Tou Katoa ʼi Totatou ʼUhiga Kau Faiako ʼo Te Folafola ʼa Te ʼAtua
“Ko [te ʼAtua] ʼaē neʼe ina faka fealagia ke fakanofo [mātou] ko te ʼu minisi.”—2 Kolonito 3:5, 6, MN.
1, 2. Koteā te ʼu fakatuʼutuʼu neʼe tautau fai ki te fai faka mafola, kae he koʼe ʼi te agamāhani ʼe mole ʼi ai hona fua?
ʼE FEAFEAʼI anai mo kapau ʼe foaki atu he gāue ʼe mole koutou poto ʼi tona fai? Koutou fakakaukauʼi muʼa: ʼe koutou maʼu te ʼu meʼa kehekehe ʼaē ʼe ʼaoga moʼo fai ʼo takotou gāue, pea ʼe koutou maʼu ia te ʼu meʼa gāue. Kae ʼe mole koutou ʼiloʼi pe la peʼe feafeaʼi te fai ʼo te gāue ʼaia. Tahi ʼaē meʼa faigataʼa, ʼe tonu ke koutou fai fakavilivili te gāue ʼaia, heʼe falala te hahaʼi kia koutou ʼo ʼuhiga mo te gāue ʼaia. ʼE koutou loto mamahi anai heʼe mole koutou poto ʼi te gāue ʼaia!
2 Ko te faʼahi ʼaia ʼe hoko moʼoni. Tou vakaʼi te faʼifaʼitaki. ʼI ʼihi temi, neʼe fai te ʼu fakatuʼutuʼu ʼa te ʼu ʼēkelesia ʼo te Keletiate ke nātou ʼolo ʼo faka mafola ʼi te ʼu ʼapi. ʼI te agamāhani neʼe mole ʼi ai he fua ʼo tanatou ʼu faiga ʼaia, he neʼe fai pe ʼi he ʼu vāhaʼa peʼe ʼi he ʼu māhina pea nātou tuku. Koteā tona tupuʼaga? Neʼe mole akoʼi e te Keletiate kia nātou ʼaia peʼe feafeaʼi te fai ʼo te gāue. Māʼiape la mo te kau takitaki lotu neʼe mole akoʼi nātou ki te gāue fai faka mafola, logola te ʼu taʼu ʼaē neʼe akoʼi ai nātou ʼi te ʼu seminalio. He koʼe ʼe moʼoni tatatou ʼu palalau ʼaia?
3. Ia 2 Kolonito 3:5, 6, koteā te kupu ʼaē ʼe fakaʼaogaʼi tuʼa tolu, pea koteā tona faka ʼuhiga?
3 ʼE fakahā mai e te Folafola ʼa te ʼAtua peʼe fakanofo feafeaʼi he kaugā fai faka mafola moʼoni ʼo te logo lelei. ʼAki te tokoni fakaʼatua neʼe tohi fēnei e te ʼapositolo ko Paulo: “ ʼE mole ko māua totonu ʼaē neʼe ma fakanofo ia māua ke ʼui ke ma fiameʼameʼa, kae neʼe fakanofo māua e te ʼAtua, ko ia ʼaē neʼe ina faka fealagia moʼoni ke fakanofo māua ko te ʼu minisi.” (2 Kolonito 3:5, 6, MN ) Koutou fakatokagaʼi ʼe fakaʼaogaʼi tuʼa tolu te kupu—“fakanofo.” Koteā tona faka ʼuhiga? ʼE ʼui fēnei e Vine ʼi te Expository Dictionary of Biblical Words: “Mokā ʼe tou talanoa ki he ʼu meʼa pea ʼe faka ʼuhiga [te kupu faka Keleka] ki te kupu ‘feʼauga’ . . . ; mokā tou talanoa ki he tahi, ko tona faka ʼuhiga ‘ ʼe ina maʼu te fealagia,’ ‘ ʼe tau mo ia.’ ” Koia, ko he tahi neʼe “fakanofo” ʼe ko he tahi ʼe ina maʼu te fealagia pea ʼe tāu mo ia ke ina fai te gāue ʼaē neʼe foaki age. Ei, ko te kau minisi moʼoni ʼo te logo lelei ʼe nātou maʼu te ʼu fealagia moʼo fai te gāue ʼaia. ʼE tāu mo feʼauga ke nātou fai faka mafola.
