“ ʼE Haʼu Koa Maifea Te Paʼaga?”

ʼE PUNAMAʼULI ia nātou ʼaē ʼe nātou sioʼi te foʼi fime viteo ʼa te Sosiete Watch Tower “Les Témoins de Jéhovah—Un nom, une organisation.” ʼE nātou sio ʼi te foʼi fime ʼaia ki te ʼu tagata pea mo te ʼu fafine ʼo te ʼu lanu kehekehe pea mo te ʼu fenua kehekehe, ʼe fiafia pea ʼe nātou gāue fakatahi ʼi te logo tahi. ʼE mole gata pe tanatou tokagaʼi te fiafia ʼo te toko lauʼi afe hahaʼi ʼaē ʼe gāue, kae neʼe nātou toe tokagaʼi mo te ʼu fale lalahi ʼo te ʼu nofoʼaga ʼa te Sosiete ʼi Brooklyn pea mo tonatou fale tauhi manu ʼi Wallkill, ʼi New York. ʼE fakahā e te foʼi fime viteo ʼi te ʼu fale ʼaia ʼe maʼu ai te ʼu masini ʼe fakaʼaogaʼi ʼi te temi nei—ʼe nātou tā fakavilivili pea mo fakapipiki te ʼu tohi, pea ʼe nātou fai te ʼu tohi ʼe lauʼi miliona ʼi te māhina fuli, pea ʼe lahi ʼaupito te ʼu olotinatea, pea mo te ʼu pilō ʼe fakaʼaogaʼi ki te tahi ʼu gāue.

Ko te ʼu meʼa ʼaia neʼe ʼaoga kiai he toe paʼaga. Koia ʼe ʼui fēnei ai ʼe ʼihi, “ ʼE haʼu koa maifea te paʼaga?”

Ko nātou ʼaē ʼe nātou ʼaʼahi te ʼu nofoʼaga faka malamanei ʼa te Sosiete ʼe nātou punamaʼuli. ʼE nātou fakatokagaʼi te toe fale foʼou ko ʼona fata e 30, ʼaē ʼe nonofo ai te toko 3 000 tupu kau minisi ʼe nātou gāue ai ʼi tonatou lotolelei. Ko te tokolahi ʼo te hahaʼi ʼe nātou ōfo ʼi tanatou ʼaʼahi te ʼu fale foʼou ʼo te Faʼahi ʼaē ʼe fai ai te ako ʼo te Sosiete Watchtower, ʼaē ʼe tuʼu ia kilometa e 110 ʼi te potu tokelau ʼo Brooklyn. Mole heʼeki ʼosi te laga ʼo te ʼu fale ʼaia, pea ʼe gāue ai te toko 1 200. ʼI te taʼu fuli, ʼe ako ai anai te ʼu kalasi faka misionea e lua ʼi te ʼu fale ʼaia, pea ʼe hinoʼi ai nātou ki te fenua ka nātou ʼolo kiai. Tahi ʼaē meʼa, ʼe takitaki e te ʼu fale ʼaia te gāue ʼa te ʼu kokelekasio ʼa te kau Fakamoʼoni ʼa Sehova ʼe toko 10 000 tupu ʼi Amelika. ʼE lahi te ʼu filiale ʼi te malamanei katoa neʼe hoki faka laulahi tonatou ʼu fale peʼe nātou fakatuʼutuʼu ke nātou fai te faʼahi ʼaia. Moʼo fakahoko te ʼu gāue fuli ʼaia, ʼe ʼaoga kiai he toe paʼaga. ʼE ʼui maʼa te hahaʼi, “ ʼE haʼu koa maifea te paʼaga?”

Ko te paʼaga ʼaia ʼe haʼu pe mai te hahaʼi ohage pe ko tatou. Ko te ʼu hahaʼi ʼaia, ʼi te malamanei katoa, ʼe nātou loto ke nātou fai ia meʼa fuli ʼaē ʼe nātou fealagia, moʼo lagolago ki te gāue maʼuhiga ʼa te kau Kilisitiano ʼaē ko te fai faka mafola pea mo te akoʼi ʼo te hahaʼi. Ko te taʼi aga ʼaia ʼe mole ko he aga foʼou.

