Ko Ai Koa ʼAē ʼe Feala Ke Kau Ki Te Fai Faka Mafola?
1 ʼO ʼuhiga mo te minisitelio fai faka mafola, neʼe koutou manatu koa la ohage ko Moisese? Neʼe ina ʼui fēnei: “Fakalelei mai Sehova, kae mole ko ʼau ko he tagata ʼe faigafua ʼi te palalau, talu mai ʼanāfi pea mo muʼa atu, pea talu mai te temi ʼaē ʼe ke palalau ai ki tau kaugana.” (Ek. 4:10) Kapau ʼe koutou manatu feiā, pea ʼe lagi feala ke mole koutou fia kau ai ki te fai faka mafola. Kae, “neʼe fakatotonu mai [e Sesu] kia tatou ke tou fai faka mafola ki te hahaʼi pea mo tou fakamoʼoni katoa.” (Gāue 10:42) Koia ʼe lava feafeaʼi koa hatatou faiva ʼi te faka mafola ʼo te logo lelei?
2 ʼE mole tou faiva ʼi te minisitelio ʼuhi ko tatatou maʼu pepa ʼi te faleako. Neʼe ʼui fēnei e Paulo “ ʼe mole lahi he kau popoto ʼi te kakano neʼe pāui” pea “ko te poto ʼo te mālama ʼaenī ʼe vale ia ia mata ʼo te ʼAtua.” (1 Ko. 1:26; 3:19) Neʼe fili e Sesu tana kau ʼapositolo ʼi te lotolotoiga ʼo te hahaʼi gāue—ʼe ko te toko fā neʼe ko te ʼu tagata tautai. Ko te kau takitaki lotu fialahi neʼe nātou sioʼi te hahaʼi ʼaia ohage ko he ʼu hahaʼi vaʼiganoa, ko he ʼu “tagata neʼe mole ako pea ko te ʼu tagata neʼe hage pe ko te hahaʼi fuli.” ʼO mulimuli ki te ʼu lekula ʼo te mālama, neʼe mole feala ke fai faka mafola te kau ʼapositolo. Kae, ko te akonaki mālohi ʼaē neʼe fai e Petelo ʼi te ʼaho ʼo te Penikosite, neʼe ina uga ai te toko 3 000 hahaʼi ke nātou papitema!—Gāue 2:14, 37-41; 4:13.
3 ʼE Akoʼi Tatou e Sehova Ke Tou Faiva ʼi Te Fai Faka Mafola: Neʼe ʼui fēnei e Paulo: “Ko tatatou faiva ʼe haʼu ia mai te ʼAtua.” (2 Ko. 3:5) Ko Sehova, te Matapuna ʼo te poto, ʼe ina akoʼi te ʼu lauʼi miliona hahaʼi ke nātou faka mafola te moʼoni ki te hahaʼi. (Is. 54:13) ʼE tou sio ki te fua lelei ʼo te gāue ʼaia, he ko te toko 338 491 neʼe papitema ʼi te taʼu ʼaenī kua ʼosi, ʼo nātou liliu ko “te ʼu tohi fakamoʼoni.” (2 Ko. 3:1-3) ʼE lahi te ʼu tupuʼaga ʼo tatatou fai faka mafola ʼaki he lototoʼa, pea mo tou ʼiloʼi papau ai ko te ʼu meʼa ʼaē ʼe tou akoʼi ʼe haʼu ia mai ia Sehova.
4 Neʼe fakatuʼu e te kautahi ʼa te ʼAtua te polokalama ako ʼi te malamanei ʼo ʼuhiga mo te minisitelio. ʼAki te Tohi-Tapu pea mo te ʼu tohi faka Tohi-Tapu kehekehe, ʼe akoʼi tatou ke tou ‘maʼu katoa te ʼu kalitate ʼaē ʼe ʼaoga, mo tou maʼu ia meʼa fuli ʼe ʼaoga’ ki te fai faka mafola. (2 Tim. 3:16, 17) Neʼe ōfo te tokolahi ʼi tanatou sio ki te ʼu meʼa kehekehe ʼaē ʼe feala ke kita ako ʼi te ʼu tohi ʼa te Sosiete. Ohage la, neʼe ʼui fēnei e te nusipepa ʼo Suède: “Ko te tui ʼaē ʼe faka mafola e te kau Fakamoʼoni ʼa Sehova, ʼe hā ʼaki ai te poto lahi ʼo ʼuhiga mo te Tohi-Tapu, pea ʼe lahi te ʼu meʼa kehekehe mai te malamanei katoa ʼe nātou talanoa kiai.”
5 ʼAki te takitaki ʼaē ʼe foaki mai ʼi tatatou ʼu fono e nima, ʼi tatatou polokalama lau ʼo te Tohi-Tapu pea mo tona akoʼi, ʼi te ʼu tokoni ʼaē ʼe foaki mai ʼi te Ako ʼo Te Minisitelio Faka Teokalatike, te tokoni ʼaē ʼe foaki mai e ʼihi ʼu tēhina mo tuagaʼane kua māhani, pea tahi ʼaē meʼa, ʼaki te tokoni ʼo te laumālie maʼoniʼoni ʼa Sehova, ʼe feala ke tou falala ʼe tokagaʼi tatou e Sehova ʼe ko he ʼu hahaʼi ʼe faiva katoa ʼi te fai faka mafola. “ ʼIo, ohage ko he kau fakafofoga ʼa te ʼAtua, ʼe mātou palalau ia muʼa ʼo te ʼAtua, ʼo kaugā gāue mo Kilisito.”—2 Ko. 2:17.
6 Kapau ʼe tou fakaʼaogaʼi te ʼu fealagia fuli ʼo te ako faka teokalatike ʼaē ʼe foaki mai e te ʼAtua ʼaki tana kautahi, pea ʼe mole feala anai ke tou vaivavai peʼe tou ufiufi. ʼAki he loto fiafia, ʼe feala ke tou fai faka mafola ki te hahaʼi, ʼo tou ʼiloʼi papau ʼe tapuakina anai e Sehova tatatou ʼu faiga.—1 Ko. 3:6.