“Ko Te Manavasiʼi Faka Lotu”—Fakatahi Faka Tisitilike 1994
1 Talu mai te temi ʼo Apele pea mo Noe, tokolahi te ʼu tagata neʼe nātou maʼu ia te “manavasiʼi faka lotu.” (Hep. 11:4, 7) Ko te manavasiʼi faka lotu “ko tona faka ʼuhiga ko te fakaʼapaʼapa pea mo te atolasio ki te Tupuʼaga, ʼo mole fai he meʼa ʼe mole ina leleiʼia.” (ad p. 343.) ʼI ʼAukusito, ʼe tou fakahā ai anai he fakaʼapaʼapa lahi ʼo tou ʼolo ki te fakatahi faka tisitilike ko tona kupu tāfito “Ko te manavasiʼi faka lotu.” ʼE tou kau anai koa ki te fakatahi katoa, mai te katiko ʼaē ʼi te kamataʼaga ʼo aʼu ki te faikole fakaʼosi?
2 ʼI te taʼu fuli, ʼe tou nonofo ʼo ʼamanaki ki te fakatahi faka tisitilike. Ko tatatou kau ki te fakatahi e lagi fakamaʼua kiai he falā pea mo he ʼu faiga, kae ʼe tou maʼu ai te ʼu tapuakina lahi. ʼE tou liliu fiafia ki totatou ʼapi, ʼo tou maʼu he fua lelei pea mo tou mālohi fakalaumālie. (Vakaʼi 1 Hau 8:66.) Ko te fakakaugā mo ʼihi ʼi te fakatahi ʼe fakatupu fiafia pea ʼe puli ai te ʼu aga māhani. Kae ʼaua naʼa galo ia tatou ʼe tou fakatahitahi moʼo atolasio kia Sehova. Ko ia ʼaē ʼe ina fakatotonu mai ke tou fakatahitahi pea ʼe ina fakahā mai ʼe tou maʼu ai he ʼu tapuakina.—Teu. 31:12, 13; Pes. 122:1.
3 Ko He Fakatahi ʼAho Tolu: ʼI te taʼu ʼaenī, ʼe hoko anai te fakatahi ʼi Niumea ʼi te ʼu ʼaho 26 ki te 28 ʼo ʼAukusito 1994.
4 ʼE kamata anai te fakatahi ʼi te hola 10 ʼosi 20 ʼi te Feliaono pea ʼe fakaʼosi anai ʼi te ʼAhotapu ʼi te hola 4 ʼosi 15 afiafi. Ko te Moeaki pea mo te ʼAhotapu, ʼe kamata anai ʼi te hola 9 ʼosi 30. Ko te ʼu matapā ʼe avahi anai ʼi te hola 7 ʼosi 30. ʼE gata pe kia nātou ʼaē ʼe ʼi ai tanatou gāue ʼe feala hanatou hū fakatomuʼa ki loto.
5 Ko He Fakaʼapaʼapa Lahi Kia Sehova ʼe Ina Uga Tatou Ke Tou ʼOlo Ki Te Fakatahi: Neʼe tokoniʼi e Paulo te kau Kilisitiano ke nātou “kaugana ki te ʼAtua ʼaki he gāue taputapu . . . , ʼaki he manavasiʼi faka lotu pea mo he manavahe.” (Hep. 12:28.) Ko te fakatahi faka tisitilike neʼe teuteuʼi foki moʼo tokoni kia tatou ke tou fai te faʼahi ʼaia. E lagi tou tāu anai mo he ʼu fihifihia ʼe fakatupu kovi ai ki tatatou fakatuʼutuʼu ʼaē ke tou kau ki te fakatahi. ʼE feala ke hage te ʼu faigataʼaʼia ʼaia ko he ʼu moʼuga, kae, ʼaki te tokoni ʼa Sehova, ʼe faigafua ai tatatou tauʼi. (Mat. 17:20) Kapau ʼe mole feala hakotou toʼo he ʼu ʼaho mālōlō ke koutou kau ai ki te fakatahi, mai te Feliaono ki te ʼAhotapu hoʼatā, neʼe koutou kole koa he ʼaho mālōlō ki tokotou patolo pea mo koutou faikole kia Sehova? (Sake 1:6-8)
6 Ke Tou Maʼu He Fua Lelei Mai Tatatou Fakatuʼutuʼu: Koteā koa te fakatuʼutuʼu ʼaia? Ko te temi pea mo te ʼu faiga ʼe feala ai hatatou kau ki te fakatahi. ʼE mole ko he aga fakapotopoto anai hatatou teuteu fakalelei ke feala hatatou ʼolo ki te fakatahi pea tou liliu ki totatou ʼapi ʼi te ʼAhotapu afiafi ʼo lahi te koga ʼo te polokalama neʼe mole tou muliʼi. ʼE tou mavae anai koa ʼi te lolotoga ʼo he kaitahi ʼo ʼolo ʼo fai niʼihi ʼu maʼua? Kapau kua tou fakapotopoto ʼi te faʼahi fakalaumālie pea mo tou maʼuliʼi te manavasiʼi faka lotu, ʼe mole tonu anai ke tou hala mo te meʼa kai ʼaē neʼe teuteuʼi e Sehova maʼa tatou.—Vakaʼi 1 Kolonito 2:9, 10.
