“Tou Vikiviki Fakafiafia”—Fakatahi Faka Tisitilike 1995
1 Koteā te ʼu tupuʼaga ʼe tou maʼu ke tou fakafiafia ai? E lagi ko te tokosiʼi ia tatou neʼe kua nātou fai he lisi ʼo ʼuhiga mo te ʼu tupuʼaga ʼaia. Logope la ʼaē tatatou maʼuli ʼi te mālama loto hoha pea mo lotolotolua, e lahi te ʼu tupuʼaga ke tou fiafia ai. Ko te kupu tāfito ʼaenī “Tou Vikiviki Fakafiafia” ʼe ko he kupu fakaloto mālohi ʼo ʼuhiga mo te ʼu fakatahi faka tisitilike ʼo te taʼu 1995.
2 ʼE tou vikiviki ia Sehova koteʼuhi neʼe ina akoʼi mai te moʼoni. (Is. 54:13; Soane 8:32) Koia ʼaē, ʼe tou fakahā fakafiafia kia nātou fuli ʼaē ʼe nātou kumi te fīmālie pea mo te manuʼia. (Esk. 9:4; Gāue 20:35) Ko totatou famili fakatautehina faka Kilisitiano ʼe ina toe foaki mai kia tatou te fiafia. Ko he famili fakalaumālie ʼofa ʼe ina foaki mai te maʼuli fīmālie pea mo manuʼia. ʼE ko he ʼu tupuʼaga ia ʼaenī ʼo tatatou fiafia, ʼo uga ai tatou ke tou vikiviki kia Sehova. Ko te ʼu akonaki pea mo te ʼu faʼifaʼitaki ʼaē ka fai anai ʼi te fakatahi, ʼe nātou fakatokagaʼi anai tatou ki te tahi ʼu tupuʼaga faka Tohi-Tapu ʼo tatatou fiafia ʼi te ʼu ʼaho fakamuli maveuveu ʼaenī.
3 Ko Te Fakatahi ʼAho Tolu: Neʼe kua koutou fakatuʼutuʼu koa mo tokotou patolo ke feala hakotou kau ki te ʼu ʼaho e tolu ʼaē ʼe fai ai te fakatahi? Ko tatatou fakatahi ʼe fai anai ʼi Niumea ʼi te temi mālōlō ʼi ʼAukusito 1995. Ko te sikalaipe ʼo tokotou kokelekasio ʼe ina fakahā atu anai te ʼu faʼahiga meʼa ʼo ʼuhiga mo tokotou kokelekasio.
4 ʼE kamata anai te fakatahi ʼi te Feliaono uhu ʼi te hola 10 toe 20 pea ʼe fakaʼosi anai ʼi te ʼAhotapu afiafi ʼi te hola 4 toe 10. ʼI te Moeaki pea mo te ʼAhotapu, ʼe kamata anai te fakatahi ʼi te uhu ʼi te hola hiva vaelua. Ko te ʼu matapā ʼe avahi anai ʼi te hola 8. ʼE gata pe kia nātou ʼaē neʼe hinoʼi ki hanatou gāue ʼe fakagafua hanatou hū fakatomuʼa ki loto.
5 ʼE Koutou Kau Anai Koa Ki Te Fakatahi?: ʼE fakaloto mālohiʼi tatou ke tou kau ki te ʼu ʼaho e tolu ʼo te fakatahi. Koteā tona tupuʼaga? Koteʼuhi ʼe loto ia Sehova ke tou kau kiai. Ia ʼaho nei ʼe mālohi ʼaupito te tauʼi ʼo tatatou tui pea mo totatou maʼuli fakalaumālie. Neʼe tokoniʼi e Paulo te kau Kilisitiano ʼo Sutea “ke ʼaua naʼa tuku te fakatahitahi ʼo [nātou] totonu” ʼi te temi neʼe nātou felāveʼi ai mo te ʼu faigataʼa lahi ʼaupito. (Hep. 3:12, 13; 10:25) Ko te kau Kilisitiano ʼo Filipe neʼe nātou maʼuʼuli “ ʼi te lotolotoiga ʼo he taʼiake aga fakalialia pea mo fakapikopiko.” Logope la te faʼahi ʼaia, neʼe nātou “mū ohage ko he ʼu nofoʼaga mālama ʼi te malamanei.” (Filp. 2:15) He koʼe neʼe kehekehe te kau Kilisitiano ʼaia ʼi te hahaʼi ʼaē ʼo te ʼuluaki sēkulō? Koteʼuhi neʼe nātou mulimuli fakalelei pe ki te ʼu fakatuʼutuʼu ʼa te laumālie maʼoniʼoni, ʼaē ʼe ina taki nātou ke nātou tātānaki “moʼo uga ia [nātou] ki te ʼofa pea mo te ʼu gāue matalelei.”—Hep. 10:24.