4. (a) ʼE hā feafeaʼi mai ʼi te faʼifaʼitaki ʼa Paulo ko te fakanofo ʼo he Kilisitiano ki te minisitelio ʼe mole faka tuʼakoi pe ki he kiʼi kūtuga kua filifili? (b) Koteā te ʼu meʼa e tolu ʼaē ʼe fakaʼaogaʼi e Sehova moʼo fakanofo he ʼu minisi?
4 Kae ko ai ʼaē ʼe ina fai te fakanofo ʼaia? ʼE fakanofo koa ʼuhi ko he ʼu fealagia, peʼe ko he ʼatamai, peʼe ʼuhi he neʼe tou ako ʼi he ʼu faleako lalahi? Ko te ʼapositolo ko Paulo neʼe ina maʼu te ʼu ʼaluʼaga fuli ʼaia. (Gaue 22:3; Filipe 3:4, 5) Kae ʼaki he agavaivai neʼe mahino kia ia ko tona fakanofo minisi, neʼe mole ina maʼu mai he ʼu faleako lalahi kae mai ia Sehova ʼAtua. ʼE faka tuʼakoi koa te ʼu fakanofo ʼaia ki he kiʼi kūtuga kua filifili? Neʼe ʼui e Paulo ki te kokelekasio ʼo Kolonito “ko [totatou] fakanofo.” ʼE mahino ia ko Sehova ʼe tokaga ke liliu tana ʼu kaugana agatonu fuli ʼo faʼafai, pea mo nātou lava fai te gāue ʼaē neʼe hinoʼi age kia nātou. ʼE fakanofo feafeaʼi e Sehova te kau Kilisitiano moʼoni ia ʼaho nei? Tou vakaʼi ia meʼa e tolu ʼe ina fakaʼaogaʼi: (1) ko tana Folafola, (2) mo tona laumālie maʼoniʼoni, pea (3) mo tana kautahi fakakelekele.
Ko Te Folafola ʼa Sehova ʼe Ina Foaki Mai Te ʼu Fealagia
5, 6. Neʼe malave feafeaʼi te Tohi-Tapu ki te kau Kilisitiano moʼoni?
5 ʼUluaki, ʼe tokoni feafeaʼi mai te Folafola ʼa te ʼAtua ke tou liliu ko he minisi? Neʼe tohi fēnei e Paulo: “Ko te Tohi-Tapu katoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke katoa lelei te tagata ʼa te ʼAtua, pea mo teuteu lelei ki te ʼu gāue lelei fuli pe.” (2 Timoteo 3:16, 17, MN ) Koia ko te Tohi-Tapu ʼe tokoni mai ke tou “katoa lelei . . ., pea mo teuteu lelei” ki te fai ʼo he ʼu “gāue lelei” moʼo akoʼi te hahaʼi ʼo ʼuhiga mo te Folafola ʼa te ʼAtua. Kae e feafeaʼi ki te hahaʼi fuli ʼaē ʼe kau ki te ʼu ʼēkelesia ʼo te Keletiate? ʼE nātou maʼu te Tohi-Tapu. Kae he koʼe ʼe lava tokoni te tohi ʼaia ki niʼihi ke liliu ko te kau minisi kae mole tokoni ia ki ihi? Koteʼuhi ʼe fakalogo te faʼahi ʼaia ki te maʼuliʼi ʼo te Tohi-Tapu.
