ʼE Au Poto Koa ʼi Te Fai Fakamafola?
1. He koʼē ʼe mole tonu ke tou manatu ʼe mole tou popoto ʼi te fai fakamafola?
1 Kapau ʼe kotou fai ia te taʼi fehuʼi ʼaia kiā koutou totonu pē, ʼaua naʼa kotou lotovaivai! ʼE mole ko he gāue ʼe akoʼi mai ʼi te ʼu faleako pea ʼe mole tou tutupu ake mo he toe poto lahi ke tou popoto atu aipē ʼi te fai fakamafola. Neʼe ʼui ʼo ʼuhiga mo ʼihi ʼi te ʼu ʼuluaki tisipulo “neʼe mole ako pea ʼe ko te ʼu tagata māhani.” Kae neʼe fua lelei tanatou fakamafola ia te logo lelei, he neʼe natou mulimuli ʼaki tonatou loto kātoa ki te faʼifaʼitaki ʼa Sesu.—Gāue 4:13; 1 Pet. 2:21.
2. Neʼe feafeaʼi ia te faiako ʼaē ʼa Sesu?
2 Neʼe Feafeaʼi Ia Te Faiako ʼAē ʼa Sesu? Neʼe faigafua tana faiako, neʼe ʼalutahi mo te ʼaluʼaga ʼo te hahaʼi, pea neʼe mahino gafua kiai ia te hahaʼi. ʼAki tana ʼu fehuʼi, mo tana ʼu lea fakatātā, pea mo tana ʼu ʼuluaki palalau faigafua, neʼe fakalogo lelei te hahaʼi. (Mat. 6:26) Neʼe ina fakahā tana tokaga moʼoni kiā nātou. (Mat. 14:14) Tahi ʼaē meʼa, neʼe tui papau ia Sesu ki tana ʼu faiakonaki pea neʼe ina fai ʼaki he mālohi, ʼi tana ʼiloʼi ʼaē ʼe ko Sehova ʼaē neʼe ina fekauʼi ia ia pea mo foaki age ia te mālohi ke ina fakahoko tana gāue ʼaia.—Luka 4:18.
3. ʼE feafeaʼi te tokoni mai ʼa Sehova ke tou fakahoko tatatou minisitelio?
3 ʼE Tokoni Mai Sehova Kiā Tātou: ʼAki tana Folafola pea mo tana kautahi, ko tatatou Faiako Lahi ʼe ina foaki mai ia te ako ʼaē ʼe ʼaoga kiā tātou ke fua lelei ai tatatou fakamafola ia te logo lelei. (Isa. 54:13) Mai tona ʼaluʼaga ʼaē neʼe taupau e Sehova ia te fakamatala ʼo te faʼahiga faiako ʼa Sesu, ʼe feala ai ke tou ako pea mo faʼifaʼitakiʼi ia tana ʼu faʼahiga fai fakamafola. ʼE foaki mai e Sehova ia tona laumālie māʼoniʼoni pea mo ina akoako tātou ʼaki ia te ʼu fono ʼo te kōkelekāsio. (Soa. 14:26) Pea ʼe ina foaki mai te kau fai fakamafola ʼaē kua māhani, ʼe feala ke natou tokoni mai ke fua lelei age tatatou fai fakamafola.
4. He koʼē ʼe feala ke tou manatu ʼe tou popoto ʼi te fakamafola ia te logo lelei ki te hahaʼi?
4 ʼE lahi te ʼu tupuʼaga kehekehe ʼe feala ai ke tou manatu ʼe tou popoto ʼi te fai fakamafola, mai tona ʼaluʼaga ʼaē ko ‘totatou poto ʼe haʼu ia mai te ʼAtua.’ (2 Ko. 3:5) ʼI tatatou falala kiā Sehova pea mo fakaʼaogaʼi fakalelei ia te ʼu fakatuʼutuʼu ʼofa ʼaē neʼe ina fai, ʼe tou “faiva . . . pea mo kātoa ki te ʼu gāue lelei fuli pē.”—2 Tim. 3:17.