“Ko He Tauhi Tapu ʼAki Te Fakaʼaoga ʼo Tokotou ʼAtamai”

“Koutou momoli ʼokotou sino ko he sakilifisio maʼuli, mo maʼoniʼoni, pea mo lelei ki te ʼAtua, ko he tauhi tapu ʼaki te fakaʼaogaʼi ʼo tokotou ʼatamai.”—Loma 12:1.

1, 2. E feafeaʼi te akoʼi ʼa te ʼu pelesepeto faka Tohi-Tapu ohage ko te ʼiloʼi lelei ʼo he lea?

NEʼE mole heʼeki koutou faiga koa la ke koutou ako he tahi lea? Kapau koia, ʼe mahino papau ʼe koutou manatu tahi anai ʼi te ʼui ʼaē ʼe mole ko he gāue faigafua. Koia, ʼe faigataʼa age ia ʼi he ako ʼo he ʼu kupu foʼou. Kapau ʼe kita fia liliu ʼo poto ʼi te fakaʼaogaʼi ʼo he faʼahiga lea, pea ʼe toe maʼua foki ke kita poto ʼi te faʼufaʼu ʼo te ʼu palalau ʼo te lea ʼaia. ʼE tonu ke koutou mahino ki te fakaʼaluʼalu ʼo te ʼu kupu pea mo tonatou fakatahiʼi ke liliu ko he ʼu manatu kua katoa tona faʼufaʼu.

² ʼE toe tatau pe foki mo tatatou maʼu te ʼatamai mālama ʼo te Folafola ʼa te ʼAtua. ʼE mole gata ʼaki pe hakita ako he ʼu vaega kua filifili. ʼE toe maʼua foki, ʼi hona ʼaluʼaga fakatātā, ke tou ako te faʼahiga faʼu ʼa te ʼu palalau ʼa te Tohi-Tapu. ʼE ʼaoga ke tou mahino ki te pikipikiga ʼo te ʼu vaega ʼo te Tohi-Tapu pea mo tanatou faʼahiga fakaʼaogaʼi ohage ko he ʼu pelesepeto ʼe feala ke tou maʼuliʼi ʼi totatou maʼuli ʼi te ʼaho fuli. Koia, ʼe feala hatatou liliu ko he ʼu hahaʼi ʼe “faiva katoa ia meʼa fuli moʼo fai ʼo he gāue ʼe lelei.”—2 Timoteo 3:17.

3. ʼO ʼuhiga mo te tauhi ki te ʼAtua, koteā te fetogi ʼaē neʼe hoko ʼi te taʼu 33 ʼo totatou temi?

³ ʼI te fakatuʼutuʼu ʼo te Lao Faka Moisese, neʼe feala ke fakahā he faʼahi lahi ʼo te agatonu ʼi te lagolago lelei ʼo he ʼu lekula kua ʼosi fakamahino. Kae, ʼi te taʼu 33 ʼo totatou temi, neʼe molehi e Sehova te Lao, ʼo ina “tutuki ki te pou fakamamahi” ʼaē neʼe puluhia ai tona ʼAlo. (Kolose 2:13, 14) Ki muli age, neʼe mole foaki ki te hahaʼi ʼo te ʼAtua he ʼu lisi ʼo ʼuhiga mo te ʼu sakilifisio ʼaē neʼe tonu ke momoli pea mo he ʼu lekula ke muliʼi. Kae neʼe ʼui age kia nātou: “Koutou momoli ʼokotou sino ko he sakilifisio maʼuli, mo maʼoniʼoni, pea mo lelei ki te ʼAtua, ia he tauhi tapu ʼaki te fakaʼaogaʼi ʼo tokotou ʼatamai.” (Loma 12:1) Ei, neʼe tonu ke faiga mālohi te kau Kilisitiano ke nātou fai tanatou tauhi ki te ʼAtua ʼaki tonatou loto katoa, mo tonatou nefesi katoa, mo tonatou laumālie katoa, pea mo tonatou mālohi katoa. (Maleko 12:30; vakaʼi ia Pesalemo 110:3.) Kae koteā te faka ʼuhiga ʼo te foaki “he tauhi tapu ʼaki te fakaʼaogaʼi ʼo tokotou ʼatamai”?

4, 5. Koteā te faka ʼuhiga ʼo te tauhi ʼaē kia Sehova ʼaki te fakaʼaoga ʼo totatou ʼatamai?

