“Ko Te ʼAtua ʼe ʼOfa Kia Ia ʼAē ʼe Ina Foaki ʼAki He Loto Fiafia”

ʼE LOTO fia foaki ia Sehova. Ei, ʼe ʼui mai e te Tohi-Tapu ʼe ina Foaki “te meʼa ʼofa lelei fuli pea mo te mōlaga haohaoa lelei fuli.” (Sake 1⁠:17) Ohage la, ko te ʼu meʼa ʼaē neʼe fakatupu e te ʼAtua. Neʼe ina fai te meʼa kai lelei pea mo malie; ʼe lanu kehekehe te ʼu fisiʼi teu; ʼe taulekaleka te tō ʼo te laʼā. ʼIo, ko te ʼu agaaga fuli ʼo te ʼu meʼa ʼaē neʼe fakatupu e Sehova ʼe nātou fakahā mai tona ʼofa pea mo tana loto fia foaki. (Pesalemo 19:1, 2; 139:14) Tahi ʼaē meʼa, ʼe Foaki e Sehova ʼaki he loto fiafia. ʼE fakafiafia ʼi tana fai te ʼu meʼa ʼaē ʼe lelei maʼa tana kau kaugana.​—Pesalemo 84:11; 149:4.

Neʼe fakatotonu ki te kau Iselaelite ke nātou faʼifaʼitakiʼi te loto fia foaki ʼa Sehova ʼi tanatou ʼu felogoi mo te hahaʼi. Neʼe ʼui fēnei e Moisese kia nātou: “ ʼE mole tonu anai ke ke fakafefeka tou loto pea ʼe mole tonu anai ke ke pupunu tou nima ki tou tēhina ʼaē ʼe masiva. . . . ʼE tonu anai ke ke foaki ki ai he meʼa, pea ʼe mole tonu anai ke ke loto mānumānu.” (Teutalonome 15:​7, 10) Mai tona ʼuhiga ʼaē neʼe tonu ke nātou foaki ʼaki he loto katoa, koia neʼe tonu ai ke fiafia te kau Iselaelite ʼi tanatou foaki he ʼu meʼa ʼofa.

Neʼe toe fai te tokoni ʼaia ki te kau Kilisitiano. Ei, neʼe ʼui e Sesu ʼe ‘kita fiafia ʼi takita foaki.’ (Gāue 20⁠:35) Neʼe tuku mai te faʼifaʼitaki lelei e te kau tisipulo ʼa Sesu he neʼe nātou foaki ʼaki he loto fiafia. Ohage la, ʼe fakamatala e te Tohi-Tapu, ʼi Selusalemi ko nātou ʼaē neʼe liliu ko he kau Kilisitiano neʼe “nātou fakatau tanatou ʼu koloā pea mo tanatou ʼu kele, pea neʼe nātou vahevahe kia nātou fuli, ʼo mulimuli pe ki te meʼa ʼaē neʼe ʼaoga ki te tagata takitokotahi.”​—Gāue 2:​44, 45.

Kae ki muli age neʼe liliu ʼo masiva te kau Sutea loto fia foaki ʼaia. ʼE mole fakahā mai e te Tohi-Tapu pe koʼe neʼe hoko kia nātou te faʼahi ʼaia. ʼE ʼui e ʼihi hahaʼi popoto neʼe lagi tupu ko te pakupaku ʼaē ʼe talanoa kiai ia Gāue 11:28, 29. Tatau aipe peʼe moʼoni peʼe kailoa, kae ko te kau Sutea Kilisitiano neʼe nātou tau mo te fihifihia fakamataku pea neʼe fia fai e Paulo he ʼu fakatuʼutuʼu ke foaki age te ʼu meʼa ʼaē ʼe ʼaoga kia nātou. Koteā te fakatuʼutuʼu ʼaē neʼe ina fai?

Te Tānaki Meʼa ʼOfa Maʼa Te Kau Māsisiva

Neʼe kole e Paulo ki te ʼu kokelekasio ʼo aʼu ki Masetonia ke nātou tokoni ki te kau Kilisitiano māsisiva ʼo Sutea, pea neʼe ina fakatuʼutuʼu ke tānaki he ʼu meʼa ʼofa maʼa nātou. Neʼe tohi fēnei e Paulo ki te kau Kolonito: “Ohage pe ko te ʼu fakatotonu ʼaē neʼe ʼau fai ki te ʼu kokelekasio ʼo Kalate, koutou fai feiā mo koutou. Koutou tahi tokaga ʼi te ʼuluaki ʼaho ʼo te vāhaʼa ʼo tuku keheʼi he meʼa ʼi tokotou ʼapi, ʼo mulimuli pe ki tokotou fealagia.”a​—1 Kolonito 16⁠:​1, 2.

