ʼE Foaki Lahi e Sehova Te Moʼoni Pea Mo Te Tokalelei
“ ʼE ʼau fakamālōlō anai ia nātou pea ʼe ʼau fakahā anai kia nātou te mahu ʼo te tokalelei pea mo te moʼoni.”—Selemia 33:6.
1, 2. (a) ʼO ʼuhiga mo te tokalelei, koteā ʼaē ʼe ʼui ʼo ʼuhiga mo te ʼu puleʼaga? (b) ʼI te taʼu 607 ʼi muʼa ʼo totatou temi, koteā te meʼa ʼaē neʼe fakamahino e Sehova ki Iselaele ʼo ʼuhiga mo te tokalelei?
TE TOKALELEI! Ko te meʼa ʼe tou holi fuli kiai, kae ʼe ko he meʼa neʼe hoko tahitahiga ʼi te hisitolia ʼo te tagata! Tāfito ʼi te ʼuafulu sēkulō, ʼe mole ko he sēkulō ʼo te tokalelei. Kae neʼe hoko te ʼu tau fakamataku e lua ʼe mole honā fakatatau kua hoko ʼi te hisitolia ʼo te tagata. ʼI te hili ʼo te ʼuluaki tau faka malamanei, neʼe fakatuʼu te Sosiete ʼo te ʼu Puleʼaga moʼo taupau te tokalelei ʼi te malamanei, kae neʼe tō te kautahi ʼaia. ʼI te hili ʼo te lua tau faka malamanei, neʼe fakatuʼu te kautahi ʼo te ʼu Puleʼaga Fakatahi ke ina toe fakahoko te faʼahi ʼaia. ʼI tatatou lau te ʼu sulunale ʼi te ʼaho fuli, ʼe tou sio ai ʼe mole feala tuʼa tahi ki te kautahi ʼaia ke ina fakatuʼu te tokalelei.
2 ʼE tonu koa ke tou punamaʼuli ki te mole lava foaki mai e te ʼu kautahi fakatagata ia te tokalelei? Kailoa. Ia taʼu e 2 500 tupu ki muʼa atu neʼe ʼi ai te meʼa neʼe mahino kiai te hahaʼi ʼa te ʼAtua, ia Iselaele, ʼo ʼuhiga mo te faʼahi ʼaia. ʼI te fitu sēkulō ʼi muʼa ʼo totatou temi, neʼe tuʼutāmakiʼia te tokalelei ʼo Iselaele ʼuhi ko te mālohi faka malamanei ʼaē neʼe tuputupu, ia Papiloni. Neʼe haga ia Iselaele ki Esipito ʼo ʼuhiga mo te tokalelei. Kae neʼe mole feala ke fakahoko e Esipito te faʼahi ʼaia. (Selemia 37:5-8; Esekiele 17:11-15) ʼI te taʼu 607 ʼi muʼa ʼo totatou temi, neʼe maumauʼi e te ʼu kautau ʼo Papiloni te ʼu kaupā ʼo Selusalemi pea mo nātou tutu te fale lotu ʼa Sehova. Koia, neʼe mahino ai ki Iselaele te vaʼiganoa ʼo te falala ki te ʼu kautahi fakatagata. Neʼe mole nātou maʼu te tokalelei, kae neʼe ʼave fakakinau nātou ki Papiloni.—2 Fakamatala 36:17-21.
3. Ke hoko te ʼu palalau ʼaē neʼe fai e Sehova ʼaki ia Selemia, koteā te ʼu meʼa neʼe hoko ʼi te hisitolia neʼe toe akoʼi ai te kau Iselaelite ʼo ʼuhiga mo te tokalelei?