⁴ ʼE fakaliliu te kupuʼi palalau “te fakaʼaogaʼi ʼo te ʼatamai” ʼi te faka Keleka ko lo·gi·kosʹ, ko tona faka ʼuhiga “ ʼe fakafuafua lelei” peʼe “poto.” ʼE tonu ki te kau kaugana ʼo te ʼAtua ke nātou maʼu he leʼo ʼo loto neʼe akoʼi e te Tohi-Tapu. Ko te kau Kilisitiano ʼe mole nātou fakatafito tanatou ʼu tonu ki he ʼu tuʼuga lekula kua fakatuʼutuʼu fakatomuʼa, kae ʼe nātou fakafuafua lelei ʼaki te ʼu pelesepeto faka Tohi-Tapu. ʼE ʼaoga ke nātou mahino ki te “faʼufaʼu ʼo te ʼu palalau” ʼo te Tohi-Tapu, pe koteā te pikipikiga ʼo tana ʼu pelesepeto. Koia ʼe feala ke nātou fai he ʼu tonu ʼe fakafuafua lelei ʼaki te fakaʼaogaʼi ʼo tonatou ʼatamai.

⁵ ʼE faka ʼuhiga koa ʼe mole mulimuli te kau Kilisitiano ki he ʼu lao? Kailoa. ʼE tapuʼi fakahagatonu e te ʼu Tohi Faka Keleka Faka Kilisitiano te tauhi tamapua, te ʼu felāveʼi fakasino heʼeʼaoga, te fai fakapō, te loi, te faifakalauʼakau, te fakaʼaogaʼi kovi ʼo te toto, pea mo te ʼu tahi ʼu faʼahiga agahala. (Gāue 15:28, 29; 1 Kolonito 6:9, 10; Fakahā 21:8) Pea tahi ʼaē meʼa, ʼo maʼuhiga age ʼi te ʼu maʼua ʼaē neʼe tonu ke fai e te ʼu Iselaelite, ʼe tonu ke tou fakaʼaogaʼi totatou ʼatamai moʼo ako pea mo maʼuliʼi te ʼu pelesepeto ʼo te Tohi-Tapu. Ohage ko tatatou faiga ʼaē ke tou mahino ki he lea foʼou, ʼe tonu ke tou fakaʼaogaʼi he temi loaloaga pea mo he ʼu faiga ki te faʼahi ʼaia. ʼE lava feafeaʼi hatatou gāueʼi te fakaʼaoga ʼo totatou ʼatamai?

Koutou Gāueʼi Te Fakaʼaogaʼi ʼo Tokotou ʼAtamai

6. Koteā ʼaē ʼe pipiki ki te ako ʼo te Tohi-Tapu?

⁶ ʼUluaki ʼe tonu ke tou liliu ko he kau ako ʼe nātou fia mahino ki te Tohi-Tapu. Ko te Folafola ʼaē ʼe haʼu mai te ʼAtua ʼe “ ʼaoga moʼo akoʼi, moʼo fakatonutonuʼi, moʼo fakatokatoka te ʼu meʼa, moʼo akonakiʼi ʼi te faitotonu.” (2 Timoteo 3:16) Ka tou felāveʼi mo he fihifihia, ʼe mole tou ʼamanaki ke tou maʼu tuʼumaʼu he tali kua ʼosi tohi ʼi he vaega ʼo te Tohi-Tapu. Kae, ʼe feala ke tou fakakaukauʼi he ʼu vaega ʼo te Tohi-Tapu ke feala hatatou maʼu he mālama ki he faʼahiga ʼaluʼaga pe ko he fihifihia. ʼE ʼaoga anai ke tou fai he ʼu kumi ʼe loloto ʼi te ʼu manatu ʼa te ʼAtua ʼo ʼuhiga mo te faʼahi ʼaia. (Tāʼaga Lea 2:3-5) ʼE toe ʼaoga foki ke tou liliu ʼo poto, he “ko te tagata ʼaē ʼe poto, ko ia ʼaē ʼe ina maʼu te fealagia ʼo te takitaki.” (Tāʼaga Lea 1:5) Ko te tagata poto ʼe feala hana fakakeheʼi te ʼu meʼa ʼaē ʼe mole pipiki ki tana fihifihia pea mo mālama pe koteā te pikipikiga ʼo te ʼu meʼa ʼaia. Ohage ko he puzzle (ko te gaoʼi ʼe tonu ke fakatahiʼi te ʼu koga ʼo he paki ʼe vetevete), ko ia ʼaē ʼe poto ʼe ina fakatahiʼi tuʼumaʼu te ʼu koga ʼo te puzzle ʼaia ke feala hana sio ki te paki katoa.