Neʼe loto e Paulo ke momoli vave te falā ʼaia ki te kau Kilisitiano ʼaē ʼi Selusalemi, kae neʼe mole fakahoko vave e te kau Kolonito te ʼu meʼa ʼaē neʼe ina kole age kia nātou. Neʼe koteā tona tupuʼaga? Neʼe nātou heʼe manavaʼofa koa ki te fihifihia ʼo tonatou ʼu tēhina Sutea? Kailoa, neʼe ʼiloʼi e Paulo ko te kau Kolonito neʼe nātou “mahu ʼi te meʼa fuli, ʼi te tui, ʼi te lea, ʼi te ʼatamai mālama pea mo te fakavilivili katoa.” (2 Kolonito 8⁠:⁠7) Lagi neʼe nātou maʼumaʼua ʼi te tahi ʼu meʼa maʼuhiga, ʼi te temi ʼaē neʼe momoli ai e Paulo kia nātou tana ʼuluaki tohi. Kae ʼi te temi ʼaia neʼe kovi ʼaupito te ʼaluʼaga ʼo te kau Kilisitiano ʼi Selusalemi. Koia la ʼaē neʼe fai ai e Paulo tana lua tohi ki te kau Kolonito.

ʼE Kole Ke Foaki He ʼu Meʼa ʼOfa

ʼUluaki neʼe fakahā e Paulo ki te kau Kolonito te loto fia foaki ʼa te kau Masetonia, ʼaē neʼe nātou tali lelei te tānaki ʼaē neʼe tonu ke fai. Neʼe tohi e Paulo: “ ʼI te lolotoga ʼo te ʼahiʼahi lahi, ko te mahu ʼo tonatou fiafia pea mo te kovi ʼo tonatou masiva neʼe nā faka mahu te koloaʼia ʼo tonatou loto fia foaki.” Neʼe mole ʼaoga ke fakakolekole ki te kau Masetonia ke nātou fai te faʼahi ʼaia. Kae neʼe ʼui e Paulo “ko nātou totonu, neʼe nātou kole mamahi mai kia mātou te pilivilesio ʼaē ke nātou foaki ʼaki he lotolelei.” ʼE fakaofoofo te loto fia foaki ʼa te kau Masetonia mokā tou manatuʼi “tonatou masiva fakaʼofaʼofa.”​—2 Kolonito 8:​2-4.

ʼI tana vikiʼi te kau Masetonia, neʼe faiga koa ia Paulo ke ina fakatupu ʼi te kau Kolonito he loto fakataupiepie? Kailoa, he neʼe ina ʼiloʼi ʼe mole lelei te faʼahiga fai ʼaia moʼo uga he tahi. (Kalate 6⁠:⁠4) Tahi ʼaē meʼa, neʼe ina ʼiloʼi neʼe mole ʼaoga ke ina fakaufiufi te kau Kolonito ke nātou fai te meʼa ʼaē ʼe tonu ke fai. Kae neʼe falala ki tanatou ʼofa moʼoni ki tonatou ʼu tēhina Sutea pea mo tanatou holi ʼaē ke nātou foaki he ʼu meʼa ʼofa kia nātou. Neʼe ina ʼui fēnei kia nātou: “Kua hili kiai te taʼu katoa, neʼe mole gata ʼaki pe takotou kamata fai [ʼo te meʼa ʼaia] kae neʼe hilifaki kiai mo takotou fia fai [te meʼa ʼaia].” (2 Kolonito 8⁠:10) Ei, ʼo ʼuhiga mo ʼihi agaaga ʼo te tānaki meʼa ʼofa ʼaia, ko te kau Kolonito totonu neʼe nātou tuku he faʼifaʼitaki lelei. Neʼe tohi fēnei e Paulo kia nātou: “ ʼE ʼau ʼiloʼi tokotou lotolelei pea neʼe ʼau fai te fakavikiviki ʼaia ʼo ʼuhiga mo koutou ki te kau Masetonia. Ko takotou fakamalotoloto neʼe malave ki te tokolahi ʼo nātou.” (2 Kolonito 9⁠:⁠2) Kae neʼe kua tonu leva ke uga nātou e tonatou lotolelei pea mo tanatou fakamalotoloto ke nātou foaki he ʼu meʼa ʼofa.

