Ko Te Fakatahi ʼo Te Taʼu, ʼAho 5 ʼo ʼOketopeli 1996

KO TE FAKATAHI ʼO TE TAʼU ʼa te ʼu tēhina pea mo tuagaʼane ʼa te Watch Tower Bible and Tract Society of Pennsylvania, ʼe fai anai ʼi te ʼaho 5 ʼo ʼOketopeli 1996, ʼi te Fale Fakatahi ʼa te kau Fakamoʼoni ʼa Sehova, 2932 Kennedy Boulevard, Jersey City, New Jersey. ʼE fai anai te ʼuluaki fono ʼi te hola hiva vaelua pea ʼe ʼāteaina pe kia nātou ʼaē ʼe kau ki te Sosiete, pea hoa mai leva kiai, ʼi te hola 10, te fakatahi ʼaē ʼe fai ʼi te taʼu fuli.

Ko te ʼu tēhina pea mo tuagaʼane ʼo te Sosiete ʼaē neʼe nātou fetogi tonatou ʼu tuʼasila ʼi te taʼu ʼaenī kua hili, ʼe tonu anai ke nātou fakahā ʼi te temi nei ki te Pilō ʼo te Sikalaipe, koteʼuhi ke maʼu e nātou te pepa fakaafe pea mo te ʼu pouvoirs lolotoga te māhina ʼo Sūlio.

Ko te ʼu pouvoirs, ʼaē ʼe momoli anai ki te ʼu tēhina mo tuagaʼane ʼo te fakatahi ʼo te taʼu, ʼo toe feiā aipe mo te ʼu pepa fakaafe, ʼe tonu ke toe fakaliliu ki te Pilō ʼo te Sikalaipe ʼo faka tuʼakoi ki te ʼaho 1 ʼo ʼAukusito. Ko te tagata takitokotahi ʼe tonu ke ina tohi te ʼu pouvoirs pea mo ina fakaliliu fakavilivili, ʼo ina fakahā ʼi te pepa ʼaia peʼe ʼalu anai ki te fakatahi peʼe kailoa. ʼE tonu anai ke ʼiloʼi papau te ʼu tonu ʼaē ka foaki, koteʼuhi ke ʼiloʼi ai ia nātou ʼaē ka kau anai ki te fakatahi ʼaia.

ʼE fakatuʼutuʼu ko te polokalama katoa ʼaē ʼe kamata ʼaki te fono pea mo te ʼu tānaki, ʼe ʼosi ʼi te hola tahi hili hoʼatā peʼe ki muli mai ʼo te hola ʼaia. ʼE mole ʼi ai anai he ʼu akonaki ʼi te hili hoʼatā. Mai tona ʼaluʼaga ʼaē, ʼe mole lahi he ʼu nofoʼaga, ko te hū ki loto ʼe fai anai ʼaki pe te ʼu tikite. ʼE mole fai anai he fakatuʼutuʼu ke fakahokohoko ki he tahi age ʼu fale fono te fakatahi ʼaia ʼaki te telefoni.