Ko Te Faʼifaʼitaki Neʼe Tuku Mai e Te Iselaele ʼĀfea

Kua hili kiai taʼu e 3 500 tupu, neʼe ʼaoga ke fai e te kau Iselaelite he ʼu meʼa ʼofa. Neʼe fakatotonu e Sehova kia Moisese ke ina faʼu he tapenakulo, peʼe ko he “fale fehikitaki ʼo te fono,” moʼo fai ʼo Tana tauhi. Ko te ʼu fakatuʼutuʼu ʼaē neʼe fakahā e te ʼAtua neʼe ʼaoga kiai he ʼu meʼa maʼuhiga kehekehe. Neʼe fakatotonu fēnei e Sehova: “Koutou toʼo mai ia koutou he meʼa ʼofa maʼa Sehova. Ko te tagata fuli pe ʼaē ʼe lotolelei ke ina ʼaumai ohage ko he meʼa ʼofa kia Sehova.” (Ekesote 35:4-9) Neʼe tali feafeaʼi koa e te hahaʼi te faʼahi ʼaia? ʼE fakahā mai e te hisitolia kia tatou “neʼe nātou ʼōmai ai, ia nātou fuli ʼaē neʼe uga e ʼonatou ʼu loto, pea neʼe nātou fetuku mai, ia nātou fuli ʼaē neʼe uga e tonatou ʼatamai, te meʼa ʼofa kia Sehova ʼo ʼuhiga mo te gāue ʼo te fale fehikitaki ʼo te fono pea mo tana ʼu gāue fuli ʼe ʼaoga ki ai pea mo te ʼu kofu taputapu.” Neʼe fakaʼaluʼalu te “meʼa ʼofa” ʼaia ʼo lahi ʼaupito, ʼo ‘laka maumau te ʼu meʼa ʼaia neʼe ʼaoga ki te gāue ʼi te ʼu meʼa ʼaē neʼe fakatotonu e Sehova ke fai.’ (Ekesote 35:21-29; 36:3-5) Neʼe fakahā e te kau Iselaelite ʼe mole nātou manatu pe kia nātou, kae ʼe nātou maʼu te loto foaki!

Hili kiai taʼu e 500, neʼe toe kole ki te kau Iselaelite ke nātou foaki he ʼu meʼa ʼofa. Neʼe loto te hau ko Tavite ke laga he fale maʼa Sehova ʼi Selusalemi pea neʼe fakahoko te faʼahi ʼaia ʼe tona foha ko Salomone. Neʼe tātānaki e Tavite te ʼu meʼa ʼofa pea neʼe lahi te meʼa ʼofa ʼaē neʼe ina foaki ki te laga ʼo te fale lotu. Ko ʼihi neʼe nātou mulimuli kiai ʼi te temi ʼaē neʼe pāui ai ia Tavite ke ʼaumai “he meʼa ʼofa maʼa Sehova.” Koteā tona ikuʼaga? “Ko te hahaʼi neʼe nātou fakafiafia, he neʼe nātou fai te ʼu mōlaga ʼaki he lotolelei, koteʼuhi neʼe nātou fai te ʼu mōlaga ʼaia kia Sehova ʼaki te loto katoa; pea ʼo feiā aipe mo te hau ko Tavite neʼe fiafia ʼaupito.” (1 Fakamatala 22:14; 29:3-9) Ko te lahi ʼo te siliva pea mo te aulo ʼaē neʼe foaki ko te 5 000 miliale!—2 Fakamatala 5:1.

ʼE tou fakatokagaʼi ʼi te ʼu faʼifaʼitaki ʼaenī, neʼe mole he tahi neʼe fakakinauʼi ke ina foaki he meʼa ʼofa. Neʼe nātou foaki “ ʼaki he lotolelei” pea mo fai “ ʼaki te loto katoa.” Neʼe loto ia Sehova ke foaki e te kau Iselaelite tanatou ʼu meʼa ʼofa ʼaki tonatou loto katoa. ʼO feiā aipe, ʼi te temi neʼe ʼaoga ai ke foaki he paʼaga moʼo lagolago ki te kau Kilisitiano māsisiva, neʼe tohi fēnei e te ʼapositolo ko Paulo ʼe mole ko “he meʼa ʼe fai fakakinau.” Neʼe ina toe ʼui fēnei: “Ke tahi fai pe ki te meʼa ʼaē kua ina fakatotonu ʼi tona loto, ʼo mole fai ʼaki he fakahemala peʼe ʼaki hona fakakinau, heʼe ʼofa te ʼAtua kia ia ʼaē ʼe ina foaki ʼaki te loto fiafia.”—2 Kolonito 9:5, 7.

