Ko Te Fakatahi Faka Tisitilike 1996 ʼo “Te Kau ʼAve Logo ʼo Te Tokalelei Fakaʼatua”

¹ Ko te polokalama ʼo te fakatahi faka tisitilike ʼo te taʼu ʼaenī, ʼe mahino papau ia ʼe tokoni anai kia tatou ke tou taupau maʼu tatatou tokalelei fakaʼatua, pea ʼe ina fakamahino mai anai kia tatou tatatou gāue moʼo tokoni ki te hahaʼi ke nātou maʼu te tokalelei ʼaia. Koʼeni te kupu tāfito ʼo te fakatahi “Ko Te Kau ʼAve Logo ʼo Te Tokalelei Fakaʼatua.” ʼE fai anai ʼi totatou Fale Fakatahi ʼi Normandie ʼo kamata ʼi te ʼaho 13 ki te 15 ʼo Sepetepeli 1996. Neʼe kua koutou fai koa he ʼu fakatuʼutuʼu ke koutou kau ʼi te polokalama katoa ʼo te fakatahi ʼaia?

2 Ko Te Fakatahi ʼAho Tolu: ʼE mātou ʼiloʼi ʼe koutou toe leleiʼia anai mo te fakatahi ʼo te taʼu ʼaenī, pea ʼe koutou liliu anai ki tokotou ʼapi mo he mālohi foʼou. (2 Fkma. 7:​10) Ko te taʼu ʼaenī ʼe toe fai anai te fakatahi ia ʼaho e tolu. Neʼe kua koutou fai koa he ʼu fakatuʼutuʼu ke koutou toʼo hokotou ʼu ʼaho mālōlō ʼi takotou gāue, ke feala ai hakotou kau ki te fakatahi ʼi te ʼu ʼaho ʼaia e tolu?

³ Ko Te Tule Leʼo ʼo te ʼaho 15 ʼo Fepualio 1996, ʼe tuʼu ai te lisi ʼo te ʼu ʼaho pea mo te ʼu koga meʼa ʼaē ʼe fai ai te ʼu fakatahi fuli ʼo te Potu Toga ʼo te Pasifika. ʼO ʼuhiga mo tatatou filiale, ʼe ʼi ai anai te tahi fakatahi ʼe fai ʼi Vila ʼi te lea faka Pisilama. Ko te fakatahi ʼaia ʼe tonu ke fai ʼi te Fale ʼo te Puleʼaga ʼo te kokelekasio ʼi Vila, ʼo kamata ʼi te ʼaho 30 ʼo ʼAukusito ki te ʼaho 1 ʼo Sepetepeli 1996.

⁴ ʼI te ʼu ʼaho ʼaia e tolu ʼe kamata anai te polokalama ʼi te hola 9 vaelua ʼi te uhu pea ʼe fakaʼosi anai ʼi te ʼAhotapu ʼi te fakaōvi ki te hola 4 afiafi. ʼE avahi anai te ʼu matapā ʼi te hola 8 uhu. ʼE gata pe kia nātou ʼaē neʼe hinoʼi ki he gāue ʼe fakagafua anai hanatou hū fakatomuʼa ki loto, pea ʼe mole fakagafua anai tanatou tāʼofi he ʼu hekaʼaga ʼi muʼa ʼo te avahi ʼo te fale ki te hahaʼi fuli. ʼE tou fakahā anai koa te agaʼofa ki ʼotatou ʼu tēhina kua matutuʼa pea mo nātou ʼaē ʼe māʼimoa, ʼaki tatatou tuku te ʼu hekaʼaga ʼaē ʼe ʼaoga pea mo lelei ke nātou heheka ai? Tou manatuʼi “ko te ʼofa . . . ʼe mole ina kumi pe te meʼa ʼaē ʼe ʼaoga kia te ia.”​—1 Ko. 13:​4, 5; Filp. 2:⁠4.

⁵ ʼE Feafeaʼi Anai Hakotou Fakamāsila?: ʼI te ʼosi talanoa ʼo Te Tule Leʼo ʼo te ʼaho 15 ʼo ʼAukusito 1993 kia Tāʼaga Lea 27:​17, “Ko te ukamea ʼe fakamāsila ʼaki te ukamea,” neʼe ina ʼui fēnei: “ ʼE tou hage ko he ʼu meʼa gāue ʼe tonu ke fakamāsila tuʼumaʼu. Ko tatatou ʼofa ʼaē kia Sehova pea mo te ʼu tonu ʼaē ʼe tou fai ʼo ʼuhiga mo tatatou tui, ʼe faka ʼuhiga ai ʼe tonu ke tou kehe mo te malamanei, koia ʼe tonu ai ke tou kehekehe tuʼumaʼu mo te hahaʼi.” ʼE lava feafeaʼi koa hatatou mulimuli ki te tokoni ʼaia?