7. ʼE lava feafeaʼi ki te ʼu mātuʼa ke nātou fakaʼaogaʼi te ʼu pelesepeto ʼo te Tohi-Tapu ʼo ʼuhiga mo te fakatonutonuʼi?

⁷ Ohage la, tou toʼo te faʼifaʼitaki ʼo ʼuhiga mo te ʼu mātuʼa. ʼE ʼui e Tāʼaga Lea 13:24 ko te tāmai ʼaē ʼe ʼofa ki tona foha “ ʼe ina kumi ia ia ʼaki te akonaki.” Kapau ʼe tou fakasiosio lelei te vaega ʼaenī, ʼe feala ke fakaʼaogaʼi hala moʼo faka lākatonuʼi he tūʼa fefeka neʼe fai ʼaki te loto ʼita. Pea tahi ʼaē, ʼe fakatokagaʼi fēnei e Kolose 3:21 ʼaki he tokoni fakapotopoto: “ ʼU tāmai, ʼaua naʼa koutou fakatupu ʼita ki takotou fānau, naʼa feala ke nātou lotovaivai ai.” Ko te ʼu mātuʼa ʼaē ʼe nātou fakaʼaogaʼi tonatou ʼatamai pea mo muliʼi te ʼu pelesepeto ʼaia, ʼe mole nātou fakahoko anai he faʼahiga akonaki ʼe feala ke liliu ʼo “fefeka fau.” ʼE nātou agaʼofa anai ki tonatou ʼu fānau, mo lotomahino, pea mo fakaʼapaʼapa kia nātou. (Efesi 6:4) Koia, ʼaki te ʼu pelesepeto faka Tohi-Tapu ʼo ʼuhiga mo te akoʼi ʼo te ʼu fānau pe ko he ʼu tahi ʼu fihifihia, ʼe feala ke tou fakatuputupu te fakaʼaogaʼi ʼo totatou ʼatamai moʼo fakafuafua te ʼu faʼahi fuli ʼaē ʼe pipiki kiai. ʼAki te faʼahiga fai ʼaia, ʼe feala ke tou mahino ki te faʼahiga fakaʼaogaʼi ʼo te ʼu pelesepeto ʼo te Tohi-Tapu, mo te fakatuʼutuʼu ʼa te ʼAtua pea mo te faʼahiga fakahoko ʼo te fakatuʼutuʼu ʼaia.

8. ʼE lava feafeaʼi hatatou līaki he manatu fefeka ʼo ʼuhiga mo te temi fakafiafia?

⁸ Ko te lua faʼahi ʼaē ʼe feala ke tou gāueʼi te fakaʼaoga ʼo totatou ʼatamai, ko te tekeʼi he manatu ʼe fefeka. Kapau ʼe fefeka fau takita faʼahiga manatu, pea ʼe feala ke ina tāʼofi te tuputupu ʼo te fakaʼaogaʼi ʼo totatou ʼatamai. Ohage la ko te ʼu temi fakafiafia. ʼE ʼui fēnei e te Tohi-Tapu: “Ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) ʼE faka ʼuhiga koa ko te ʼu tohi fuli, te ʼu ʼata fuli, pe ko he polokalama ʼi te televisio ʼaē ʼe haʼu mai te mālama ʼe heʼemaʼa pea ʼe haʼu mai ia Satana? Ko te taʼi faʼahiga manatu ʼaia ʼe mole fakapotopoto ia. ʼE mahino papau ia, ʼe feala ke filifili e ʼihi ke mole nātou sioʼi te televisio, te ʼu ʼata, pe ke mole nātou lau he ʼu tohi mai te mālama. ʼE ʼa nātou pe te vakaʼi te faʼahi ʼaia, pea ʼe mole tonu ke fatufatuʼi nātou ʼi te faʼahi ʼaia. Kae ʼe mole tonu ke nātou fakamālohiʼi ʼihi ke mulimuli ki tanatou ʼu fakatuʼutuʼu. Neʼe tā e te Sosiete te ʼu alatike ʼe talanoa ʼo ʼuhiga mo te ʼu pelesepeto ʼo te Tohi-Tapu, ʼaē ʼe feala ke tou fakaʼaogaʼi moʼo filifili fakapotopoto totatou ʼu temi fakafiafia. ʼE mole ko he aga fakapotopoto mo kapau ʼe mole tou fakaʼaogaʼi te ʼu fakatuʼutuʼu ʼaia pea mo kapau ʼe tou kau ki te ʼu faʼahiga fakafiafia ʼaē kua maʼu ʼi te mālama, ohage la ko te ʼu manatu heʼeʼaoga, te ʼu agamālohi, pea mo te faifakalauʼakau. ʼE moʼoni, ko te filifili ʼo he temi fakafiafia ʼe maʼua ke fakaʼaogaʼi totatou ʼatamai moʼo maʼuliʼi te ʼu pelesepeto ʼo te Tohi-Tapu ke feala ke tou maʼu he leʼo ʼo loto ʼe maʼa ia muʼa ʼo te ʼAtua pea mo te tagata.—1 Kolonito 10:31-33.

