Te ʼu Fehuʼi ʼa Te Kau Lautohi

Koteā te faka ʼuhiga ʼo te palalau ʼa Sake ʼi tana ʼui ʼaē: “ ʼOku ʼu tēhina, ʼaua naʼa koutou hahaʼi fau ʼi te faiakonaki, heʼe tou ʼiloʼi ʼe tou maʼu anai he fakamāu lahi ake”?—Sake 3:1.

ʼE mahino ia neʼe mole fakaloto vaivai e Sake te kau Kilisitiano ʼo ʼuhiga mo tanatou ako te moʼoni ki niʼihi. Ia Mateo 28:19, 20, neʼe fakatotonu e Sesu ki tana kau tisipulo ke nātou “fai ni ʼu tisipulo ʼi te hahaʼi ʼo te ʼu fenua fuli pe, . . . ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.” Koia, ko te kau Kilisitiano fuli ʼe tonu ke nātou liliu ko he kau faiakonaki. Neʼe tokoniʼi e te ʼapositolo ko Paulo te kau Kilisitiano ʼo Hepeleo koteʼuhi neʼe mole heʼeki nātou faiakonaki. Neʼe ina tohi fēnei: “Logope la neʼe kua tonu ke koutou faiakonaki talu mai fualoa, ka kei ʼaoga pe ke toe akoʼi koutou e hina tahi talu mai te kamataʼaga, te ʼu akonaki ʼuluaki ʼo te ʼu folafola taputapu ʼa te ʼAtua.”—Hepeleo 5:12.

Kae, neʼe palalau ia Sake ʼo ʼuhiga mo teā? Neʼe talanoa ia kia nātou ʼaē ʼe nātou maʼu te ʼu pilivilesio makehe ko te faiakonaki ʼi te kokelekasio. ʼE tou lau fēnei ia Efesi 4:11: “Neʼe ina [ia Sesu Kilisito, te Pule ʼo te kokelekasio] foaki ʼihi ko te kau ʼapositolo, ʼihi ko te kau polofeta, ʼihi ko te kau fagonogono ʼo te evaselio, ʼihi ko te kau tauhi ōvi pea mo te kau faiako.” Neʼe nātou maʼu te ʼu pilivilesio makehe ʼi te ʼu kokelekasio ʼo te ʼuluaki sēkulō ohage pe ko te temi nei. Ohage la, ko te Kolesi Pule ʼe ina fakafofoga “te tagata kaugana agatonu mo poto” pea ʼe ina maʼu te maʼua makehe ʼaē ko te tokaga ki te fai akonaki ʼa te ʼu kokelekasio ʼi te malamanei katoa. (Mateo 24:45) Ko te ʼu taupau feʼaluʼaki pea mo te ʼu tagata ʼāfea ʼo te kokelekasio ʼe nātou toe maʼu foki mo te pilivilesio makehe ʼaē ko te faiakonaki.

Neʼe ʼui koa e Sake ki te ʼu tagata Kilisitiano fakapotopoto ʼe mole tonu ke nātou tali te maʼua ʼaē ko te faiakonaki naʼa hoko kia nātou te fakamāu lahi ake ʼa te ʼAtua? Kailoa ia. Ko te maʼua ʼo te tagata ʼāfea ʼe ko he pilivilesio lahi, ohage ko tona fakahā ia 1 Timoteo 3:1, ʼaē ʼe ʼui fēnei ai: “Kapau ʼe holi he tahi ki he gāue faka taupau, ʼe loto ia ki he gāue matalelei.” Ko he meʼa ʼe ʼaoga ke fakanofo ai he tahi ko he tagata ʼāfea ʼi te kokelekasio ʼe tonu ko he tagata ʼe “faiva ia ʼi te faiakonaki.” (1 Timoteo 3:2) ʼE mole fakafeagai ia Sake ki te ʼu palalau ʼa Paulo ʼaē ʼe haʼu mai te ʼAtua.