⁶ ʼE tonu ke tou kehe mo te hahaʼi ʼo te malamanei. ʼE tonu ke tou taupau maʼu te faʼahi ʼaia, ʼaki hatatou faiva ki te ʼu gāue ʼaē ʼe lelei. (Tito 2:​14) Ko te tupuʼaga la ʼaia ʼo te toe ʼui fēnei e te alatike ʼo Te Tule Leʼo: “Ka tou fakatahi mo te hahaʼi ʼaē ʼe ʼoʼofa kia Sehova, ʼe tou fefaka­māsilaʼaki​—ʼe tou feʼugaʼaki ki te ʼofa pea mo te ʼu gāue lelei.” Ko te fakatahi faka tisitilike ʼe ko he fakatuʼutuʼu ʼa Sehova moʼo tokoni kia tatou ke tou maʼu he ʼatamai māsila ʼi te faʼahi fakalaumālie. ʼOfa pe ke tou faiga mālohi ke tou kau ki te ʼu ʼaho e tolu ʼo te fakatahi. Ke ʼaua naʼa tou tō ʼi he koga ʼo te polokalama ʼaia.

⁷ Ko He Tahi ʼe Poto ʼe Fakalogo Anai: Ko te fakalogo ʼe ko he faʼahi ia ʼe tonu ke gāueʼi. Neʼe ʼui ko te tagata ʼe ina manatuʼi pe te vaelua ʼo te ʼu meʼa ʼaē neʼe fagono kiai​—tatau aipe peʼe manatu ia neʼe fakalogo lelei. Mai tona ʼaluʼaga ʼaē ʼe tou maʼuʼuli ʼi te ʼu temi ʼe lahi ai te ʼu fakafiafia, ʼi ʼihi temi ʼe lagi faigataʼa hatatou fakakaukau ʼi he ʼu temi loaloaga. ʼE feala koa hatatou faigaʼi ke ʼāsili age tatatou fakalogo, tāfito la mokā ʼe tou kau ki he fakatahi ʼe kau kiai he tokolahi, ʼo fakalogo ki he tahi ʼe fai akonaki? Kapau ʼe kole atu ke koutou fai he fakamanatu fakanounou ʼo te polokalama ʼo te ʼu ʼaho ʼaia ʼi takotou liliu ki tokotou ʼapi ʼi te ʼosi ʼo te fakatahi, ʼe feala anai koa hakotou fai te fakamanatu fakanounou ʼaia? ʼE lava feafeaʼi koa hatatou hikihiki fuli te fealagia ʼaē ko te fakalogo pea mo tokaga lelei ki te ʼu koga fuli ʼo te polokalama ʼo te fakatahi?

⁸ Ko te meʼa ʼofa fakaʼatua ʼo ʼuhiga mo te fakakaukau, ʼe mole feala ke haʼele lelei mo kapau ʼe mole tou tokakaga ʼo fakalogo lelei ki te polokalama ʼo te fakatahi. Ohage la, kapau ʼe ʼi ai he akonaki ʼe leleiʼia e he tahi, ʼe mahino ia ʼe faigafua anai kia ia hana manatuʼi te ʼu puani tāfito ʼo he akonaki peʼe ko he koga ʼo te polokalama. Kae, ʼe fakalogo tāfito te faʼahi ʼaia ki tatatou tokaga lelei ki te ʼu meʼa ʼaē ʼe tou fia fagono kiai ʼi te ʼu fakatahi faka tisitilike. Ko tatatou fakalogo lelei pea mo tokaga lelei ki te ʼu koga fuli ʼo te polokalama ʼo te fakatahi, ʼe fua lelei anai ki totatou maʼuli fakalaumālie ʼi te temi nei ʼo feiā aipe ki tatatou ʼamanaki ki te temi ka haʼu. ʼI te ʼu fakatahi ʼe tou ako te ʼu ala ʼo Sehova pea ʼe foaki mai kia tatou te ʼu fakatotonu moʼo fakahoko te gāue ʼaē ʼe feala ke hāofaki ai te hahaʼi. (1 Tim. 4:​16) Koutou fakakaukauʼi ʼe koutou ʼi he vaka ʼe feʼaluʼaki ʼi he tai ʼe tokakovi ʼuhi ko te afā. Ko te ʼu fakapapau ʼa Sehova ʼe ko te foʼi tau mālohi ʼaia ʼo te ʼamanaki. Kapau ko he tahi ʼe mole mulimuli ki te ʼu polokalama faka Kilisitiano pea ʼe ina tuku tona ʼatamai ke hēʼia, koteā te meʼa ka hoko? ʼE feala ke galo ia ia te ʼu tokoni tāfito pea mo te akonaki ʼaē ʼe feala ke tokoni kia ia ke hāo mai te tuʼutāmaki fakalaumālie.​—Hep. 2:1; 6:​19.

⁹ ʼE lahi te ʼu koga fenua ʼi te malamanei, ʼe faiga mālohi ai totatou ʼu tēhina ke nātou kau ki te ʼu fono. ʼE ko he meʼa fakaofoofo tatatou sio ki tanatou tokaga fakamalotoloto ki te ʼu fakatahi. Kae, ʼi ʼihi fenua, ko ʼihi ʼe nātou fakalelu kia nātou ʼaē ʼe fakalogo ki te ʼu akonaki, heʼe nātou feʼoloʼaki lolotoga te fakatahi. Ko ʼihi ʼe ʼōmai tauhala. ʼI ʼihi ʼu fakatahi ki muʼa atu, neʼe faigataʼa tatatou fagono ʼi te ʼu ʼuluaki minuta ʼo te polokalama, koteʼuhi ko ʼihi ʼe nātou feʼoloʼaki ʼi te lolotoga ʼo te fakatahi. ʼI te agamāhani ʼe mole ko te ʼu tēhina ʼaē ʼe gāue peʼe ko te ʼu faʼe ʼaē ʼe tokakaga ki tanatou fānau kei liliki. Ko nātou tāfito ʼaē ʼe fakalelu ki te hahaʼi ʼi te ʼu fakatahi ʼaia, ʼe ko nātou ʼaē ʼe fai palalau lolotoga te ʼu akonaki. ʼI te taʼu ʼaenī ko te Selevisi Tali Fagona ʼe tokaga tāfito anai ki te faʼahi ʼaia, pea ʼe tou fakaʼamu ke tou tahi nofo fuli ki tona hekaʼaga ʼi te temi ʼaē ka fakaafe ai tatou e te pelesita ʼo te fakatahi ke tou fai te faʼahi ʼaia. ʼE ko he meʼa lelei anai mo kapau ʼe tou faifaitahi ʼi te faʼahi ʼaia.