9. Koteā te faka ʼuhiga ʼo te “sio mamaʼo”?

⁹ ʼE lahi te ʼu fakafiafia ʼi te temi nei ʼe mole ʼaoga ki te kau Kilisitiano.a Koia la ʼaē, ʼe tonu ke tou akoʼi totatou ʼu loto ke “fehiʼa ki te meʼa ʼaē ʼe kovi” ke mole tou liliu ohage ko nātou ʼaē ʼo te ʼuluaki sēkulō ʼaē neʼe “puli ia nātou te mahino ki te aga ʼaē ʼe tonu ke fai.” (Pesalemo 97:10; Efesi 4:17-19) Moʼo fakakaukauʼi te ʼu faʼahi ʼaia, ʼe ʼaoga kia tatou “he ʼatamai mālama totonu pea mo he sio mamaʼo ʼe totonu.” (Filipe 1:9) ʼE fakaliliu e te kupu faka Keleka te “sio mamaʼo” ko “he sio ki te ʼu meʼa ʼaē ʼe tonu ke fai.” ʼE faka ʼuhiga te kupu ʼaia ki te ʼu meʼa ʼaē ʼe tou logoʼi ʼi te kakano, ohage ko te sio. Kapau ʼe maʼua ke tou fai he tonu ʼo ʼuhiga mo he temi fakafiafia pe ko he tahi age faʼahi, ʼe tonu ke tou fakaʼaogaʼi tatatou mahino ki te aga ʼaē ʼe tonu ke fai, ke feala hatatou mulimuli ki te ʼu meʼa ʼaē kua tou ʼiloʼi pea mo te ʼu meʼa ʼaē ʼe mole heʼeki tou ʼiloʼi papau. Pea tahi ʼaē, ʼo ʼuhiga mo te maʼuliʼi ʼo te ʼu pelesepeto ʼo te Tohi-Tapu, ʼe mole tonu ke tou fefeka fau pea mo tou fakakinauʼi totatou ʼu tēhina ke nātou fai ohage ko tatou.—Filipe 4:5.

10. ʼE lava feafeaʼi ke tou mahino ki te ʼulugaaga ʼo Sehova ohage ko tona fakahā ia Pesalemo 15?

¹⁰ Ko te tolu faʼahi ʼaē ʼo te gāueʼi ʼo te fakaʼaoga ʼo totatou ʼatamai, ko te mahino ki te ʼu manatu ʼa Sehova pea ke tupu ʼi totatou ʼu loto. ʼI tana Folafola, ʼe fakahā e Sehova tana ʼulugaaga pea mo tona ʼu fakatuʼutuʼu. Ohage la, ʼe tou lau ia Pesalemo 15 te faʼahiga tagata ʼaē ʼe fakaafe e Sehova ki tona fale fehikitaki. Ko te taʼi tagata ʼaia ʼe ina maʼuliʼi te faitotonu, ʼe palalau ki te moʼoni ʼi tona loto, ʼe agatonu ia ʼi tana ʼu fakapapau, pea ʼe mole manatu pe kia ia totonu. ʼI takotou lolotoga lau te pesalemo ʼaia, koutou fai te ʼu fehuʼi ʼaenī: ‘ ʼE ʼau maʼu koa te ʼu kalitate ʼaenī? ʼE feala koa ke fakaafe ʼau e Sehova ki tona fale fehikitaki?’ ʼE fakaloto mālohiʼi totatou ʼatamai mo kapau ʼe tou mulimuli ki te ʼu ala pea mo te ʼu manatu ʼa Sehova.—Tāʼaga Lea 3:5, 6; Hepeleo 5:14.

