E Feafeaʼi Tanatou Polokalama ʼo ʼUhiga Mo Te Lau ʼo Te Tohi-Tapu Pea Koteā Tona ʼu Fua Kia Nātou
ʼI Te Kei Hegihegi ʼo Te ʼAho:
Ko te taumatuʼa, ʼe nā gāue toko lua, neʼe nā fakatuʼutuʼu ke nā ʼaʼala ʼi te uhu fuli ʼo lau fakatahi te Tohi-Tapu ia minuta pe e hogofulu ʼi muʼa ʼo hanā mavae fakavilivili ʼi tonā loto fale. Ko te ʼu manatu ʼaē neʼe nā lau ʼe ko he fakatafitoʼaga ʼaia ʼo hana fai palalau lelei mokā nā mavae ʼi tonā ʼapi.
Ko te tagata ʼāfea ʼi Niselia ʼe ina fakaʼaogaʼi te polokalama lelei ʼo te Ako Faka Minisitelio Teokalatike moʼo fakatafito ai he lau ʼo te Tohi-Tapu faka famili ʼi tona loto fale. ʼI te agamāhani ʼi te uhu, mokā ʼosi tanatou fai palalau ʼaē ki te koga tohi ʼo te ʼaho, ʼe nātou lau he ʼu vaega ʼo te Tohi-Tapu ʼi te ʼaho fuli. ʼE kole ki te ʼu tamaliki ke nātou tahi lau fakahoahoa te ʼu kapite ʼo te Tohi-Tapu ʼaē neʼe hinoʼi mai ke lau. Koia ʼe fakaafe ia nātou ke nātou fai ni ʼu fehuʼi ʼo ʼuhiga mo te ʼu vaega ʼaē neʼe nātou lau.
Ko te fafine ʼi Saponia ʼe ina lau te Tohi-Tapu katoa ʼi te taʼu fuli talu mai te taʼu 1985. Ko tana polokalama neʼe ina fakatuʼutuʼu ke ina lau ia minuta e 20 peʼe 30, ʼo ina kamata ʼi te hola nima ʼi te ʼaho fuli pe. ʼO ʼuhiga mo te ʼu fua lelei, ʼe ina ʼui fēnei: “Ko taku tui neʼe mālohi. ʼE tokoni kia ʼau ke ʼaua naʼa ʼau manatuʼi toku mahaki pea ke ʼau tuku katoa toku ʼatamai ki te ʼamanaki ʼo te Palatiso.”
Ko te tuagaʼane neʼe pionie ia taʼu e 30 kae ko tona ʼohoana neʼe mole ko te Fakamoʼoni, ʼe ʼala ʼi te uhu fuli ʼi te hola nima ʼo lau te Tohi-Tapu. Ko tana polokalama ʼe ina fakamaʼua kia ia ke ina lau te ʼu pasina e fā ʼi te ʼu Tohi Faka Hepeleo ʼo te Tohi-Tapu, ko te kapite e tahi ʼi te ʼu Tohi Faka Keleka Faka Kilisitiano, pea mo te vaega ʼi te tohi Tāʼaga Lea. Neʼe ina lau te Tohi-Tapu katoa ʼi te taʼu fuli talu mai te taʼu 1959. ʼE ina ʼui fēnei: “Ko te fua ʼo taku lautohi, ʼe ʼau logoʼi te ʼofa ʼo Sehova . . . ʼE ʼau maʼu te fakaloto mālohi, te loto fīmālie, pea mo te fakatonutonu.” ʼE ina toe ʼui fēnei: “Ko te lau ʼo te Tohi-Tapu ʼe hage pe ʼe haga ia Sehova ʼo fakaʼāsili fakamālohiʼi aipe ia ʼau ʼi te ʼaho fuli pe.”
Ko te tuagaʼane neʼe ina ako te moʼoni ʼi te fenua neʼe tapuʼi ai te gāue ʼa te kau Fakamoʼoni ʼa Sehova, ko tona ʼohoana neʼe toe fakafeagai mo ia ki tana lotu. Neʼe feala pe ke ina fai tana lau ʼo te Tohi-Tapu mai te Mōnite ki te Feliaono, ʼi te uhu ʼi te hola 6 ki te hola 7. Ko te lautohi ʼaia neʼe ina fakaloto mālohiʼi tona loto. ʼO ʼuhiga mo te malave kia te ia ʼo tana lautohi, ʼe ina ʼui fēnei: “ ʼE tou ako te ʼofa kia Sehova pea mo Sesu pea mo tou maʼuli fiafia, tatau aipe peʼe tou felāveʼi mo ni ʼu fihifihia pea mo ni ʼu faigataʼaʼia ʼe tau mo tatou, heʼe tou ʼiloʼi ko te ʼu fakapapau ʼa Sehova ʼe hoko moʼoni.”
