Ko Te Kau Faka Mafola ʼo Te Puleʼaga ʼe Nātou Fakamatala

‘Ke Mū Tokotou Mālama Ki Te Hahaʼi’

ʼI TANA Akonaki ʼi te Moʼuga, neʼe ʼui e Sesu ki tana kau tisipulo: “Ko koutou ko te mālama ʼo te malamanei.” Pea neʼe ina fakaloto mālohiʼi nātou ʼo ina ʼui fēnei: “Ke toe feiā pe te mū ʼo tokotou mālama ʼi muʼa ʼo te hahaʼi, koteʼuhi ke nātou mamata ki ʼakoutou gāue lelei pea nātou faka kolōlia ai ki takotou Tāmai ʼaē ʼe ʼi selo.”​—Mateo 5:​14-​16.

ʼI Italia, neʼe fakatokagaʼi e te hahaʼi te ʼu gāue lelei ʼa te kau Fakamoʼoni ʼa Sehova. Ohage la, ko tanatou aga ʼaē ʼe lelei mokā nātou kau ʼi tanatou ʼu fakatahi ʼaē ʼe fai ʼi te taʼu fuli, ʼe fakavikiviki ai kia Sehova, ohage pe ko te fakamoʼoni ʼo te fakamatala ʼaē ʼe hoa mai:

▪ Lolotoga ni ʼu taʼu, ko te fafine ʼo te kolo ʼo Terni ʼi Italia, neʼe tokoni ki tana taʼahine ke ina fakahaʼele te fale kafe neʼe tuʼu ōvi ki te malaʼe faigaoʼi ʼo te kolo ʼaia. ʼE ina fakamatala fēnei: “Neʼe ʼau tokagaʼi te kehekehe ʼaupito ʼo nātou ʼaē neʼe ʼōmai ki te ʼu aka fitipolo, pea mo nātou ʼaē neʼe ʼōmai ki te ʼu fakatahi ʼo te kau Fakamoʼoni ʼa Sehova ʼi te potu ʼaia. Ko te kau Fakamoʼoni ʼe lelei tonatou ʼu teu, pea ʼe nātou agatonu pea mo aga fakaʼapaʼapa. Neʼe ʼau fia ʼiloʼi tuʼumaʼu peʼe lava felogoi feafeaʼi te ʼu hahaʼi ʼaia ʼaē ʼe lanu kehekehe.

“ ʼI te tahi ʼaho, neʼe ʼau felāveʼi mo te Fakamoʼoni ʼi te ala, neʼe ina fehuʼi mai kia ʼau peʼe ʼau ʼiloʼi te huafa ʼo te ʼAtua. Neʼe mole ʼau ʼiloʼi te faʼahi ʼaia, pea ʼi taku ʼiloʼi ʼaē ko te kau Fakamoʼoni ʼa Sehova ʼe ko he ʼu hahaʼi lelei, koia neʼe ʼau tali ai ke ina ʼaʼahi ʼau. Neʼe ʼi ai taku ʼu fehuʼi ʼo ʼuhiga mo te ʼaluʼaga ʼo te kau mate, pea neʼe ina tali kiai ʼaki te Tohi-Tapu. Neʼe ʼau lotolelei ke ʼau ako te Tohi-Tapu, pea hili kiai vāhaʼa e lua, pea neʼe ʼau kamata kau ʼi te ʼu fono.

“ ʼI te kamata neʼe fakafeagai taku taʼahine kia ʼau, kae ʼaki taku aga pea mo toku lotomālohi neʼe fetogi ai tana aga. Neʼe ʼau kamata taku ako kua ʼosi kiai māhina e hiva. Ia ʼaho nei, ko taku taʼahine pea mo tona ʼohoana ʼe nā vikiʼi te kau Fakamoʼoni ʼa Sehova ʼaē ʼe nātou ʼōmai ki tonā fale kafe. Pea ko ʼau, neʼe ʼau papitema ʼi te fakatahi neʼe fai ʼi te malaʼe faigaoʼi ʼaia.”

▪ ʼI te hili ʼo te fakatahi ʼaē neʼe fai ʼi te kolo ʼo Roseto degli Abruzzi, ko te patolo ʼo te malaʼe mo te ʼu falelā neʼe ina ʼui fēnei: “Neʼe ʼau fakatokagaʼi ko te kau Fakamoʼoni ʼa Sehova ʼe nātou agatonu ʼi te ʼu meʼa fuli ʼaē ʼe nātou fai. ʼI te vāhaʼa kua ʼosi, neʼe ʼi ai te toko 40 ʼo nātou ʼi toku malaʼe, pea neʼe mole nātou fakatupu he fihifihia. Kae ʼe ko nātou tokotahi pe ʼaē ʼe nātou ʼōmai kia ʼau ʼo fakahā mai mo kapau ʼe ʼi ai he tahi ʼu hahaʼi kehe ʼi tonatou ʼu caravanes pea mo tonatou ʼu falelā. ʼI taku manatu, ʼi te ʼu hahaʼi ʼaē ʼe nātou lue taku malaʼe, ʼe lelei pe te kau Fakamoʼoni ʼa Sehova.”

▪ ʼI te hili ʼo te fakatahi pe ʼaia, ko te patolo ʼo he otele neʼe ina ʼui fēnei: “Ko te kau Fakamoʼoni ʼa Sehova ʼe nātou maʼuli ʼi te tokalelei. ʼE mole nātou agamālohi, pea ʼe nātou momoe vave. ʼE nātou agalelei, mo agatonu, pea ʼe lelei tanatou aga. ʼE ko he meʼa lelei ʼaupito anai mo kapau neʼe tatau te hahaʼi fuli mo nātou ʼaia. Ko te tahi ʼu hahaʼi ʼe nātou kaihaʼa te ʼu meʼa kehekehe​—te ʼu foʼi ipu, te ʼu meʼa tūsikaleti, māʼiape la mo te ʼu pepa kapine pea mo te suka! Neʼe mole heʼeki hoko he ʼu meʼa feiā mo koutou. Mokā toʼo e takotou ʼu tamaliki te ʼu foʼi sōpe ʼi te ʼaisi ʼi te afiafi, ʼe mole ʼau tuʼania ʼo ʼuhiga mo te ʼu meʼa neʼe nātou toʼo. ʼE nātou vakaʼi peʼe ko te fia ʼaē ʼe tonu ke nātou totogi mai kia ʼau, pea ʼe nātou foimo totogi atu aipe. ʼE ʼau falala ʼaupito kia nātou. ʼI meʼa lelei mo kapau neʼe feiā te hahaʼi fuli! ʼE ʼau fakaʼamu ki te hahaʼi fuli ʼaē ʼe nātou nonofo ʼi toku otele ke nātou hage ko te kau Fakamoʼoni ʼa Sehova.”

Kua ʼiloʼi lelei e te hahaʼi te kau Fakamoʼoni ʼa Sehova ʼi Italia, ohage ko te tahi ʼu potu ʼo te kele. ʼE nātou ‘taupau te aga ʼaē ʼe lelei ʼi te lotolotoiga ʼo te ʼu puleʼaga,’ pea ʼi tanatou fai te faʼahi ʼaia, ʼe nātou fakavikiviki ki te ʼAtua moʼoni, koteʼuhi ʼe nātou ʼamo tona huafa.​—1 Petelo 2:​12.