11. ʼO ʼuhiga mo te kau Faliseo, neʼe feafeaʼi tanatou “lotonoa ki te faitotonu pea mo te ʼofa ki te ʼAtua”?

¹¹ Ko te faʼahi tafito ʼaia ʼaē neʼe hala ʼaupito ai te kau Faliseo. Neʼe ʼiloʼi e te kau Faliseo te fakatuʼutuʼu ʼa te Lao kae neʼe mole nātou mahino peʼe feafeaʼi te fakaʼaogaʼi ʼo te Lao ʼaia. Logope tanatou ʼiloʼi ʼaē te ʼu ʼatu koga kehekehe ʼo te Lao, kae neʼe galo kia nātou te mahino ki te ʼulugaaga ʼo Sehova, ia ia ʼaē neʼe ina tohi te Lao. Neʼe ʼui fēnei e Sesu kia nātou: “[ʼE] koutou foaki te vahe e tahi ʼi te hogofulu ʼo te menite, pea mo te lue, pea mo te tahi ʼu kiʼi ʼakau fuli ʼo te ʼōloto, kaʼe ʼe koutou lotonoa ki te faitotonu pea mo te ʼofa ki te ʼAtua!” (Luka 11:42) ʼI te fefeka ʼo tanatou manatu pea mo tonatou loto, neʼe galoʼi e te kau Faliseo ke nātou fakaʼaogaʼi tonatou ʼatamai. Ko te hala ʼo tanatou fakakaukau neʼe hā ʼi te temi ʼaē neʼe nātou fatufatuʼi ai te ʼu tisipulo ʼa Sesu ʼi tanatou fusi te ʼu kauʼi fulumeto ʼo nātou kai ʼi te Sapato; pea tahi ʼaē meʼa, ki muli age ʼo te ʼaho pe ʼaia, neʼe mole mamahi tonatou loto ʼi te temi ʼaē neʼe nātou talaga ai ke matehi Sesu!—Mateo 12:1, 2, 14.

12. ʼE lava feafeaʼi ke tou felogoi lelei mo Sehova ohage ko he Tagata?

¹² ʼE mole tou loto ke tou tatau mo te kau Faliseo. Ko tatatou ʼatamai mālama ʼo ʼuhiga mo te Folafola ʼo te ʼAtua, ʼe tonu ke tokoni kia tatou ke lahi age tatatou felogoi mo Sehova ohage ko hatatou felogoi mo he Tagata. ʼE lava feafeaʼi ke tou fai te faʼahi ʼaia. ʼI tanatou ʼosi lau te ʼu vaega ʼo te Tohi-Tapu pe ko he tohi faka Tohi-Tapu, ko ʼihi neʼe nātou maʼu te ʼu tokoni ʼi tanatou metitasio ki te ʼu fehuʼi ʼaenī, ‘Koteā ʼaē ʼe akoʼi mai e te koga ʼaē neʼe ʼau lau ʼo ʼuhiga mo Sehova pea mo tona ʼu kalitate? ʼE lava feafeaʼi haku fakahā te ʼu kalitate ʼa Sehova ʼi taku ʼu felogoi mo ʼihi?’ Ko te metitasioʼi ʼo te ʼu fehuʼi ʼaia ʼe ina fakatuputupu te fakaʼaoga ʼo totatou ʼatamai pea ʼe feala ke tou liliu ko “he kau faʼifaʼitaki ʼo te ʼAtua.”—Efesi 5:1.

