“Faka Maʼuhigaʼi Ia Sehova ʼAki Tou ʼu Koloā”—ʼO Feafeaʼi?
“FAKA MAʼUHIGAʼI ia Sehova ʼaki tou ʼu koloā pea mo te ʼu ʼuluaki fua ʼo tau ʼu meʼa fakakelekele fuli.” ʼI te ʼu palalau agapoto ʼaia ʼaē ʼe haʼu mai te ʼAtua pea neʼe tohi ia taʼu e 2 600 ki muʼa atu, ʼe tou maʼu ai te kalavi ʼaē ʼe faka fealagia ai ke tou mahu ʼi te ʼu tapuakina ʼa Sehova, he neʼe hoko atu e te tagata faitohi ʼo ina fakatokagaʼi te faʼahi ʼaenī: “Pea ko tou ʼu faleoko ʼe mahu anai, pea ko tou ʼu tane lalahi ʼe fonu gutugutu anai ʼi te vino foʼou.”—Tāʼaga Lea 3:9, 10.
Kae koteā tona faka ʼuhiga ke tou faka maʼuhigaʼi ia Sehova? Koteā te ʼu koloā ʼaē ʼe tonu ke tou fakaʼaogaʼi moʼo faka maʼuhigaʼi ia Sehova? Pea ʼe lava feafeaʼi hatatou fai te faʼahi ʼaia?
“Faka Maʼuhigaʼi Ia Sehova”
ʼI te Tohi-Tapu, ko te kupu faka Hepeleo ka·vohdhʹ, ʼe fakaliliu tāfito ʼaki te kupu faka maʼuhigaʼi, pea ʼe faka ʼuhiga ki te “mamafa.” Koia kapau ʼe kita faka maʼuhigaʼi he tahi, ko tona faka ʼuhiga ʼe kita fakamoʼoni ki ai ʼe maʼuhiga pea mo fakaofoofo. Ko te tahi kupu faka Hepeleo yeqarʹ, ʼaē ʼe fakaliliu ʼaki te kupu faka maʼuhigaʼi, ʼe toe fakaliliu foki ʼaki te kupu “maʼuhiga” pea mo te ʼu “meʼa maʼuhiga.” ʼO toe feiā pe, ko te kupu faka Keleka ti·meʹ, ʼe fakaliliu ʼaki te kupu “faka maʼuhigaʼi,” ʼe toe faka ʼuhiga foki ki te fakaʼapaʼapa pea mo te maʼuhiga. Koia ʼe kita faka maʼuhigaʼi he tahi mokā kita fakaʼapaʼapa lahi ki ai.
Ko te faka maʼuhigaʼi ʼo he tahi, ʼe toe kau foki kiai te tahi meʼa. Koutou vakaʼi te talanoa ʼo ʼuhiga mo te Sutea agatonu ko Maletokeo, ʼaē neʼe ina fakahā te fakatuʼutuʼu ʼaē neʼe fai moʼo matehi ʼo Asuelusi, te Hau ʼo te Pelesia ʼāfea. Ki muli age, ʼi te ʼiloʼi e te hau neʼe mole fai he meʼa moʼo faka maʼuhigaʼi ia Maletokeo, neʼe ina fehuʼi ki tana ʼuluaki minisi ko Amane peʼe lava feafeaʼi ki te hau ke ina faka maʼuhigaʼi ia ia ʼaē neʼe ina leleiʼia. Neʼe manatu ia Amane ko te faka maʼuhigaʼi ʼaia ʼe fai anai kia ia, kae neʼe faihala! Neʼe ʼui e Amane neʼe tonu ke fakakofuʼi ia ia ʼaia ʼaki te ʼu “kofu faka hau” pea ke heka “ ʼi te hōsi ʼaē ʼe heka ai te hau.” Neʼe ina fakaʼosi fēnei: “ ʼE tonu ke nātou tuku ia ia ke heka ʼi te hōsi ke ʼalu ʼi te malaʼe ʼo te kolo, pea ʼe tonu ke nātou kalaga fēnei ʼi ʼona muʼa, ‘Ko te meʼa ʼaenī ʼe fai kia ia ʼaē ʼe leleiʼia e te hau.’ ” (Esitele 6:1-9) ʼI te lakaga ʼaia, ko te faka maʼuhigaʼi ʼo he tahi, neʼe kau ai tona hikihiki ʼi muʼa ʼo te hahaʼi fuli ke nātou fakaʼapaʼapa ki ai.