¹⁰ Koteā te ʼu puani ʼaoga ʼe tokoni anai kia tatou ke lahi age tatatou fakalogo ki te polokalama ʼo te fakatahi, pea ke lahi age mo tatatou manatuʼi ʼo te ʼu puani ʼaē ka tou talanoa kiai ʼi te fakatahi? Ko te ʼu meʼa ʼaē neʼe ʼui ʼi te ʼu taʼu kua hili ʼe maʼuhiga ke toe fakamanatuʼi: (a) Tou manatuʼi tāfito te tupuʼaga ʼo tatatou ʼolo ki te fakatahi. ʼE mole tou ʼolo ki he mālōlō, kae ʼe tou ʼolo ʼo fakalogo pea mo akoʼi tatou. (Teu. 31:12) Koutou mālōlō lelei ʼi te ʼu afiafi fuli. Kapau ʼe koutou ʼolo ki te fakatahi kae koutou gaʼegaʼe, ʼe faigataʼa ʼaupito anai hakotou fakalogo. (b) Koutou ʼolo fakatomuʼa ke maʼu he tauʼaga ʼo takotou motokā pea mo hokotou hekaʼaga ʼi muʼa ʼo te kamata ʼo te polokalama. Kapau ʼe tou tauhala mai, pea ʼe mole tou maʼu katoa anai te ʼu koga ʼo te ʼuluaki akonaki. (c) Koutou tohi fakanounou te ʼu puani tāfito. Kapau ʼe mole lahi fau te ʼu puani ʼaē ʼe tou tohi, pea ʼe faigafua anai tatatou fakalogo lelei ki te ʼu akonaki. Ka koutou tohi te ʼu akonaki, koutou tokakaga naʼa mole koutou fakalogo ki he tahi ʼu puani, ʼuhi ko takotou tokakaga ki te ʼu meʼa ʼaē ʼe koutou tohi. (d) Ka fakahā mai e te pelesita ʼo te fakatahi pe koteā te akonaki ʼaē ka hoa mai, ʼe tonu ke tou fia ʼiloʼi papau pe koteā anai te meʼa ʼaē ka talanoa kiai te akonaki ʼaia. Koutou fai te fehuʼi ʼaenī, ‘Koteā te ʼu puani ʼaē ʼe feala ke ʼau tāʼofi ʼi te akonaki, ʼaē ka fakatuputupu ai anai toku loto fakafetaʼi pea mo toku ʼofa ʼaē kia Sehova? ʼE lava tokoni feafeaʼi kia ʼau te ʼu puani ʼaia ke lahi age taku maʼuliʼi te ʼuhigaʼi tagata foʼou? ʼE tokoni feafeaʼi anai kia ʼau te faʼahi ʼaia ke ʼau hikihiki toku minisitelio?’

¹¹ Ko Tatatou Aga ʼe Ina Fakamataleleiʼi Tatatou Minisitelio: Neʼe fakaloto mālohiʼi e Paulo ia Tito ke liliu ko “he faʼifaʼitaki ʼo te ʼu gāue lelei.” ʼI tana nofo agatonu ʼi tana ʼu akonaki neʼe tokoni ia Tito ki te hahaʼi ke “nātou fakamataleleiʼi ia meʼa fuli, te akonaki ʼo totatou ʼAliki, te ʼAtua.” (Tito 2:​7, 10) ʼI te taʼu fuli, ʼe foaki mai kia tatou te ʼu fakamanatu ʼe fakahā ai pe koʼe ʼe maʼuhiga ʼaupito tatatou aga faka lotu, ka tou ʼolo ki te potu ʼaē ʼe fai ai te fakatahi pea mokā tou liliu mai ai, pea mo te maʼuhiga ʼaē ke lelei tatatou aga ʼi te ʼu ʼapi ʼo te ʼu tēhina ʼaē ʼe tou momoe ai ʼi Niumea pea mo tatatou aga ʼi te fakatahi.