6 Meʼa fakaʼofaʼofa foki heʼe ko te tokolahi ʼaē neʼe kau ki te ʼu ʼēkelesia, neʼe mole nātou tali te logo ʼo te Tohi-Tapu “i tona uhiga mooni, ko [te] folafola a te Atua.” (1 Tesalonika 2:13) Neʼe lahi te ʼu meʼa fakaufiufi neʼe hoko ki te Keletiate. Ko te ʼu taʼu ʼaē neʼe ako ai te kau takitaki lotu ʼi te ʼu faleako faka teolosia, neʼe teuteuʼi ai koa nātou ke nātou liliu ko he kau ako ʼo te Folafola ʼa te ʼAtua? Kailoa. Ko ʼihi ʼi tanatou kamata ako ʼi te ʼu fale seminalio neʼe nātou tui ki te Tohi-Tapu kae ʼi tanatou ʼosi maʼu pepa neʼe nātou liliu ʼo lotolotolua! Kae ki muli age neʼe mole kei nātou faka mafola te Folafola ʼa te ʼAtua, heʼe ko te tokolahi ia nātou ʼaia ʼaē ʼe mole kei nātou tui kiai, kua nātou faka maʼuhigaʼi pe ʼi tanatou minisitelio te ʼu fihi faka politike, mo he evaselio faka sosiale, peʼe nātou faka maʼuhigaʼi te ʼu filosofia faka tagata ʼi tanatou ʼu faiakonaki. (2 Timoteo 4:3) Kae ko te kau Kilisitiano moʼoni ʼe nātou muliʼi te faʼifaʼitaki ʼa Sesu Kilisito.
7, 8. He koʼe ʼe kehekehe te agaaga ʼa Sesu pea mo te kau takitaki lotu ʼo tona temi ʼo ʼuhiga mo te Folafola ʼa te ʼAtua?
7 Neʼe mole fakagafua e Sesu ki te kau takitaki lotu ʼo tona temi ke nātou fetogi tana ʼu fakakaukau. Ko te ʼu akonaki ʼaē neʼe fai e Sesu ki he kiʼi kūtuga ohage la ko tana kau ʼapositolo, peʼe ki he tokolahi, neʼe lahi tana fakaʼaogaʼi te ʼu tohi taputapu. (Mateo 13: 10-17; 15:1-11) Ko he faʼahi neʼe kehe ai mo te kau takitaki lotu ʼo tona temi, he neʼe mole nātou fakaloto mālohiʼi te hahaʼi ke nātou kumi loloto te ʼu meʼa ʼo ʼuhiga mo te ʼAtua. ʼI tona fakahagatonu neʼe ko he agamāhani ki he tagata faiako ʼo te temi ʼaia ke ina ʼui ko ʼihi vaega faka Tohi-Tapu ʼe mole lava hanatou fai palalau kiai heʼe loloto fau, kae neʼe palalau pe ia mo tana tisipulo fakapelepele—kae māʼiape la mo te ʼaluʼaga ʼaia, neʼe tonu ke nā fai palalau leʼo veliveli pea mo nā ʼuʼufi tonā ʼu ulu. Neʼe matataku te kau takitaki lotu ʼaia ʼi te palalau ki ʼihi koga ʼo te Tohi-Tapu ohage la ko te puʼaki ʼo te huafa ʼo te ʼAtua!
8 Neʼe mole feiā ia Kilisito. Neʼe mahino kia ia neʼe ko te hahaʼi fuli ʼaē neʼe tonu ke nātou vakaʼi “te folafola fuli pe ʼe haʼu mai te gutu ʼo Sehova,” kae mole ko he kiʼi kūtuga makehe. Neʼe mole tokaga pe Sesu ʼo foaki te kalavi ʼo te ʼatamai mālama ki he ʼu hahaʼi ako ʼe nātou maʼu he poto makehe. Neʼe ina ʼui fēnei ki tana kau tisipulo: “Ko te meʼa ʼaē ʼe ʼau tala atu kia koutou ʼi te fakapōʼuli, koutou tala ʼi te mālama; pea ko te meʼa ʼaē ʼe koutou logo kiai ʼe muhumuhuʼi, koutou kalagaʼi ʼi te ʼu ʼato fakaheketālaʼa.” (Mateo 4:4, MN; 10:27, MN ) Neʼe holi mālohi ia Sesu ke ina fakahā te ʼatamai mālama ʼo te ʼAtua ki te hahaʼi tokolahi mokā ʼe fealagia.
9. ʼE fakaʼaogaʼi feafeaʼi e te kau Kilisitiano moʼoni ia te Tohi-Tapu?