Te ʼu Meʼa ʼAē ʼe ʼAoga Kiai Te Paʼaga Ia ʼAho Nei

Ia ʼaho nei ʼe ʼi ai koa he ʼu meʼa ʼe ʼaoga kiai te paʼaga ʼaē ʼe foaki fakaʼofa? ʼE mahino ia, pea ʼaki te temi ʼe toe lahi anai tona ʼaoga. Koteā tona tupuʼaga?

Neʼe fai te ʼu fakatotonu makehe ki te kau Kilisitiano ʼo ʼuhiga mo te temi fakaʼosi ʼaenī. Neʼe fakatotonu fēnei e Sesu ki tana kau tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”—Mateo 28:19, 20.

ʼI tatatou kua fakaōvi ki te fakaʼosi ʼo “te tuʼu ʼo te ʼu faʼahiga meʼa ʼaenī,” ʼe ʼaoga he ʼu temi loaloaga pea mo he paʼaga moʼo akoʼi ʼo te hahaʼi ʼi te malamanei katoa, pea mo fakahoko ʼo te fai faka mafola. Koteā tona tupuʼaga? Koteʼuhi ko te ʼu meʼa fuli ʼaia ʼe lagolago ki te fakaaʼu ʼo te logo ʼo te Puleʼaga ʼa te ʼAtua ki “te ʼu potu taupotu ʼo te kele.” (Gāue 1:8) Tokolahi te hahaʼi ʼe mole nātou ʼiloʼi lelei te Tohi-Tapu ohage ko te kau Sutea ʼo te ʼuluaki sēkulō. ʼI tona fakahagatonu, ʼe lahi ʼaupito te hahaʼi ʼi te kele ʼe mole nātou ʼiloʼi te Tohi-Tapu, pea ʼe mole nātou faka ʼuhiga te Tohi-Tapu ohage ko te Folafola ʼa te ʼAtua. ʼE tonu ke akoʼi he ʼu hahaʼi fai faka mafola pea ke fekauʼi ia nātou ki te ʼu fenua ʼaē ʼe mamaʼo. (Loma 10:13-15) Koutou fakakaukauʼi age muʼa te ʼu lea ʼaē ʼe fakahoko ʼaki te gāue ʼaia! Ko te hahaʼi ʼaē ʼe tou fai faka mafola kiai, ʼe ʼaoga ke nātou maʼu te ʼu Tohi-Tapu pea mo he ʼu tohi faka Tohi-Tapu ke nātou lau pea mo nātou akoʼi ʼi tanatou lea. Ke feala hanatou tuputupu ke nātou maʼu te fakapotopoto ʼi te faʼahi fakalaumālie, ke feala ai hanatou tokoni ki niʼihi, neʼe ʼaoga ke fai he ʼu fakatuʼutuʼu faka malamanei.—2 Timoteo 2:2.

Neʼe ʼui e Sesu ko te “logo lelei ʼaenī ʼo te puleʼaga” ʼe tonu muʼa ke “faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14) Koia ʼe ko te temi ʼaenī ʼe tonu ke tou fai ai ia meʼa fuli, moʼo fakahoko ʼo te gāue maʼuhiga ʼaia. ʼE tou fakaʼaogaʼi lelei anai totatou ʼu koloā, ʼi muʼa ʼo tonatou pulihi.—Esekiele 7:19; Luka 16:9.

ʼE ʼAve Koa Kifea Te Paʼaga?