¹² ʼI te taʼu kua hili neʼe tou toe logo ki he ʼu fakamatala fakaloto mālohi. Kae, ʼe ʼi ai te ʼu meʼa ʼe tonu ke tou tokakaga kiai. ʼI ʼihi faʼahi ko te ʼu tēhina ʼi Niumea neʼe nātou tali lelei ʼi ʼonatou ʼapi te ʼu tēhina ʼe ʼōmai mai te ʼu motu peʼe ko te vao. Neʼe nātou fakaʼaogaʼi tanatou falā ke feala ai hanatou fakatalitali lelei ʼonatou ʼu tēhina. Kae ko te ʼu tēhina pea mo tuagaʼane ʼo te ʼu motu pea mo te vao, neʼe fetogi tanatou fakatuʼutuʼu, ʼo mole nātou fakahā ki he tahi, ʼo lagi nātou leleiʼia tanatou ʼolo ki tonatou ʼu famili ʼi Niumea, peʼe mole nātou ʼōmai ki te fakatahi. ʼE feala ke tou fakakaukauʼi te lotomamahi ʼo te ʼu famili ʼaē ʼe nātou fakatalitali kia nātou ʼaia. Ko tatatou ʼofa ki ʼotatou ʼu tēhina ʼe tonu ke ina tāʼofi ia tatou mai te faʼahiga aga ʼaia.​—⁠1 Kolonito 13:⁠5.

¹³ Kae ʼe tou kole kia nātou ʼaē neʼe nātou kole honatou nofoʼaga, ke nātou tali te nofoʼaga ʼaē neʼe tuku age ke nātou ʼolo kiai. Koia ʼe kole atu, kapau ʼe hoko he meʼa fakapunamaʼuli, ʼo mole feala ai ke koutou ʼolo ki te nofoʼaga ʼaē neʼe hinoʼi atu ke koutou ʼolo kiai, koutou foimo fakahā kia ia ʼaē ʼe ina fakatalitali anai koutou pea mo te Selevisi ʼo ʼuhiga mo te nofoʼaga, ke fai he tahi fakatuʼutuʼu. Ko te fakatahi ʼaia ʼe feala ke liliu maʼa koutou ko he fakatahi ke koutou maʼu ai hokotou ʼu kaumeʼa ʼe tologa, mo kapau ʼe koutou tali te nofoʼaga ʼaē neʼe hinoʼi atu ke koutou ʼolo kiai.

¹⁴ ʼE ʼaoga ke tou akoʼi ʼatatou ʼu tamaliki ke nātou mahino, ko te aga faka Kilisitiano ʼe mole fai faka temi pe. ʼE mole gata tatatou aga ʼaia, mokā tou mavae ʼi te fale ʼo te fakatahi. ʼE tonu ke hoko atu ʼi te ʼaho katoa. Ko tatatou aga ʼi totatou ʼapi peʼe ʼi te ʼapi ʼaē neʼe fakaafe ai tatou kiai, pea mo tatatou aga mokā tou ʼolo ʼi te ʼu ala, ʼe tonu ke lelei, ʼo toe feiā aipe mo te ʼu temi ʼaē ʼe tou heheka ai mo ʼotatou ʼu tēhina ʼi te fakatahi, ke akoʼi tatou e Sehova.​—Is. 54:13; 1 Pe. 2:​12.

¹⁵ Logope la ko te selevisi ʼo te meʼa kai ʼe mole kei fai ʼi tatatou ʼu fakatahi, ʼe kei ʼi ai pe te ʼu meʼa tāfito ʼe ʼaoga ke totogi. Ko ʼatatou ʼu meʼa ʼofa ʼe fakaʼaogaʼi anai moʼo totogi ʼo te ʼu meʼa ʼaia. Ko te tuagaʼane mo tana ʼu tamaliki liliki neʼe nātou ʼolo ki te fakatahi mo he falā ʼe mole faʼa lahi. Kae, neʼe tokoni te tuagaʼane ʼaia mo tana ʼu tamaliki ʼo nātou foaki tanatou kiʼi meʼa ʼofa. ʼO ʼuhiga mo te faʼahi ʼaia, ʼe ʼa tatou takitokotahi tona vakaʼi, kae ʼe mātou ʼiloʼi ʼe koutou leleiʼia te ʼu fakamanatu ʼaia.​—Gāue 20:35; 2 Ko. 9:⁠7.

¹⁶ ʼE ʼIloʼi Tatou ʼAki Tatatou Faʼahiga Teu: ʼAki totatou faʼahiga teu ʼe feala ke ʼiloʼi ai totatou ʼuhiga, pea mo te ʼu meʼa ʼaē ʼe tou logoʼi ʼi totatou loto ki niʼihi. Ko te tokolahi ʼo te kau tūpulaga pea mo te hahaʼi lalahi ʼe nātou ako tahi pea mo nātou gāue tahi mo te ʼu hahaʼi ʼe nātou ai te ʼu teu lamote, peʼe nātou hoko teuteu. ʼI te taʼu fuli kua fakaʼaluʼalu ʼo faikehe pea mo heʼe fakapoipoi te faʼahiga teuteu ʼa te hahaʼi. Kapau ʼe mole tou tokakaga, ʼe faigafua hatatou mulimuli ki te faʼahiga teuteu ʼa te hahaʼi ʼo te mālama. ʼE lahi te ʼu faʼahiga teu ʼe mole lelei ki te ʼu fono ʼo ʼuhiga mo tatatou tauhi. Neʼe fakahā ʼi te hili ʼo te fakatahi ʼo te taʼu kua hili, te ʼu manatu lelei ʼo ʼuhiga mo te polokalama, kae neʼe hilifaki kiai te manatu ʼaenī: “Neʼe ʼau punamaʼuli ʼi taku sio ki te kau finemui e tokolahi ʼe mumutu ʼonatou ʼu kofu, peʼe ko he ʼu kofu ʼe mole fakapoipoi, peʼe mole aga fakapoipoi ʼonatou ʼu vala.” ʼE mahino ia ʼe tou fia tui fuli he ʼu mutuʼi meʼa ʼe mole feala ke laukoviʼi ai totatou minisitelio faka Kilisitiano ʼi te fakatahi pea mo tatatou fakatahitahi ʼi te hili ʼo te polokalama. ʼE ʼaoga ke mulimuli te kau Kilisitiano ki te tokoni ʼa te ʼapositolo ko Paulo ʼaē ke tui he ʼu “teu lelei, ke [nātou] teuteu ʼaki he aga fakapoipoi pea mo he aga fakapotopoto.”​—1 Tim. 2:9.