3 Kae, ʼi muʼa ʼo te tō ʼo Selusalemi, neʼe fakahā e Sehova ko ia anai ʼaē ka ina foaki te tokalelei moʼoni ki Iselaele, kae mole ko Esipito. Neʼe ina fakapapau fēnei ʼaki ia Selemia: “ ʼE ʼau fakahā anai kia nātou te mahu ʼo te tokalelei pea mo te moʼoni. Pea ʼe ʼau toe ʼaumai anai te kau popūla ʼo Suta, pea mo te kau popūla ʼo Iselaele, pea ʼe ʼau toe fakatuʼu anai nātou ohage ko te kamata.” (Selemia 33:6, 7) Neʼe kamata hoko te fakapapau ʼa Sehova ʼi te taʼu 539 ʼi muʼa ʼo totatou temi, ʼi te temi ʼaē neʼe fakaʼauha ai ia Papiloni pea mo foaki ai te ʼāteaina ki te kau Iselaelite ʼaē neʼe ʼaunofo ʼi Papiloni. (2 Fakamatala 36:22, 23) ʼI te fakaʼosi ʼo te taʼu 537 ʼi muʼa ʼo totatou temi, neʼe fakamanatuʼi e te kūtuga Iselaelite te ʼAho Lahi ʼo te ʼu Fale Lau ʼi te kele ʼo Iselaele, ko tona ʼuluaki fai ʼaia talu mai ia taʼu e 70 ki muʼa atu! ʼI te hili ʼo te ʼaho lahi ʼaia, neʼe nātou toe laga te fale lotu ʼa Sehova. Neʼe malave feafeaʼi kia nātou te faʼahi ʼaia? ʼE fakamatala fēnei e te Tohi-Tapu: “Neʼe nātou kalaga leʼolahi ʼo nātou fakavikiviki ia Sehova, koteʼuhi neʼe fakatuʼu te ʼu tafitoʼaga ʼo te ʼapi ʼa Sehova.”—Esitalasi 3:11.
4. Neʼe uga feafeaʼi e Sehova te kau Iselaelite ke nātou toe laga te fale lotu, pea koteā te fakapapau neʼe ina fai ʼo ʼuhiga mo te tokalelei?
4 Kae, hili te kamata ʼo te fakafiafia ʼaia, neʼe lotovaivai te kau Iselaelite ʼuhi ko nātou ʼaē neʼe fakafeagai ki te gāue, pea neʼe nātou fakagata te laga ʼo te fale lotu. Hili kiai te ʼu taʼu, neʼe fekauʼi e Sehova te ʼu polofeta ko Asea pea mo Sakalia ke nā uga te kau Iselaelite ke nātou fakaʼosi te laga ʼo te fale lotu. Neʼe lagi nātou ōfo ʼi tanatou logo ʼaē ki te ʼui fēnei e Asea ʼo ʼuhiga mo te fale lotu ʼaē neʼe tonu ke laga: “ ‘Ko te kolōlia ʼo te ʼapi ʼaenī ʼe lahi age anai ia ʼi te kolōlia ʼo te [ʼapi] ʼāfea,’ ko te ʼui ʼaia ʼa Sehova ʼo te ʼatu kautau. ‘Pea ʼe ʼau foaki anai ki te potu ʼaenī te tokalelei’ ”!—Asea 2:9.
ʼE Fakahoko e Sehova Tana ʼu Fakapapau
5. Koteā ʼaē ʼe feala ke tou fakatokagaʼi ʼi te kapite valu ʼo te tohi ʼo Sakalia?
5 ʼI te Tohi-Tapu, ʼi te tohi ʼa Sakalia, ʼe tou maʼu ai te ʼu meʼa kehekehe neʼe hā pea mo te ʼatu ʼu lea faka polofeta neʼe nātou fakaloto mālohiʼi te hahaʼi ʼa te ʼAtua ʼaē neʼe maʼuʼuli ʼi te ono sēkulō ʼi muʼa ʼo totatou temi. Ko te ʼu lea faka polofeta ʼaia ʼe nātou haga fakamoʼoni mai kia tatou ʼo ʼuhiga mo te tokoni ʼa Sehova. ʼE nātou foaki mai te ʼu tupuʼaga lahi ke tou tui, ʼe toe foaki anai e Sehova te tokalelei ki tana hahaʼi ia ʼaho nei. Ohage la, ʼi te kapite valu ʼo te tohi ʼo te polofeta ko Sakalia, neʼe ina fai tuʼa fitu te ʼu palalau ʼaenī: ‘Koʼeni te meʼa ʼaē neʼe ʼui e Sehova.’ ʼI te lakaga fuli, ʼe hoa ki te ʼu palalau ʼaia te ʼu palalau fakaʼatua ʼo ʼuhiga mo te tokalelei ʼo te hahaʼi ʼa te ʼAtua. Ko ʼihi ʼi te ʼu fakapapau ʼaia neʼe hoko ʼi te temi ʼo Sakalia. Kae ʼe lahi te ʼu lea faka polofeta neʼe hoko peʼe lolotoga hoko ʼi te temi nei.
“ ʼE ʼAu Maheka Anai Maʼa Sione”
6, 7. Neʼe liliu feafeaʼi ia Sehova ʼo ‘maheka maʼa Sione ʼaki he ʼita lahi’?
