Neʼe Nātou Fai Te Finegalo ʼo Te ʼAtua
ʼI Tanatou Mulimuli Ki Te ʼu Palalau Fakaʼosi ʼa Sesu
ʼI TE afiafi ʼo te ʼaho 14 ʼo Nisani, ʼi te taʼu 33 ʼo totatou temi, ko Sesu Kilisito pea mo tana toko 11 kau ʼapositolo neʼe nātou takokoto ki te laupapa kai ʼi te koga fale ʼo te fale fata, ʼi Selusalemi. ʼI tana ʼiloʼi ʼaē kua ōvi mai tana mate, neʼe ina tala fēnei kia nātou: “ ʼE kei ʼau nofo mo koutou ʼi he kiʼi temi siʼisiʼi pe.” (Soane 13:33) ʼI tona fakahagatonu, neʼe kua ʼalu ia Sutasi Isikaliote ʼo fonofono mo te kau tagata agakovi ʼaē neʼe nātou fia matehi ia Sesu.
Neʼe mole he tahi ʼi te koga fale ʼo te fale fata ʼaia neʼe kua mahino ki te maʼuhiga ʼo te ʼaluʼaga ʼaia ohage ko te mahino ʼaē kiai ia Sesu. Neʼe ina ʼiloʼi lelei te ʼu mamahi ʼaē ka hoko kia ia. Neʼe toe ʼiloʼi foki e Sesu ʼe līaki anai ia ia e tana kau ʼapositolo ʼi te po tonu ʼaia. (Mateo 26:31; Sakalia 13:7) Mai tona ʼuhiga ʼaē neʼe ko te temi faigamālie fakaʼosi ʼaia ke palalau ai Sesu mo tana kau ʼapositolo ʼi muʼa ʼo tona mate, ʼe feala ke tou tui papau ko tana ʼu palalau fakaʼosi neʼe fai tāfito ʼo ʼuhiga mo te ʼu meʼa ʼe maʼuhiga ʼaupito.
“Koutou Haga Fai Te Meʼa ʼAenī Moʼo Fakamanatu Kia Te ʼAu”
ʼAki tana kau ʼapositolo agatonu, neʼe fakatuʼu e Sesu te meʼa foʼou ʼe ina fetogi anai te Pāsikate faka Sutea. Neʼe fakahigoaʼi e te ʼapositolo ko Paulo te faʼahi ʼaia ko te “taumafa ʼo te ʼAliki.” (1 Kolonito 11:20) ʼI tana toʼo te pane ʼaē ʼe mole hona meʼa fakatupu, neʼe faikole ia Sesu. Neʼe ina tofitofi te pane pea mo ina foaki ki tana ʼu ʼapositolo. Neʼe ina ʼui fēnei: “Koutou toʼo ʼo kai. Ko te meʼa ʼaenī ʼe ina fakatātā toku sino.” Pea neʼe ina toʼo te ipu vino, ʼo ina fai te kole fakafetaʼi pea mo ina foaki ki tana kau ʼapositolo, ʼo ina ʼui fēnei: “Koutou ʼiʼinu fuli kiai; heʼe ko te meʼa ʼaenī ʼe ina fakatātā toku ‘taʼataʼa ʼo te fuakava,’ ʼaē ʼe tonu ke liligi maʼa te tokolahi ki te fakamolemole ʼo te ʼu agahala.”—Mateo 26:26-28.
Koteā te faka ʼuhiga ʼo te meʼa ʼaia ʼaē neʼe hoko? Ohage ko tona fakahā e Sesu, neʼe fakatātā e te pane tona sino haohaoa. (Hepeleo 7:26; 1 Petelo 2:22, 24) Neʼe fakatātā e te vino te taʼataʼa ʼaē neʼe liligi e Sesu, ʼaē ʼe feala ʼaki ai ke fakamolemole te ʼu agahala. Tahi ʼaē meʼa, neʼe fakamoʼoni e tona taʼataʼa te fuakava foʼou ʼa Sehova ʼAtua pea mo te toko 144 000 hahaʼi, ʼaē ʼe nātou hau anai mo Sesu ʼi selo. (Hepeleo 9:14; 12:22-24; Fakahā 14:1) ʼI tana fakaafe tana kau ʼapositolo ke nātou kau ki te taumafa ʼaia, neʼe fakahā e Sesu ʼe nātou kau fakatahi anai mo ia ʼi te Puleʼaga ʼaē ʼi selo.
ʼO ʼuhiga mo te taumafa fakamanatu ʼaia, neʼe fakatotonu fēnei e Sesu: “Koutou haga fai te meʼa ʼaenī moʼo fakamanatu kia te ʼau.” (Luka 22:19) Ei, ko te Taumafa ʼo te ʼAliki ʼe ko he meʼa ʼe tonu ke fai ʼi te taʼu fuli, ohage pe ko te Pāsikate. Ko te Pāsikate neʼe ina fakamanatuʼi te faka ʼāteaina ʼo te kau Iselaele mai te maʼuli popūla ʼi Esipito, kae ko te Taumafa ʼo te ʼAliki ʼe faka ʼuhiga ki he faka ʼāteaina ʼe lahi age—he faka ʼāteaina ʼo te malamanei mai te maʼuli popūla ki te agahala pea mo te mate. (1 Kolonito 5:7; Efesi 1:7) Pea tahi ʼaē meʼa, ko nātou ʼaē ʼe nātou kai te pane pea mo ʼinu te vino, ʼe nātou manatuʼi anai tonatou ʼu pilivilesio ʼaē ka nātou maʼu ʼi te temi ka haʼu, ʼi tonatou ʼuhiga hau pea mo pelepitelo ʼi te Puleʼaga ʼo te ʼAtua ʼi selo.—Fakahā 20:6.