7 Tokolahi ia tatou ʼe mole hake anai ʼi tatatou manatu ke tou mavae ʼi te fakatahi ia muʼa ʼo te temi ʼaē ʼe ʼosi ai. Kae, ʼe feala anai pe ke lahi te koga ʼe mole tou maʼu. ʼO feafeaʼi? ʼAki tatatou mole teuteu ʼaē ke lahi tatatou maʼu he fua lelei ʼo te polokalama. ʼE tou fia ʼalaʼala uhu anai ʼo ʼinu kafe pea mo fai ʼo ʼihi gāue ʼe ʼaoga, ke fealagia ai hatatou heheka ʼi totatou hekaʼaga ia muʼa ʼo te kamata ʼo te fakatahi. ʼE maʼuhiga foki ke lelei tatatou mālōlō ke feala ai hatatou nonofo ʼalaʼala pea mo fakalogo lelei ki te fakatahi.
8 Ke tou maʼu he fua lelei ʼo te polokalama, ko he fakatuʼutuʼu ʼe lelei ko te tohi ʼo he ʼu nota nounou. Ko te faʼahi ʼaia ʼe ʼaoga tatau ki te kau tūpulaga pea mo nātou ʼaē kua lalahi. ʼE tala fēnei e te kaugā faka mafola e taʼu 16: “ ʼE ʼau tohi te ʼu vaega faka Tohi-Tapu ʼaē ʼe fakahā ʼi te akonaki. ʼE feala ai haku toe lau ʼi toku ʼapi.” ʼE toe ʼui fēnei e te tahi tūpulaga e taʼu 16: “ ʼE ʼau tohi te ʼu puani tāfito ke feala ai haku nofo ʼalaʼala.” ʼI te agamāhani, ʼe ʼaoga pe ke tou ʼave ki te fakatahi tatatou Tohi-Tapu, he katiko, he kaupepa ʼe mole faʼa lahi pea mo he peni. ʼIo, ʼe tonu ke tokakaga te ʼu mātuʼa ʼaē ʼe ʼi ai tanatou ʼu tamaliki kei liliki ki te ʼu meʼa ʼaē ʼe ʼaoga kia nātou, kae ʼe lelei ke ʼaua naʼa nātou ʼaumai he ʼu ʼaisi lalahi pea mo ʼihi ʼu meʼa ʼe ʼaoga kia nātou.
9 Ko te ʼu tēhina ʼe nātou puke te polokalama ʼo te fakatahi ʼaki te ʼu fakatagi puke leʼo peʼe ko te ʼu kamela viteo ke feala ai hanatou fakalogo peʼe ke nātou sioʼi ʼi he temi ki ʼamuli ʼi tonatou ʼapi. ʼE ko he potu ia ʼe tahi fakalogo pe kia tatou takitokotahi, kae ko te meʼa neʼe kua hoko, ʼe hā mai ia ka hoko te temi ʼaē ʼe tou fakahoko ai ʼotatou ʼu maʼua, ʼe mole maʼu hotatou temi ke tou fakalogo ai peʼe ke tou sioʼi ai te foʼi fime. Koia, ʼe feala pe ke mole tou tokagaʼi te ʼu manatu tāfito ʼo he akonaki ʼuhi heʼe tou faiga ke lelei te puke ʼo te foʼi fime.