6 ʼE ʼuluaki hā te ʼu palalau ʼaia ia Sakalia 8:2, ʼaē ʼe ʼui fēnei ai: “Koʼeni te meʼa ʼaē neʼe ʼui e Sehova ʼo te ʼatu kautau: ‘ ʼE ʼau maheka anai maʼa Sione ʼaki he maheka lahi, pea ʼe ʼau maheka anai maʼa ia ʼaki he ʼita lahi.’ ” Ko te fakapapau ʼa Sehova ʼaē ʼe maheka fakamalotoloto ʼaupito anai, ʼe faka ʼuhiga maʼa tana hahaʼi, ʼe tokaga anai ke nātou toe maʼu te tokalelei. Ko te toe fakanofo ʼo Iselaele ki tona fenua pea mo te toe fakatuʼu ʼo te fale lotu neʼe ko te fakamoʼoni ʼo te tokaga fakamalotoloto ʼaia ʼa Sehova.
7 Kae, koteā ʼaē neʼe hoko kia nātou ʼaē neʼe fakafeagai ki te hahaʼi ʼa Sehova? Neʼe tatau tana tokaga fakamalotoloto ki tana hahaʼi pea mo tona “ ʼita lahi” ki te ʼu fili ʼaia. ʼI te temi ʼaē neʼe tauhi ai te kau Sutea agatonu ʼi te fale lotu ʼaē neʼe toe laga, neʼe feala ke nātou fakakaukauʼi te meʼa ʼaē neʼe hoko ki te mālohi ʼo Papiloni, ʼaē kua tō ʼi te temi nei. Neʼe feala pe foki ke nātou fakakaukauʼi te mole iku ʼo te ʼu faiga ʼa te ʼu fili ke nātou tāʼofi te toe laga ʼo te fale lotu. (Esitalasi 4:1-6; 6:3) Pea neʼe feala ke nātou fakamālo kia Sehova ʼi tana fakahoko tana fakapapau. Neʼe nātou mālo ʼuhi ko te tokaga fakamalotoloto ʼa Sehova!
“Te Kolo ʼo Te Moʼoni”
8. ʼI te temi ʼo Sakalia, neʼe feafeaʼi te liliu ʼo Selusalemi ko te kolo ʼo te moʼoni, ʼo mole hage ko te temi muʼa?
8 Ko tona tuʼa lua ʼaē te tohi fēnei e Sakalia: “Koʼeni te meʼa ʼaē neʼe ʼui e Sehova.” Koteā te ʼu palalau ʼaē ʼe fai e Sehova ʼi te lakaga ʼaia? “ ʼE ʼau toe liliu mai anai ki Sione pea ʼe ʼau nofo anai ʼi te lotolotoiga ʼo Selusalemi; pea ʼe mahino papau ia, ʼe fakahigoa anai ia Selusalemi ko te kolo ʼo te moʼoni, pea ko te moʼuga ʼo Sehova ʼo te ʼatu kautau, te moʼuga maʼoniʼoni.” (Sakalia 8:3) ʼI muʼa ʼo te taʼu 607 ʼi muʼa ʼo totatou temi, ʼe mahino papau ia ko Selusalemi neʼe mole ko te kolo ʼo te moʼoni. Neʼe aga fakahehema tana kau pelepitelo pea mo tana kau polofeta, pea neʼe heʼe agatonu tana hahaʼi. (Selemia 6:13; 7:29-34; 13:23-27) ʼI te temi nei, kua toe laga e te hahaʼi ʼa te ʼAtua te fale lotu, ʼo nātou fakahā ai tanatou lagolago ki te tauhi maʼa. ʼI hona ʼaluʼaga fakalaumālie, neʼe toe nofo ia Sehova ʼi Selusalemi. Neʼe toe palalau te hahaʼi ki te ʼu moʼoni ʼo te tauhi maʼa ʼi Selusalemi, pea neʼe feala ai ke fakahigoaʼi ko “te kolo ʼo te moʼoni.” Ko te potu māʼoluga ʼaē neʼe tuʼu ai, neʼe ko “te moʼuga ʼo Sehova.”
