Ko Te Ala ʼe Lelei Age

KO TE KAU FAKAMOʼONI ʼA SEHOVA ʼe nātou tuʼania ʼo ʼuhiga mo te mole tokaga ʼa te malamanei ki te ʼu meʼa fakalaumālie, pea mo te kua mafola ʼo te ʼu aga heʼe ʼaoga pea mo te lotolotolua faka lotu ʼi te sosiete fakatagata. Koia la ʼaē, ʼi ʼihi temi ʼe higoaʼi nātou ko te kau fondamentalistes. Kae ʼe nātou feiā koa? Kailoa. Logope la ʼe nātou tui mālohi ki tanatou lotu, kae ʼe mole ko he kau fondamentalistes ohage ko te meʼa ʼaē neʼe kua fakamahino ʼo ʼuhiga mo te faʼahi ʼaia. ʼE mole nātou uga te kau takitaki faka politike ke nātou hikihiki he faʼahiga manatu, pea ʼe mole nātou fai he ʼu agamālohi moʼo fakafeagai kia nātou ʼaē ʼe mole nātou tali tanatou ʼu manatu. Kae kua nātou maʼu te ala ʼe lelei age. ʼE nātou faʼifaʼitaki ki tonatou Pule, ko Sesu Kilisito.

Kua ʼiloʼi papau e te kau Fakamoʼoni ʼa Sehova ʼe ʼi ai te ʼu moʼoni ʼo ʼuhiga mo te lotu, pea ko te ʼu moʼoni ʼaia ʼe tou maʼu ʼi te Tohi-Tapu. (Soane 8:​32; 17:17) Kae ʼe akoʼi e te Tohi-Tapu te kau Kilisitiano ke nātou finegaloʼofa, mo agalelei, mo agamālu, pea mo fakapotopoto​—kae ko te ʼu kalitate ʼaia ʼe mole mulimuli kiai te ʼu hahaʼi ʼaē ʼe tauhi fakavale ki te lotu. (Kalate 5:​22, 23; Filipe 4:5) ʼI te tohi faka Tohi-Tapu ʼo Sake, neʼe ina fakaloto mālohiʼi te kau Kilisitiano ke nātou mulimuli ki “te poto mai ʼoluga,” ʼaē ʼe ʼui ʼe “maʼa ia, pea ʼe tokalelei, agapoto, mo fia fakalogo, fonu ʼi te manavaʼofa pea mo te ʼu fua lelei.” Neʼe toe ʼui fēnei e Sake: “Ko te fua ʼo te faitotonu neʼe to ʼi te ʼu ʼaluʼaga tokalelei kia nātou ʼaē ʼe nātou fakahoko te tokalelei.”​—Sake 3:​17, 18.

ʼE manatuʼi e te kau Fakamoʼoni ʼa Sehova neʼe maʼuhiga ʼaupito kia Sesu ia te moʼoni. Neʼe ina ʼui age kia Posio Pilato: “Neʼe ʼau tupu ʼuhi ko te potu ʼaenī, pea neʼe ʼau haʼu ki te malamanei ʼuhi ko te potu ʼaenī: ko te fakamoʼoni ki te moʼoni.” (Soane 18:37) Logope la neʼe lagolago mālohi ki te moʼoni, neʼe mole ina fakakinauʼi te hahaʼi ke nātou tui ki tana ʼu akonaki. Kae neʼe faiga ia ke lave tana ʼu akonaki ki tonatou ʼatamai pea mo tonatou loto. Neʼe ina ʼiloʼi ko tana Tāmai ʼaē ʼe ʼi selo, ʼe ko te ʼAtua ʼe “lelei pea mo faitotonu,” pea ʼe ina fakatuʼutuʼu anai te temi ʼaē ka ina pulihi ai te loi pea mo te heʼe faitotonu ʼi te kele. (Pesalemo 25:8) Koia, neʼe mole faiga ia ke ina fai he ʼu aga mālohi kia nātou ʼaē neʼe mole lototahi mo ia. Kae neʼe faiga te kau takitaki lotu orthodoxes ʼo tona temi ke nātou tāʼofi ia Sesu.​—Soane 19:​5, 6.