Ko Te Kau Kaugana ʼa Te ʼAtua Pea Mo Kilisito, Kae Mole ʼa Te Tagata

13. He koʼe ʼe ʼui ko te kau Faliseo neʼe nātou hage ko he ʼu pule ʼe aga fakahau?

¹³ ʼE tonu ke faka fealagia e te kau tagata ʼāfea ki te hahaʼi ʼaē ʼe nātou tokakaga ki ai, ke nātou fakaʼaogaʼi tonatou ʼatamai. Ko te hahaʼi ʼo te kokelekasio ʼe mole ko he kau kaugana ʼa he tagata. Neʼe tohi fēnei e Paulo: “Ka na pau la neʼe kei leleiʼia ʼau e te ʼu tagata ka na ʼaua la ʼe mole heʼeki ʼau liliu ko he kaugana ʼa Kilisito.” (Kalate 1:10; Kolose 3:23, 24) Kae, neʼe loto e te kau Faliseo ke tui te hahaʼi ʼe maʼuhiga age ke felogoi lelei mo te tagata ʼi te felogoi lelei ʼaē mo te ʼAtua. (Mateo 23:2-7; Soane 12:42, 43) Neʼe filifili e te kau Faliseo ke nātou liliu ko he ʼu takitaki aga fefeka, ʼo nātou faʼufaʼu tanatou ʼu lekula ʼo nātou totonu pea mo fakamāuʼi ʼihi ʼo mulimuli ki tonatou ʼu poto fakatagata. Ko nātou ʼaē neʼe mulimuli ʼi te kau Faliseo neʼe mole kei nātou fia fakaʼaogaʼi tonatou leʼo ʼo loto ʼaē neʼe akoʼi e te Tohi-Tapu, ʼo nātou liliu ai ko te kau kaugana ʼa te tagata.

14, 15. (a) ʼE lava feafeaʼi ke fakahā e te ʼu tagata ʼāfea ʼe nātou gāue tahi mo te ʼu ōvi? (b) ʼE lava feafeaʼi ke fakatokatoka e te ʼu tagata ʼāfea te ʼu faʼahi ʼaē ʼo ʼuhiga mo te leʼo ʼo loto?

¹⁴ Ia ʼaho nei, ʼe ʼiloʼi e te kau tagata ʼāfea Kilisitiano ʼe mole ko nātou tāfito ʼaē ʼe tonu ke fai ki ai e te ʼu ōvi tonatou maʼua. ʼE tonu ke tahi ʼamo tana kavega. (Loma 14:4; 2 Kolonito 1:24; Kalate 6:5) ʼE ʼa tatou takitokotahi te fai ʼo te faʼahi ʼaia. ʼE moʼoni, kapau neʼe liliu te ʼu ōvi ko he kau kaugana ʼa te ʼu tagata, ʼo nātou fakalogo ʼuhi heʼe sioʼi nātou, koteā ʼaē ka nātou fai mokā pupuli te ʼu tagata ʼaia? Neʼe feala ke fiafia ia Paulo ʼo ʼuhiga mo te kau Filipe: “Ohage pe ko takotou fakalogo tuʼumaʼu, ʼo mole gata ʼaki pe ʼi taku kei ʼi henā, kae tāfito age la ʼi te temi nei, ʼi taku lolotoga puli, koutou haga gāue ki tokotou maʼuli ʼaki te manavasiʼi pea mo tekelili.” Neʼe ko he ʼu kaugana moʼoni ʼa Kilisito, kae neʼe mole ko he ʼu kaugana ʼa Paulo.—Filipe 2:12.

¹⁵ Koia, ʼi te ʼu faʼahi ʼo te leʼo ʼo loto, ʼe mole fai e te ʼu tagata ʼāfea he ʼu tonu maʼa nātou ʼaē e nātou tokoni ki ai. ʼE nātou fakamahino age te ʼu pelesepeto ʼo te Tohi-Tapu ʼo ʼuhiga mo te faʼahi ʼaia pea ʼe tuku kia ia ʼaē neʼe tokoniʼi ke ina fakaʼaogaʼi tona ʼatamai. ʼE ko he maʼua mamafa, kae ʼe ko he maʼua ʼa kita totonu.

