Te ʼu Fakatahi Faka Tisitilike Pea Mo Faka Malamanei ʼo Te Taʼu 1998 “Te Faʼahiga Maʼuli ʼAē ʼe Fakamaʼua Mai e Te ʼAtua”

¹ ʼE fakamanatuʼi mai kia tatou ia Tāʼaga Lea 10:29, “ko te ala ʼo Sehova ʼe ko he kolo mālohi.” Koia ʼe lelei ai te kupu tāfito ʼo te fakatahi ʼo te taʼu ʼaenī​—“Te Faʼahiga Maʼuli ʼAē ʼe Fakamaʼua Mai e Te ʼAtua”! ʼE fakahā feafeaʼi anai te kupu tāfito ʼaia ʼi te lolotoga ʼo te fakatahi ʼaho tolu ʼaia? ʼE tou fakaʼamu fuli ki te ʼu meʼa fakalaumālie ʼaē neʼe teuteuʼi maʼa tatou, pea ʼe fakahā ai anai he ʼu puani maʼuhiga.

² Ko he kau misionea, peʼe ko he kau laga fale feʼoloʼaki peʼe ko ʼihi ʼe nātou gāue temi katoa ʼi te ʼu fenua tai, ʼe lagi nātou kau anai ki takotou fakatahi. ʼE ʼui ko te toko lauʼi afe tēhina mo tuagaʼane ʼo te ʼu fenua kehekehe ʼe nātou ʼolo anai ki te ʼu kolo ʼaē ka fai ai te ʼu fakatahi faka malamanei. ʼE lagi koutou felāveʼi anai mo ʼihi ia nātou ʼaia. Ko te polokalama ʼo te fakatahi, ʼe kau kiai te ʼu fakamatala ʼo ʼuhiga mo te tapuakiʼi e Sehova te gāue fai faka mafola ʼi te ʼu telituale kehekehe.

³ ʼE Lelei Hatatou Faiga Ke Tou Kau Kiai: ʼE tokolahi totatou ʼu tēhina pea mo tuagaʼane ʼi Afelika neʼe tau mo nātou he ʼu fihifihia ʼuhi ko te tau pea mo te ʼu maveuveu ʼaē ʼe hoko ʼi te ʼu fenua ʼaia. Kia nātou, ʼe hage ʼe fakalogo tonatou maʼuli ki te ʼu fakatahi ʼaia ʼo te hahaʼi ʼa Sehova. Ko ʼihi ʼe tonu ke nātou haʼele lolotoga ni ʼu kilometa ke nātou tau ki te ʼu fakatahi, kae ʼe mole nātou tō ʼi te ʼu fakatahi ʼaia. Ko te tēhina ʼe taʼu 73 mai teLepupilika Temokalatike ʼo Congo (ko te Zaïre ʼāfea) neʼe haʼele ia kilometa e 450 ke feala hana kau ki he fakatahi. ʼI tana ʼosi haʼele lolotoga ʼaho e 16, neʼe mamahi ʼona vaʼe, kae neʼe fiafia ʼi tana kua tau ki te fakatahi. ʼI te hili ʼo te fakatahi, neʼe fiafia ʼaupito pea neʼe kua fakaloto mālohiʼi ia ia ʼi te faʼahi fakalaumālie, pea neʼe toe haʼele lalo kiō ia. ʼE ko he meʼa kua ina fai māhani talu mai ni ʼu taʼu!

⁴ ʼI Mozambique, ko te tagata taupau faka tisitilike pea mo tona ʼohoana neʼe nā kake ʼi te moʼuga lahi pea mo fakalaka ʼi te toafa ke nā kau ki te fakatahi faka silikosikilipisio. Neʼe nā haʼele ia kilometa e 90 lolotoga ia hola e 45. Neʼe tupu ai te lotomālohi ʼo nātou fuli ʼaē neʼe kau ki te fakatahi, ʼuhi ko te faʼifaʼitaki lelei ʼaē neʼe tuku e te taumatuʼa ʼaia. Neʼe lahi te ʼu famili ʼaē neʼe nātou toe faiga mālohi mo nātou ke nātou kau ki te fakatahi. Neʼe fakamatala ai e te tagata taupau faka tisitilike, ko ʼihi tēhina neʼe kau ki ai te tēhina ʼe taʼu 60, neʼe nātou haʼele ia kilometa e 200!

⁵ Kua koutou ʼosi fai koa he ʼu fakatuʼutuʼu ke koutou kau ki te fakatahi ʼo te taʼu ʼaenī? E mole lagi tonu anai ke koutou haʼele lolotoga ni ʼu kilometa, kae ʼe maʼua anai ke koutou fai he ʼu sakilifisio ke feala hakotou kau kiai ʼaki tokotou famili. Koutou fakatuʼutuʼu ke koutou kau ki te polokalama katoa. ʼE tokolahi te kau ako Tohi-Tapu ʼe nātou tuputupu ʼi te faʼahi fakalaumālie ke nātou foaki tonatou maʼuli ki te ʼAtua. Kapau ʼe nātou kau ki te fakatahi, pea ko te faʼahi ʼaia ʼe tokoni anai kia nātou ke nātou fai te tonu ʼaē ʼe lelei. Neʼe koutou fakaafe koa takotou ʼu ako Tohi-Tapu pea mo ʼihi ʼaē ʼe nātou fia ʼiloʼi te moʼoni ke nātou ʼōmai mo koutou ki te fakatahi ʼaia?