10 ʼE tonu anai ke tou heheka ia muʼa ʼo te kamata ʼo te fakatahi. Tatau aipe peʼe tou fakafiafia ʼi tatatou felāveʼi mo ʼotatou ʼu kaumeʼa ʼāfea, kae ka fakahā mai e te pelesita ko te polokalama ka kamata, ʼe ko he aga fakaʼapaʼapa kia nātou ʼaē ʼe gāue pea mo te ʼu tēhina fuli ia te fakagata ʼo te fai palalau kae tou ʼolo ʼo heheka ki ʼotatou ʼu hekaʼaga.
11 Ko te ʼu fakatahi faka tisitilike ʼe ko he ʼu ʼaho fakafiafia koteʼuhi ʼe lahi te tapuakina e Sehova te ʼu ʼaho ʼaia. ʼE tou maʼu ai te ʼu tapuakina ʼi te faʼahi fakasino pea mo te faʼahi fakalaumālie.
12 Ko Takotou Aga ʼe Tāu Anai Koa Mo He ʼu Fakavikiviki? ʼI te taʼu fuli, ko te Minisitelio ʼo te Puleʼaga ʼe ina fakamanatuʼi fakalelei mai te maʼuhiga ʼo te maʼu ʼaē ʼo he aga ʼe lelei mokā ʼe tou kau ki te fakatahi faka tisitilike. Koia ʼe tonu ai ke tou maʼu tuʼumaʼu he aga ʼe tāu, kae kapau ʼe kaugamālie tatatou fakatahi, ko te ʼu hahaʼi ʼaē ʼo tuʼa ʼe nātou tautau sivi fakalelei ia tatou. E lagi ʼe nātou fakamāu anai tatou ʼuhi ko tatatou aga, peʼe lelei peʼe kovi, kae lagi mole nātou fakamāu tatatou fai faka mafola. ʼE tou loto ke liliu ʼatatou ʼu palalau pea mo ʼatatou ʼu aga ʼo fakavikiviki ia Sehova.—Taag. 27:2; 1 Petelo 2:12.
13 ʼI te hili ʼo te fakatahi faka tisitilike “Akonaki fakaʼatua” ʼo te taʼu kua hili, neʼe ʼui fēnei e te tagata ʼe gāue ʼi te otele: “Neʼe kua fualoa taku mole heʼeki sio ki he kau tūpulaga feiā.” Pea, ʼi te hili ʼo tana fakatokagaʼi he ʼu aga ʼe mole lelei pea mo te maumau ʼa ʼihi kūtuga, neʼe ina ʼui fēnei ʼo ʼuhiga mo te ʼu tamaliki ʼa te kau Fakamoʼoni “ ʼE lelei tanatou aga; ʼe ko he meʼa lelei tatatou fakatahi mo nātou. Ka na neʼe hage pe la te ʼu fakatahi age ʼaē ko te fakatahi ʼaenī! ”
14 Neʼe ʼui fēnei e te tagata fai sulunale ʼo ʼuhiga mo te fakatahi: “Neʼe teu te hahaʼi fafine pea mo te tamaliki fafine ki te ʼu kofu matalelei; ko te ʼu tagata pea mo te kau tūpulaga neʼe ʼi ai tanatou kofu pea mo ʼonatou hēkesi. Neʼe nātou tohi fakalelei tanatou ʼu nota mo nātou fakalogo lelei kia nātou ʼaē ʼe fai akonaki ʼi te ʼu ʼaho ʼaia e fā. Kapau ʼe ʼalutahi te aga maʼa pea mo te aga faka lotu, pea ko te kau Fakamoʼoni ʼa Sehova ʼe lahi ʼaupito tanatou fakahā ia te faʼahi ʼaia.” Ko te ʼu tānaki fuli ʼe mole fakafiafia tuʼumaʼu.
15 Ko te ʼu tamaliki neʼe mole nātou fakalogo ʼo nātou logoaʼa ʼi te ʼu fakatahiʼaga. ʼE lahi te ʼu faʼahi feiā neʼe hoko he neʼe siʼisiʼi pe neʼe mole tokakaga te hahaʼi lalahi kia nātou.