Ko te kau Fakamoʼoni ʼa Sehova ʼe nātou tui mālohi ki tanatou ʼu akonaki faka lotu, pea ʼe nātou taupau mālohi te ʼu aga ʼaē ʼe tonu ke fai. Ohage ko te ʼapositolo ko Paulo, ʼe nātou tui papau ʼe ko “he ʼAliki pe e tahi, ko he tui pe e tahi, ko he papitema pe e tahi.” (Efesi 4:5) Tahi ʼaē meʼa ʼe nātou mahino ki te ʼu palalau ʼaenī ʼa Sesu: “[ʼE] fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea e tokosiʼi ia nātou ʼe nātou maʼu.” (Mateo 7:​13, 14) Kae, ʼe mole nātou faiga ke nātou fakamālohiʼi te hahaʼi ke mulimuli age ki tanatou ʼu akonaki. Kae, ʼe nātou faʼifaʼitaki kia Paulo pea ʼe nātou “kole mamahi” kia nātou fuli ʼaē ʼe fia “fakatokatoka mo te ʼAtua.” (2 Kolonito 5:​20) ʼE ko te ala lelei ʼaia. Ko te ala ʼo te ʼAtua.

Ko te kupu fondamentalisme faka lotu, ʼe kehe ʼaupito ia. ʼE lahi te ʼu kākā ʼaē ʼe fakaʼaogaʼi e te kau fondamentalistes​—ʼo kau ai mo te agamālohi—​moʼo fakamālohiʼi ʼo te sosiete fakatagata ke mulimuli ki tanatou ʼu fakatuʼutuʼu. ʼAki tanatou ʼu aga ʼaia, ʼe nātou liliu ai ko he koga tāfito ʼo te tuʼu faka politike. Kae neʼe ʼui e Sesu ko tana ʼu tisipulo ʼe “mole [nātou] kau ʼi te malamanei.” (Soane 15:19; 17:16; Sake 4:4) ʼO mulimuli ki te ʼu palalau ʼaia, ko te kau Fakamoʼoni ʼa Sehova ʼe mole nātou kau ki te ʼu fakafeagai faka politike. Pea, ohage ko te meʼa ʼaē neʼe fakamoʼoni kiai te nusipepa Italia Fuoripagina, ʼe “mole nātou fakakinauʼi he tahi; ʼe maʼu e te hahaʼi takitokotahi te loto faʼifaʼitaliha ke nātou fili peʼe nātou tali peʼe nātou fakafisi ki te ʼu meʼa ʼaē ʼe nātou tala age.” Koteā tona ʼu fua? Ko te logo ʼo te tokalelei faka Tohi-Tapu ʼa te kau Fakamoʼoni ʼa Sehova, ʼe ina uga te hahaʼi kehekehe, ʼo feiā aipe mo te kau fondamentalistes.​—Isaia 2:​2, 3.

Ko He Mālama ʼe Mālohi Te ʼu Meʼa ʼAē ʼe Pipiki Kiai

ʼE ʼiloʼi e te kau Fakamoʼoni ʼa Sehova ʼe mole feala ke fakatokatoka e te tagata te fihifihia ʼaē ʼo ʼuhiga mo te kau fondamentalistes. ʼE mole feala ke koutou fakakinauʼi he tahi ke tui ki te ʼAtua peʼe ke ina tali takotou lotu. Ko ʼihi ʼi tanatou manatu ʼaē ʼe feala ke nātou fai te faʼahi ʼaia, neʼe tupu ʼaki ai te ʼu fai fakapō fakalialia ʼi te hisitolia, ohage ko te ʼu tau taputapu, te ʼu Inikisisio ʼo te Moyen Âge, pea mo te ‘fakamaliu ʼo te kau Initia ʼo Amelika ki he tahi lotu.’ Kae, kapau ʼe koutou falala ki te ʼAtua, ʼe koutou tuku anai te faʼahi ʼaia ke ina fakatokatoka.