¹⁷ Ko ai koa ʼaē ʼe tonu ke ina fakatuʼutuʼu pe koteā te ʼu teu ʼaē ʼe aga fakapoipoi pea mo “lelei”? Ko te aga fakapoipoi ko tona faka ʼuhiga ko “te mole fia hā pea mo agapauʼu.” ʼE toe ʼui foki e te tikisionalio ko te aga fakapoipoi ʼe ko he tahi “ ʼe mole fialahi.” ʼE mole fakatuʼutuʼu e te Sosiete peʼe ko te ʼu tagata ʼāfea, he ʼu lekula ʼo ʼuhiga mo tatatou faʼahiga teuteu peʼe ko te faʼu ʼo totatou lauʼulu. Kae, ʼe mole tonu koa la ke ʼiloʼi lelei e he Kilisitiano pe koteā te ʼu mutuʼi meʼa ʼaē ʼe fakapoipoi pea mo fakaʼapaʼapa? (Vakaʼi ia Filipe 1:​10.) ʼE mole tonu ke lahi fau tatatou tokaga ki te faʼu ʼo totatou lauʼulu pea mo te ʼu mutuʼi meʼa ʼaē ʼe tou ʼai. ʼE tonu ke lelei totatou teu, pea mo lelei te gaohi ʼo totatou lauʼulu, ka mole tonu ke hage totatou ʼu mutuʼi meʼa pea mo te gaohi ʼo totatou lauʼulu ko te hahaʼi ʼo te mālama. ʼI totatou ʼuhiga kau minisi ʼo te logo lelei, ko tatatou teuteu lelei pea mo te lelei ʼo te gaohi ʼo totatou lauʼulu lolotoga te temi ʼaia, ʼe tupu ʼaki ai he fakafetaʼi kia Sehova pea mo fakavikiviki ai tatatou kautahi. Koia, ko te ʼu mātuʼa ʼe nātou tuku anai he faʼifaʼitaki pea ʼe nātou tokakaga anai ke lelei te ʼu mutuʼi meʼa ʼo tanatou tamaliki ki te fakatahi. ʼE tuku anai e te ʼu tagata ʼāfea he faʼifaʼitaki lelei pea ʼe nātou foaki anai he ʼu tokoni lelei mo kapau ʼe ʼaoga te faʼahi ʼaia.

¹⁸ Te ʼu Kamela Viteo Pea Mo Te ʼu Meʼa Pukeleʼo: ʼE fakagafua ke tou fakaʼaogaʼi te ʼu kamela pea mo te ʼu meʼa pukeleʼo, kae ʼe tonu ke tou fakaʼapaʼapa kia nātou ʼaē ʼe fakalogo ki te ʼu akonaki. Kapau ʼe tou feʼoloʼaki lolotoga te fakatahi mo fai ʼo he ʼu paki, ʼe fakalelu anai kia nātou ʼaē ʼe fia logo ki te ʼu akonaki, pea tahi ʼaē meʼa, ʼe mole tou mulimuli katoa anai ki te polokalama ʼaia. ʼI te agamāhani ʼe ʼaoga lahi ake te fakatahi kia tatou mo kapau ʼe tou fakalogo lelei ki te ʼu akonaki ʼaē ʼe fai pea mo tohi te ʼu manatu ʼo te ʼu akonaki. ʼE feala ke tou puke he ʼu akonaki maʼa he tēhina peʼe ko he tuagaʼane ʼe mole feala ke kau ki te fakatahi; kae, maʼa tatou totonu, ʼe feala ke tou fakatokagaʼi ʼi te hili ʼo te fakatahi pea ʼi tatatou liliu ki totatou ʼapi, ʼe mole tou maʼu anai hotatou temi moʼo fakalogo ki te ʼu akonaki ʼaē neʼe tou puke. ʼE mole fakaʼaogaʼi anai te ʼu meʼa ʼo te fale fakatahi moʼo puke ʼo te ʼu akonaki ʼo fakapipiki ki te hila peʼe ki te tuʼuʼaga ʼo te mikolo, heʼe fakatupu gaohaʼa ki te feʼoloʼaki ʼa te hahaʼi.

¹⁹ Te ʼu Hekaʼaga: Kua mātou fakatokagaʼi te mulimuli lelei ʼo te ʼu tēhina mo tuagaʼane ʼo ʼuhiga mo te tāʼofi ʼo te ʼu hekaʼaga. ʼI te taʼu kua hili, tokolahi ia koutou neʼe koutou mulimuli ki te ʼu fakatotonu ʼaenī: ʼE TONU KE TOU TAUPAU HE ʼU HEKAʼAGA ʼO TOTATOU FAMILI PEA MO NĀTOU ʼAĒ NEʼE ’ŌMAI MO TATOU. Neʼe lagi koutou fakatokagaʼi neʼe mole lahi he ʼu faigataʼaʼia ʼo ʼuhiga mo te faʼahi ʼaia. Ko te faʼahi ʼaē ʼe maʼuhiga tāfito, ko takotou mulimuli ki te fakatotonu ʼaia neʼe leleiʼia e Sehova pea mo te ‘tagata kaugana agatonu,’ ʼaē ʼe ina foaki mai te meʼa kai fakalaumālie.​—⁠Mat. 24:45.