9 ʼE tonu ke fakatafito tuʼumaʼu tatatou faiako ki te Folafola ʼa te ʼAtua. Ohage la, mokā tou fai he akonaki ʼi te Fale ʼo te Puleʼaga, ʼe mole tonu pe ke tou lau te ʼu vaega faka Tohi-Tapu ʼaē kua ʼosi filifili. ʼE tonu foki ke tou fakamahino, mo fai he ʼu fakatā, pea mo vakaʼi tona maʼuliʼi. ʼE tou fakatuʼutuʼu ʼi hona ʼaluʼaga fakatātā ke tou toʼo mai ki tuʼa te logo ʼa te Tohi-Tapu pea ke tou fakahū ki te loto ʼo nātou ʼaē ʼe fagono. (Nehemia 8:8, 12) ʼE toe tonu foki ke tou fakaʼaogaʼi te Tohi-Tapu mokā ʼe maʼua ke foaki he tokoni peʼe ko te fakatonutonuʼi ʼo he tahi. Logola ko te hahaʼi ʼa Sehova ʼe nātou lea kehekehe pea ʼe nātou fenua kehekehe, kae ʼe nātou fakaʼapaʼapa fuli ki te Tohi-Tapu, te tohi ʼaē ʼe maʼuhiga ʼaupito ʼi te ʼu tohi fuli.
10. ʼE lava malave feafeaʼi kia tatou te logo fakaʼatua ʼo te Tohi-Tapu?
10 Ka tou fakaʼapaʼapa feiā ki te Tohi-Tapu, pea ʼe malave kia tatou te mālohi ʼo te logo ʼaē ʼe tohi ai. (Hepeleo 4:12) ʼE ina uga te hahaʼi ke fetogi tonatou maʼuli, ke nātou līaki te ʼu aga heʼeʼaoga ʼaē ʼe mole ʼalutahi mo te Tohi-Tapu ohage ko te folonikasio, mo te tono, mo te tauhi tamapua, mo te ʼinu kava fakavale, pea mo te kaihaʼa. Neʼe tokoni ki te tokolahi ke nātou līaki te ʼulugaaga ʼāfea kae ke nātou kofuʼi te ʼulugaaga foʼou. (Efeso 4:20-24) Ei, kapau ʼe lahi age tatatou fakaʼapaʼapa ki te Tohi-Tapu ʼi te ʼu manatu fakatagata peʼe ko te talatisio, pea mo tou fakaʼaogaʼi lelei, pea ko te Tohi-Tapu ʼe ina lava fakaliliu tatou ke tou faʼafai, pea mo tou teuteu lelei ke tou liliu ko he kau faiako ʼo te Folafola ʼa te ʼAtua.
Ko Te Laumālie ʼo Sehova ʼe Ina Fakakatoa Tatou
11. He koʼe ʼe feala ke ʼui ko te laumālie maʼoniʼoni ʼo Sehova ʼe “ko he tokoni”?
11 Lua, tou talanoa ki te ʼaoga ʼo te laumālie maʼoniʼoni ʼo Sehova, peʼe ko tona mālohi gāue, ʼi tana gāue ia tatou ke tou katoa ki te gāue. ʼE mole tonu ke galo kia tatou ʼe mole he tahi age mālohi ʼe laka age ʼi te laumālie ʼo Sehova. Neʼe foaki e Sehova te mālohi ki tona ʼAlo ʼofaina ke ina fakaʼaogaʼi lelei te mālohi fakaofoofo ʼaia ki te kau Kilisitiano moʼoni fuli. Koia la ʼaē, neʼe ʼui ai e Sesu ko te laumālie maʼoniʼoni ʼe ko he “tokoni.” (Soane 16:7, MN ) Neʼe ina fakaloto mālohiʼi tana kau tisipulo ke nātou kole kia Sehova te laumālie ʼaia, pea mo ina fakapapau age ko Sehova ʼe ina foaki lahi anai kia nātou te mālohi ʼaia.—Luka 11:10-13; Sakopo 1:17.
12, 13. (a) He koʼe ʼe maʼuhiga ke tou kole te laumālie maʼoniʼoni ke tokoni mai kia tatou ʼi totatou minisitelio? (b) Neʼe hā feafeaʼi ʼi te aga ʼa te kau Faliseo ko te laumālie maʼoniʼoni neʼe mole gāue ia nātou?