6 Ko te mālohi ʼo te mālama ʼe ina fakavaivai tatatou holi ʼaē ke tou fakatahitahi mo ʼotatou ʼu tēhina pea ke tou vikiviki kia Sehova. Neʼe fakaafe tatou ke tou fakalogo ki te laumālie ʼo Sehova pea ke tou leleiʼia te ʼu ʼaho e tolu ʼaē ʼe fai ai te fakatahi. Kua tou fakatuʼutuʼu koa ke tou ʼolo ki te fakatahi mo totatou famili katoa? ʼE ʼaoga ke fakaloto mālohiʼi tuʼumaʼu totatou ʼofa pea mo tatatou tui. Neʼe fakatuʼutuʼu e Sehova te ʼu fakatahi ʼi te taʼu fuli moʼo tokoni kia tatou ʼi te faʼahi ʼaia.
7 Tou Liliu Ki Totatou ʼApi Mo He Koloā: ʼE lava feafeaʼi ke koutou maʼu he fua lelei ʼi te fakatahi? ʼAki pe te “tuku katoa ʼo takotou fakakaukau ki te ʼu akonaki.” ʼE mole ko he faʼahi ʼe faigafua ʼi te sosiete maveuveu mo fakatupu hoha ʼaenī. Ko te kau tūpulaga mālolohi e lagi ʼe faigataʼa te tuku katoa ʼo tanatou fakakaukau ki te ʼu akonaki, kae ko he faigataʼaʼia ʼaia ʼe tau mo tatou fuli mokā tou kau ki he fakatahi faka tisitilike. ʼE faigafua anai he tuku katoa ʼo tatatou fakakaukau ki te ʼu akonaki mokā ʼe tou fai he fakatuʼutuʼu fakatomuʼa. Koutou fai te fehuʼi ʼaenī ʼo ʼuhiga mo koutou totonu, ‘Koteā koa te kupu tāfito ʼo te fakatahi?’ Tou metitasioʼi te kupu tafito ʼaia! ‘He koʼe koa ʼe ʼau ʼalu ki te fakatahi, pea koteā te meʼa ʼe ʼau fai ʼi te ʼu ʼaho ʼaia e tolu? ʼE ʼau fakaʼaogaʼi anai koa te ʼu afiafi moʼo fai ʼo he fakafiafia, peʼe kua ʼau fakatuʼutuʼu toku temi ke ʼau mālōlō ai pea mo toe vakaʼi te ʼu puani maʼuhiga ʼo te fakatahi?’
8 Ko te alatike ʼaē “Metitasio peʼe moemisi?” ʼo Te Tule Leʼo fakafalani ʼo te ʼaho 1 ʼo Maio 1984, neʼe ina tuku mai he ʼu tokoni ʼe feala ai hatatou maʼu he ʼu fua lelei ʼi te ʼu fono pea neʼe ina fakatokagaʼi tatou ki te manatu fakaʼosi ʼaenī: “Ko te fakatonutonuʼi ʼo te fakakaukau ʼe ko he meʼa tāfito.” Mokā kamata he akonaki ʼa he tahi, ʼi te agamāhani ʼe tou fakalogo kiai, kae ʼi te lolotoga ʼo te akonaki, ʼe feala “ke vaivai te tuku katoa ʼo tatatou fakakaukau ki te akonaki.” Koteā te meʼa ʼe feala ke tou fai ke ʼaua naʼa hoko te faʼahi ʼaia?
9 Ko te ʼu tokoni ʼaē neʼe fakahā ʼi te ʼu taʼu kua hili ʼe feala pe ke toe fakamanatuʼi, koteʼuhi ʼe ʼaoga ʼaupito. Kapau ʼe feala, tou faiga ke feʼauga tatatou mālōlō ʼi te po fuli. ʼI te agamāhani, ko te fai ʼo he fakatuʼutuʼu lelei ʼe ina faka fealagia anai ke koutou mālōlō.