16 Neʼe ʼui fēnei, neʼe lahi te feʼoloʼaki ʼi te lolotoga ʼo te fakatahi. Neʼe tokolahi ʼaupito te hahaʼi (tāfito la te ʼu tamaliki) ʼi te ʼu faʼahi ʼaē ʼe feʼoloʼaki ai te hahaʼi ʼi te Moeaki hoʼatā, ʼe hā mai ai ʼe tonu ke akoʼi e te ʼu mātuʼa pea ke lahi tanatou tokakaga ki tanatou ʼu tamaliki. Mokā tou feʼoloʼaki tuʼumaʼu ʼi te ʼu faʼahi ʼaē ʼe feʼoloʼaki ai te hahaʼi, ʼe lahi ai tatatou logoaʼa, ʼo fakatupu hohaʼa kia nātou ʼaē fakalogo. Ko ʼihi ʼe ʼi ai tanatou ʼu gāue ʼe ʼaoga ke nātou fai ʼi te fakatahi, kae ko ʼihi ʼe mole tonu koa la ke nātou nonofo ʼi tonatou ʼu hekaʼaga pea mo fakalogo fakalelei?
17 Tokolahi te ʼu mātuʼa ʼe nātou tokakaga ki tanatou ʼu tamaliki mokā ʼe nātou ʼolo ki te ʼu fono ʼo te kokelekasio ʼi te vāhaʼa fuli. ʼE mole tonu koa la ke toe feiā aipe tanatou tokakaga ki tanatou ʼu tamaliki ke nātou heheka ʼi ʼonatou tafa kae ʼaua naʼa nātou feleleʼaki lolotoga te fakatahi? ʼE moʼoni ia, ko te koga meʼa ʼaē ʼe fai ai te fakatahi ʼe ko he Fale Puleʼaga laulahi, kae ʼe kei tou nonofo nei pe ʼi te mālama ʼa Satana; ʼe feala ke hū mai ni hahaʼi ʼe ʼi ai tanatou ʼu fakakaukau kovi. ʼE ʼAOGA ʼI TE TEMI FULI KE KOUTOU ʼILOʼI PEʼE NONOFO ʼIFEA TAKOTOU ʼU TAMALIKI PEA KOTEĀ TE MEʼA ʼE NĀTOU FAI.
18 Teu Pea Mo Te Faʼu: ʼE tou maʼuʼuli ʼi te temi ʼaē ʼe tali lelei ai te ʼu faʼahiga teu ʼaē ʼe mole aga fakaʼapaʼapa. Ko te fakatokaga ʼaē ʼe tuʼu ʼi te palakalafe 14 ʼe hā mai ai ko ʼihi ʼe kei nātou leleiʼia he teu ʼe mata fakaʼapaʼapa, tāfito la ʼo ʼuhiga mo te tauhi. Ko he teu pea mo he faʼu ʼe mole lelei pea ʼe mole mata feʼauga ʼe hā ai totatou ʼuhiga totonu. Ke ʼaua naʼa galo ia tatou ko te koga meʼa ʼaē ʼe fai ai te fakatahi ʼe mole ko he malaʼe pe, kae ko te Fale ʼo te Puleʼaga. Ko ʼihi ʼe teuteu fakaʼapaʼapa ki te fakatahi kae ʼi te hili ʼo te fakatahi ʼe nātou ai ʼonatou ʼu teu ʼe mole mata feʼauga.
19 Ko nātou ʼaē ʼe papitema ʼe tonu ke nātou manatuʼi, ʼi te toʼotoʼoga ʼaia, ʼe mole ʼaoga ke nātou ai ʼihi ʼu teu maʼanu. ʼE tonu ke nātou ai honatou ʼu teu ʼe tāu mo te ʼaho ʼaia pea mo lelei. Ko ai koa ʼaē ʼe tokaga ki te faʼahi ʼaia? Ko te ʼu tagata ʼāfea ʼe nātou tokakaga ke ʼaua naʼa liliu he tahi ʼi te kokelekasio ʼo fakatupu tūkia ki he tahi. (2 Ko. 6:3, 4) Ko he teu maʼanu ʼe hā lelei ai te ʼu koga ʼo te sino pea mo te ʼu kofu sino ʼe tuʼu ʼi ai he ʼu paki pea mo he ʼu faʼahiga palalau ʼa te mālama ʼe mole tonu ke fakaʼaogaʼi. ʼE lelei anai ke palalau te ʼu tagata ʼāfea ki te faʼahi ʼaia lolotoga te fai ʼo te ʼu fehuʼi ʼaē ʼe tuʼu ʼi te tohi Notre ministère.