12 ʼE tonu ke tou kole te laumālie maʼoniʼoni ʼi te ʼaho fuli, tāfito la ke tokoni mai kia tatou ʼi tatatou minisitelio. ʼE malave feafeaʼi kia tatou ia te mālohi gāue ʼaia? ʼE ina lava uga totatou ʼatamai pea mo totatou loto ke fetogi, pea mo tou tuputupu ʼi te faʼahi fakalaumālie, pea mo fetogi totatou ʼulugaaga ʼāfea ʼaki te ʼulugaaga foʼou. (Kolose 3:9, 10) ʼE lava tokoni mai kia tatou ke tou fakatuputupu he ʼu kalitate ohage ko Kilisito. Tokolahi ia tatou ʼe tou lava lau fakaʼatamai ia Kalate 5:22, 23. Ko te ʼu vaega ʼaia ʼe talanoa ki te ʼu fua ʼo te laumālie ʼo te ʼAtua. Ko te ʼuluaki kalitate ʼe ko te ʼofa. ʼE maʼuhiga te kalitate ʼaia ki totatou minisitelio. Koteā tona tupuʼaga?
13 Ko te kalitate ʼaē ʼe ina uga tāfito tatou, ʼe ko te ʼofa. Ko te ʼofa kia Sehova pea mo totatou ʼu tatau ʼe ina uga te kau Kilisitiano moʼoni ke nātou tala te logo lelei. (Maleko 12:28-31) Kapau ʼe mole ʼi ai te ʼofa ʼaia, pea ʼe mole tou lava liliu ko he kau ako neʼe fakanofo moʼoni e te Folafola ʼa te ʼAtua. Koutou fakatokagaʼi te kehekehe ʼo Sesu pea mo te kau Faliseo. ʼO ʼuhiga mo Sesu, ʼe ʼui fēnei ia Mateo 9:36, MN: “ ʼI tana mamata ki te hahaʼi, neʼe ʼofa mamahi ia kia nātou, he neʼe nātou ʼāhua pea mo mavetevete, ohage he faga ōvi ʼe mole honatou tagata tauhi.” Neʼe feafeaʼi te aga ʼa te kau Faliseo ki te hahaʼi? Neʼe nātou ʼui fēnei: “Ko te hahai aeni e mole natou iloi te lao, ko te hahai malaia.” (Soane 7:49) Neʼe mole ʼoʼofa te kau Faliseo ʼaia ki te hahaʼi kae neʼe nātou manukinukiʼi ia nātou. ʼE mahino mai, neʼe mole gāue te laumālie ʼo Sehova ia nātou.
14. Ko te faʼifaʼitaki ʼofa ʼa Sesu ʼi tana minisitelio, ʼe tonu ke ina uga feafeaʼi ia tatou?
14 Neʼe manavaʼofa ia Sesu ki te hahaʼi. Neʼe mahino ki tonatou lotomamahi. Neʼe ina ʼiloʼi neʼe gaohi koviʼi nātou, pea neʼe nātou ʼāhua pea mo mavetevete ohage ko he faga ōvi ʼe mole honatou tagata tauhi. ʼE ʼui fēnei mai ia Soane 2:25: “[Neʼe] iloi [e Sesu] te mea i te loto o te tagata.” ʼUhi he neʼe ko ia ko te Tufuga Faiva ʼa Sehova ʼi te lolotoga fakatupu ʼo te ʼu meʼa fuli, koia neʼe mahino lelei ia Sesu ki te natula ʼo te tagata. (Tāʼaga Lea 8:30, 31) Ko te mahino lelei ʼaia neʼe ina fakalahi tona ʼofa. ʼOfa pe ke liliu tuʼumaʼu te ʼofa ʼaia ko he mālohi moʼo uga ia tatatou gāue fai faka mafola! Kapau ʼe tou logoʼi ʼe mata faigataʼa hatatou hikihiki ʼi te faʼahi ʼaia, tou kole kia Sehova tona laumālie maʼoniʼoni pea tou gāue ʼo mulimuli ki te ʼu meʼa ʼaē neʼe tou kole. ʼE tali mai anai e Sehova tatatou ʼu kole. ʼE ina tuku mai anai te mālohi fakaofoofo ʼaia moʼo tokoni kia tatou ke tou hage ko Kilisito, ʼaē neʼe fakanofo e te māʼoluga moʼo tala te logo lelei.