10 Neʼe fakahā ko te tohi ʼo he ʼu manatu, ʼe ko he tokoni ʼaia ke tuku katoa te fakakaukau ki te akonaki. Kapau ʼe lahi fau te ʼu meʼa ʼaē ʼe koutou tohi, ʼe feala ke tōtō ia koutou te ʼu manatu ʼaē ʼe maʼuhiga. Koʼeni te tokoni, koutou hiki te ʼu puani ʼaki te manatu ʼaē ke koutou fakamatala te polokalama ki he tahi ʼe ako Tohi-Tapu mo koutou peʼe ko he tahi ʼe nofo ʼi tona ʼapi. Tatau aipe peʼe mole koutou manatu tāfito ki he tahi, ʼe tonu anai ke fai hakotou fakatuʼutuʼu mokā koutou tohi he ʼu puani, pea ʼi te ʼosi ʼo te fakatahi ʼe koutou maʼu pe anai he ʼu faigamālie moʼo talanoa ki te ʼu puani tāfito ʼo te fakatahi ki ʼotatou ʼu kāiga ʼe mole ʼi te moʼoni. Kapau ʼe koutou tohi he ʼu manatu pea koutou fakahā ki niʼihi te ʼu meʼa ʼaē neʼe koutou fagono kiai, ʼe mole galo vave anai ia koutou te akonaki ʼaia. Ko tatatou palalau ki he meʼa ʼe faka fealagia ai tatatou manatuʼi tuʼumaʼu.
11 Logope la ʼe mole kei fai he meʼa kai ʼi te fakatahi, ʼe kei ʼi ai pe te ʼu meʼa maʼuhiga ʼe ʼaoga ke totogi moʼo faka fealagia ai te fai ʼo te fakatahi, ohage la ko te ʼu meʼa ʼo ʼuhiga mo te ʼu mikolo, pea mo te tahi ʼu meʼa. ʼE totogi feafeaʼi koa te ʼu meʼa ʼaia? ʼAki pe tatatou ʼu meʼa ʼofa ʼaē ʼe tou foaki, pe ko he falā peʼe ko he seki ʼe tuʼu ai te higoa ʼo te kautahi ʼa te kau “Fakamoʼoni ʼa Sehova.” ʼE ʼalutahi te faʼahi ʼaia mo te manatu ʼaē ʼe tuʼu ia Pesalemo 96:8 pea mo 2 Fakamatala 31:12.
12 Tou Vikiviki Fakafiafia Kia Sehova ʼAki Tatatou Aga Faka Lotu: Ko te tahi faigataʼa ʼe hoko tuʼumaʼu pe ʼi te ʼu taʼu fuli ʼe ko te feʼoloʼaki ʼa te ʼu tēhina pea mo te ʼu tuagaʼane ʼi loto pea mo tuʼa ʼo te fale fono ʼi te temi ʼaē ʼe lolotoga fai ai te ʼu akonaki. ʼI te fakatahi neʼe hoko ʼi te taʼu kua hili, neʼe maʼu te moʼi pepa ʼi te kesi meʼa ʼofa neʼe fai e te kaugā ako Tohi-Tapu. ʼE ʼui fēnei: “Neʼe ʼau punamaʼuli ʼi te logoaʼa, te fai palalau, pea mo te feʼoloʼaki hoholo ʼa te hahaʼi lolotoga te ʼu akonaki . . . Mole heʼeki ʼau kau ki te kau Fakamoʼoni, ʼe kei ʼau ako pe ia te Tohi-Tapu pea ʼe ʼau ako ia te manavasiʼi faka lotu pea mo te fakaʼapaʼapa.” ʼE mahino ia, ʼe mole he tahi ia tatou ʼe ina fia fakahā anai ʼe mole ia ia te loto fakafetaʼi ki te ʼu fakatuʼutuʼu ʼaē ʼe fai e Sehova.
13 ʼI te ʼu temi fuli pe ʼe tonu ke tou fai te fehuʼi ʼaenī: ‘Ko ai ʼaē ʼe ʼau fakafofoga, pea koteā te tupuʼaga ʼo taku haʼu ki te fakatahi?’ ʼAki tatatou ʼu palalau, tatatou aga, pea mo tatatou leleiʼia te ʼu fakatuʼutuʼu fakalaumālie, ʼe hā ʼaki ai te agaaga ʼo totatou ʼuhiga ʼi te faʼahi fakalaumālie, pea mo tatatou aga faka lotu. (Sake 3:13; 1 Pe. 2:2, 3, 12) ʼE tautau fakatokagaʼi ko te ʼu tēhina ʼaē neʼe nātou ʼutaki ʼi te ʼu taʼu te ʼu meʼa neʼe fakagata age kia nātou pea mo te ʼu meʼa neʼe tapuʼi tanatou fai, ʼe lahi age tanatou fakalogo pea mo tanatou fakaʼapaʼapa ʼi te ʼu fakatahi, ʼo nātou nonofo maʼu ʼi tonatou ʼu hekaʼaga, pea ʼe nātou fakalogo lelei ki te ʼu akonaki pea mo te ʼu faʼifaʼitaki.