²⁰ ʼE lahi ʼotatou ʼu tēhina ʼaē ʼe mahahaki pea ʼe kei ʼōmai ki te fakatahi. Ko ʼihi ʼe ʼōmai ʼi te ʼu hekaʼaga toho pea ʼe tonu ke tokakaga kia nātou tonatou famili. Ko ʼihi ʼe nātou maʼu te ʼu faʼahiga mahaki kehekehe ohage ko te mahaki mafu peʼe ko he tahi faʼahiga mahaki. ʼE lave mālohi ki totatou loto, tatatou sio ki te ʼu tēhina pea mo tuagaʼane ʼaia, ʼaē ʼe nātou faiga mālohi ke ʼaua naʼa nātou hala ʼi te meʼa kai fakalaumālie. Kae, ʼi ʼihi temi, ʼe ʼi ai ʼihi ʼe nātou mahahaki ʼi te lolotoga ʼo te fakatahi, ka mole ʼi ai honatou famili peʼe ko he tahi ʼi te kokelekasio ʼe feala ke tokoni ki ai. Ko ʼihi ʼu tēhina mo tuagaʼane neʼe mahahaki ʼi te lolotoga ʼo te fakatahi, pea neʼe tonu ke foimo leletakiʼi ki te lopitali. Ko te tokaga ki he tahi ʼe mahaki ʼe ko te maʼua tāfito ʼaia ʼo tona famili peʼe ko hona ʼu kāiga. Ko te Selevisi ʼaē ʼe tokaga ki te kau mahaki ʼi te ʼu fakatahi, ʼe mole ko honatou maʼua ke nātou tokakaga kia nātou ʼaē ʼe ma­hahaki. Kapau ko he tahi ʼi tokotou famili ʼe ʼaoga ki ai he tokaga makehe, pea ʼe kole atu ke koutou tokakaga ke mole nofo tokotahi, tāfito la mo kapau ʼe tonu ke lele­takiʼi. Tahi ʼaē meʼa, ʼe mole ʼi ai anai he ʼu fakatuʼutuʼu ʼi te ʼu fakatahi, ke ʼi ai he ʼu koga fale maʼa nātou ʼaē ʼe mole feala ke nātou mulimuli ki te ʼu akonaki, ʼuhi ko honatou faʼahiga mahaki. ʼE tonu anai ke ʼiloʼi e te ʼu tagata ʼāfea ia nātou ʼaē ʼe mahahaki ʼi tonatou kokelekasio pea mo nātou tokakaga anai ki te ʼu fakatuʼutuʼu ʼaē ʼe feala ke fai ʼi muʼa ʼo te fakatahi.

²¹ Te Meʼa Kai ʼAē ʼe ʼAoga Ki Te Fakatahi: Neʼe lahi te ʼu fakamatala neʼe fai ʼo ʼuhiga mo te fua lelei ʼo tatatou ʼaumai tatatou meʼa kai. Neʼe tohi fēnei e te tēhina: “Kua feala taku sio ki tona fua lelei ʼi te faʼahi fakalaumālie. ʼI te temi nei, kua feala ke tou fakaʼaogaʼi totatou temi katoa pea mo totatou mālohi ki te ʼu meʼa fakalaumālie. Neʼe mole ʼau logo ki he valoki ʼo ʼuhiga mo te fakatuʼutuʼu ʼaia.” Neʼe tohi fēnei e te tuagaʼane: “ ʼAki takotou faʼifaʼitaki, ʼu tēhina ʼe koutou fakaloto mālohiʼi ia mātou kau Kilisitiano takitokotahi, ke mātou vakaʼi pea mo mātou kumi he ʼu faʼahiga meʼa moʼo fakamaʼamaʼa ʼo tomatou maʼuli, pea mo fakatuputupu tamatou gāue faka teokalatike.” Ko he tagata taupau feʼaluʼaki neʼe ina tohi fēnei ʼo ʼuhiga mo te fakatuʼutuʼu ki muʼa atu ʼo te selevisi tufa meʼa kai: “Ko te fakatuʼutuʼu ʼāfea ʼaia neʼe mole feala ai ki te tokolahi ʼo te ʼu tēhina ke nātou mulimuli ki te polokalama katoa ʼo te fakatahi.” ʼO ʼuhiga mo te meʼa kai ʼaē ʼe ʼaumai e te ʼu tēhina, neʼe tohi fēnei e te tagata ʼāfea: “Neʼe nātou ʼaumai pe te meʼa ʼaē ʼe nātou loto kiai, pea neʼe mole nātou tutuʼu ʼo talitali ke tufa age tanatou meʼa kai.” Moʼo fakaʼosi, neʼe tohi fēnei e te tahi tuagaʼane: “ ʼI te ʼosi ʼo te fakatahi neʼe tokalelei pea neʼe mole logoaʼa, pea neʼe fiafia te ʼu tēhina mo tuagaʼane.” ʼIo, ko tatou takitokotahi ʼe feala ke tou ʼaumai he meʼa kai ʼe feʼauga ki te hili hoʼatā. ʼE tokagaʼi e te tokolahi ʼi te temi nei kua maʼu tonatou temi ke nātou fai palalau mo te ʼu tēhina mo tuagaʼane.