16. Koteā te fakatuʼutuʼu neʼe maʼu ʼi Iselaele moʼo fakatokatoka te ʼu fihifihia?

¹⁶ Koutou fakatokagaʼi te temi ʼaē neʼe fakaʼaogaʼi e Sehova te ʼu tagata fai fakamāu ke nātou takitaki ia Iselaele. ʼE ʼui fēnei mai e te Tohi-Tapu: “ ʼI te ʼu ʼaho ʼaia, neʼe mole ʼi ai he hau ʼi Iselaele. Neʼe kua māhani te hahaʼi ʼi te fai ʼo te meʼa ʼaē neʼe matatonu kia nātou.” (Kau Fakamāu 21:25) Neʼe tokaga Sehova ke maʼu e tana hahaʼi he takitaki. Neʼe maʼu ʼi te ʼu kolo te ʼu tagata matutuʼa kua nātou māhani ʼi te fai tokoni ʼo ʼuhiga mo te ʼu fehuʼi kehekehe pea mo te ʼu fihifihia kehekehe. Pea tahi ʼaē, neʼe toe tokoni te kau pelepitelo ʼo te telepi ʼo Levi ki te akoʼi ʼo te hahaʼi ki te ʼu lao ʼa te ʼAtua ohage ko he mālohi ki te fai ʼo te meʼa ʼaē ʼe lelei. Ka hoko he ʼu fihifihia maʼuhiga, neʼe faka felogoi te pelepitelo mo te ʼAtua, ʼo ina fakaʼaogaʼi te Ulime pea mo te Tumime. ʼE ʼui fēnei e te tohi Insight on the Scriptures: “Ko ia ʼaē neʼe ina fakaʼaogaʼi te ʼu fakatuʼutuʼu ʼaia, mo ina maʼu te ʼatamai mālama ʼo te Lao ʼo te ʼAtua pea mo ina maʼuliʼi, neʼe ina maʼu he takitaki fakapotopoto maʼa tona leʼo ʼo loto. Koia, ʼi te lakaga ʼaia, kapau neʼe ina fai ‘te meʼa ʼaē ʼe matatonu kia ia’ ʼi te ʼu faʼahi ʼaia neʼe mole iku ia ki he meʼa ʼe kovi. Neʼe fakagafua e Sehova ki te hahaʼi ke nātou fakahā pe neʼe nātou lotolelei ke nātou fai te faʼahi ʼaia peʼe kailoa.”—Lua tohi, ʼi te pasina 162 ki te pasina 163, fakapilitānia.b

17. E feafeaʼi te fakahā e te ʼu tagata ʼāfea tanatou tokoni ʼo mulimuli ki te ʼu lekula ʼa te ʼAtua, ka mole ko te ʼu lekula ʼa nātou?

¹⁷ Ohage ko te ʼu tagata fai fakamāu pea mo te ʼu pelepitelo Iselaelite, ʼe foaki e te ʼu tagata ʼāfea ʼi te kokelekasio he tokoni ki te ʼu fihifihia pea mo nātou foaki he ʼu tokoni ʼe maʼuhiga. ʼI ʼihi temi, ʼe nātou “akonakiʼi, fakatonutonuʼi, fakaloto mālohiʼi ʼi te loto faʼa kātaki, pea ʼaki te faiva ʼi te fai akonaki.” (2 Timoteo 4:2) ʼE nātou fai ʼo mulimuli ki te ʼu lekula ʼa te ʼAtua, ka mole ko te ʼu lekula ʼa nātou. ʼE ʼaoga ʼaupito te ʼu tokoni ʼaia mo kapau ʼe foaki e te kau tagata ʼāfea he faʼifaʼitaki pea mo nātou faiga ke lave ʼi te ʼu loto!

18. He koe ʼe fua lelei mokā lave te ʼu tokoni ʼa te ʼu tagata ʼāfea ki te loto?

¹⁸ Ko te loto ʼe ko te “masini” ʼo totatou ʼu gāue faka Kilisitiano. Koia la ʼaē ʼe ʼui e te Tohi-Tapu: “Ko ia ko te matapuna ʼo te maʼuli.” (Tāʼaga Lea 4:23) ʼE mahino anai ki te ʼu tagata ʼāfea ʼaē ʼe nātou fakaloto mālohi, ko te hahaʼi ʼo te kokelekasio neʼe uga nātou e tonatou loto ke nātou fai te ʼu meʼa fuli ʼaē ʼe feala ke nātou fai ʼi te tauhi ki te ʼAtua. ʼE nātou uga anai ia nātou totonu ke nātou fai te faʼahi ʼaia, ka mole nātou fakatalitali ke uga nātou e niʼihi. ʼE mole loto e Sehova ke fakakinauʼi he tahi ke fakalogo. ʼE ina kumi te fakalogo ʼaē ʼe haʼu mai te loto ʼaē ʼe fonu ʼi te ʼofa. ʼE feala ki te ʼu tagata ʼāfea ke nātou fakaloto mālohi te taʼi gāue ʼaia ʼe fai ʼaki te loto, ʼo nātou tokoni ki te faga ōvi ke nātou fakatuputupu te fakaʼaoga ʼo tonatou ʼatamai.