Koia neʼe ʼui fēnei ai e Paulo kia nātou: “Ke tahi fai pe ki te meʼa ʼaē kua ina fakatotonu ʼi tona loto, ʼo mole fai ʼaki he loto fakahemala peʼe ʼaki he loto fakakinau, heʼe ko te ʼAtua ʼe ʼofa kia ia ʼaē ʼe ina foaki ʼaki te loto fakafiafia.” (2 Kolonito 9⁠:⁠7) Neʼe mole fia fakakinau e Paulo te kau Kolonito ke nātou fai he ʼu meʼa ʼofa, heʼe mole feala ke kita foaki ʼaki he loto fiafia mo kapau ʼe fakamaʼua mai ke kita fai te faʼahi ʼaia. ʼE mahino ia, ʼi te manatu ʼa Paulo, ko te kau Kolonito neʼe kua nātou lotolelei pea neʼe kua nātou fakatotonu ʼi tonatou loto ke nātou foaki he ʼu meʼa ʼofa. Tahi ʼaē meʼa, neʼe ʼui age e Paulo kia nātou: “He kapau ʼe ʼi ai muʼa te lotolelei, pea ʼe tali tāfito ia ʼo fai ki te meʼa ʼaē ʼe maʼu e he tahi, ka mole fai ki te meʼa ʼaē ʼe mole maʼu e he tahi.” (2 Kolonito 8:​12) Ei, kapau ʼe lotolelei he tahi​—kapau ʼe ko te ʼofa ʼaē ʼe ina uga he tahi ke ina foaki he meʼa ʼofa​—pea ʼe leleiʼia e te ʼAtua te meʼa ʼofa ʼaē ʼe ina foaki, tatau aipe peʼe hage ʼe veliveli te meʼa ʼofa ʼaia.​—Vakaʼi ia Luka 21:​1-4.

Tou Foaki ʼAki He Loto Fiafia ʼi Te Temi Nei

Ko te tānaki meʼa ʼofa ʼaē neʼe fai maʼa te kau Kilisitiano Sutea, ʼe ko he faʼifaʼitaki lelei ʼaupito maʼa tatou ia ʼaho nei. Ko te kau Fakamoʼoni ʼa Sehova ʼe nātou fai faka mafola ʼi te malamanei katoa pea mo nātou fafaga te toko lauʼi miliona hahaʼi ʼaē ʼe pakupaku ʼi te faʼahi fakalaumālie. (Isaia 65:13, 14) ʼE nātou fai te faʼahi ʼaia moʼo fakalogo ki te fakatotonu ʼaenī ʼa Sesu: “Koutou ʼolo pea ke koutou fai ni ʼu tisipulo ʼi te hahaʼi ʼo te fenua fuli pe, ʼo papitemaʼi ia nātou . . . ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”​—Mateo 28:19, 20.

Ko te fakahoko ʼo te gāue ʼaia ʼe mole ko he meʼa faigafua. ʼE maʼua ke taupau te ʼu fale misionea pea mo te ʼu filiale ʼi te malamanei katoa. Tahi ʼaē meʼa, ʼe tonu ke laga te ʼu Fale ʼo te Puleʼaga ke feala ai ke fakatahi te hahaʼi atolasio ʼa Sehova ʼi te ʼu fale lelei pea ke nātou fefakaloto mālohiʼaki. (Hepeleo 10:24, 25) ʼI ʼihi temi, ko te kau Fakamoʼoni ʼa Sehova ʼe nātou momoli te ʼu meʼa ʼofa ki te ʼu fenua ʼaē neʼe hoko ai he ʼu tuʼutāmaki faka natula.

Koutou manatuʼi foki mo te toe paʼaga ʼaē ʼe fakaʼaogaʼi ki te tā tohi. ʼI te vāhaʼa fuli ʼe tā te ʼu Tule Leʼo e 22 000 000 pea mo te ʼu Réveillez-vous! e 20 000 000. ʼO hilifaki ki te meʼa kai fakalaumālie ʼaia ʼaē ʼe foaki tuʼumaʼu, ʼi te taʼu fuli ʼe faʼu mo te ʼu lauʼi miliona tohi, mo te ʼu kaupepa, mo te ʼu kaseti pea mo te ʼu foʼi fime viteo.