20 Ko Te ʼu Meʼa Nofo: ʼE ʼaoga ke tou mahino lelei mokā fakatalitali tatou e ni ʼu tēhina pea mo tuagaʼane ʼi tonatou ʼapi. ʼE tonu ke tou maʼuliʼi te fua ʼo te laumālie ʼi te temi fuli. Tou manatuʼi foki ʼe ʼaoga ke tou lagolago ki te famili ʼaē ʼe ina fakatalitali tatou pea ke ʼaua naʼa tou tali koviʼi te tali kāiga ʼa te famili ʼaia. Koutou fakaʼaogaʼi he ʼu minuta ke feala ai hakotou toe vakaʼi te alatike ʼo ʼuhiga mo te tali kāiga, ʼaē ʼe fakatafito ki Te Tule Leʼo (fakafalani) ʼo te ʼaho 15 ʼo Sepetepeli 1975 ʼi te pasina 551.
21 Te ʼu Meʼa Puke Leʼo: Ohage ko tatatou ʼui ʼi ʼoluga, ko te fakaʼaogaʼi ʼo te ʼu meʼa puke leʼo pea tāfito te ʼu kamela viteo ʼe ko he faʼahi ʼe fakalogo pe ia kia tatou takitokotahi. Kapau ʼe tou fakatuʼutuʼu ke tou puke te ʼu akonaki, ke tou fakahā tatatou agaʼofa kia nātou ʼaē ʼi ʼotatou tafaʼaki. ʼO feiā aipe mo te puke fime ʼaē mai tokita hekaʼaga ʼe feala ke fakatupu hohaʼa ki niʼihi. ʼE mole tonu anai ke tou fakatupu hohaʼa ki niʼihi ʼi te fakatahi, ʼaki hatatou puke ʼo he foʼi fime viteo. Tahi ʼaē meʼa, ʼe mole tonu ke ʼi ai he meʼa puke leʼo peʼe ko he tahi meʼa ʼe fakapipiki ki te hila peʼe ki te tuʼuʼaga ʼo te mikolo ʼo te fakatahi, pea ke ʼaua naʼa fakatupu hohaʼa ki te faʼahi ʼaē ʼe feʼoloʼaki ai te hahaʼi.
22 Hekaʼaga: ʼE ʼaoga tuʼumaʼu ke tou fakatokagaʼi te ʼu faigataʼaʼia ʼo ʼuhiga mo te tatāʼofi ʼaē ʼo te ʼu hekaʼaga. Koia, ʼe mātou fia fakamanatuʼi atu te meʼa ʼaenī: ʼE TONU KE TOU TAUPAU HE ʼU HEKAʼAGA ʼO TOTATOU FAMILI PEA MO NĀTOU ʼAĒ NEʼE ’ŌMAI MO TATOU. Tokolahi ʼe nātou tatāʼofi te ʼu hekaʼaga ʼe mole nofoʼi lolotoga te fakatahi. Ko te taʼi aga ʼaia ʼe hā ai ʼe mole ia tatou te agaʼofa ʼe hage pe ia ʼe hoholo atu tona fai logope la te ʼu fakamanatu ʼaē ʼe tautau fai mai. ʼE mole tonu koa la ke tou sivi ia tatou ʼi te faʼahi ʼaia pea ke tou metitasio ki te fakatuʼutuʼu ʼaē ia Filipe 2:3, 4?
23 ʼI te fakatahi fuli, ʼe fai te ʼu fakatuʼutuʼu ʼo ʼuhiga mo nātou ʼaē ʼe ʼi ai he ʼu meʼa makehe ʼe ʼaoga kia nātou, ohage la ko te hahaʼi ʼaē kua matutuʼa pea mo nātou ʼaē ʼe māʼimoa. Koutou tokaga ke ʼaua naʼa nonofo niʼihi ʼi te ʼu hekaʼaga ʼo te faʼahi ʼaē neʼe tāʼofi maʼa nātou mo kapau ʼe mole koutou kau ki te ʼu hahaʼi ʼaia. Ke koutou tokakaga ʼo foaki fakavilivili kia nātou ʼaia he hekaʼaga mo kapau ʼe mole nātou kaugā ʼōmai mo niʼihi.