9. Koteā te fetogi fakaofoofo ʼaē neʼe hoko ki “te Iselaele ʼo te ʼAtua” ʼi te taʼu 1919?
9 Logope la ko te ʼu tala ʼaia e lua neʼe faka ʼuhiga ki te Iselaele ʼāfea, ʼe toe faka ʼuhiga lahi foki kia tatou ʼi te kua vave ʼosi ʼo te ʼuafulu sēkulō. Kua teitei hili kiai taʼu e 80, lolotoga te ʼuluaki tau faka malamanei, ko te toko lauʼi afe kau fakanofo ʼaē neʼe nātou fakafofoga “te Iselaele ʼo te ʼAtua” neʼe nātou ʼaunofo ʼi te faʼahi fakalaumālie, ohage pe ko te ʼaunofo ʼa te Iselaele ʼāfea ʼi Papiloni. (Kalate 6:16) ʼI te lea faka polofeta, neʼe fakatatau nātou ki he ʼu sino mate ʼe tuku ʼi te ala. Kae neʼe nātou fia tauhi moʼoni kia Sehova “ ʼaki te laumālie pea mo te moʼoni.” (Soane 4:24) Koia, ʼi te taʼu 1919, neʼe faka ʼāteaina nātou e Sehova mai tanatou ʼaunofo, ʼo ina fakatuʼuake nātou mai tanatou mate fakalaumālie. (Fakahā 11:7-13) Neʼe ʼio Sehova ʼaki he leʼo mālohi ki te fehuʼi faka polofeta ʼaenī ʼa Isaia: “Ko he fenua ʼe tupu anai koa ʼi he ʼaho e tahi ʼi te ʼu nunuʼa ʼo he faifānau? Peʼe ko he fenua ʼe tupu tuʼa tahi anai koa?” (Isaia 66:8) ʼI te taʼu 1919, neʼe toe maʼuli te hahaʼi ʼa Sehova ohage ko he puleʼaga fakalaumālie ʼi tonatou “fenua,” peʼe nātou toe maʼuʼuli ʼi he ʼaluʼaga fakalaumālie ʼi te kele.
10. ʼO kamata ʼi te taʼu 1919, koteā te ʼu tapuakina ʼaē neʼe maʼu e te kau Kilisitiano fakanofo ʼi tonatou “fenua”?
10 ʼI tanatou maʼuli fīmālie ʼi te fenua ʼaia, neʼe tauhi ai te kau Kilisitiano fakanofo ʼi te fale lotu lahi fakalaumālie ʼa Sehova. ʼE fakahigoaʼi nātou ko “te tagata kaugana agatonu mo poto,” ʼe ina tali te maʼua ʼaē ke tokaga ki te ʼu meʼa ʼa Sesu ʼi te kele, ko he pilivilesio ʼe kei nātou fakahoko ʼi te kua vave ʼosi ʼo te 20 sēkulō. (Mateo 24:45-47) Kua mahino lelei kia nātou ko Sehova ko “te ʼAtua totonu ʼo te tokalelei.”—1 Tesalonika 5:23.
11. Neʼe feafeaʼi te liliu ʼo te kau takitaki lotu ʼo te Keletiate ko he ʼu fili ʼa te hahaʼi ʼa te ʼAtua?
11 Kae, koteā ʼaē ka hoko ki te ʼu fili ʼo te Iselaele ʼo te ʼAtua? Ko te tokaga fakamalotoloto ʼa Sehova ki tana hahaʼi ʼe tatau mo tana ʼita ki te kau fili. Lolotoga te ʼuluaki tau faka malamanei, neʼe fakahoko e te kau takitaki lotu ʼo te Keletiate te ʼu faigataʼaʼia lahi, he neʼe nātou faiga ke nātou molehi te kiʼi kūtuga Kilisitiano ʼaē neʼe nātou palalau ʼo ʼuhiga mo te moʼoni, kae neʼe mole hoko tanatou ʼu faiga. Lolotoga te lua tau faka malamanei, ko te kau takitaki lotu ʼo te Keletiate neʼe nātou felogoi tahi ʼi te meʼa e tahi: ʼI te ʼu faʼahi lualua ʼaē ʼe fetauʼaki, neʼe nātou uga te ʼu puleʼaga ke nātou molehi te kau Fakamoʼoni ʼa Sehova. Māʼiape la ia ʼaho nei, ʼi te ʼu fenua ʼe lahi ʼaupito, ʼe uga e te kau takitaki lotu te ʼu puleʼaga ke nātou faka tuʼakoi peʼe nātou tapuʼi te fai faka mafola ʼa te kau Fakamoʼoni ʼa Sehova.