Koutou Taupau “Te Manatu ʼa Kilisito”

19, 20. He koe ʼe maʼuhiga kia tatou ke tou taupau te manatu ʼa Kilisito?

¹⁹ Ohage ko te meʼa ʼaē neʼe tou ʼui, ʼe mole gata ʼaki pe te ʼiloʼi ʼo te ʼu lao ʼa te ʼAtua. Neʼe kole mamahi fēnei e te tagata fai pesalemo: “Fakamahino mai kia te ʼau, koteʼuhi ke ʼau tokagaʼi tau lao pea mo ʼau taupau ʼaki toku loto katoa.” (Pesalemo 119:34) Neʼe fakahā e Sehova “te manatu ʼa Kilisito” ʼi tana Folafola. (1 Kolonito 2:16) Neʼe tuku mai kia tatou e Sesu te faʼifaʼitaki haohaoa he neʼe tauhi kia Sehova ʼo ina fakaʼaogaʼi tona ʼatamai. Neʼe mahino ki te ʼu lao pea mo te ʼu pelesepeto ʼa te ʼAtua, pea neʼe katoa tana maʼuliʼi. Kapau ʼe tou akoʼi tana faʼifaʼitaki, ʼe feala anai ke tou ‘mahino ki te laulahi, te loa, te māʼoluga, pea mo te loloto, pea ke tou ʼiloʼi te ʼofa ʼo Kilisito ʼaē ʼe māʼoluga ʼi te ʼatamai mālama.’ (Efesi 3:17-19) Ei, ko te meʼa ʼaē ʼe tou akoʼi ʼi te Tohi-Tapu ʼo ʼuhiga mo Sesu, ʼe maʼuhiga age ʼi te ʼiloʼi ʼo he ʼu tuʼuga meʼa; ʼe ina fakahā lelei mai pe koteā te ʼuhiga totonu ʼa Sehova.—Soane 14:9, 10.

²⁰ Koia, ʼi tatatou ako te Folafola ʼa te ʼAtua, ʼe feala ke tou sio ki te ʼu manatu ʼa Sehova ʼi te ʼu faʼahi fuli pea mo fai he ʼu tonu ʼe lelei. ʼE tonu ke lahi tatatou ʼu faiga ʼi te faʼahi ʼaia. ʼE tonu ke tou liliu ʼo ako fakamalotoloto te Folafola ʼa te ʼAtua, pea ke malave kia tatou te ʼulugaaga ʼa Sehova pea mo tana ʼu lekula. ʼE hage ko he lea foʼou ʼe tou akoako peʼe feafeaʼi te faʼufaʼu ʼo tana ʼu palalau. Pea tahi ʼaē meʼa, ko nātou ʼaē ʼe nātou fai te faʼahi ʼaia ʼe nātou mulimuli anai ki te tokoni ʼa Paulo “[ke nātou] momoli [tonatou ʼu] sino ko he sakilifisio maʼuli, mo maʼoniʼoni, pea mo lelei ki te ʼAtua, ko he tauhi tapu ʼaki te fakaʼaogaʼi ʼo [tonatou] ʼatamai.”—Loma 12:1.

[Nota ʼi te lalo pasina]

Koteā ʼAē Neʼe Koutou Ako?

◻ Koteā te fetogi ʼaē neʼe hoko ʼi te taʼu 33 ʼo totatou temi ʼo ʼuhiga mo te tauhi ki te ʼAtua?

◻ ʼE lava feafeaʼi ke tou gāueʼi te fakaʼaogaʼi ʼo totatou ʼatamai?

◻ ʼE lava tokoni feafeaʼi te kau tagata ʼāfea ke liliu te ʼu ōvi ko he kau kaugana ʼa te ʼAtua pea mo Kilisito?

◻ He koʼe ʼe tonu ke tou taupau “te manatu ʼa Kilisito”?

[Paki ʼo te pasina 23]

ʼE tokoni te ʼu tagata ʼāfea ki niʼihi ke nātou fakaʼaoga tonatou ʼatamai