²² ʼE toe feiā anai mo te taʼu ʼaenī, ʼe mole ʼi ai anai he selevisi tufa meʼa kai. Koutou toʼo he ʼu kiʼi minuta ʼo toe vakaʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Maio 1995 ʼi te palakalafe 26, ʼo ʼuhiga mo te ʼu manatu ʼaē ʼe ʼaoga, te ʼu tokoni ʼo ʼuhiga mo te meʼa kai ʼaē ʼe feala ke ʼaumai ki te fakatahi. Koutou manatuʼi, ʼe mole ʼaoga ke ʼave he ʼu ipu sioʼata peʼe ko he ʼu foʼi kava ki te fakatahi. ʼE feala hakita ʼave he kiʼi ʼaisi veliveli ʼe faigafua tona feʼāveʼaki, mo kapau ʼe feala hona tuku ʼi te lalo hekaʼaga. Koutou manatuʼi ʼe feʼauga te temi ʼaē ke koutou kai ai pea mo ʼinu ai te ʼu meʼa ʼaē neʼe koutou ʼave ki te fakatahi. Ohage pe ko te ʼu fono ʼaē ʼe fai ʼi te Fale ʼo te Puleʼaga. ʼE tou fakaʼapaʼapa anai ki te ʼu fakatuʼutuʼu ʼo ʼuhiga mo te tauhi pea mo te meʼa kai fakalaumālie ʼaē ʼe foaki mai.

²³ Kua vave kamata te ʼuluaki Fakatahi Faka Tisitilike “Te Kau ʼAve Logo ʼo Te Tokalelei Fakaʼatua.” Kua feala koa hakotou kau ki te fakatahi ʼaia, pea mo koutou tokalelei ki te ʼu ʼaho fakafiafia ʼaia e tolu ʼaē ka koutou felāveʼi ai mo tokotou ʼu tēhina mo tuagaʼane, pea mo kai ki te ʼu meʼa kai lelei ʼi te faʼahi fakalaumālie? ʼE mātou faikole fakamalotoloto kia Sehova ke ina tapuakiʼi takotou ʼu faiga ke koutou kau ki te fakatahi ʼaia.

[Talanoa ʼo te pasina 6]

Te ʼu Fakamanatu ʼo ʼUhiga Mo Te Fakatahi Faka Tisitilike

Papitema: ʼI muʼa ʼo te kamata ʼo te fakatahi ʼi te Moeaki uhu, ʼe tonu anai ke heheka ia nātou ʼaē ka papitema ʼi te ʼu hekaʼaga ʼaē kua tāʼofi maʼa nātou ʼi muʼa. Neʼe fakatokagaʼi ko ʼihi ʼe nātou ʼōmai mo tonatou teu maʼanu ʼe mole mata fakaʼapaʼapa pea ʼe fakatupu kovi ki te maʼuhiga ʼo te papitema. Koia ʼe tonu ke nātou ʼōmai mo honatou teu maʼanu ʼe mata fakaʼapaʼapa pea mo honatou tauveli. Ko te ʼu tagata ʼāfea ʼo te kokelekasio ʼaē ka nātou vakaʼi te ʼu fehuʼi ʼi te tohi Notre ministère mo nātou ʼaē ʼe fia papitema, ʼe tonu ke nātou ʼiloʼi papau peʼe kua nātou mahino lelei ki te ʼu puani ʼaia. ʼI te ʼosi fai ʼo te akonaki ʼo te papitema pea mo te faikole, ko te pelesita ʼo te fakatahi ʼe ina fakahā anai he ʼu fakatuʼutuʼu fakanounou kia nātou ʼaē ʼe papitema, pea ʼosi pea ina fakahivaʼi te katiko. ʼI te ʼosi ʼo te hivaʼi ʼo te ʼu ʼuluaki kupu ʼo te katiko, ko nātou ʼaē ʼe kau ki te gāue fakatalitali ʼe nātou taki anai ia nātou ʼaē ʼe kau ki te papitema ki te faʼahi ʼaē ʼe fai ai te papitema. Mai tona ʼaluʼaga ʼaē ko te papitema ʼe ko te fakatā ʼo te foaki ʼo tokita maʼuli ki te ʼAtua pea ʼe ko he faʼahi pe ia ʼa kita tokotahi pea mo Sehova, ʼe mole fai he ʼu fakatuʼutuʼu ke papitema fakatahi he toko lua peʼe ko he tokolahi ʼe fāʼufua pea mo nātou fetapikiʼaki lolotoga tanatou papitema.

Te ʼu Pepa Fakaʼiloga: Koutou ʼai takotou pepa fakaʼiloga ʼo te taʼu 1996 ʼi te fakatahi pea mo koutou ʼai mokā koutou liliu ki tokotou ʼapi. ʼAki te faʼahi ʼaia, ʼe feala ai hatatou tuku he faʼifaʼitaki lelei ʼi tatatou feʼaluʼaki. ʼE tonu ke koutou toʼo takotou ʼu pepa fakaʼiloga ʼi te kokelekasio. ʼAua naʼa koutou talitali ke fakaōvi mai te fakatahi pea koutou ʼolo ai leva ʼo fakaʼui he ʼu kate maʼa koutou pea mo tokotou famili. Koutou manatuʼi ʼo ʼave takotou kate Instructions médicales/Carte dʼidentité.