12, 13. ʼE hā feafeaʼi te ʼita ʼa Sehova ki te Keletiate?
12 Kae neʼe sio ia Sehova ki te faʼahi ʼaia. ʼI te hili ʼo te ʼuluaki tau faka malamanei, neʼe tō te Keletiate pea mo te toe ʼo Papiloni Lahi. (Fakahā 14:8) Neʼe hoki hā lelei te kua tō ʼo te Keletiate ʼi te 1922, he neʼe hoko te ʼu tautea fakatā, ʼo fakahā ai ki te hahaʼi tana mate ʼi te faʼahi fakalaumālie, pea mo te fakaʼauha ʼaē ka hoko ki ai. (Fakahā 8:7–9:21) Moʼo fakamoʼoni ʼe kei hoko atu te ʼu tautea ʼaia, ko te akonaki ko tona kupu tāfito: “Ko Te Fakaʼosi ʼo Te Lotu Hala Kua Ōvi Mai” neʼe fai ʼi te malamanei katoa ʼi te ʼaho 23 ʼo ʼApelili 1995, ʼo hoko ai mo te tufa ʼo te ʼu lauʼi teau miliona kiʼi pepa lotu ʼo te ʼu Logo ʼo Te Puleʼaga.
13 Ia ʼaho nei, ʼe nofo te Keletiate ʼi hona ʼaluʼaga fakaʼofaʼofa. ʼI te 20 sēkulō, neʼe fetāmateʼiʼaki tana ʼu hahaʼi ʼi te ʼu tau fakalialia, ʼaki te tapuakina ʼo tana ʼu patele pea mo tana kau takitaki lotu. ʼI ʼihi fenua ʼe mole kei ʼi ai hona mālohi. Kua tonu ke fakaʼauha te Keletiate pea mo te toe ʼo Papiloni Lahi.—Fakahā 18:21.
Ko Te Tokalelei Maʼa Te Hahaʼi ʼa Sehova
14. Koteā te lea faka polofeta ʼe fakatā te nofo ʼa te hahaʼi ʼi te tokalelei?
14 ʼI te tahi faʼahi, ʼi te taʼu 1996 ʼaenī, ʼe maʼu e te hahaʼi ʼa Sehova te tokalelei lahi ʼi tonatou fenua ʼaē neʼe toe laga, ohage ko tona fakamatala fēnei ʼi te palalau tuʼa tolu ʼa Sehova: “Koʼeni te meʼa ʼaē neʼe ʼui e Sehova ʼo te ʼatu kautau, ‘ ʼE kei heheka anai ni kau matuʼa pea mo ni kau finematuʼa ʼi te ʼu lapalasi ʼo Selusalemi ʼaē ʼe kaugamālie ai te hahaʼi, ʼo tahi toʼo tana tokotoko ʼi tona nima, ʼuhi ko te lahi ʼo tonatou ʼu ʼaho. Pea ko te ʼu potu ʼo te kolo ʼaē ʼe kaugamālie ai te hahaʼi, ʼe fakahahaʼi anai e te kau tama pea mo te kau taʼahine ʼaē ʼe nātou lolotoga gaoʼi ʼi tona ʼu potu ʼaē ʼe kaugamālie ai te hahaʼi.’ ”—Sakalia 8:4, 5.