15. He koʼe neʼe tāu mo Sesu te ʼu palalau ʼo Isaia 61:1-3 ʼi te temi ʼaē neʼe ina valoki ai te kau Faliseo?
15 Ko ai ʼaē neʼe ina fakanofo ia Sesu? Neʼe ina ʼui fēnei: “Ko te laumālie ʼo Sehova ʼe ia te ʼau.” (Luka 4:17-21, MN ) Ei, ko Sehova totonu ʼaē neʼe ina fakanofo ia Sesu ʼaki tona laumālie maʼoniʼoni. Neʼe mole ʼaoga kia Sesu he tahi age ʼu meʼa ki tona fakanofo ʼaia. Neʼe ko te laumālie maʼoniʼoni koa ʼaē neʼe ina fakanofo te kau takitaki lotu ʼo tona temi? Kailoa. Pea neʼe mole akoako nātou ke nātou fakahoko ia te ʼu palalau ʼaē ia Isaia 61:1-3, ʼaē neʼe lau leʼolahi e Sesu pea mo faka ʼuhigaʼi kia te ia totonu. Koutou lau te ʼu vaega pea ʼe koutou mahino anai neʼe mole lava fai te gāue ʼaia e te kau sekelipa pea mo te kau Faliseo. Neʼe mole ʼi ai he logo lelei ke nātou tala ki te hahaʼi māsisiva. Pea neʼe feafeaʼi hanatou lava faka mafola he ʼāteaina ki te kau pilisoni pea mo faka fealagia ki te kau kivi ke nātou toe sisio? ʼI hona ʼaluʼaga fakalaumālie, neʼe toe kivi mo nātou pea mo nātou maʼuli popūla ki te ʼu talatisio faka tagata! ʼO mole hage ko te ʼu tagata ʼaia, ʼe feala koa ke tou akoʼi te hahaʼi?
16. Koteā te falala ʼe lava maʼu e te hahaʼi ʼa Sehova ia ʼaho nei ʼi tonatou fakanofo minisi?
16 ʼE moʼoni, neʼe mole tou ako ʼi te ʼu faleako lalahi ʼa te Keletiate. Neʼe mole tou liliu ko he kau ako ʼuhi he neʼe filifili tatou e he ʼu seminalio faka teolosia. Kae ʼe ʼi ai koa he ʼu meʼa ʼe mole tou maʼu ke mole filifili ai tatou? Kailoa! Ko Sehova ʼaē neʼe ina fakanofo tatou ko te kau Fakamoʼoni. (Isaia 43:10-12) Kapau ʼe tou kole tona laumālie pea mo tou gāue ʼo mulimuli ki te ʼu meʼa ʼaē ʼe tou kole, pea ʼe feʼauga aipe ki totatou fakanofo. ʼIo, ʼe mole tou haohaoa pea ʼe mole tou aʼu ki te faʼifaʼitaki ʼaē neʼe tuku mai e te Faiako Lahi ko Sesu. Kae ʼe mole tou loto fakafetaʼi koa la ki te fakaʼaogaʼi e Sehova tona laumālie moʼo akoʼi pea mo teuteuʼi ʼo tatou ke tou liliu ko te kau faiako ʼo tana Folafola?
Ko Te Kautahi ʼa Sehova ʼe Ina Fakakatoa Tatou
17-19. ʼE tokoni feafeaʼi mai kia tatou te ʼu fono e nima ʼaē ʼe fai ʼi te vāhaʼa fuli e te kautahi ʼa Sehova moʼo fakakatoa tatou ke tou liliu ko ni ʼu minisi?