ʼO toe feiā pe, ko te faka maʼuhigaʼi ʼo Sehova ʼe ʼi ai tona ʼu faʼahiga fai e lua: ʼe tonu kia tatou takitokotahi ke tou fakaʼapaʼapa kia ia, pea ke tou faka maʼuhigaʼi ia ia ʼi muʼa ʼo te kaugamālie ʼo tou kau pea mo tou lagolago ki te gāue ʼaē ko te kalagaʼi ʼo tona huafa.
“Tou ʼu Koloā”—Koteā?
ʼE mahino ia, ʼe kau ki totatou ʼu koloā totatou maʼuli, mo totatou temi, mo totatou ʼu faiva pea mo totatou mālohi. E feafeaʼi ki tatatou ʼu koloā? Koutou fakatokagaʼi te ʼu palalau ʼa Sesu ʼi te temi ʼaē neʼe sio ai ki te fafine vitua masiva ʼaē neʼe ina ʼai te ʼu kiʼi foʼi piesi e lua ʼe mole faʼa maʼuhiga ki te puha tānaki paʼaga ʼo te fale lotu. Neʼe ina ʼui fēnei: “Ko te fafine vitua ʼaenī, logope tona masiva, ka kua lahi age te meʼa ʼaē neʼe ina ʼai ia nātou fuli ʼaē. He ko nātou fuli ʼaenī [ko te tahi ʼu hahaʼi ʼaē neʼe foaki meʼa ʼofa] neʼe nātou ʼai tanatou ʼu meʼa ʼofa ʼi tanatou ʼu paʼaga ʼaē neʼe mole loko ʼaoga kia nātou, kaʼe ko te fafine ʼaenī, logope tona masiva, neʼe ina ʼai fuli te meʼa ʼaē ʼe ina maʼu.” (Luka 21:1-4) Neʼe vikiʼi e Sesu te fafine vitua ʼaia he neʼe ina fakaʼaogaʼi tona ʼu koloā fuli moʼo lagolago ki te tauhi ʼo Sehova.
ʼE mahino papau ia, ʼe toe kau foki ʼi te ʼu koloā ʼaē neʼe palalau kiai ia Salomone, te ʼu meʼa fakasino fuli ʼaē ʼe tou maʼu. Pea ko te kupuʼi palalau ʼaē ko “te ʼu ʼuluaki fua ʼo tou ʼu meʼa fakakelekele fuli,” ʼe toe faka ʼuhiga ki tatatou foaki kia Sehova totatou ʼu meʼa ʼaē ʼe lelei ʼaupito.
Kae ʼe lava feafeaʼi hatatou faka maʼuhigaʼi ia Sehova ʼi tatatou momoli te ʼu koloā kia te ia? ʼE mole ʼa ia totonu koa la ia meʼa fuli? (Pesalemo 50:10; 95:3-5) Neʼe fakamoʼoni fēnei e te Hau ko Tavite ʼi tana faikole fakamalotoloto kia Sehova: “Ko meʼa fuli ʼe haʼu mai ia te koe.” Koʼeni te meʼa ʼaē neʼe ʼui e Tavite ʼo ʼuhiga mo te meʼa ʼofa lahi ʼaē neʼe ina foaki mo tana hahaʼi ki te laga ʼo te fale lotu: “ ʼE haʼu mai tou nima totonu te ʼu meʼa ʼaē ʼe mātou foaki atu kia te koe.” (1 Fakamatala 29:14) Koia ʼi tatatou foaki kia Sehova te ʼu meʼa ʼofa, ʼe tou toe foaki age kia ia te ʼu meʼa ʼaē neʼe ina foaki mai ʼuhi ko tona lotoʼofa. (1 Kolonito 4:7) Kae ohage ko te meʼa ʼaē neʼe tou fakatokagaʼi ki muʼa atu, ko te faka maʼuhigaʼi ʼo Sehova ʼe toe faka ʼuhiga ki tona fakavikiviki ia muʼa ʼo te hahaʼi. ʼE tou faka maʼuhigaʼi te ʼAtua mokā tou momoli te ʼu meʼa ʼofa fakasino moʼo lagolago ki te tauhi moʼoni. ʼE maʼu ʼi te Tohi-Tapu te ʼu faʼifaʼitaki lelei ʼo ʼuhiga mo te taʼi faka maʼuhigaʼi ʼaia ʼo Sehova.