Ko te tuagaʼane neʼe kau ki te Ako ʼo te Selevisi Pionie neʼe ina fakatotonu ke ina fakaʼaogaʼi te tokoni ʼaē neʼe foaki ʼo ʼuhiga mo te lau ʼaē ʼo te Tohi-Tapu ʼi te ʼaho fuli. ʼUluaki, neʼe feala ke ina fai te faʼahi ʼaia ʼi te uhu ʼi te hola 5 ki te hola 6. ʼI te temi leva ʼaē neʼe fetogi ai tana gāue ʼo mole kei feala ke ina fai ʼi te ʼu hola ʼaia, neʼe ina tuku tana lautohi ki te afiafi ʼi te hola 9 ki te hola 10. ʼI te temi ʼaē neʼe malaga ai te tahi ʼu faigataʼaʼia, ʼe ina ʼui fēnei, “Neʼe ʼau toe fetogi taku polokalama ʼo mulimuli pe ki te ʼu ʼaluʼaga.”
ʼI He Tahi Lakaga ʼo Te ʼAho:
Ko te tautuagaʼane totonu ʼe kau ʼi te famili ʼo te Petele ʼi Pelesile neʼe ko tanā agamāhani te lau fakatahi ʼo te Tohi-Tapu ia minuta e 20 ʼi te ʼaho fuli mokā nā ʼosi kakai ʼi te fetapā. Neʼe nā lau tuʼa 25 te Tohi-Tapu katoa; kae ʼe nā tohi fēnei: “ ʼE kei ma maʼu aipe te ʼu meʼa foʼou, koia ko te lau ʼo te Tohi-Tapu ʼe mole liliu pe la ia ʼi he temi ʼo fakapiko.”
ʼI Saponia, ko te tuagaʼane ʼe heʼeki ʼohoana, neʼe mahino kia ia logope la neʼe ina ako te moʼoni talu mai tana kei veliveli, kae neʼe mole heʼeki ina ʼiloʼi lelei te Tohi-Tapu; ʼi te temi ʼaē neʼe pionie ai, neʼe fakatuʼutuʼu ke ina lau tuʼumaʼu te Tohi-Tapu. ʼI te temi nei, ʼe ina lau te ʼu koga tohi ʼo te Ako Faka Minisitelio Faka Teokalatike mokā ʼalu ʼi te vāhaʼa fuli ki tona faitoʼo ʼi te lopitali. Ki muli age ʼi tona ʼapi, ʼe ina fai te ʼu kumi. Mokā fakaōvi ki te fakaʼosi ʼo te vāhaʼa, ʼe lahi age tana lau te Tohi-Tapu, ʼo ina fili te ʼu tohi ʼo mulimuli pe ki te ʼu taʼu ʼaē neʼe tohi ai.
Ko te tūpulaga e taʼu 13 neʼe kua ina lau tuʼa tolu te Tohi-Tapu katoa, ʼi te temi nei ʼe ina lau te kapite e tahi ʼi te ʼaho fuli mokā haʼu mai tana ako. ʼE ina ʼui, ko te lautohi ʼaia neʼe tokoni kia ia “ke ina logoʼi ʼaupito te ʼofa ʼo Sehova.”
Ko te Fakamoʼoni neʼe lahi tona ʼu maʼumaʼua ʼi tona ʼuhiga tagata gāue, tagata ʼāfea, ʼi tona ʼuhiga tagata ʼohoana, pea mo tona ʼuhiga tāmai, ʼe ina fakalogo te ʼu foʼi fime ʼo te Tohi-Tapu mokā ʼalu ki tana gāue ʼi te saliote afi. Koia ʼi tana aʼu ki tona ʼapi ʼe ina toe lau te ʼu kapite ʼaia ʼaē neʼe ina fakalogo ʼi te saliote afi.
ʼO mole gata ʼaki pe tana lau te Tohi-Tapu, ko te pionie ʼi Falani ʼe ina fakalogo te ʼu foʼi fime ʼo te Tohi-Tapu mokā gaohi meʼa kai, mokā taki motokā, mokā ʼe felāveʼi mo ni ʼu faigataʼaʼia, peʼe ina fakalogo te ʼu foʼi fime ʼuhi pe ko tana leleiʼia.
Ko te tēhina pionie e taʼu 21 ʼi Saponia, ʼe ina manatuʼi ko tana faʼe neʼe ina fakamālohiʼi ia ia ke ina fai he meʼa fakalaumālie ʼi te ʼaho fuli pe, pea neʼe ina lau te Tohi-Tapu ʼi te ʼaho fuli pe, logope la ʼe mole fai tuʼumaʼu ʼi te temi pe ʼaia, koteʼuhi neʼe ko tona taʼu tolu pe. Mokā ʼosi tana lau te koga tohi ʼaē neʼe ina fili ki te ʼaho ke ina lau, ʼe ina toe lau te ʼu vaega maʼuhiga, pea ʼe ina toʼo te ʼu kiʼi minuta ke ina toe fakakaukauʼi te ʼu meʼa ʼaia neʼe ina lau.