17 Tou talanoa leva ki te tolu puani ʼaē ʼe fakaʼaogaʼi e Sehova moʼo teuteuʼi ʼo tatou ke tou liliu ko te kau ako ʼo tana Folafola—ko tana kokelekasio ʼi te kele, peʼe ko tana kautahi ʼaē ʼe ina akoʼi ai tatou ke tou liliu ko ni ʼu minisi. ʼO feafeaʼi? Koutou fakakaukauʼi age muʼa te polokalama ako ʼaē ʼe tou maʼu! Ohage la ʼi te vāhaʼa fuli, ʼe tou kau kia fono faka Kilisitiano e nima. (Hepeleo 10:24, 25) ʼE tou fakatahitahi ko he ʼu kiʼi kūtuga ʼi te Ako Tohi ke tou fakaloloto ai te ako ʼo te Tohi-Tapu ʼaki te ʼu tohi ʼe foaki mai e te kautahi ʼa Sehova. ʼI tatatou fakalogo pea mo fai hatatou ʼu tali, ʼe tou maʼu ai te ʼu ako pea mo tou fefakaloto mālohiʼaki. ʼE tou toe maʼu ai te ako lelei kia tatou takitokotahi, pea mo te tokaga ʼa te tēhina ʼaē ʼe ina takitaki te ako tohi. ʼI te Fono Ki Te Hahaʼi pea mo te Ako ʼo Te Tule Leʼo, ʼe toe lahi age totatou fafaga ʼi te faʼahi fakalaumālie.
18 ʼE fakatuʼutuʼu e te Ako ʼo te Minisitelio Faka Teokalatike ke ina akoʼi tatou peʼe feafeaʼi hakita akoʼi te hahaʼi. Ka tou teuteuʼi te ʼu kiʼi faiakonaki, pea ʼe tou ako ai peʼe feafeaʼi te fakaʼaogaʼi ʼo te Folafola ʼa te ʼAtua moʼo akoʼi niʼihi ʼi he ʼu faʼahiga ʼaluʼaga kehekehe. (1 Petelo 3:15) Neʼe kua hinoʼi atu koa koutou ke koutou fai he kiʼi akonaki ʼe hage neʼe mata faigafua kia koutou te kupu tāfito, pea ʼi takotou teuteuʼi neʼe koutou maʼu ai te ʼu puani foʼou? ʼE ko he meʼa ʼe hoko māhani. Moʼo hikihiki ʼo totatou ʼatamai mālama ʼaia, ʼe tonu ke tou akoʼi ki te hahaʼi te ʼu meʼa ʼaia ʼe tou ako. Tatau aipe mo kapau ʼe mole ko hakita kiʼi akonaki, kae ʼe feala aipe ke tou akoako ke tou hikihiki age tatatou faʼahiga faiakonaki. ʼI te kau ako fuli, ʼe tou tokagaʼi te ʼu kalitate lelei, pea ʼe tou lava fakakaukauʼi peʼe feafeaʼi hakita faʼifaʼitakiʼi tonatou ʼu kalitate ʼaia.
19 ʼE fakatuʼutuʼu te Fono Gāue ke ina teuteuʼi tatou ke tou liliu ko te kau ako ʼo te Folafola ʼa te ʼAtua. ʼI te ʼu vāhaʼa fuli, ʼe tou logo ki te ʼu kiʼi akonaki, pea mo te ʼu fai palalau, pea mo te ʼu faʼifaʼitaki neʼe fai moʼo akoʼi ʼo tatou ki totatou minisitelio. Ko te faʼifaʼitaki fea ʼaē ka tou fakaʼaogaʼi? ʼE tou lava tali feafeaʼi ki te ʼu fihifihia ʼaē ʼe tou maʼu ʼi totatou minisitelio? Koteā te ʼu fealagia ʼe tou maʼu ke tou fakaʼaogaʼi lahi age ʼi tatatou gāue? Koteā ʼaē ka tokoni anai kia tatou ke tou faiva age mokā tou fai he ʼu ʼaʼahi pea mo he ʼu ako Tohi-Tapu? (1 Kolonito 9:19-22) Ko te ʼu fehuʼi ʼaia ʼe tou vakaʼi pea mo tou talanoa kiai ʼi te ʼu Fono Gāue. ʼE lahi te ʼu koga ʼo te fono ʼe fakatafito ki te ʼu alatike ʼi Te Minisitelio ʼo Te Puleʼaga, ko te tahi ʼaia meʼa gāue moʼo teuteuʼi tatou ki te gāue maʼuhiga ʼaē ko te fai faka mafola.