15. Logope te fetauʼaki ʼo te ʼu puleʼaga, koteā te tokalelei ʼaē neʼe maʼu e te ʼu kaugana ʼa Sehova?
15 ʼE fakahā e te paki ʼaia he meʼa fakatalakitupua ʼi te mālama ʼaenī ʼaē ʼe lahi ai te tau—ʼe ʼi ai te hahaʼi ʼe nātou maʼuʼuli ʼi te tokalelei. Talu mai te taʼu 1919, neʼe hoko te lea faka polofeta ʼa Isaia, ʼaē neʼe ina ʼui fēnei: “Neʼe ʼui e Sehova: ‘ ʼE hoholo anai te tokalelei ki ʼaē ʼe mamaʼo pea mo ʼaē ʼe ōvi mai, pea ʼe ʼau fakamālōlō anai ia ia.’ . . . Neʼe ʼui e toku ʼAtua: ‘Kae ʼe mole ʼi ai he tokalelei maʼa te kau agakovi.’ ” (Isaia 57:19-21) ʼE mahino ia, ko te hahaʼi ʼa Sehova, logope ʼe mole nātou kau ʼi te malamanei, ʼe mole feala ke nātou hāo mai te ʼu maveuveu faka puleʼaga. (Soane 17:15, 16) ʼI ʼihi fenua, ʼe nātou kātakiʼi te ʼu faigataʼaʼia fakamataku, pea ko ʼihi ia nātou neʼe mamate. Kae, ʼe maʼu e te kau Kilisitiano moʼoni te tokalelei ʼi te ʼu faʼahi maʼuhiga tāfito e lua. ʼUluaki, ʼe nātou “tokalelei mo te ʼAtua ʼaki [tonatou] ʼAliki ko Sesu Kilisito.” (Loma 5:1) Lua, ʼe nātou tokalelei mo ʼonatou ʼu tēhina mo tuagaʼane. ʼE nātou maʼu “te poto mai ʼoluga,” ʼaē ʼe “maʼa ia, pea ʼe tokalelei.” (Sake 3:17; Kalate 5:22-24) Pea tahi ʼaē, ʼe nātou fakatalitali ke nātou maʼu te tokalelei ʼi tona ʼuhiga katoa, ʼi te temi ʼaē “ka maʼu ai anai e te kau agavaivai ia te kele, pea mo nātou fiafia ai ʼi te tokalelei ʼaupito.”—Pesalemo 37:11.
16, 17. (a) ʼE lava feafeaʼi ki “[te] kau matuʼa pea mo [te] kau finematuʼa,” ʼo toe feiā mo “te kau tama pea mo te kau taʼahine” ke nātou fakaloto mālohiʼi te kautahi ʼa Sehova? (b) Koteā ʼaē ʼe fakahā e te tokalelei ʼa te hahaʼi ʼa Sehova?
16 ʼE kei ʼi ai pe “[te] kau matuʼa pea mo [te] kau finematuʼa” ʼi te hahaʼi ʼa Sehova, te kau fakanofo, ʼe nātou manatuʼi te ʼu ʼuluaki mālo ʼo te kautahi ʼa Sehova. ʼE tou leleiʼia ʼaupito tanatou agatonu pea mo tanatou faʼa kātaki. Ko te kau fakanofo ʼaē neʼe kei tūpulaga neʼe nātou takitaki lolotoga te ʼu ʼaho fakamataku ʼo te taʼu 1930, ʼo aʼu ki te Lua Tau Faka Malamanei pea, ki muli age, ki te ʼu taʼu fakafiafia lahi ʼuhi ko te tuputupu ʼa te gāue. Tahi ʼaē meʼa, tāfito talu mai te taʼu 1935, neʼe hā te “toe hahaʼi tokolahi” ʼo “te tahi ʼu ōvi.” (Fakahā 7:9; Soane 10:16) ʼI te kua matutuʼa pea mo tokosiʼi ʼa te kau Kilisitiano fakanofo, neʼe fakahoko e te tahi ʼu ōvi te gāue fai faka mafola pea neʼe nātou fai te gāue ʼaia ʼi te kele katoa. ʼI te ʼu taʼu pe ʼaenī, tokolahi te ʼu tahi ʼu ōvi neʼe nātou hū ki te fenua ʼa te hahaʼi ʼa te ʼAtua. Koia, ʼi te taʼu pe ʼaenī kua hili, ko te toko 338 491 ia nātou neʼe papitema moʼo fakahā kua nātou foaki tonatou maʼuli kia Sehova! Ko te ʼu taʼi hahaʼi ʼaia ʼe kei foʼofoʼou ʼi te faʼahi fakalaumālie. ʼE ko he meʼa lelei tanatou mālohi pea mo tanatou fiafia ʼi tanatou fakatuputupu te kaugamālie ʼo nātou ʼaē ʼe nātou hiva te ʼu fakavikiviki fakafetaʼi ki te “ ʼAtua, ʼaē ʼe ʼafio ʼi te hekaʼaga faka hau, pea mo te Akeno.”—Fakahā 7:10.