Ko te tahi Fakamoʼoni pionie, neʼe kua ina lau tuʼa hogofulu te Tohi-Tapu katoa ʼi te ʼu taʼu ʼaenī e 12 kua hili. Ko tona ʼohoana ʼe mole lotu tahi mo ia, koia ʼe ina fakatuʼutuʼu tana lautohi ki te hoʼatā.
ʼI Te Afiafi:
ʼI te ʼu taʼu ʼaenī e valu kua hili, ko te tagata ʼāfea pea ʼe pionie katoa ʼi Saponia ʼe ina lau tana Tohi-Tapu ʼi te po fuli ʼi muʼa ʼo tana moe. ʼE ina ʼui fēnei: “ ʼE ʼau leleiʼia tāfito te ʼu vaega ʼaē ʼe talanoa ai peʼe feafeaʼi te manatu ʼa Sehova, peʼe koteā ʼaē ʼe ina logoʼi ʼo ʼuhiga mo te ʼu meʼa ʼaē ʼe hoko, pea e feafeaʼi tana fakatokatoka te ʼu ʼaluʼaga. ʼAki taku metitasioʼi te ʼu vaega ʼaia, neʼe tokoni ai te faʼahi ʼaia ke ʼau maʼu te manatu ʼa Sehova, pea ke ʼau tokoni ki toku ʼu tēhina pea mo tuagaʼane faka Kilisitiano pea mo nātou ʼo toku famili.”
Talu mai te taʼu 1979, ko te tagata ʼāfea ʼi Falani neʼe ina lau te Tohi-Tapu ʼi te hola katoa ʼi te afiafi fuli. ʼE ina tau fakaʼaogaʼi te ʼu Tohi-Tapu kehekehe e nima peʼe ono moʼo fakatatau. ʼE ina ʼui ko tana tokaga ki tana lautohi neʼe tokoni kia ia ke ina maʼu te fakasiosio lelei “peʼe feafeaʼi te fakaʼaogaʼi ʼo te mālama ʼo te Tohi-Tapu ʼi te ʼu ʼaluʼaga ʼi te ʼaho fuli pe.” Ko te meʼa ʼaia neʼe ina toe faka fealagia kia ia ke ʼāsili poto lelei age mokā ʼe ina foaki he ʼu tokoni mai te Tohi-Tapu.
ʼI te ʼu taʼu e 28 kua hili, ko te tēhina ʼi Niselia neʼe ko hana agamāhani te lau ʼi te afiafi te vaega ʼo te Tohi-Tapu ki te fai palalau ʼo te ʼapogipogi, ʼe tuʼu ʼi te kiʼi tohi Tou Vakaʼi Te Tohi-Tapu ʼi Te ʼAho Fuli. Tahi ʼaē meʼa, ʼe ina lau fuli te kapite ʼo te vaega faka Tohi-Tapu ʼaē neʼe ina lau. ʼI tana ʼosi ʼohoana, neʼe hoholo pe tana agamāhani ʼaia, ʼo ina lau pea mo felogoi ki te ʼu meʼa ʼaia mo tona ʼohoana.
Ko te kiʼi finemui ko tana ʼu mātuʼa neʼe mole ko he ʼu Fakamoʼoni, neʼe ko hana agamāhani te lau ia minuta e nima peʼe hogofulu ʼi te po fuli ia muʼa ʼo tana moe. Neʼe ko he ʼu minuta maʼuhiga ʼaia kia ia, pea ʼe faikole ia ia muʼa ʼo tana lautohi pea mo te fakaʼosi ʼo tana lautohi. Neʼe ina fakatuʼutuʼu ke ina ʼiloʼi te logo ʼaē neʼe foaki e Sehova ki te ʼu tagata takitahi ʼaē neʼe nātou tohi te Tohi-Tapu.
Ko te tēhina kua ʼohoana, ʼe gāue ʼi te Petele, ʼe ina ʼui neʼe kua ina lau te Tohi-Tapu ʼi te taʼu fuli ʼi te ʼu taʼu e valu ʼaē kua hili. ʼI te afiafi ʼi muʼa ʼo tana ʼalu ʼo moe, ʼe ina lau te Tohi-Tapu ia minuta e 20 peʼe 30. Māʼiape la mokā ʼe gaʼegaʼe, kia ia kapau ʼe ʼalu ʼo moe ka mole heʼeki ina lau te Tohi-Tapu, ʼe mole lava moe. Neʼe tonu ke toe tuʼu ake pea ke ina fakafimālieʼi te fia kai fakalaumālie ʼaia.