24 Te ʼu Tohi Pea Mo Te Selevisi ʼo Te Meʼa Kai: ʼI te fakatahi faka tisitilike, ʼe tou maʼu ai he meʼa kai lahi ʼaupito ʼi te faʼahi fakasino pea mo te faʼahi fakalaumālie. ʼE tonu anai ke tou tali fakafiafia, ke ʼaua naʼa puli he manatu kia tatou. (2 Fkma. 31:10; Taag. 3:10; Soane 6:12)
25 Ko te ʼaho 26 ʼo ʼAukusito ʼo te taʼu 1994 ʼaē ʼe kamata ai anai te ʼuluaki fakatahi faka tisitilike ko tona kupu tāfito “Ko Te Manavasiʼi Faka Lotu.” Kua katoa koa ʼakotou fakatuʼutuʼu, pea kua koutou teuteu koa ke koutou kau fakalelei ki te ʼu ʼaho fakafiafia e tolu ʼo koutou maʼu te fiafia fakatautehina pea mo te ʼu meʼa lelei ʼi te faʼahi fakalaumālie? ʼE mātou faikole fakamalotoloto kia Sehova ke ina tapuakiʼi ʼakotou faiga ke feala ai hakotou kau ki te fakatahi faka tisitilike ko tona kupu tāfito “Ko Te Manavasiʼi Faka Lotu” pea ʼe fafaga ai koutou ki te ʼu meʼa lelei ʼe haʼu mai te laupapa ʼa Sehova.
[Talanoa ʼo te pasina 6]
Fakatahi Faka Tisitilike—Puani Ke Manatuʼi
Papitema: Ko nātou ʼaē ʼe papitema ʼe nātou faiga anai ke nātou heheka ʼi te ʼu hekaʼaga ʼaē ʼi muʼa, ia muʼa ʼo te kamata ʼo te fakatahi ʼi te moeaki uhu. Neʼe fakatokagaʼi ko ʼihi ʼe nātou ʼōmai mo tonatou teu maʼanu ʼe mole mata fakaʼapaʼapa pea ʼe pulinoa ai te maʼuhiga ʼo te papitema. Ke nātou tahi ʼōmai mo honatou teu maʼanu ʼe mata fakaʼapaʼapa pea mo honatou tauveli. ʼI te ʼosi fai ʼo te akonaki ʼo te papitema pea mo te faikole, ko te pelesita ʼo te fakatahi ʼe ina fakahā anai he ʼu fakatuʼutuʼu kia nātou ʼaē ʼe papitema, pea ʼosi pea ina fakahivaʼi te katiko. ʼI te ʼosi ʼo te katiko, ko nātou ʼaē ʼe kau ki te gāue fakatalitali ʼe nātou taki anai ia nātou ʼaē ʼe kau ki te papitema ki te faʼahi ʼaē ʼe fai ai te papitema. Mai tona ʼaluʼaga ʼaē ko te papitema ʼe ko te fakatā ʼo te foaki ʼo kita pea ʼe ko he faʼahi pe ia ʼa kita tokotahi pea mo Sehova, ʼe mole fai he ʼu fakatuʼutuʼu ke fai he ʼu “papitema fakakaugā” ʼa he toko lua peʼe tokolahi ʼe fāʼufua peʼe nā tapiki lolotoga te hū ʼaē ki te vai.
Te ʼu Pepa Fakaʼiloga: Koutou ʼai takotou pepa fakaʼiloga ʼo te taʼu 1994 ʼi te fakatahi ʼo tatau aipe mo takotou ʼu feʼaluʼaki haʼele pea mo takotou liliu, ʼe feala ai hakotou tuku he faʼifaʼitaki lelei. ʼE tonu ke koutou toʼo takotou ʼu pepa fakaʼiloga ʼi te kokelekasio, heʼe mole koutou maʼu anai ʼi te fakatahi. Ke ʼaua naʼa galo ke koutou ʼave takotou kate Instructions médicales. Ko nātou ʼaē ʼe kau ki te famili ʼo te Petele pea mo te kau pionie ʼe tonu ke ia nātou tuʼumaʼu tanatou Carte dʼidentité pea ʼe tohi ai te kokelekasio ʼaē ʼe nātou kau kiai.