17 Ia ʼaho nei, ‘kua fakahahaʼi e te kau tama pea mo te kau taʼahine te ʼu potu ʼaē ʼe kaugamālie ai te hahaʼi,’ ko ni kau Fakamoʼoni ʼe ia nātou te mālohi ʼo te temi tūpulaga. ʼI te taʼu gāue 1995, neʼe maʼu te ʼu tānaki gāue mai te ʼu fenua pea mo te ʼu motu e 232. Kae ʼe mole ʼi ai he ʼu fakataupiepie fakafenua, he ʼu fehiʼa faka telepi, peʼe ko he maheka ʼe molemo tau mo te kau fakanofo pea mo te tahi ʼu ōvi. ʼE nātou tuputupu fakatahi fuli ʼi te faʼahi fakalaumālie, ʼo nātou logo tahi ʼi te ʼofa. Ko te ʼofa fakatautehina ʼa te kau Fakamoʼoni ʼa Sehova ʼi te malamanei katoa ʼe ko he meʼa ʼe mole maʼu ʼi te mālama.—Kolose 3:14; 1 Petelo 2:17.
ʼE Faigataʼa Fau Koa Maʼa Sehova?
18, 19. ʼO kamata ʼi te taʼu 1919, neʼe fakahoko feafeaʼi e Sehova te meʼa ʼaē neʼe hage ʼe mata faigataʼa fau kia mata ʼo te tagata?
18 ʼI te 1918, neʼe kei toe te toko lauʼi afe kau fakanofo, neʼe ko he ʼu nefesi neʼe kua lotovaivai ʼi tonatou ʼaunofo ʼi te faʼahi fakalaumālie. Neʼe mole he tahi neʼe feala hana fakahā fakatomuʼa peʼe feafeaʼi anai te fakaʼaluʼalu ʼo te ʼu meʼa ʼaē ka hoko. Kae, neʼe ʼiloʼi ia e Sehova—ohage ko tana tala faka polofeta tuʼa fā, ʼo fēnei: “Koʼeni te meʼa ʼaē neʼe ʼui e Sehova ʼo te ʼatu kautau: ‘Tatau aipe peʼe hage ʼe faigataʼa fau kia mata ʼo nātou ʼaē ka toe anai ʼi te hahaʼi ʼaia, ʼi te ʼu ʼaho ʼaia, ʼe toe faigataʼa fau anai koa kia te ʼau te faʼahi ʼaia?’ ko te ʼui ʼaia ʼa Sehova ʼo te ʼatu kautau.”—Sakalia 8:6.
19 ʼI te taʼu 1919, neʼe toe fakaloto mālohiʼi e te laumālie ʼa Sehova tana hahaʼi ki te gāue ʼaē neʼe kei toe ke fakahoko. Koia, neʼe tonu ke nātou falala ʼe ina taupau anai te kiʼi kautahi ʼaia ʼa te kau atolasio kia Sehova. Neʼe nātou tokosiʼi pea neʼe lahi te ʼu meʼa neʼe mole nātou mahino lelei kiai. Kae, neʼe fakaloto mālohiʼi māmālie nātou e Sehova, ke nātou fakaʼaluʼalu lelei ia meʼa fuli pea ke nātou maʼu ia meʼa fuli moʼo fakahoko te gāue faka Kilisitiano, te fai faka mafola ʼo te logo lelei pea mo fai he ʼu tisipulo. (Isaia 60:17, 19; Mateo 24:14; 28:19, 20) ʼAki te temi, neʼe tokoni kia nātou ke nātou mahino lelei ki te ʼu fehuʼi maʼuhiga ʼaenī, ohage ko te mole kau ʼaē ki te ʼu tau pea ʼo ʼuhiga mo te pule faʼitaliha ʼa Sehova ʼi te ʼatulaulau. Neʼe faigataʼa fau koa kia Sehova ke ina fakahoko tona finegalo ʼaki te kiʼi kūtuga ʼo te kau Fakamoʼoni ʼaia? Kailoa. ʼE fakamoʼoni te faʼahi ʼaia ʼi te pasina 12 ki te pasina 15 ʼo te nusipepa ʼaenī, ʼaē ʼe ina fakahā te gāue ʼa te kau Fakamoʼoni ʼa Sehova ʼo te taʼu gāue 1995.
“Ko ʼAu ʼe ʼAu Liliu Anai Ko Tonatou ʼAtua”
20. Ohage ko tona ʼui e te lea faka polofeta, ʼe tānaki te hahaʼi ʼa te ʼAtua mai te ʼu potu fea?
20 ʼE fakahā fēnei e te palalau tuʼa nima, te fiafia lahi ʼaē ʼe maʼu e te kau Fakamoʼoni ʼa Sehova ia ʼaho nei: “Koʼeni te meʼa ʼaē neʼe ʼui e Sehova ʼo te ʼatu kautau: ‘Koʼeni ʼe ʼau hāofaki taku hahaʼi ʼi te fenua ʼaē ʼe hopo ai te laʼā pea mo te fenua ʼaē ʼe tō ai te laʼā. Pea ʼe mahino papau ia, ʼe ʼau ʼaumai anai nātou pea ʼe tonu anai ke nātou nonofo ʼi te lotolotoiga ʼo Selusalemi; pea ʼe tonu anai ke nātou liliu ko taku hahaʼi, pea ko ʼau, ʼe ʼau liliu anai ko tonatou ʼAtua ʼi te moʼoni pea mo te faitotonu.’ ”—Sakalia 8:7, 8.