14 Ko Takotou Faʼahiga Teuteu Pea Mo Te Faʼahiga Gaohi ʼo Tokotou Lauʼulu ʼe Hā Ai Tokotou ʼUhiga Totonu: Ia 1 Samuele 16:7, neʼe fakamanatuʼi mai ko te “tagata ʼe sio ia ki te meʼa ʼaē ʼe hā ki te ʼu mata; kae kia Sehova, ʼe sio ia ki te meʼa ʼaē ʼe ʼi te loto.” Koia, ko te hahaʼi ʼe nātou sivi tuʼumaʼu tatou ʼi te meʼa ʼaē ʼe hā ki tuʼa. ʼE nātou sioʼi tāfito tatatou faʼahiga teuteu pea mo te faʼahiga gaohi ʼo totatou lauʼulu, tāfito la mokā tou kau ki te fakatahi ʼo atolasio ki te ʼAtua pea mo akoʼi te maʼuli faka Kilisitiano. Kapau ko koutou ko he tūpulaga kei ako peʼe ko koutou ko he tahi ʼe gāue, ʼe koutou fakatahi mo te hahaʼi ʼaē ʼe nātou mulimuli ki te faʼahiga teuteu ʼo te temi ʼaenī, ʼo feala ke faigataʼa ai takotou maʼuliʼi te ʼu lekula faka Kilisitiano ʼo ʼuhiga mo te faʼahiga teuteu ʼaē ʼe hā ai te fakaʼapaʼapa.
15 Ko te ʼu faʼahiga teuteu pea mo te ʼu faʼahiga gaohi ʼo te lauʼulu e kehekehe tona fai ʼi te ʼu fenua ʼi te malamanei. Ko te ʼu teu ʼa te kau Kilisitiano ʼe fakaʼapaʼapa pea mo maʼa. Ko ai koa ʼaē ʼe ina fai he puleʼaki ʼo ʼuhiga mo te faʼahi ʼaia? ʼE tonu anai ke tokakaga te ʼu mātuʼa ki tanatou fānau ke ʼaua naʼa nātou faʼifaʼitakiʼi te fai teuteu ʼa te kau tūpulaga ʼo te mālama ʼaenī ʼi te faleako. Neʼe foaki mai te ʼu takitaki ʼaoga moʼo tokoni kia tatou ke tou fai he ʼu puleʼaki ʼe fakapotopoto ʼi te faʼahi ʼaia. ʼE fakaloto mālohiʼi tatou ke tou toe vakaʼi te alatike ʼo te Réveillez-vous! ʼo te ʼaho 8 ʼo Fepualio 1987 ko tona kupu tāfito “Te ʼu mutuʼi meʼa: koteā koa tona faka ʼuhiga kia koutou?” Koteā te meʼa neʼe fakatokagaʼi ʼi ʼihi ʼatatou ʼu fakatahi ʼi te taʼu kua hili?
16 ʼI te ʼosi ʼo te Fakatahi Faka Tisitilike “Ko Te Manavasiʼi Faka Lotu” neʼe tou maʼu te fakatokaga ʼaenī: “ ʼI te fakatahi ʼo te taʼu ʼaenī neʼe kua siasiaʼa te fai teuteu, mo te gaohi ʼo te lauʼulu pea mo te aga ʼa te ʼu tēhina pea mo te ʼu tuagaʼane. . . . Kae, ʼe kei ʼi ai pe te tahi ʼu faʼahiga meʼa pea mo te tahi ʼu faiteuteu ʼe ʼaoga ke fakatonutonuʼi.” ʼI te hili ʼo te tahi fakatahi neʼe fakatokagaʼi ai te ʼu teu ʼe heʼe fakaʼapaʼapa. Neʼe fakahā e te fakamatala ʼaia ko te faiteuteu ʼa ʼihi neʼe fakatupu tūkia ki niʼihi. Ko te hahaʼi ʼo te mālama ʼaē neʼe kau ʼi te fakatahi ʼaia, neʼe nātou fakatokagaʼi foki te ʼu faiteuteu heʼe fakaʼapaʼapa ʼaia. Ko te tahi ʼu teu ʼe hā lelei aipe te ʼu koga ʼo te sino pea ʼe ko he ʼu teu ʼe pipiki fau ki te sino.
