ʼAua Naʼa Tou Vaivai ʼi Te Tala ʼo Te Logo Lelei
1 Neʼe fai fakamalotoloto e te ʼu ʼuluaki Kilisitiano tonatou minisitelio. Neʼe ʼui fēnei e Luka: “ ʼI te ʼaho fuli pe, ʼi te fale lotu pea mo te ʼu ʼapi, tuʼumaʼu pe, ʼe nātou haga akoʼi pea mo tala te logo lelei ʼo ʼuhiga mo Kilisito, Sesu.” (Gāue 5:42) Neʼe mole he meʼa neʼe feala ke ina tāʼofi nātou, māʼiape la mo te ʼu fakataga! (Gāue 8:4) ʼI te ʼaho fuli neʼe nātou palalau ki te hahaʼi ʼo ʼuhiga mo te moʼoni ʼi te ʼaho fuli.
2 E feafeaʼi koa ia tatou? Koutou fai te fehuʼi ʼaenī: ‘ ʼE ʼau mahino koa kua nounou te temi? ʼE ʼau fia hoko tuʼumaʼu atu koa taku tala ʼo te logo lelei?’
3 Te ʼu Faʼifaʼitaki Ia ʼAho Nei ʼo Te Hahaʼi ʼe Mole Nātou Vaivai ʼi Te Fai Faka Mafola: Ko te tuagaʼane, neʼe ina maʼu te mahaki ʼaē ko te polio, neʼe maʼuli ʼaki te ʼate ukamea. Neʼe mole feala tana ʼalu ki te Fale ʼo te Puleʼaga peʼe ki he fakatahi. Kae neʼe maʼumaʼua ʼaupito ia ʼi te tala ʼo te logo lelei. Lolotoga tana nofo ʼi tona ʼapi ia taʼu e 37, neʼe tokoni ki te toko 17 hahaʼi ke nātou ako te moʼoni! Neʼe feafeaʼi tana fai te faʼahi ʼaia? Logope la neʼe mole feala tana ʼalu ʼo fisifisi te ʼu matapā, neʼe ina maʼu te faʼahiga fai moʼo fagonogono faigamālie kia nātou ʼaē neʼe ʼōmai ʼo fai palalau mo ia.
4 ʼE tau totatou ʼu tēhina ʼi Bosnie mo te tau pea mo te pakupaku. Kae, ʼe hoko tuʼumaʼu tanatou fai faka mafola ki te hahaʼi. ʼI Sarajevo ko te ʼu kaugā fai faka mafola neʼe nātou gāueʼi te ʼu hola e 20 ʼi te māhina fuli, ʼo nātou fakahā ki te hahaʼi te logo lelei, pea neʼe nātou fai takitahi te ʼu ako Tohi-Tapu e lua. Logope la te ʼu ʼaluʼaga faigataʼa ʼaē ʼe tau mo nātou, ʼe nātou haga hoko atu aipe tanatou fai faka mafola pea mo akoʼi te hahaʼi.
5 ʼE toe kau foki mo te kau tūpulaga ki te gāue mālohi ʼi te minisitelio. Ko he famili kau Fakamoʼoni ʼi Rwanda neʼe tuku ki he kogafale pea neʼe ʼamanaki ke tāmateʼi nātou e te kau solia. Pea neʼe kole age e te famili ke faka fealagia age muʼa ke fai hanatou kole. Ko te faʼahi ʼaia neʼe fakagafua age kia nātou, pea ko te kiʼi taʼahine ko Déborah, neʼe faikole leʼolahi ʼo ina ʼui fēnei: “Sehova, ʼi te vāhaʼa ʼaenī neʼe ʼau tufa te ʼu nusipepa e nima mo taku matuʼa. ʼE lava feafeaʼi hamā toe liliu ki te ʼu hahaʼi ʼaia ʼo akoʼi kia nātou te moʼoni pea mo tokoni kia nātou ke nātou maʼu te maʼuli?” ʼUhi ko tana tui mālohi pea mo tana manako ki te minisitelio, neʼe hāo ai te famili katoa.
6 Ia ʼaho nei, ʼe tonu ke tou kumi he ʼu faigamālie moʼo faka mafola ʼo te logo lelei ki te hahaʼi, pea mo kumi ia nātou ʼaē ʼe “lotolelei ki te maʼuli heʼegata.” (Gāue 13:48) ʼO mulimuli ki te ʼu ʼaluʼaga ʼo te telituale, ʼe fai anai e te ʼu tagata ʼāfea ʼo te kokelekasio te ʼu fakatuʼutuʼu ke feala ai he fai faka mafola ʼi te temi ʼaē ʼe ʼaoga kiai, peʼe ko te uhu, peʼe ko te hoʼatā, peʼe ko te ʼu afiafi. Ko te ʼu alatike ʼi Te Minisitelio ʼo Te Puleʼaga pea mo te ʼu koga ʼo te Fono Gāue, mo te ʼu fakatahi faka silikosikilipisio, pea mo te ʼu fakatahi faka tisitilike, ʼe foaki mai ai he ʼu tokoni ʼe ʼaoga pea mo he ʼu fakaloto mālohi ke tou kau ki te ʼu koga kehekehe ʼo te fai faka mafola ʼo te Puleʼaga. Tahi ʼaē meʼa, ko te ʼu tagata taupau faka silikosikilipisio pea mo te ʼu tagata taupau faka tisitilike ʼe nātou ako te kaugā fai faka mafola ʼi te fagonogono ʼi te ala, ʼo fakahā kia nātou peʼe feafeaʼi te fai faka mafola ʼi te telituale ʼaē ʼe ʼi ai te hahaʼi gāue, pea mo fakahā age kia nātou te tahi ʼu faʼahiga fai moʼo fai faka mafola ki te ʼu hahaʼi ʼaē ʼe tonu ke tou ʼolo ʼo vakaʼi. Ko te ʼu meʼa fuli ʼaia ʼe nātou faka maʼuhigaʼi te faʼahi ʼaenī, ke ʼaua naʼa tou vaivai ʼi te tala ʼo te logo lelei!
7 Neʼe lototoʼa te kau ʼapositolo ʼa Sesu ʼo nātou ʼui fēnei: “ ʼE mole feala ke tuku tamatou palalau ki te ʼu meʼa ʼaē neʼe mātou sisio kiai pea mo fagono kiai.” Neʼe feafeaʼi tanatou loto faʼa kātaki, logope la te ʼu fihifihia fuli ʼaē neʼe tau mo nātou? Neʼe nātou kole kia Sehova ke tokoni age kia nātou, pea neʼe tali e Sehova, pea “neʼe nātou fonu fuli ʼi te laumālie maʼoniʼoni pea nātou talanoa ai ki te folafola ʼa te ʼAtua ʼaki te lototoʼa.” (Gāue 4:20, 29, 31) ʼE mahino ia, ʼe mole hoko anai kia tatou fuli he ʼu ʼaluʼaga makehe ʼi te minisitelio, kae kapau ʼe tou loto moʼoni ke mole tuku ʼi he temi tatatou tala te logo lelei pea kapau ʼe tou faiga ke tou fai te faʼahi ʼaia ʼi te ʼaho fuli, pea ʼe tokoni anai ia Sehova kia tatou.