ʼO mulimuli ki te Tohi-Tapu, neʼe faka tuʼakoi e te ʼAtua te temi ʼaē ʼe ina fakagafua ai ki te tagata ke ina maumauʼi tana ʼu lao, ʼo tupu ai la te ʼu mamahi. Ko te temi ʼaia kua vave ʼosi. ʼI te temi nei, kua nofo Hau ia Sesu ʼi te Puleʼaga ʼo te ʼAtua ʼaē ʼe ʼi selo, pea ʼe mole kei tuai, pea ʼe ina fakaʼauha anai te ʼu puleʼaga fakatagata, pea ʼe ina puleʼi anai te tagata ʼi te ʼaho fuli. (Mateo 24:​3-​14; Fakahā 11:15, 18) Ko te malamanei katoa ʼe liliu anai ko he palatiso, ʼe mahu ai anai te tokalelei pea mo te faitotonu. ʼI te temi ʼaia ʼe mole toe ʼi ai anai he lotolotolua ʼo ʼuhiga mo te faʼahiga tauhi ʼaē ʼe tonu ke fai ki te ʼAtua moʼoni. “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.” (Pesalemo 37:29) Ko te ʼu kalitate heʼegata ohage ko te ʼofa makehe, te moʼoni, te faitotonu, pea mo te agalelei ʼe nātou mālo anai ʼo fua manuʼia ki te hahaʼi talagafua fuli pe.

ʼO talitali ki te temi ʼaia, ʼe fai e te tagata fai pesalemo te ʼu kupu fakatuketuke ʼaenī: “Ka ki te finegaloʼofa ʼo te loto pea mo te moʼoni, kua nā fetaulaki; pea ko te faitotonu mo te tokalelei kua nā fakafekita. ʼE homo ake anai te moʼoni mai te kele, pea ko te faitotonu ʼe sio ifo anai mai te lagi. Pea tahi, ko Sehova, ʼe ina foaki anai e ia, te meʼa ʼaē ʼe lelei, pea ko totatou kele ʼe ina foaki mai anai tona fua. ʼE haʼele anai ʼi muʼa ia te ia te faitotonu, pea ʼe ina fai anai ʼaki tana haʼele ia he ala.”​—Pesalemo 85:​10-​13.

Logope la ʼe mole feala ke tou fetogi te mālama, kae ʼe feala ke tou pipiki takitokotahi ki te ʼAtua ia ʼaho nei. Koia, ʼe feala ai ke tou faiga ke tou liliu ko te ʼu faʼahiga hahaʼi ʼaē ka tali anai e te ʼAtua ke nātou atolasio kia te ia ʼi te mālama foʼou ʼaia. Pea ʼe tou kau anai ki te hahaʼi agavaivai ʼaē ʼe talanoa kiai te pesalemo: “Kae ko te kau agavaivai ʼe nātou maʼu anai te kele, pea ʼe nātou fiafia anai ʼi te mahu ʼo te tokalelei.” (Pesalemo 37:11) ʼE lagolago te ʼAtua pea mo ina tapuakina ia nātou ʼaē ʼe nātou fai tona finegalo, pea ʼe ina fakapapau age kia nātou te ʼu meʼa fakaofoofo ki tonatou ka haʼu. Neʼe ʼui fēnei e te ʼapositolo ko Soane: “ ʼE mole te malamanei pea mo tona loto, ka ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.”​—1 Soane 2:​17.

[Paki ʼo te pasina 7]

ʼE fakaafe e te kau Fakamoʼoni ʼa Sehova te hahaʼi fuli ke nātou ako te logo lelei ʼo te Puleʼaga ʼo te ʼAtua

[Haʼuʼaga ʼo te paki pasina 6]

Lamp on pages 3, 4, 5, and 6: Printer’s Ornaments/by Carol Belanger Grafton/Dover Publications, Inc.