20. Koteā ʼaē ʼe tonu ke tou fai ke fua lelei kia tatou te ʼu fono pea mo te ʼu fakatahi lalahi?
20 Kapau ʼe tou teuteu pea mo kau ki tatatou ʼu fono pea mo tou maʼuliʼi te ʼu meʼa ʼaē ʼe tou ako ʼo ʼuhiga mo tatatou gāue faiako, pea ʼe tou maʼu ai te toe ako lahi ʼaupito. Kae ʼe ʼi ai te tahi ʼu fono. ʼE toe ʼi ai mo te ʼu fono ʼe tou kaugamālie ai—ko te ʼu fakatahi lalahi—ʼaē neʼe fakatuʼutuʼu moʼo teuteuʼi tatou ke tou liliu ko te kau ako ʼo te Folafola ʼa te ʼAtua. Pea ʼe tou holi ʼaupito ke tou fakalogo lelei kiai pea mo mulimuli ki te ʼu tokoni ʼaia!—Luka 8:18.
21. Koteā te fakamoʼoni ʼe hā ai ko tatatou ako ʼe fua lelei, pea ko ai ʼaē neʼe ina fakafua lelei ia tatatou gāue?
21 ʼE lelei koa te ako ʼaē neʼe foaki mai e Sehova? ʼE tou sio pe ki tona ʼu fua lelei. ʼI te taʼu fuli ko te toko lauʼi teau afe hahaʼi neʼe tokoniʼi ke nātou ako te ʼu akonaki tāfito ʼo te Tohi-Tapu pea ke nātou maʼuliʼi te ʼu meʼa ʼaē ʼe fakamaʼua age e te ʼAtua kia nātou. ʼE tou tuputupu pea ʼe mole hoko ʼuhi ko tatou totonu. ʼE tonu ke tou sio ohage ko Sesu ʼo ʼuhiga mo te ʼu meʼa ʼaē ʼe tou fai. Neʼe ina ʼui fēnei: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au.” Ohage ko te kau ʼapositolo, ko ʼihi ia tatou ʼe mole popoto ʼi te faitohi pea mo te lautohi. (Soane 6:44; Gaue 4:13) ʼE fakalogo te fua lelei ʼo tatatou gāue kia Sehova, heʼe ko ia ʼaē ʼe ina taki mai te hahaʼi ʼaē ʼe nātou fia logo ki te moʼoni. Neʼe fakahā fakalelei fēnei e Paulo: “Ko au, nee au to, nee fakapala e Apolose, kae nee fakatupu e te Atua.”—1 Kolonito 3:6.
22. He koʼe ʼe mole tonu ke tou lotovaivai moʼo kau mālohi ki te minisitelio faka Kilisitiano?
22 Ei, ʼe lagolago mālohi ia Sehova ki tatatou gāue faiako ʼo tana Folafola. ʼI ʼihi temi ʼe lagi hage kia tatou ʼe mole fakanofo tatou ko he kau faiako. Kae ke tou manatuʼi, ʼe ko Sehova ʼaē ʼe ina taki mai te hahaʼi kia ia pea mo tona ʼAlo. Ko Sehova ʼaē ʼe ina fakanofo tatou ke tou tauhi ki te hahaʼi foʼou ʼaia ʼaki tana Folafola, mo tona laumālie maʼoniʼoni, pea mo tona kautahi fakakelekele. Tou tali ki te ako ʼa Sehova ʼo tou maʼuliʼi te ʼu meʼa lelei ʼaē ʼe ina foaki mai ke tou katoa lelei, pea mo teuteu lelei ki totatou ʼuhiga kau faiako ʼo te Folafola ʼa te ʼAtua!
ʼE Koutou Tali Feafeaʼi Anai?
• ʼE teuteuʼi feafeaʼi e te Tohi-Tapu ia tatou ki te gāue fai faka mafola?
• Koteā te gāue ʼa te laumālie maʼoniʼoni ki totatou fakanofo minisi?
• Koteā te ʼu ʼaluʼaga ʼaē neʼe tokoniʼi ai koutou e te kautahi fakakelekele ʼa Sehova ke koutou liliu ko he kaugā faka mafola neʼe fakanofo moʼo tala te logo lelei?
• He koʼe ʼe tou lava falala mokā tou kau ki te minisitelio?
[Paki ʼo te pasina 25]
ʼI tona ʼuhiga faiako ʼo te Folafola ʼa te ʼAtua, neʼe ʼofa ia Sesu ki te hahaʼi