ʼE tā e te Sosiete Watch Tower te ʼu tohi faka Tohi-Tapu ʼi te ʼu lea e 230 tupu, pea mo te ʼu tohi faka Braille maʼa te hahaʼi kivi, pea mo te ʼu fime viteo ʼe fai ai te ʼu fakamatala ʼaki te ʼu nima maʼa te hahaʼi ʼaē ʼe tuli. Moʼo fakahoko ʼo te ʼu meʼa ʼaia, ʼe ʼaoga ke ʼi ai he hahaʼi fai fakaliliu pea mo ʼihi ke nātou vakavakaʼi fakalelei te fakaliliu ʼo te ʼu tohi. Koutou fakakaukauʼi age te ʼu meʼa fuli ʼaē ʼe ʼaoga moʼo fai ʼo te gāue ʼaia, tāfito ia te nusipepa, ʼaē ko Te Tule Leʼo ʼe tā ʼi te māhina fuli ʼi te ʼu lea e 121 pea ko Te Tule Leʼo e 101 ʼe tā ʼi te moʼi temi pe e tahi, ʼe ko he gāue fakaofoofo. Kae ʼe ʼaoga te faʼahi ʼaia ke feala ai ki te hahaʼi ʼi te kele katoa, ke nātou lau he meʼa e tahi pea mo nātou mahino ki he meʼa e tahi. ʼI te taʼu fuli ʼe lahi te paʼaga ʼe fakaʼaogaʼi moʼo totogi ʼo te pepa pea mo ʼihi faʼahiga meʼa ʼe fakaʼaogaʼi moʼo faka fealagia te fakahā ʼo te logo ʼo te Puleʼaga, ʼaē ʼe fai ʼaki he ʼu fime pukeleʼo peʼe ko he ʼu fime viteo. Ko te ʼu faʼahiga meʼa ʼaia neʼe totogi ʼaki te ʼu meʼa ʼofa ʼaē ʼe foaki e te ʼu tēhina.

Ko te fai faka mafola pea mo te gāue fai ako, ʼe fai ʼi te ʼu telituale ʼo te ʼu kokelekasio e 75 000 ʼo te kau Fakamoʼoni ʼa Sehova ʼi te malamanei katoa. Ke feala hanatou logo tahi pea mo fakaloto mālohiʼi ʼo nātou, neʼe akoʼi te ʼu tagata taupau feʼaluʼaki, ke nātou ʼaʼahi te ʼu kokelekasio fuli ʼo tuʼa lua ʼi te taʼu. Tahi ʼaē meʼa, ʼe toe maʼuhiga te ʼu fakatahi moʼo akoʼi te hahaʼi. Moʼo fai te ʼu fakatahi ʼaia ʼaē ʼe nātou fakamālohiʼi te tui, ʼe tonu ke lue he ʼu fale lalahi. Ko takotou ʼu meʼa ʼofa ʼe toe fakaʼaogaʼi foki ki te ʼu fakatuʼutuʼu ʼaia.

ʼI te agamāhani ʼe fai tuʼa tolu te ʼu fakatahi lalahi ʼi te taʼu, kae ko te ʼu kokelekasio ʼo te telituale ʼe nātou fai te ʼu fono e nima ʼi te vāhaʼa. (Vakaʼi ia Ekesote 34:23, 24.) ʼI te taʼu fuli ʼe maʼu te ʼu kokelekasio ʼe lauʼi afe, ʼuhi ko te hahaʼi foʼou ʼaē ʼe nātou tali te logo lelei. ʼAki te toe paʼaga ʼe foaki e te Sosiete, ʼi te taʼu fuli ʼe laga te ʼu Fale ʼo te Puleʼaga ʼe lauʼi teau, pea ʼe lahi te tahi ʼu fale neʼe fakafoʼou pea mo fakalahi. Logope la te fakaʼaogaʼi tuʼumaʼu ʼo te falā ʼaia, ʼe ʼaoga ke lahi he paʼaga heʼe lahi ʼaupito te kole paʼaga ki te Sosiete.

Ko te fenua ʼaē neʼe lahi ai te tuputupu, ʼe ko te Eulopa ʼo te Potu Hahake, ʼaē neʼe puleʼi e te Lusia ʼāfea. Neʼe ko he meʼa fakafiafia te tuputupu foʼou ʼo te gāue ʼaē kua fakagafua ʼi te ʼu fenua ʼaia! ʼI te temi nei ʼe lahi te ʼu misionea ʼe ʼave ki te ʼu fenua ʼaia. Neʼe fakatuʼu te ʼu filiale foʼou ʼi te tahi ʼu fenua, ʼo tuputupu ai te kau gāue ʼo te ʼu famili ʼo te Petele ki te toko 15 000 tupu, te ʼu minisi ʼe gāue ʼi tonatou lotolelei. Koia, neʼe ʼaoga ai ke laga he ʼu fale peʼe ke totogi he ʼu fale ke nātou nonofo ai. Ko takotou ʼu meʼa ʼofa ʼe tokoni ki te fakahoko ʼo te ʼu meʼa ʼaia.

