Ko Te Fakatahi ʼAē ʼe Fai ʼi Te Taʼu Fuli, ʼAho 7 ʼo ʼOketopeli 2000

KO TE FAKATAHI ʼAĒ ʼE FAI ʼI TE TAʼU FULI mo te ʼu tēhina pea mo tuagaʼane ʼo te Watch Tower Bible and Tract Society of Pennsylvania, ʼe fai anai ʼi te ʼaho 7 ʼo ʼOketopeli 2000, ʼi te Fale Fakatahi ʼa te kau Fakamoʼoni ʼa Sehova, 2932 Kennedy Boulevard, Jersey City, New Jersey. ʼI te hola hiva ʼosi kuata, ʼe fai ʼāteaina anai te ʼuluaki fono mo nātou ʼaē ʼe kau ki te Sosiete, pea hoa leva kiai, ʼi te hola 10, te fakatahi ʼaē ʼe fai ʼi te taʼu fuli.

Ko te ʼu tēhina mo tuagaʼane ʼo te Sosiete ʼaē neʼe nātou fetogi tonatou ʼu tuʼasila ʼi te taʼu ʼaenī kua hili, ʼe tonu anai ke nātou fakahā te faʼahi ʼaia ʼi te temi nei ki te Pilō ʼo te Sikalaipe, ke feala hanatou maʼu te pepa fakaafe pea mo te ʼu pouvoirs lolotoga te māhina ʼo Sūlio.

Ko te ʼu pouvoirs, ʼaē ʼe momoli anai ki te ʼu tēhina pea mo tuagaʼane ʼo te fakatahi ʼaē ʼe fai ʼi te taʼu fuli, ʼo toe feiā aipe mo te ʼu pepa fakaafe, ʼe tonu anai ke toe fakaliliu ki te Pilō ʼo te Sikalaipe ʼo faka tuʼakoi ki te ʼaho 1 ʼo ʼAukusito. Ko nātou takitokotahi ʼe tonu ke nātou tohi te ʼu pouvoirs pea mo nātou fakaliliu fakavilivili, ʼo nātou fakahā ʼi te pepa ʼaia peʼe nātou ʼolo anai ki te fakatahi peʼe kailoa. ʼE tonu anai ke ʼiloʼi papau te ʼu tonu ʼaē ka nātou fai, koteʼuhi ke ʼiloʼi ai ia nātou ʼaē ka nātou kau ki te fakatahi ʼaia.

ʼE fakatuʼutuʼu, ko te polokalama katoa ʼaia ʼo kau ai mo te ʼuluaki fono pea mo te ʼu tānaki, ʼe ʼosi anai ʼi te hola tahi hili hoʼatā peʼe ki muli age. ʼE mole fai anai he fono ʼi te hili hoʼatā. Mai tona ʼaluʼaga ʼaē ʼe mole lahi he ʼu hekaʼaga, koia ko te hū ki loto ʼe fai anai ʼaki pe te ʼu tikite. ʼE mole fai anai he fakatuʼutuʼu ke fakahokohoko ʼaki te telefoni te fakatahi ʼaia ki he tahi ʼu fale fono.