Kua Mafola Te Fondamentalisme
KO TE fondamentalisme—ʼe mole heʼeki faʼa fualoa, neʼe ʼui ʼe ko he kiʼi kūtuga ʼo te Lotu Polotesita. Kae kua fetogi te faʼahi ʼaia! Kua hili kiai taʼu e 30, neʼe tohi fēnei e te tagata fakamatala lotu ko Bruce Lawrence ko te tokosiʼi neʼe mole nātou manatu ʼi te fakaʼosi ʼo te 20 sēkulō, ko te fondamentalismea ʼe liliu anai ko he faʼahi maʼuhiga pea mo talanoa fakavale kiai te ʼu sulunale pea mo te ʼu kumi ʼaē ʼe fai ʼi te ʼu univelesitē.
Kae, ko te meʼa ʼaia ʼaē kua hoko. Ko te ʼu fakamatala ʼaē ʼe fai e te ʼu nusipepa ʼo ʼuhiga mo te ʼu aga mālohi ʼaē ʼe fai ʼi te ʼu ala, te ʼu fai fakapō, mo te ʼu hahaʼi ʼaē ʼe nātou fakafeagai ki te fakatō fatu, mo te ʼu kākā faka politike ʼaē ʼe fakaneke e te ʼu kūtuga faka lotu, pea mo te ʼu tuʼuga tohi ʼe fai ai ni ʼu laukovi, ʼe nātou fakamanatuʼi tuʼumaʼu mai te ʼu gāue ʼa te kau fondamentalistes. Neʼe ʼui fēnei e te sulunale Italia Mondo Economico ʼi te ʼu potu fuli ko te fondamentalisme “ ʼe fakalaga tau ia ki te huafa ʼo te ʼAtua.”
ʼI te agamāhani ʼe ʼui ko te kau fondamentalistes, ʼe ko he ʼu hahaʼi ʼe nātou fai fakavale tanatou lotu, mo nātou fakatupu he ʼu maveuveu, pea mo nātou fai fakapō. ʼE tuʼaniaʼi e te hahaʼi te tuputupu ʼo te ʼu kūtuga ʼaia ohage ko te Comunione e Liberazione ʼi te Lotu Katolika Loma, te Gush Emunim ʼi te Lotu Faka Sutea, pea mo te felogoi faka Kilisitiano ʼo te Lotu Polotesita ʼi te Potu Tokelau ʼo Amelika. He koʼe koa kua mafola te fondamentalisme? Koteā te ʼu meʼa ʼaē ʼe nātou uga ia te faʼahi ʼaia? Ohage ko te ʼui e te tagata sosioloke Falani ko Gilles Kepel, ʼe lagi ko “te lagavaka ʼa te ʼAtua.”
[Nota ʼi te lalo pasina]
a Ko he fondamentaliste ʼe ko he tahi ʼe ina taupau mālohi te ʼu talatisio faka lotu pea mo pipiki mālohi kiai. Ko te faka ʼuhiga ʼo te kupu “fondamentalisme” ʼe lahi ʼaupito anai tona talanoa kiai ʼi te alatike ʼaē ka hoa mai.
[Haʼuʼaga ʼo te paki pasina 3]
Nina Berman/Sipa Press