Ei, ko te mate ʼo Sesu Kilisito neʼe ko te meʼa maʼuhiga ʼaupito ʼaē neʼe hoko ʼi te hisitolia ʼo te tagata. Ko nātou ʼaē ʼe nātou mahino ki te meʼa ʼaē neʼe fai e Sesu, ʼe nātou fakalogo ki tana fakatotonu fēnei ʼo ʼuhiga mo te Taumafa ʼo te ʼAliki: “Koutou haga fai te meʼa ʼaenī moʼo fakamanatu kia te ʼau.” ʼE fakamanatuʼi e te kau Fakamoʼoni ʼa Sehova te mate ʼo Sesu ʼi te taʼu fuli ʼi te ʼaho ʼaē ʼe ʼalutahi mo te ʼaho 14 ʼo Nisani. ʼI te taʼu 1996, ʼe tō te ʼaho ʼaia ʼi te ʼaho 2 ʼo ʼApelili, ʼi te ʼosi tō ʼo te laʼā. ʼE fakaafe koutou ke koutou kau kiai ʼi te Fale ʼo te Puleʼaga ʼi tokotou kolo.
‘ ʼE ʼAu Foaki Atu Te Fakatotonu Foʼou’
ʼO hilifaki ki te fakatuʼu ʼo te Taumafa ʼo te ʼAliki, neʼe foaki e Sesu te ʼu tokoni fakaʼosi ki tana kau ʼapositolo. Logope la neʼe lelei tanatou ako, ka neʼe kei lahi te tahi ʼu meʼa neʼe tonu ke ako e te ʼu tagata ʼaia. Neʼe mole nātou mahino katoa ki te fakatuʼutuʼu ʼa te ʼAtua ʼo ʼuhiga mo Sesu, mo nātou pea mo te temi ka haʼu. Kae neʼe mole faiga ia Sesu ke ina fakamahino te ʼu meʼa fuli ʼaia ʼi te temi pe ʼaia. (Soane 14:26; 16:12, 13) Kae, neʼe palalau ia ki te meʼa ʼe maʼuhiga ʼaupito age ia. Neʼe ina ʼui fēnei: “ ʼE ʼau foaki atu kia koutou te fakatotonu foʼou, ke koutou feʼofaʼofani, ohage pe ko taku ʼofa ʼaē kia koutou, ke koutou feʼofaʼofani foki mo koutou.” Pea neʼe toe ʼui fēnei e Sesu: “ ʼAki te meʼa ʼaenī, ʼe ʼiloʼi anai e te hahaʼi fuape, ko koutou ko taku ʼu tisipulo, mo kapau ʼe koutou feʼofaʼofani.”—Soane 13:34, 35.
He koʼe neʼe ko “te fakatotonu foʼou”? Neʼe fakatotonu e te Lao Faka Moisese: “ ʼE tonu anai ke ke ʼofa ki tou kāiga ohage pe ko koe totonu.” (Levitike 19:18) Kae, neʼe kole e Sesu ke fakahā e tana kau tisipulo te ʼofa ʼaē ʼe ina ʼeke anai nātou ke nātou foaki tonatou maʼuli maʼa he kaugā fagona Kilisitiano. ʼE mahino papau ia, ko te ‘lao ʼo te ʼofa’ ʼe tonu pe foki ke toe maʼu ʼi te ʼu ʼaluʼaga ʼaē ʼe mole faʼa maʼuhiga. ʼI te ʼu ʼaluʼaga fuli, ko he tisipulo ʼa Sesu Kilisito ʼe tonu anai ke ina fakatuʼutuʼu ke ina fakahā te ʼofa, ʼo tokoni ki ʼihi ʼi te faʼahi fakalaumālie pea mo ʼihi ʼatu faʼahi.—Kalate 6:10.
ʼI te po fakamuli ʼaia ʼo te maʼuli ʼo Sesu ʼi te kele, ko te ʼofa neʼe ina uga ia Sesu ke faikole kia Sehova ʼAtua maʼa tana kau tisipulo. ʼI te tahi koga ʼo tana faikole, neʼe ina ʼui fēnei: “ ʼE nātou ʼi te mālama, pea ʼe ʼau ʼalu atu kia te koe. Tāmai maʼoniʼoni, taupau kia nātou ʼuhi ko tou huafa ʼaē neʼe ke foaki mai, ke nātou liliu ko he meʼa e tahi ohage ko tāua.” (Soane 17:11) Ko te meʼa ʼaē ʼe tou fakatokagaʼi ʼi tana kole ʼaia ki tana Tāmai, neʼe faikole ia Sesu ke maʼu e tana kau tisipulo te logo tahi ʼaki te ʼofa. (Soane 17:20-23) Neʼe tonu ke nātou ‘feʼofaʼofani ohage pe ko te ʼofa ʼa Sesu kia nātou.’—Soane 15:12.
Neʼe mulimuli te ʼu ʼapositolo agatonu ki te ʼu palalau fakaʼosi ʼaia ʼa Sesu. Mo tatou foki ʼe tonu ke tou mulimuli ki tana ʼu fakatotonu ʼaia. ʼI te ʼu “ ʼaho fakamuli” pea mo maʼuhiga ʼaenī, ko te ʼofa pea mo te logo tahi ʼi te lotolotoiga ʼo te kau atolasio moʼoni ʼe maʼuhiga ʼaupito age ʼi te ʼu temi muʼa. (2 Timoteo 3:1) Koia, ʼe fakalogo te kau Kilisitiano moʼoni ki te ʼu fakatotonu ʼa Sesu pea mo nātou fakahā te ʼofa fakatautehina. ʼE kau ki te faʼahi ʼaia te fakalogo ki tana fakatotonu ʼaē ke fai te Taumafa ʼo te ʼAliki.