Ko Te ʼu Faʼifaʼitaki ʼo Te Temi Muʼa
Ko taʼu e 3 500 ki muʼa atu, ʼi te temi ʼaē neʼe kua tonu ai ke foaki e Sehova ki te kau Iselaele te tapenakulo ʼi te toafa ke feala ai hanatou tauhi kia ia, neʼe ʼaoga te ʼu meʼa kehekehe maʼuhiga ʼaē neʼe fakatuʼutuʼu e te ʼAtua ke nātou fai. Neʼe fakatotonu e Sehova kia Moisese ke ina ‘tuku te tagata fuli ʼe lotolelei ke ina ʼaumai te meʼa ʼofa maʼa Sehova.’ (Ekesote 35:5) ʼE hoko atu fēnei te fakamatala ʼaia: “Pea neʼe nātou ʼōmai ai, ia nātou fuli ʼaē neʼe uga nātou e ʼonatou ʼu loto, pea neʼe nātou fetuku mai, ia nātou fuli ʼaē neʼe uga nātou e tonatou ʼatamai, te meʼa ʼofa kia Sehova ʼo ʼuhiga mo te gāue ʼo te fale fono fehikitaki pea mo tona selevisi katoa pea mo te ʼu kofu maʼoniʼoni.” (Ekesote 35:21) ʼI tona fakahagatonu, neʼe lahi age te ʼu meʼa ʼofa ʼaē neʼe nātou foaki ʼi tonatou lotolelei ʼi te meʼa ʼaē neʼe ʼaoga ki te gāue, pea neʼe maʼua ke “tāʼofi [te hahaʼi] ke tuku la tanatou fetuku mai”!—Ekesote 36:5, 6.
Koutou vakaʼi te faʼifaʼitaki ʼaenī. ʼI te temi ʼaē neʼe kua ʼosi fakaʼaogaʼi ai te tapenakulo pea neʼe kamata ai te ʼu teuteuʼi ki te laga ʼo te fale lotu, neʼe foaki e Tavite te meʼa ʼofa lahi mai tona ʼu koloā, ki te laga ʼo te fale lotu ʼaē ka fai anai e tona foha ko Salomone. Neʼe ina toe kole foki ki te hahaʼi ke nātou fai feiā, pea neʼe ʼaumai e te hahaʼi te ʼu meʼa ʼofa maʼuhiga kia Sehova. Ko te siliva pea mo te aulo ʼaē neʼe nātou ʼaumai ʼe ko tona fakatatau ko te 5 000 000 000 000, mo kapau ʼe tou fakatatau ki te falā ʼo te temi nei. “Pea ko te hahaʼi neʼe nātou fakafiafia he neʼe nātou fai te ʼu mōlaga ʼaki tonatou lotolelei.”—1 Fakamatala 29:3-9; 2 Fakamatala 5:1.
Ko ‘Te ʼu Mōlaga ʼe Fai ʼAki He Lotolelei’ ʼi Totatou Temi
ʼE lava feafeaʼi hatatou kau ki te fiafia ʼaē ko te foaki ʼo he ʼu mōlaga ʼaki totatou lotolelei ʼi totatou temi? Ko te gāue ʼaē ʼe maʼuhiga tāfito ʼi te temi nei ʼi te mālama ʼaenī, ʼe ko te faka mafola ʼo te Puleʼaga pea mo fai ʼo ni ʼu tisipulo. (Mateo 24:14; 28:19-20; Gāue 1:8) Pea neʼe fakatokagaʼi e Sehova ʼe feala ke falala ki tana ʼu Fakamoʼoni ke nātou tokakaga ki te ʼu meʼa fakakelekele ʼo te Puleʼaga.—Isaia 43:10.
ʼE mahino papau ia, ʼe ʼaoga te paʼaga ki te fakaʼaluʼalu ʼo te gāue ʼa te kau Fakamoʼoni ʼa Sehova ʼi te temi nei. ʼE ʼaoga te paʼaga ki te laga pea mo te taupau ʼo te ʼu Fale ʼo te Puleʼaga, mo te ʼu Fale Fakatahi, mo te ʼu filiale, mo te ʼu fale gāue pea mo te ʼu Petele. ʼE tonu ke totogi he ʼu meʼa ki te tā pea mo te tufa ʼo te ʼu Tohi-Tapu pea mo te ʼu tohi faka Tohi-Tapu. ʼE totogi feafeaʼi te ʼu meʼa ʼaia ʼaē ʼe ʼaoga ki te gāue? ʼAki te ʼu meʼa ʼofa ʼaē ʼe fai ʼaki he lotolelei!