Neʼe mole puli kia Satana pea mo tana kau temonio te ʼu gāue fuli ʼaia. ʼE nātou fai ia meʼa fuli moʼo fakafeagai ki te ʼu faiga ʼa te kau kaugana agatonu ʼa Sehova, peʼe nātou fakahoko he ʼu fihifihia kia nātou. (Fakahā 12:17) Neʼe lahi ai te ʼu fihi ʼi te ʼu telepinale moʼo puipui ʼo te maʼua ʼa te hahaʼi ʼa te ʼAtua ʼaē ko te fai faka mafola, pea mo tanatou mulimuli ki te ʼu lao faitotonu. Tahi ʼaē meʼa, ko te tuʼu ʼo te ʼu faʼahiga meʼa ʼa Satana ʼe ina fakahoko te ʼu tau, mo te ʼu tuʼutāmaki fakamataku, pea ʼe maʼua ke tou tokoni ki ʼotatou ʼu tēhina pea mo tuagaʼane pea mo ʼihi ia nātou ʼaē neʼe tau mo te mamahi. Ko takotou foaki he meʼa ʼofa ʼe lagolago ki te tokoni maʼuhiga ʼaia.

ʼE Fakapale Anai Koutou e Sehova

ʼE tou maʼu anai he ʼu tapuakina lahi, mo kapau ʼe tou fakaʼaogaʼi totatou temi mo ʼotatou ʼu koloā moʼo fakahaʼele ki muʼa te gāue ʼa te ʼAliki. ʼO feafeaʼi? ʼE fakapale anai tatou e te ʼAtua, heʼe ʼa ia ia meʼa fuli. ʼE ʼui fēnei ia Tāʼaga Lea 11:25: “Ko te nefesi ʼaē ʼe manavaʼofa ʼe sino lelei anai ia, pea ko ʼaē ʼe lahi tana fakavai niʼihi, ʼe toe lahi anai tona fakavai.” ʼE fiafia moʼoni ia Sehova mokā ʼe tou fakahoko te gāue neʼe tuku mai ke tou fai moʼo fakahaʼele ki muʼa tana tauhi. (Hepeleo 13:15, 16) Ki te kau Iselaelite ʼo te temi muʼa, ʼaē neʼe nātou foaki te ʼu meʼa ʼofa ʼaē neʼe fakamaʼua e te fuakava ʼo te Lao, neʼe fakapapau fēnei age e te ʼAtua: “ ‘Koutou fakalelei age, ka ke koutou ʼahiʼahi ʼau ʼi te faʼahi ʼaia,’ ko te tala ʼaia ʼa Sehova ʼo te ʼatu kautau, ‘peʼe mole ʼau avahi anai kia koutou te ʼu matapā ʼo te lagi pea mo huaʼi anai kia koutou he tapuakina ʼo aʼu ki te mole toe ʼi ai ʼo he hoge.’ ” (Malakia 3:10) Ko te tuputupu fakalaumālie ʼa te kau kaugana ʼa Sehova ia ʼaho nei, ʼe ko te fakamoʼoni ʼaia ʼe fakahoko e te ʼAtua tana fakapapau.

ʼE ʼi ai te temi ʼe fakagata ai anai te gāue lahi ʼaia ʼaē ko te fakahā ki te hahaʼi ʼo te ʼaho ʼo te fakamaʼuli, pea mo tokoni ki te hahaʼi fakamalotoloto ke nātou maʼu te maʼuli heʼegata. (Mateo 7:14; 2 Kolonito 6:2) Kae ʼe tonu ke tānaki te hahaʼi fuli ʼaē ʼe kau ki te “tahi ʼu ōvi” ʼa te ʼAliki. (Soane 10:16) ʼE maʼuhiga te fai ʼo te gāue ʼaia ia ʼaho nei! Pea ʼe ko he meʼa fakafiafia anai kia tatou takitokotahi, hatatou ʼui fēnei ʼi te mālama foʼou ʼo te faitotonu, ‘Neʼe ʼau kau katoa ki te gāue ʼaia, ʼaē ko te tānaki ʼo te hahaʼi’!—2 Petelo 3:13.