17 Kapau ʼe tokagaʼi e te ʼu tagata ʼāfea ʼe ko he agamāhani te tui e ʼihi ʼo te ʼu taʼi teu ʼaia ʼi tonatou temi mālōlō, ʼi muʼa ʼo te fakatahi, ʼe lelei anai ke nātou foaki age kia nātou ʼaia he ʼu tokoni ʼofa kae ʼe tonu ke nātou mulimuli kiai, ke nātou ʼiloʼi ko te faʼahiga teuteu ʼaia ʼe mole mata fakaʼapaʼapa, tāfito mokā ʼe nātou kau ki te fakatahi faka Kilisitiano. Koutou toe vakaʼi mo nātou ʼaē ʼe ako Tohi-Tapu mo koutou ʼaē ʼe kau anai ki te fakatahi, te ʼu tokoni ʼaē ʼe tuʼu ʼi ʼoluga ʼo ʼuhiga mo te aga pea mo te faiteuteu.
18 Te ʼu Meʼa Nofo: ʼI te taʼu fuli, ʼe fai te gāue lahi ʼaupito ʼo ʼuhiga mo te foaki ʼo te ʼu meʼa nofo. ʼE ʼaoga anai ke toe vakaʼi e te kau fai faka mafola mo nātou ʼaē ʼe ako faka Tohi-Tapu mo nātou te pepa ʼe ʼalutahi mo Te Minisitelio ʼo Te Puleʼaga ʼo Sūlio 1994 ʼaē ʼe talanoa ai ki te ʼu fakatuʼutuʼu ʼo ʼuhiga mo te ʼu meʼa nofo.
19 Te ʼu Kamela Viteo Pea Mo Te ʼu Meʼa Pukeleʼo: ʼE ʼaoga ke tou toe fakamanatuʼi te ʼu fakatuʼutuʼu ʼo ʼuhiga mo te ʼu kamela viteo pea mo te meʼa pukeleʼo. Koutou manatuʼi, kapau ʼe koutou fakatuʼutuʼu ke koutou fakaʼaogaʼi te ʼu kamela viteo, peʼe ko he faʼahiga meʼa pukeleʼo, koutou fakahā ʼe koutou tokagaʼi ia nātou ʼaē ʼi ʼokotou tafa. Ko takotou feʼoloʼaki lolotoga te fakatahi ʼo feiā aipe ki te puke fime ʼi tokotou hekaʼaga, ʼe feala ke fakatupu hohaʼa ki niʼihi. ʼE mole fakapipiki anai ki te hila peʼe ki te tuʼuʼaga ʼo te mikolo ʼo te fale fakatahi, he faʼahiga meʼa moʼo puke ʼo te ʼu akonaki, heʼe nātou fakatupu gaohaʼa ki te feʼoloʼaki ʼa te hahaʼi. Kapau ʼe koutou fakatuʼutuʼu ke koutou fai he ʼu paki peʼe ke koutou puke te ʼu akonaki ʼaki he foi kamela viteo peʼe ko he foʼi meʼa pukeleʼo ʼe ko he faʼahi ʼe fakalogo pe ia kia koutou takitokotahi. Ko te ʼu paki pea mo te ʼu fime ʼaia ʼe feala pe ko he ʼu suvenia lelei mokā ʼe koutou toe sioʼi ki muli age. ʼE tonu anai ke fakaʼaogaʼi fakapotopoto te ʼu faʼahiga meʼa ʼaia moʼo puke ʼo te ʼu akonaki, koteʼuhi ke mole fakahohaʼa ki niʼihi peʼe mole koutou maʼu ai te lelei ʼaupito ʼo te polokalama. ʼI takotou liliu ki tokotou ʼapi, ʼe maʼu anai koa hokotou temi moʼo toe sioʼi ʼo te foʼi fime? ʼE feala ke koutou fakatokagaʼi ko te tohi ʼo te ʼu manatu ʼo te ʼu akonaki ʼe feʼauga aipe.