ʼE lahi te ʼu meʼa ʼofa ʼe haʼu mai te hahaʼi—ohage ko te fafine vitua ʼaē neʼe mamata ki ai ia Sesu—ko he ʼu hahaʼi ʼe mole nātou maʼu koloā. ʼE mole nātou fia tō ʼi te faʼahi ʼaia ʼo te faka maʼuhigaʼi ʼo Sehova, koia ʼe nātou foaki te kiʼi falā “ ʼo mulimuli pe ki tonatou ʼu fealagia,” pea ʼi ʼihi temi, ʼe “laka age ʼi tonatou ʼu fealagia.”—2 Kolonito 8:3, 4.
Neʼe ʼui fēnei e te ʼapositolo ko Paulo ki te kau Kilisitiano ʼo Kolonito: “Ke tahi fai pe ki te meʼa kua ina fakatotonu ʼi tona loto, ʼo mole fai ʼaki he loto fakahemala peʼe ʼaki he loto fakakinau, heʼe ko te ʼAtua ʼe ʼofa kia ia ʼaē ʼe ina foaki ʼaki te loto fiafia.” (2 Kolonito 9:7) ʼE ʼaoga ke tou fai he ʼu fakatuʼutuʼu lelei mo kapau ʼe tou fia foaki ʼaki te loto fiafia. Neʼe ʼui fēnei e Paulo ki te kau Kolonito: “Ke koutou tahi tokaga ʼi te ʼuluaki ʼaho ʼo te vāhaʼa ʼo tuku keheʼi he meʼa ʼi tokotou ʼapi, ʼo mulimuli pe ki tokotou fealagia, koteʼuhi, ka ʼau ʼalu atu anai ʼe mole fai ai he tānaki ʼi te temi ʼaia.” (1 Kolonito 16:2) ʼO toe feiā pe, ko nātou fuli ʼaē ʼe nātou fia foaki te ʼu meʼa ʼofa moʼo lagolago ki te gāue ʼo te Puleʼaga, ʼe feala kia nātou takitokotahi ke nātou tuku keheʼi he koga ʼo tonatou totogi ʼo ʼuhiga mo te faʼahi ʼaia, ʼo mulimuli ki tonatou lotolelei.
ʼE Tapuakina e Sehova Ia Nātou Fuli ʼAē ʼe Nātou Faka Maʼuhigaʼi Ia Ia
Ko te ʼu koloā fakasino ʼe mole nātou fakatupu te ʼu koloā fakalaumālie, kae ʼe feala ke tou maʼu te ʼu tapuakina lahi mo kapau ʼe tou fakaʼaogaʼi totatou ʼu koloā—totatou temi mo totatou mālohi pea mo tatatou ʼu meʼa fakasino—ʼaki he loto fia foaki, moʼo faka maʼuhigaʼi ia Sehova. ʼE hoko anai te faʼahi ʼaia, heʼe ʼui fēnei mai e te ʼAtua ʼaē ʼe ʼa ia totonu ia meʼa fuli: “Ko te nefesi ʼaē ʼe manavaʼofa ʼe sino lelei anai pea ko ʼaē ʼe lahi tana fakavai niʼihi, ʼe toe lahi anai mo tona fakavai.”—Tāʼaga Lea 11:25.
ʼI te ʼosi mate ʼo te Hau ko Tavite, neʼe fakaʼaogaʼi e tona foha ko Salomone te ʼu meʼa ʼofa ʼaē neʼe tānaki e tana tāmai moʼo laga te fale lotu faka kolōlia, ohage ko te meʼa ʼaē neʼe fakatotonu e Sehova. Pea lolotoga te temi ʼaē neʼe nofo agatonu ai ia Salomone ʼi tana tauhi ki te ʼAtua, “ko Suta pea mo Iselaele neʼe hoko atu pe tanā maʼuli fīmālie, . . . mai Tane ʼo aʼu ki Pelesepa ʼi te ʼu ʼaho fuli ʼo Salomone.” (1 Hau 4:25) Neʼe fonu te ʼu faleoko pea neʼe fonu gutugutu te ʼu tane lalahi ʼi te vino—ʼi te ‘faka maʼuhigaʼi ʼo Sehova e Iselaele ʼaki tona ʼu koloā.’