ʼE totogi feafeaʼi te ʼu meʼa ʼaia? ʼE totogi ʼaki te ʼu meʼa ʼofa ʼaē ʼe foaki ʼaki he lotolelei. ʼE nātou foaki te ʼu meʼa ʼofa ʼaia, mole ʼuhi ko hanatou fia hā ki te hahaʼi peʼe ʼuhi heʼe nātou fia laupisi, kae ʼe nātou fai heʼe nātou fia lagolago ki te tauhi moʼoni ki te ʼAtua. Koia ʼe fiafia ia ia ʼaē ʼe ina foaki pea ina maʼu ai te tapuakina ʼa te ʼAtua. (Malakia 3:​10; Mateo 6:​1-4) Māʼiape la mo nātou liliki ʼo te kau Fakamoʼoni ʼa Sehova, ʼe nātou foaki ʼaki he loto fiafia. Ohage la, ʼi tana ʼosi logo ʼaē neʼe tō te afā ki te potu fenua ʼo Amelika, neʼe momoli e Allison ʼaē ʼe taʼu fā ia tola e lua. Neʼe ina tohi fēnei: “Koʼeni te gataʼaga ʼo taku falā. ʼE ʼau ʼiloʼi ko nātou liliki, ʼe mole kei ʼi ai hanatou ʼu kiʼi meʼa gaoʼi, pea mo hanatou ʼu tohi. ʼAki te falā ʼaia, ʼe lagi feala anai ke koutou totogi he tohi maʼa he kiʼi taʼahine ʼe ma taʼu tahi.” Ko Maclean ʼaē ʼe taʼu valu, neʼe ina tohi neʼe fiafia he neʼe mole mate he tēhina ʼi te afā ʼaia. Neʼe ina toe ʼui fēnei: “Neʼe ʼau maʼu tola e 17 he ko ʼau pea mo taku tāmai neʼe ma fakatau te ʼu meʼa gigila ʼo te ʼu tekaʼi motokā. Neʼe ʼau fia totogi he meʼa ʼaki te falā ʼaia, kae ki muli mai neʼe ʼau manatuʼi te ʼu tēhina.”​—Koutou vakaʼi mo te talanoa ʼi ʼoluga.

ʼE hā lelei ai, ʼe loto fiafia ia Sehova ʼi tana sio ki te kau tūpulaga pea mo te hahaʼi lalahi ʼaē ʼe nātou fakamuʼamuʼa te ʼu meʼa ʼo tona Puleʼaga pea mo ‘faka maʼuhigaʼi ia ia ʼaki tanatou ʼu meʼa maʼuhiga.’ (Tāʼaga Lea 3:9, 10) ʼE mahino ia, ʼe mole he tahi ʼe feala ke ina foaki he ʼu koloā kia Sehova, heʼe ʼaʼana ia meʼa fuli. (1 Fakamatala 29⁠:​14-17) Kae ki te kau atolasio ʼa Sehova, ko te lagolago ki te gāue fai faka mafola ʼe ko he pilivilesio ʼe feala ai ke nātou fakahā tanatou ʼofa kia te ia. ʼE tou loto fakafetaʼi kia nātou fuli ʼaē ʼe nātou fia foaki ʼaki te manatu ʼaia.

[Nota ʼi te lalo pasina]

[Talanoa ʼo te pasina 26, 27]

Te ʼu Faʼahiga Fai ʼAē ʼe Fili e ʼIhi Moʼo Foaki ʼo He ʼu Meʼa ʼOfa Ki Te Gāue Faka Malamanei

Ko te tokolahi ʼe nātou tuku kehe he meʼa, peʼe nātou fakatuʼutuʼu ʼi tanatou polokalama, ke nātou ʼai he falā ki te ʼu kesi ʼaiʼaga meʼa ʼofa ʼaē ʼe tohi ai te meʼa ʼaenī: “Te ʼu meʼa ʼofa ki te gāue faka malamanei ʼa te Sosiete​—Mateo 24⁠:14.” ʼI te māhina fuli, ʼe momoli e te ʼu kokelekasio te falā ʼaia ki te ʼu nofoʼaga faka malamanei ʼaē ʼi Brooklyn, ʼi New York, peʼe ki te filiale ʼo tonatou telituale.

ʼE toe feala foki ke tou momoli fakahagatonu te ʼu meʼa ʼofa ki te filiale ʼo totatou fenua. ʼE feala ke tou foaki he ʼu faʼahiga koloā kehekehe pe ko niʼihi age ʼu meʼa maʼuhiga. ʼE tonu ke tou momoli fakatahi mo te ʼu meʼa ʼaia he tohi fakanounou ʼe fakahā ai ʼe ko te ʼu meʼa ʼofa fuli ʼaia.

Te ʼu Meʼa ʼOfa ʼe Faka Tuʼakoi

ʼE feala ke tou foaki he paʼaga ki te Sosiete Watch Tower, ʼaki te faka tuʼakoi makehe ʼaenī, kapau ʼe toe ʼaoga te paʼaga ʼaia kia tatou, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.