20 Te ʼu Hekaʼaga: ʼI te Fakatahi Faka Tisitilike ʼaē “Ko Te Manavasiʼi Faka Lotu” 1994, neʼe koutou tokagaʼi koa neʼe lelei age te fakatuʼutuʼu ʼo ʼuhiga mo te tāʼofi ʼo te ʼu hekaʼaga? Neʼe laka ki muʼa te fai ʼo te faʼahi ʼaia, kae ʼe ʼaoga tuʼumaʼu ke tou tokagaʼi te fakamanatu ʼaenī: ʼE FEALA KE KOUTOU TĀʼOFI PE TE ʼU HEKAʼAGA MAʼA TOKOTOU FAMILI PEA MO NĀTOU ʼAĒ NEʼE ’ŌMAI MO KOUTOU ʼI TAKOTOU MOTOKĀ. ʼE tou kau ki te fakatahi mai tona ʼaluʼaga ʼaē neʼe fakaafe tatou e te Sosiete. ʼE totogi te fakaʼaogaʼi ʼo te fale fakatahi ʼaki te ʼu meʼa ʼofa. ʼE ko he agaʼofa pea mo lototokaga koa he tāʼofi ʼo he hekaʼaga mo kapau ʼe mole tou ʼiloʼi papau peʼe nofoʼi anai?
21 ʼI te ʼu fakatahi fuli ʼe fai te ʼu fakatuʼutuʼu ʼo ʼuhiga mo nātou ʼaē ʼe ʼaoga ki ai he tokaga makehe, ohage la ko te hahaʼi matutuʼa pea mo nātou ʼaē ʼe māʼimoa. Koutou tokakaga ke ʼaua naʼa koutou fakaʼaogaʼi te ʼu hekaʼaga ʼaia mo kapau ʼe mole koutou kau ʼi te hahaʼi ʼaia. Koutou tokakaga ʼo tokoni kia nātou ke nātou maʼu honatou hekaʼaga mo kapau ʼe mole nātou kaugā ʼōmai mo niʼihi.
22 Koutou ʼOlo Ki Te Fakatahi Mo Hakotou Meʼa Kai: Ohage pe ko te meʼa kua koutou ʼiloʼi, ko te pepa ʼe ʼalutahi mo Te Minisitelio ʼo Te Puleʼaga ʼo Malesio 1995 neʼe ina fakahā te tupuʼaga ʼo te fai ʼo te ʼu fetogi ʼaia pea neʼe ina foaki te ʼu tokoni lelei ʼo fakahā ai peʼe feafeaʼi tatatou ʼōmai takitokotahi mo tana meʼa kai pea mo tana meʼa ʼinu ki te fakatahi. ʼE lelei anai ke tou toe vakaʼi fuli ia te pepa ʼaia, kae ʼe toe ʼaoga pe foki ke tou palalau ki te alatike ʼaia mo nātou ʼaē ʼe ako Tohi-Tapu mo tatou, ʼaē ʼe nātou fakatuʼutuʼu ke nātou kau ki te fakatahi. ʼE maʼuhiga ke ʼiloʼi e te kau ako faka Tohi-Tapu ko nātou fuli ʼaē ʼe ʼōmai ki te fakatahi ʼe tonu anai ke nātou ʼōmai mo tanatou meʼa kai pea mo tanatou meʼa ʼinu.
23 Moʼo fakahā pe ʼo he ʼu kiʼi puani, ʼe koutou manatuʼi anai he ʼu faʼahiga meʼa kai ʼaē neʼe kua ʼosi fakahā atu pe ke koutou ʼaumai: ko he ʼu meʼa kai ʼe maʼamaʼa, mo faigafua tona gaohi, pea mo lelei. ʼO ʼuhiga mo te meʼa ʼinu, ko te kafe, te meʼa malie, te hina vai, ʼe koutou ai anai ki he ʼu hina ʼe mole feala ke foa peʼe ko he telemosi. E feala hakita ʼave he kiʼi ʼaisi veliveli ʼe faigafua tona feʼāveʼaki, mo kapau ʼe feala hona tuku ʼi lalo ʼo he hekaʼaga. Kae, ʼe mole tonu anai ke ʼave te ʼu ʼaisi lalahi faka famili, mo he ʼu kava, peʼe ko he ʼu ipu sioʼata ki te fakatahi. ʼE mole tonu anai ke tou kakai ʼi te lolotoga ʼo te ʼu akonaki. Ko te faʼahi ʼaia ʼe fakahā ʼaki ai ʼe mole tou fakaʼapaʼapa ki te meʼa kai fakalaumālie ʼaē ʼe foaki mai.