Ki muli age, ʼaki te polofeta ko Malakia, neʼe ʼui fēnei e Sehova: “ ‘Koutou fakalelei age, ka koutou ʼahiʼahiʼi ʼau ki te faʼahi ʼaia,’ ko te tala ʼa Sehova ʼo te ʼatu kautau, ‘peʼe mole ʼau avahi anai kia koutou te ʼu matapā ʼo te lagi pea mo huaʼi anai kia koutou he tapuakina ʼo aʼu ki te mole toe ʼi ai ʼo he hoge.’ ” (Malakia 3:10) Ko te ʼu koloā fakalaumālie ʼaē ʼe maʼu e te kau kaugana ʼa Sehova, ʼe ko he fakamoʼoni lelei ʼaia neʼe fakahoko e te ʼAtua tana fakapapau.
ʼE mahino papau ia, ʼe fiafia ia Sehova ʼi tatatou kau ki te fakahaʼele ki muʼa ʼo te ʼu meʼa ʼo te Puleʼaga. (Hepeleo 13:15-16) Pea ʼe ina toe fakapapau mai ʼe lagolago anai kia tatou, mo kapau ʼe tou “haga kumi muʼa te puleʼaga pea mo tona faitotonu.” (Mateo 6:33) ʼAki he loto fiafia, ʼofa pe ke tou ‘faka maʼuhigaʼi ia Sehova ʼaki totatou ʼu koloā.’
[Talanoa ʼo te pasina 28, 29]
Te ʼu Faʼahiga Fai ʼe Fili e ʼIhi Moʼo Foaki ʼo He ʼu Meʼa ʼOfa Ki Te Gāue Faka Malamanei
Ko te tokolahi ʼe nātou tuku kehe he meʼa, peʼe nātou fakatuʼutuʼu ʼi tanatou polokalama, ke nātou ʼai he falā ki te ʼu kesi ʼaiʼaga meʼa ʼofa ʼaē ʼe tohi ai te meʼa ʼaenī: “Te ʼu meʼa ʼofa ki te gāue faka malamanei ʼa te Sosiete—Mateo 24:14.” ʼI te māhina fuli, ʼe fakamomoli e te ʼu kokelekasio te falā ʼaia ki te ʼu nofoʼaga faka malamanei ʼaē ʼi Brooklyn, ʼi New York, peʼe ki te filiale ʼo tonatou telituale.
ʼE feala foki ke tou fakamomoli fakahagatonu te ʼu meʼa ʼofa ki te filiale ʼaē ʼi totatou fenua. ʼE feala ke tou foaki he ʼu faʼahiga koloā kehekehe peʼe ko niʼihi age ʼu meʼa maʼuhiga. ʼE tonu ke tou fakamomoli fakatahi mo te ʼu meʼa ʼaia he tohi fakanounou ʼe fakahā ai ko te ʼu meʼa ʼofa fuli ʼaia.
TE ʼU MEʼA ʼOFA ʼE FAKA TUʼAKOI
ʼE feala ke tou foaki he paʼaga ki te Sosiete Watch Tower, ʼaki te faka tuʼakoi makehe ʼaenī, kapau ʼe toe ʼaoga te paʼaga ʼaia kia tatou, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.
TE FOAKI ʼO HE ʼU MEʼA ʼOFA KUA ʼOSI FAKATUʼUTUʼU
ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai moʼo lagolago ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:
Polices Dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete/he posio. ʼE tonu ke tou fakahā ki te Sosiete te faʼahiga fakatuʼutuʼu ʼaia.
Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʼo tokotou fenua, ʼe feala ke koutou tuku te Sosiete Watch Tower ke tokaga ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi tokotou mate. ʼE tonu ke koutou fakahā kiai te faʼahiga fakatuʼutuʼu ʼaia.
Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa katoa, peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.
Te ʼu Koga Kele Pea Mo Te ʼu Nofoʼaga: ʼE feala ke tou foaki katoa ki te Sosiete Watch Tower te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te Sosiete ʼi muʼa ʼo tatatou foaki kiai te ʼu koloā ʼaia.
Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéi-commis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete totatou ʼu koloā ʼi totatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, kapau ʼe fai mo te kautahi faka lotu. ʼE tonu ke tou fakamomoli ki te Sosiete te lua pepa ʼaē ʼe tohi ʼai totatou loto fakamuli peʼe ko te kotala fidéicommis.
Ko nātou ʼaē ʼe nātou fia ʼiloʼi he faʼahiga meʼa ʼo ʼuhiga mo te ʼu fakatuʼutuʼu ʼo te foaki ʼo he ʼu meʼa ʼofa, ʼe tonu ke nātou faitohi ki te filiale ʼo tonatou fenua.