[Talanoa ʼo te pasina 30, 31]

Koteā Te ʼu Meʼa ʼOfa ʼAē ʼe Foaki ʼe ʼIhi Ki Te Faka Mafola ʼo Te Puleʼaga

TE ʼU MEʼA ʼOFA KI TE GĀUE FAKA MALAMANEI: Ko te tokolahi ʼe nātou tuku kehe he meʼa peʼe nātou fakatuʼutuʼu ʼi tanatou polokalama ke nātou ai he falā ki te ʼu kesi ʼaiʼaga meʼa ʼofa ʼaē ʼe tohi ai te meʼa ʼaenī: “Te ʼu meʼa ʼofa ki te gāue faka malamanei ʼa te Sosiete—Mateo 24:14.” ʼI te māhina fuli ʼe fakamomoli e te ʼu kokelekasio te falā ʼaia ki te ʼu nofoʼaga faka malamanei ʼaē ʼi Brooklyn, ʼi New York, peʼe ki te filiale ʼo tonatou telituale.

TE ʼU MEʼA ʼOFA: ʼE feala ke tou fakamomoli fakahagatonu te ʼu meʼa ʼofa ki te filiale ʼaē ʼi tokotou fenua. ʼE feala ke tou foaki he ʼu meʼa gigila peʼe ko niʼihi age ʼu meʼa maʼuhiga. ʼE tonu ke tou fakamomoli fakatahi mo te ʼu meʼa ʼofa ʼaia he tohi fakanounou ʼe tuʼu katoa ai te ʼu meʼa ʼofa.

TE MEʼA ʼOFA ʼE FAKA TUʼAKOI: ʼE feala ke tou foaki he paʼaga ki te Sosiete Watch Tower, pea ʼe ina taupau anai te paʼaga ʼaia ʼo aʼu ki totatou mate, kae kapau ʼe ʼaoga ke tou fakaʼaogaʼi te paʼaga ʼaia, ʼe toe liufaki mai anai te paʼaga ʼaia kia tatou.

KAUPEPA ʼE TUKU AI TE FALĀ ʼI TE FALE PAʼAGA: Ko te kaupepa ʼe tuku ai te falā ʼi te fale paʼaga, peʼe ko he compte dépôt, peʼe ko he compte de retrait personnel ʼe feala ke fakagafua ki te Sosiete peʼe ke tohi ai te higoa ʼo te sosiete ʼi te mate ʼo ia ʼaē neʼe ina fai te fakatuʼutuʼu ʼaia. ʼE tonu ke tou fakahā ki te Sosiete te faʼahiga fakatuʼutuʼu ʼaia.

POLICES DʼASSURANCE: ʼE feala ke foaki ki te Sosiete Watch Tower he police dʼassurance peʼe ko he letelete/he posio. ʼE tonu ke tou fakahā ki te Sosiete te faʼahiga fakatuʼutuʼu ʼaia.

TE ʼU MEʼA MAʼUHIGA PEA MO TE ʼU KOTALA: ʼE feala ke foaki ki te Sosiete Watch Tower te ʼu meʼa maʼuhiga pea mo te ʼu kotala ohage ko he meʼa ʼofa katoa peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.

TE ʼU KOLOĀ: ʼE feala ke tou foaki he ʼu koloā ki te Sosiete Watch Tower, peʼe tou foaki fakahagatonu te meʼa ʼofa ʼaia, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te Sosiete ʼi muʼa ʼo tatatou foaki kiai te ʼu koloā ʼaia.

KOʼENI TOKU LOTO FAKAMULI PEA MO TE PEPA ʼE TOHI AI TOKU KOLOĀ: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, peʼe feala ke tou fakatuʼutuʼu ko te Sosiete ʼe feala ke ina maʼu totatou ʼu koloā. Ko he koloā ʼe fua lelei ki he kautahi faka lotu ʼe feala ke ina fakatuʼu he ʼu faʼahiga tukuhau. ʼE tonu ke tou fakamomoli ki te Sosiete te lua pepa ʼaē ʼe tuʼu ai totatou loto peʼe ko te koloā.

Kapau ʼe koutou fia ʼiloʼi he faʼahiga meʼa ʼi te ʼu manatu ʼaē ʼe tuʼu ʼi ʼoluga, koutou faitohi ki te filiale ʼo tokotou fenua.