21. Neʼe taupau feafeaʼi te mahu ʼo te tokalelei ʼo te hahaʼi ʼa Sehova pea e feafeaʼi tona folahi?
21 ʼI te taʼu 1996, ʼe feala ke tou ʼui papau, ko te logo lelei kua faka mafola ʼi te malamanei katoa, mai “te fenua ʼaē ʼe hopo ai te laʼā” ki “te fenua ʼaē ʼe tō ai te laʼā.” Neʼe fai te ʼu tisipulo ʼi te ʼu hahaʼi ʼo te ʼu fenua fuli pe, pea neʼe nātou mamata ki te hoko ʼo te fakapapau ʼa Sehova, ʼaē neʼe ina ʼui fēnei: “Ko tou ʼu foha fuli ʼe nātou liliu anai ko he ʼu hahaʼi neʼe akoʼi e Sehova, pea ko te tokalelei ʼo tou ʼu foha ʼe mahu anai.” (Isaia 54:13) ʼE tou maʼu te tokalelei koteʼuhi ʼe akoʼi tatou e Sehova. ʼO ʼuhiga mo te faʼahi ʼaia, ʼe tā te ʼu tohi ʼi te ʼu lea e 300. ʼI te taʼu pe ʼaenī kua hili, neʼe hilifaki kiai te ʼu lea e 21. ʼI te temi nei ko Te Tule Leʼo kua tā ʼi te ʼu lea e 111 ʼi te lakaga pe e tahi, pea ko te nusipepa Réveillez-vous! kua tā ʼi te ʼu lea e 54. Ko te ʼu fakatahi fakafenua peʼe faka malamanei ʼe nātou fakahā ia muʼa ʼo te hahaʼi te mahu ʼo te tokalelei ʼa te hahaʼi ʼo te ʼAtua. ʼE tou felogoi tahi ʼuhi ko te ʼu fono ʼaē ʼe fai ʼi te vāhaʼa fuli pea ʼe tou maʼu ai te fakaloto mālohi ʼaē ʼe ʼaoga kia tatou ke tou lotomālohi. (Hepeleo 10:23-25) Ei, ʼe akoʼi e Sehova tana hahaʼi “ ʼi te moʼoni pea mo te faitotonu.” ʼE ina foaki ki tana hahaʼi te tokalelei. ʼI meʼa lelei tatatou kau ʼi te tokalelei ʼaia!
ʼE Feala Koa Hakotou Fakamatala?
◻ ʼI totatou temi, neʼe feafeaʼi te liliu ʼa Sehova ʼo ‘maheka ʼaki he ʼita lahi’ maʼa tana hahaʼi?
◻ E feafeaʼi te maʼu e te hahaʼi ʼa Sehova te tokalelei, logope la tanatou nonofo ʼi te ʼu fenua ʼaē ʼe hoko ai te ʼu tau?
◻ Koteā te faka ʼuhiga ʼo te ʼui ʼaē ʼe ‘fakahahaʼi e te kau tama pea mo te kau taʼahine te ʼu potu ʼaē ʼe kaugamālie ai te hahaʼi’?
◻ Koteā te ʼu fakatuʼutuʼu ʼaē neʼe fai ke feala ke akoʼi e Sehova tana hahaʼi?
[Tānaki ʼo te taʼu gāue, ʼu pasina 12-15]
1995 TĀNAKI ʼO TE GĀUE FAKA MALAMANEI ʼA TE KAU FAKAMOʼONI ʼA SEHOVA
(Vakaʼi te nusipepa)
[Paki ʼo te pasina 8, 9]
ʼI te ono sēkulō ʼi muʼa ʼo totatou temi, neʼe akoʼi e te kau Sutea agatonu, ʼaē neʼe nātou toe laga te fale lotu, ko Sehova ko te matapuna pe e tahi ʼe feala ke tou falala ki ai ʼo ʼuhiga mo te tokalelei