Te Foaki ʼo He ʼu Meʼa ʼOfa Kua ʼOsi Fakatuʼutuʼu

ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai meʼa ʼofa moʼo lagolago ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:

Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete/ he posio.

Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʼo tokotou fenua, ʼe feala ke koutou tuku te Sosiete Watch Tower ke tokaga ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi takotou mate.

Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa katoa, peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.

Te ʼu Kele Pea Mo Te ʼu Nofoʼaga: ʼE feala ke tou foaki katoa ki te Sosiete Watch Tower te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te Sosiete ʼi muʼa ʼo tatatou foaki kiai te ʼu koloā ʼaia.

Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéicommis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete tatatou ʼu koloā ʼi tatatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, kapau ʼe fai mo te kautahi faka lotu.

Ko nātou ʼaē ʼe nātou fia ʼiloʼi he faʼahiga meʼa ʼo ʼuhiga mo te ʼu fakatuʼutuʼu ʼo te foaki ʼo he ʼu meʼa ʼofa, ʼe tonu ke nātou faitohi ki te filiale ʼo tonatou fenua.

[Talanoa ʼo te pasina 28]

Ko Te Kau Tamaliki ʼe Nātou Foaki ʼAki He Loto Fiafia!

ʼE ʼau fia foaki atu kia koutou te falā ʼaenī ke koutou faʼu he tahi ʼu tohi maʼa tatou. Neʼe ʼau maʼu te falā ʼaia he neʼe ʼau tokoni ki taku tāmai. ʼE ʼau fakamālo atu ki te gāue kinakina ʼaē ʼe koutou fai.​—Ko Pamela, taʼu fitu.

ʼE ʼau momoli atu kia koutou tola e 6,85 moʼo lagolago ki te laga ʼo te ʼu Fale ʼo te Puleʼaga. Neʼe ʼau maʼu te falā ʼaia ʼi taku fakatau te huʼa tīpolo ʼi te ala.​—Ko Selena, taʼu ono.

Neʼe ʼau taupau te matuʼa moa pea neʼe ʼi ai tona ʼu kiʼi ʼuhi, ko te moa tagata pea mo te moa fafine. Neʼe ʼau foaki te moa ʼaia kia Sehova. Neʼe ina maʼu tona ʼu kiʼi ʼuhi e tolu pea neʼe ʼau fakatau nātou. ʼE ʼau momoli atu kia koutou te falā ʼaia ke koutou fakaʼaogaʼi ki te gāue ʼa Sehova.​—Ko Thierry, taʼu valu.

ʼE ko te gataʼaga ʼaia ʼo taku falā! Fakalelei tokotou loto, kae koutou fakaʼaogaʼi fakapotopoto te falā ʼaia. Neʼe ʼau gāue kinakina ke ʼau maʼu te falā ʼaia. Ko tola e 21.​—Ko Sarah, taʼu hogofulu.

Neʼe ʼau maʼu te tuʼulaga ʼuluaki ʼi toku faleako ʼuhi ko te pepa ʼaē neʼe ʼau tohi, koia neʼe tonu ai ke ʼau kau ki te fakataupiepie ʼo te potu fenua katoa. Neʼe ʼau toe maʼu ai te tuʼulaga ʼuluaki pea neʼe ʼau tuʼulaga lua ʼi te tisitilike katoa. Neʼe ʼau maʼu taku falā ʼi te ʼu meʼa fuli ʼaia. ʼE ʼau fia vahevahe te falā ʼaia mo te Sosiete. ʼI taku manatu neʼe ʼau maʼu te ʼu fakapale ʼaia ʼuhi ko toku ako lelei ʼi te Ako ʼo Te Minisitelio Faka Teokalatike. Neʼe mole ʼau loto tuʼania ʼi taku lau taku pepa ia muʼa ʼo te ʼu hahaʼi fai fakamāu.​—Ko Amber, ʼe kau ki te kalasi ono ʼi te kolesi.

ʼE ʼau fia foaki atu kia koutou te meʼa ʼaenī maʼa Sehova. Koutou fehuʼi age kia ia pe koteā ʼaē ʼe tonu ke koutou fai mo te meʼa ʼaenī. ʼE ina ʼiloʼi meʼa fuli.​—Ko Karen, taʼu ono.

[Paki ʼo te pasina 25]

Ko te ʼu gāue ʼa te kau Fakamoʼoni ʼa Sehova ʼe lagolago ʼaki te ʼu meʼa ʼofa ʼe fai ʼaki he lotolelei