Meʼa Nofo: ʼE mātou toe kole atu kia koutou fuli ke koutou gāue tahi mo te selevisi ʼo te meʼa nofo. KAPAU ʼE KOUTOU FELĀVEʼI MO HE ʼU FAIGATAʼAʼIA, koutou fakalelei ʼo fakahā ki te tagata taupau ki te selevisi ʼo ʼuhiga mo te ʼu meʼa nofo lolotoga te fakatahi ke feala ai hana fakatokatoka fakavilivili te faʼahi ʼaia. Ko te ʼu sikalaipe ʼo te ʼu kokelekasio ʼe nātou tokakaga anai ki te ʼu Kole pea mo te ʼu Foaki meʼa nofo ke fai mo ʼave fakatomuʼa ki te tuʼasila ʼaē ʼe tonu ke ʼave kiai. Kapau ʼe koutou fakafisi ki takotou kole ʼo ʼuhiga mo te meʼa nofo, koutou fakahā fakavilivili kia ia ʼaē ʼe ina fakatalitali koutou ʼo feiā aipe ki te selevisi ʼaē ʼe fakatuʼutuʼu ʼo ʼuhiga mo te meʼa nofo ʼo te fakatahi, ke feala ai tana foaki te meʼa nofo ʼaia ki he tahi.
Te ʼu Saliote Toho Tamaliki: ʼE tapu te fakaʼaogaʼi ʼo te ʼu saliote toho tamaliki ʼi te ʼu fakatahi. Ko te ʼu fakatuʼutuʼu ki te hāofaki ʼe mole ina fakagafua ke tuku ʼi te haʼeleʼaga peʼe ʼi loto ʼo te ʼu ʼatu hekaʼaga. ʼUhi ʼe feala ke feʼiʼaki te tokolahi, ko te ʼu meʼa toho tamaliki ʼe fakatupu ai te ʼu tuʼutāmaki ki te ʼu tamaliki ʼo feiā ai foki ki te hahaʼi ʼaē ʼe feala ke fetōkaʼi ki te ʼu meʼa toho tamaliki. Koutou tokakaga ke ʼaua naʼa koutou ʼaumai te ʼu meʼa ʼaia ki te fakatahi. Kae, ko te ʼu hekaʼaga ʼo te ʼu toe kei liliki peʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala ke fakapipiki ki he hekaʼaga ʼi ʼonatou tafa. Ko takotou lagolago ki te potu ʼaia ʼe leleiʼia anai.
Selevisi Kia Nātou ʼAē ʼe Fia Gāue: ʼE feala koa hakotou fakaʼaogaʼi he kiʼi temi moʼo foaki ʼo takotou tokoni ʼi he koga ʼo te ʼu gāue? ʼE feala ke lahi hotatou ʼaoga pea mo tou maʼu ai he fiafia lahi mokā ʼe tou kaugana ki ʼotatou ʼu tēhina, tatau aipe peʼe tou fai pe ʼi he ʼu kiʼi hola. Kapau ʼe feala hakotou tokoni, koutou ʼolo ki te selevisi ʼo ʼuhiga mo te gāue ʼi te fakatahi. Ko te ʼu tamaliki ʼaē ʼe mole heʼeki katoa tonatou taʼu 16 ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou ʼu tāmai, tanatou faʼe peʼe ko he tahi atu kua aga fakapotopoto.
Te ʼu Fakatokaga: ʼI tatatou tokaga ʼaē ki te ʼu faigataʼaʼia ʼe feala ke hoko, ʼe tou faiga anai ke ʼaua naʼa hoko he ʼu faigataʼaʼia ʼe mole hona ʼuhiga. Tuʼumaʼu, ko nātou ʼaē ʼe mole heʼeki māhani ʼi te koga meʼa ʼaia ʼe kākāʼi nātou e te hahaʼi kaihaʼa pea mo te hahaʼi aga fakakākā. Koutou māpunuʼi tuʼumaʼu te ʼu matapā ʼo takotou motokā pea ʼaua naʼa koutou tuku he ʼu faʼahiga meʼa ʼo feala ke sioʼi e te hahaʼi ʼaē ʼe feʼaluʼaki ʼi te ala. Ko te ʼu hahaʼi kaihaʼa ʼe faigafua kia nātou lolotoga te ʼu fakatahi lalahi ʼaia. ʼE mole lelei anai te tuku fakahāhā ʼo he meʼa maʼuhiga ʼi te hekaʼaga. ʼE mole feala ke koutou ʼiloʼi papau ko nātou fuli ʼaē ʼe nātou taka ʼi ʼokotou tafaʼaki ko te kau Kilisitiano. KOUTOU SIOʼI TUʼUMAʼU TAKOTOU FĀNAU.