24 ʼAua naʼa galo ia tatou ko te temi ʼaē neʼe tuku mai ke tou kakai ai, ʼe ko he temi ke tou kai he meʼa kai ʼe maʼamaʼa pea ke tou fakafiafia ʼi tatatou fakakaugā mo ʼotatou ʼu tēhina pea mo tuagaʼane ʼi te faʼahi fakalaumālie. ʼUhi ko tatou ko te hahaʼi ʼa Sehova, ʼe mahino kia tatou ko te meʼa kai fakalaumālie ʼaē ʼe foaki mai ʼi te ʼu fakatahi ʼe maʼuhiga ʼaupito age ia ʼi te ʼu meʼa fakamālama, pea ʼe tonu anai ke tou fai he fakatuʼutuʼu ʼo ʼuhiga mo te faʼahi ʼaia.
25 ʼE kamata anai tatatou ʼu fakatahi faka tisitilike ʼi ʼAukusito 1995, ko tona kupu tāfito “Tou Vikiviki Fakafiafia.” Kua katoa koa ia meʼa fuli neʼe koutou fakatuʼutuʼu kiai, pea kua tokalelei koa ia meʼa fuli ʼo ʼuhiga mo koutou, ke koutou fakafiafia ʼi te ʼu ʼaho ʼaia e tolu mo te ʼu tēhina pea mo te ʼu meʼa lelei ʼi te faʼahi fakalaumālie? ʼE mātou faikole fakamalotoloto kia Sehova ke ina tapuakina takotou ʼu faiga ke koutou kau ki te fakatahi ʼi te fasiga taʼu māfana ʼaenī mo ʼokotou ʼu tēhina pea mo tuagaʼane ʼaē ka tou talanoa ai peʼe feafeaʼi te vikiviki fakafiafia kia Sehova.
[Talanoa ʼo te pasina 6]
Fakatahi Faka Tisitilike—Puani Ke Tou Manatuʼi
Papitema: Ko nātou ʼaē ʼe papitema ʼe nātou faiga anai ke nātou heheka ʼi te ʼu hekaʼaga ʼaē ʼi muʼa, ia muʼa ʼo te kamata ʼo te fakatahi ʼi te Moeaki uhu. Neʼe fakatokagaʼi ko ʼihi ʼe nātou ʼōmai mo tonatou teu maʼanu ʼe mole mata fakaʼapaʼapa pea ʼe pulinoa ai te maʼuhiga ʼo te papitema. Ke nātou tahi ʼōmai mo honatou teu maʼanu ʼe mata fakaʼapaʼapa pea mo honatou tauveli. ʼI te ʼosi fai ʼo te akonaki ʼo te papitema pea mo te faikole, ko te pelesita ʼo te fakatahi ʼe ina fakahā anai he ʼu fakatuʼutuʼu kia nātou ʼaē ʼe papitema, pea ʼosi pea ina fakahivaʼi te katiko. ʼI te ʼosi ʼo te katiko, ko nātou ʼaē ʼe kau ki te gāue fakatalitali ʼe nātou taki anai ia nātou ʼaē ʼe kau ki te papitema ki te faʼahi ʼaē ʼe fai ai te papitema. Mai tona ʼaluʼaga ʼaē ko te papitema ʼe ko te fakatā ʼo te foaki ʼo kita pea ʼe ko he faʼahi pe ia ʼa kita tokotahi pea mo Sehova, ʼe mole fai he ʼu fakatuʼutuʼu ke fai he ʼu papitema fakakaugā ʼa he toko lua peʼe tokolahi ʼe fāʼufua peʼe nā tapiki lolotoga te hū ʼaē ki te vai.
Te ʼu Pepa Fakaʼiloga: Koutou ʼai takotou pepa fakaʼiloga ʼo te taʼu 1995 ʼi te fakatahi ʼo tatau aipe mo takotou ʼu feʼaluʼaki haʼele pea mo takotou mavae ʼi te fakatahi. Ko te faʼahi ʼaia ʼe feala ai hatatou tuku he faʼifaʼitaki lelei ʼi tatatou feʼaluʼaki. Ke ʼaua naʼa galo ke koutou ʼave takotou kate Instructions médicales. Ko nātou ʼaē ʼe kau ki te famili ʼo te Petele pea mo te kau pionie ʼe tonu ke ia nātou tuʼumaʼu tanatou Carte dʼidentité pea ʼe tohi ai te kokelekasio ʼaē ʼe nātou kau kiai.