Kae, ʼe hage ʼi te ʼuluaki sēkulō ʼo totatou temi, neʼe lau e ʼihi ko nātou ko te kau faiakonaki, ka neʼe mole nātou maʼu te ʼu kalitate moʼo fai ʼo te faʼahi ʼaia pea neʼe mole hinoʼi nātou ki te faʼahi ʼaia. ʼE mahino ia, neʼe nātou logoʼi te faʼahi ʼaia ohage ko he tuʼulaga māʼoluga, pea neʼe nātou holi ke faka kolōliaʼi nātou. (Vakaʼi ia Maleko 12:38-40; 1 Timoteo 5:17.) Neʼe talanoa te ʼapositolo ko Soane kia Tiotelefe, ʼaē neʼe ‘manako ki te tuʼulaga māʼoluga, kae neʼe mole ina tali ʼaki te fakaʼapaʼapa he meʼa neʼe ʼui age e Soane.’ (3 Soane 9) Ia 1 Timoteo 1:7 ʼe talanoa ai ki ni hahaʼi neʼe ‘fia faiakonaki ʼo ʼuhiga mo te lao kae neʼe mole nātou mahino ki te meʼa ʼaē neʼe nātou talanoa kiai peʼe ko te ʼu meʼa ʼaē neʼe nātou faka tui kiai.’ Ko te ʼu palalau ʼa Sake 3:1 ʼe ʼaoga tāfito ki te hahaʼi tagata ʼaē ʼe holi ke nātou liliu ko ni tagata faiakonaki kae ʼe kovi te meʼa ʼaē ʼe ina uga tonatou loto. Ko te faʼahiga tagata ʼaia ʼe feala ke fakatupu kovi ki te faga ōvi, pea koia la ʼaē ʼe nātou maʼu ai te fakamāu fakamataku.—Loma 2:17-21; 14:12.

Ia Sake 3:1 ʼe ko he toe fakamanatu lelei ʼaia kia nātou ʼaē ʼe nātou maʼu te ʼu kalitate ki te faiakonaki. Mai tona ʼaluʼaga ʼaē ʼe lahi te ʼu meʼa ʼaē neʼe foaki kia nātou, ʼe toe lahi anai mo te meʼa ʼaē ka fakamaʼua kia nātou. (Luka 12:48) Neʼe ʼui fēnei e Sesu: “Ko te palalau vaʼiga fuli pe ʼe fai e te hahaʼi, ʼe fakamāuʼi anai ia nātou kiai ʼi te ʼAho ʼo te Fakamāu.” (Mateo 12:36) Ko te manatu ʼaenī ʼe moʼoni tāfito kia nātou ʼaē ʼe mālohi tanatou uga ia te hahaʼi, te kau tagata ʼāfea.

Ko te kau tagata ʼāfea ʼe nātou huʼi maʼua anai ʼo ʼuhiga mo tanatou faʼahiga taupau te faga ōvi ʼa Sehova. (Hepeleo 13:17) Ko te ʼu meʼa ʼaē ʼe nātou palalau kiai ʼe malave ki totatou maʼuli. Koia, ʼe tonu ke tokaga te tagata ʼāfea ke ʼaua naʼa ina fakamuʼamuʼa tana ʼu manatu peʼe ke ina gaohi koviʼi te ʼu ōvi ohage ko te kau Faliseo. ʼE tonu ke ina fakahā te ʼofa loloto ʼaē neʼe fakahā e Sesu ki te hahaʼi. ʼI te ʼu temi fuli ʼaē ʼe faiakonaki ai, pea tāfito la mokā ko he akonaki ʼo ʼuhiga mo he aga neʼe kovi, ʼe tonu anai ke tokaga te tagata ʼāfea ki tana ʼu palalau, ʼo mole ina fakaʼaogaʼi he ʼu akonaki ʼe lave kovi peʼe talanoa pe ia ki tana ʼu manatu. ʼAki tatatou falala katoa kia Sehova, ki tana Folafola, pea mo tana ʼu takitaki ʼaē ʼe tuku mai e tana kautahi, ʼe maʼu anai e te tagata tauhi ōvi te ʼu tapuakina lahi mai te ʼAtua, ka mole ko te “fakamāu lahi ake.”