Ko Te Tagata ʼAē ʼe Maheka

ʼI TE lea faka Hepeleo, ʼe ko te haʼuʼaga pe e tahi ʼo ʼuhiga mo te kupu “maheka.” Mokā talanoa ki te ʼu tagata agahala, ʼe feala ke fakaliliu ʼi te faka Hepeleo ʼaki te kupu “fesiosioʼaki.” (Senesi 26:14; Tagata Tānaki 4:4) Kae, ʼe lahi age te ʼu kupu ʼi te lea faka Keleka ʼo ʼuhiga mo te kupu “maheka ʼaē ʼe kovi.” Ko te kupu zeʹlos, ʼaē ʼe tatau mo te kupu faka Hepeleo, ʼe feala ke faka ʼuhiga ki te maheka ʼaē ʼe lelei pea mo ʼaē ʼe kovi. Ko te tahi kupu faka Keleka, phthoʹnos, ʼe faka ʼuhiga ʼāteaina pe ia ki te maheka ʼaē ʼe kovi.

Neʼe fakaʼaogaʼi feafeaʼi koa te kupu phthoʹnos ʼi te faka Keleka ʼāfea? ʼE fakamatala fēnei e te tikisionalio The Anchor Bible Dictionary: “ ʼO mole tatau mo te tagata ʼaē ʼe mānumānu, ko te tagata ʼaē ʼe tau mo te phthonos ʼe mole loto ia ke lelei age tana ʼu meʼa, ʼo meo ʼo ʼuhiga mo te ʼu meʼa ʼaē ʼe maʼu e ʼihi; ʼe mole loto ia ke maʼu e ʼihi te ʼu meʼa lelei ʼaia. ʼE makehe ia ʼi tana fakatuʼutuʼu mo te tagata ʼaē ʼe fakataupiepie, ʼe mole tatau ia mo te tagata fakataupiepie ʼaia, ʼe mole loto ia ke mālo kae ʼe ina tāʼofi ʼihi ke mole nātou mālo.”

ʼE teitei galoʼi e te tagata ʼaē ʼe maheka ko te tupuʼaga tāfito ʼo tona fihifihia ko tana agaaga ʼo ia totonu. ʼE fakamahino e te tikisionalio pe ʼaia: “Ko te manatu makehe ʼo te kupu phthonos, ʼe ko te mole ʼi ai ia te mahino ki tona ʼuhiga totonu. Ko te tagata ʼaē ʼe phthoneros, kapau ʼe tonu ke ina fakamahino tana aga, ʼe ina ʼui kia ia totonu pea kia ʼihi, ko nātou ʼaē ʼe ina fatufatuʼi ʼe tau pea mo nātou te faʼahi ʼaia pea ʼuhi ko te heʼe faitotonu ʼo te meʼa ʼaē neʼe hoko neʼe uga ai ia ia ke ina fatufatuʼi. Kapau ʼe fehuʼi age peʼe lava feafeaʼi hana palalau feiā ʼo ʼuhiga mo he kaumeʼa, ʼe ina ʼui anai ʼe ina fatufatuʼi maʼa te lelei ʼo tona kaumeʼa.”

Neʼe fakaʼaogaʼi e te ʼu tagata faitohi Evaselio ʼaē ko Mateo pea mo Maleko te kupu faka Keleka phthoʹnos, moʼo fakamatala te meʼa ʼaē ʼe ina uga ia nātou ʼaē neʼe nātou matehi ia Sesu. (Mateo 27:18; Maleko 15:10) Ei, neʼe taki nātou e te maheka. Ko te manatu fakatupu kovi pe ʼaia ʼaē neʼe ina fakaliliu te kau ʼaposita ʼo nātou fehiʼa lahi ki tonatou ʼu tēhina ʼāfea. (1 Timoteo 6:3-5) ʼE mole tou punamaʼuli ki te mole fakagafua ki te ʼu tagata ʼaē ʼe maheka ke nātou hū ki te Puleʼaga ʼo te ʼAtua! Neʼe fakatotonu e Sehova ko nātou fuli ʼaē ʼe nātou haga “fonu [aipe] ʼi te maheka . . . ʼe tonu ke matehi.”—Loma 1:29, 32; Kalate 5:21.

[Paki ʼo te pasina 7]

ʼAua naʼa koutou tuku te maheka ke ina maumauʼi tokotou maʼuli