Nofoʼaga: KAPAU ʼE KOUTOU FELĀVEʼI MO HE ʼU FAIGATAʼAʼIA ʼO ʼUHIGA MO TE NOFOʼAGA, ʼe kole atu ke koutou fakahā ki te tagata taupau ʼaē ki te selevisi ʼo ʼuhiga mo te nofoʼaga, ke feala hana fakatokatoka fakavilivili te faʼahi ʼaia. Ko te ʼu sikalaipe ʼo te ʼu kokelekasio ʼe nātou tokakaga anai ke foimo ʼave te ʼu kiʼi pepa ʼo ʼuhiga mo te nofoʼaga ki te tuʼasila ʼaē ʼe tonu ke ʼave kiai. Kapau ʼe koutou fakafisi ki takotou kole ʼo ʼuhiga mo te nofoʼaga ʼaē neʼe hinoʼi atu kia koutou, ʼe tonu ke koutou foimo fakahā kia ia ʼaē ʼe ina fakatalitali koutou ʼo toe feiā aipe mo te selevisi ʼaē ʼe ina kumi te ʼu nofoʼaga, ke ina foaki te nofoʼaga ʼaia ki he tahi kehe.

Te ʼu Saliote Toho Tamaliki: ʼE lahi te ʼu faʼahi ʼe mole feala ke fakaʼaogaʼi ai te ʼu saliote toho tamaliki ʼi te ʼu fakatahi lalahi. Ko te ʼu fakatuʼutuʼu ʼaē naʼa hoko he tuʼutāmaki, ʼe mole nātou fakagafua ke tou tuku te ʼu kiʼi saliote ʼaia ʼi te faʼahi ʼaē ʼe tou feʼoloʼaki ai, peʼe ʼi te vaha ʼo te ʼu hekaʼaga. Mai tona ʼaluʼaga ʼaē, ʼi te kaugamālie ʼo te hahaʼi ʼe feala pe ke nātou feʼīʼaki, ko te ʼu meʼa toho tamaliki ʼe ko he ʼu meʼa fakatupu tuʼutāmaki ki te ʼu kiʼi tamaliki ʼo toe feiā pe ki te hahaʼi ʼaē ʼe tūkia anai kiai. Koutou tokakaga ke ʼaua naʼa koutou ʼaumai te ʼu meʼa ʼaia ki te fakatahi. Kae, ko te ʼu hekaʼaga ʼo te ʼu kiʼi toe liliki peʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala tona fakapipiki ki he hekaʼaga ia tafa ʼo te ʼu mātuʼa.

Selevisi Kia Nātou ʼAē ʼe Fia Gāue: Mai tona ʼaluʼaga ʼaē ʼe mole kei fai he selevisi ʼo te meʼa kai, kua feala ʼi te temi nei ki te tokolahi ke nātou kau ki te tahi ʼu gāue. ʼE feala koa hakotou fakaʼaogaʼi he kiʼi temi moʼo tokoni ki he koga ʼo te ʼu gāue ʼaia? ʼE feala ke lahi hotatou ʼaoga pea mo tou maʼu ai he fiafia lahi mokā ʼe tou kaugana ki ʼotatou ʼu tēhina, tatau aipe peʼe tou fai pe ʼi he ʼu kiʼi hola. Kapau ʼe feala hakotou tokoni, koutou ʼolo ʼo vakaʼi te selevisi ʼo ʼuhiga mo te gāue ʼi te fakatahi. Ko te ʼu tamaliki ʼaē ʼe mole heʼeki katoa tonatou taʼu 16 ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou ʼu tāmai, tanatou ʼu faʼe peʼe ko he tahi kua lahi pea mo fakapotopoto.

Te ʼu Fakatokaga: Tou tokakaga ki te ʼu fihifihia ʼaē ʼe feala ke hoko ai te ʼu tuʼutāmaki, ʼe tou faiga anai ke ʼaua naʼa hoko he ʼu faigataʼaʼia ʼe mole hona ʼuhiga. ʼI te agamāhani ko nātou ʼaē ʼe mole heʼeki māhani ʼi te koga meʼa ʼaia ʼe kākāʼi nātou e te hahaʼi kaihaʼa pea mo te hahaʼi aga fakakākā. Koutou māpunuʼi tuʼumaʼu te ʼu matapā ʼo takotou motokā pea ʼaua naʼa koutou tuku he ʼu faʼahiga meʼa ʼe feala ke sioʼi e te hahaʼi ʼaē ʼe feʼoloʼaki ʼi te ala. Ko te ʼu hahaʼi kaihaʼa ʼe nātou tokagaʼi te ʼu fakatahi lalahi. ʼE mole lelei anai te tuku fakahāhā ʼo he meʼa maʼuhiga ʼi tokotou hekaʼaga. ʼE mole feala ke koutou ʼiloʼi papau peʼe ko nātou fuli ʼaē ʼi ʼokotou tafaʼaki ko te kau Kilisitiano.