Meʼa Nofo: Ko te ʼu sikalaipe ʼo te ʼu kokelekasio ʼe nātou tokakaga anai ki te ʼu Kole pea mo te ʼu Foaki meʼa nofo ke fai mo ʼave fakatomuʼa ki te tuʼasila ʼaē ʼe tonu ke ʼave kiai. Kapau ʼe koutou fakafisi ki takotou kole ʼo ʼuhiga mo te meʼa nofo, koutou fakahā fakavilivili kia ia ʼaē ʼe ina fakatalitali koutou ʼo feiā aipe ki te selevisi ʼaē ʼe fakatuʼutuʼu ʼo ʼuhiga mo te meʼa nofo ʼo te fakatahi, ke feala ai tana foaki te meʼa nofo ʼaia ki he tahi.
Te ʼu Saliote Toho Tamaliki Pea Mo Te ʼu Hekaʼaga ʼe Feala Ke Peluki: ʼE lahi te ʼu faʼahi ʼe mole feala ke fakaʼaogaʼi ai te ʼu saliote toho tamaliki ʼi te ʼu fakatahi lalahi. Ko te ʼu fakatuʼutuʼu ʼo ʼuhiga mo te tokalelei ʼe mole nātou fakagafua ke tou tuku ʼi te ʼu faʼahi ʼaē ʼe tou feʼoloʼaki ai, peʼe ʼi te vaha ʼo te ʼu hekaʼaga te ʼu saliote toho tamaliki. Mai tona ʼaluʼaga ʼaē, ʼi te kaugamālie ʼo te hahaʼi ʼe feala pe ke nātou feʼīʼaki, ko te ʼu meʼa toho tamaliki ʼe ko he ʼu meʼa fakatupu tuʼutāmaki ki te ʼu tamaliki ʼo toe feiā pe ki te hahaʼi ʼaē ʼe tūkia anai kiai. Koutou tokakaga ke ʼaua naʼa koutou ʼaumai te ʼu meʼa ʼaia ki te fakatahi. Kae, ko te ʼu hekaʼaga ʼo te ʼu toe kei liliki peʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala tona fakapipiki ki he hekaʼaga ia tafa ʼo te ʼu mātuʼa. Pea koutou tokakaga pe foki naʼa koutou ʼōmai mo ni ʼu hekaʼaga ʼe feala ke peluki. Ko te ʼu hekaʼaga ʼaia ʼe fakatupu tuʼutāmaki pea ʼe mole fakagafua tonatou fakaʼaogaʼi ʼi te ʼu fakatahi lalahi. Ko takotou lagolago ki te potu ʼaia ʼe leleiʼia anai.
Selevisi Kia Nātou ʼAē ʼe Fia Gāue: ʼE feala koa hakotou fakaʼaogaʼi he kiʼi temi moʼo foaki ʼo takotou tokoni ʼi he koga ʼo te ʼu gāue? ʼE feala ke lahi hotatou ʼaoga pea mo tou maʼu ai he fiafia lahi mokā ʼe tou kaugana ki ʼotatou ʼu tēhina, tatau aipe peʼe tou fai pe ʼi he ʼu kiʼi hola. Kapau ʼe feala hakotou tokoni, koutou ʼolo ki te selevisi ʼo ʼuhiga mo te gāue ʼi te fakatahi. Ko te ʼu tamaliki ʼaē ʼe mole heʼeki katoa tonatou taʼu 16 ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou ʼu tāmai, tanatou faʼe peʼe ko he tahi atu kua aga fakapotopoto.
Te ʼu Fakatokaga: ʼI tatatou tokaga ʼaē ki te ʼu faigataʼaʼia ʼe feala ke hoko, ʼe tou faiga anai ke ʼaua naʼa hoko he ʼu faigataʼaʼia ʼe mole hona ʼuhiga. Tuʼumaʼu, ko nātou ʼaē ʼe mole heʼeki māhani ʼi te koga meʼa ʼaia ʼe kākāʼi nātou e te hahaʼi kaihaʼa pea mo te hahaʼi aga fakakākā. Koutou māpunuʼi tuʼumaʼu te ʼu matapā ʼo takotou motokā pea ʼaua naʼa koutou tuku he ʼu faʼahiga meʼa ʼe feala ke sioʼi e te hahaʼi ʼaē ʼe feʼoloʼaki ʼi te ala. Ko te ʼu hahaʼi kaihaʼa ʼe nātou tokagaʼi te ʼu fakatahi lalahi. ʼE mole lelei anai te tuku fakahāhā ʼo he meʼa maʼuhiga ʼi tokotou hekaʼaga. ʼE mole feala ke koutou ʼiloʼi papau ko nātou fuli ʼaē ʼe nātou taka ʼi ʼokotou tafaʼaki ko te kau Kilisitiano.