‘ ʼE ʼAu Maʼuhiga Koa Ki Te ʼAtua?’

“ ʼE ʼAU Maʼuhiga Koa? ʼE Tokaga Mai Koa Te ʼAtua?” ʼE tou lau te ʼu kupu ʼaia ʼi te alatike ʼaē ʼe hā ʼi te nusipepa Christianity Today. “ ʼI toku ʼuhiga tagata faitohi, neʼe ʼau tautau sio ʼi toku ʼu tafa ki te mamahi,” ko te ʼui ʼaia ʼa te tagata ko Philip Yancey, ia ia ʼaē neʼe ina tohi te alatike. “ ʼE ʼau liuliuga te ʼu fehuʼi pe ʼaia, ohage ko he alaala ʼo he lavea ʼāfea ʼe mole feala ia ke faitoʼo. ʼE ʼau maʼu te ʼu tohi mai taku kau lautohi, pea ko tanatou ʼu fakamatala ʼo ʼuhiga mo tanatou ʼu tuʼania ʼe ʼāsili ai taku ʼu manatu lotolotolua.”

Lagi neʼe koutou fai fehuʼi mo koutou ʼo ʼuhiga mo te tokaga ʼa te ʼAtua ki tokotou maʼuli. ʼIo, e lagi ʼe koutou māhani mo te talanoa ʼaē ʼe tuʼu ia Soane 3:​16, ʼaē ʼe ʼui ai “ko te ʼAtua ʼi tona ʼofa lahi ʼaē ki te malamanei neʼe ina foaki ai tona ʼAlo ʼulu tokotahi.” Peʼe lagi neʼe koutou lau ia Mateo 20:28, ʼaē ʼe ʼui ai ko Sesu neʼe “ina foaki tona nefesi ko he totogi moʼo fetogi ʼaki ʼo te tokolahi.” Kae ʼe feala ke koutou fai te fehuʼi ʼaenī, ‘ ʼE tokaga koa te ʼAtua kia ʼau? ʼE tokaga koa ia kia ʼau ʼi toku ʼuhiga totonu?’ ʼE ʼi ai te tupuʼaga lelei ʼo tatatou faka tui ʼe ina tokagaʼi tatou, ohage pe ko te meʼa ka tou vakaʼi anai.