⁶ Ko Te Polokalama ʼe Fai Ia ʼAho e Tolu: ʼI te taʼu ʼaenī, ʼe fai anai te polokalama ʼi te ʼu fakatahi e lua ʼi Niu-Kaletonia pea mo te fakatahi e tahi ʼi Vanuatu. ʼI Te Tule Leʼo ʼo te ʼaho 15 ʼo Fepualio 1998, ʼe tuʼu ai te lisi ʼo te ʼu ʼaho pea mo te ʼu koga meʼa ʼaē ka fai ai te ʼu fakatahi. ʼE fakahā atu anai kia koutou pe ko te fakatahi fea ʼaē ka hinoʼi kiai tokotou kokelekasio.

⁷ Ko Te Kiʼi Logo Makehe: ʼE maʼuhiga ke koutou kau ki te fakatahi ʼaē neʼe hinoʼi kiai tokotou kokelekasio. ʼAua naʼa koutou fakatuʼutuʼu ke koutou kau ki he fakatahi faka malamanei ʼaē neʼe mole fakaafe kiai tokotou kokelekasio. Ko te ʼu koga meʼa ʼaē ka fai ai te ʼu fakatahi, ʼe mole feala anai ke nofo ai ia nātou ʼaē ʼe nātou fia ʼolo kiai. Kapau ʼe koutou fakaʼapaʼapa pea mo lagolago ki te ʼu fakatuʼutuʼu ʼaia, pea ʼe fakaʼaluʼalu lelei anai ia meʼa fuli pea ʼe fai anai ʼi te fakatokatoka.​—1 Ko. 14:33, 40.

⁸ ʼI te Feliaono, mo te Moeaki, pea mo te ʼAhotapu, ʼe kamata anai te polokalama ʼo te uhu ʼi te hola 9 vaelua. ʼI te Feliaono pea mo te Moeaki, ʼe fakaʼosi anai te polokalama ʼi te hola 5 hili hoʼatā, pea ʼi te ʼAhotapu, ʼe fakaʼosi anai ʼi te hola 4 hili hoʼatā. ʼI te ʼaho fuli, ʼe avahi anai te ʼu matapā ʼi te hola 8. Ko nātou pe ʼaē ʼe hinoʼi ki he gāue ʼe feala anai ke nātou hū ki te fale ʼi muʼa ʼo te hola ʼaia. Kae ʼe mole fakagafua anai kia nātou ke nātou tāʼofi he ʼu hekaʼaga ʼi muʼa ʼo te hola 8.

⁹ ʼI tatatou ʼolo ki te fakatahi pea mo tatatou toe liliu mai ai, ʼe tonu ke tou faiga ke tou fai te fagonogono faigamālie. Ko te ʼu hahaʼi ʼo te ʼu ʼutuʼaga penisini, mo te ʼu hahaʼi fakatau koloā, mo te kau gāue ʼi te péage, mo te hahaʼi gāue ʼo te ʼu otele, e lagi nātou fia logo anai ki te logo ʼo te Puleʼaga. Koutou teuteu ki te faʼahi ʼaia ʼo koutou ʼave mo koutou he ʼu kiʼi pepa lotu, mo te ʼu nusipepa foʼou, mo he ʼu kaupepa, pea mo ʼihi atu tohi, ke feala hakotou fakaʼaogaʼi te ʼu faigamālie fuli ke koutou fai faka mafola ki he ʼu hahaʼi e mole lagi tou felāveʼi anai mo nātou ʼi tonatou ʼapi.​—2 Tim. 3:​17.

¹⁰ “Koutou Tokaga Ki Takotou Faʼahiga Fakalogo”: ʼE agapoto anai ia nātou ʼaē ʼe kau ki te fakatahi mo kapau ʼe nātou mulimuli ki te tokoni ʼaē ʼe tou maʼu ia Luka 8:​18. ʼE fakaloto mālohiʼi ia tatou fuli ke tou ʼave hatatou Tohi-Tapu, mo hatatou katiko, pea mo hatatou kaupepa faitohi. Tou fakalogo lelei ki te ʼu puani tāfito ʼo te ʼu akonaki, pea mo tou tohi fakanounou. Tou fakakaukauʼi peʼe lava feafeaʼi hatatou maʼuliʼi te ʼu meʼa ʼaē ʼe tou logo kiai ʼi te ʼu akonaki. ʼI te ʼu afiafi fuli ʼi te ʼosi ʼo te polokalama pea ʼi muʼa ʼo takotou momoe, ʼe feala ke koutou toe vakaʼi te ʼu puani ʼaē neʼe koutou tohi pea mo vakaʼi peʼe koutou mulimuli lelei ki te faʼahiga maʼuli ʼaē ʼe fakamaʼua mai e Sehova.​—Taag. 4:​10-13.

¹¹ Neʼe fakatokagaʼi, ko ʼihi ʼe nātou mavae ʼi te lolotoga ʼo te polokalama pea mo nātou ʼolo ʼo heheka ʼi tonatou ʼu motokā, kae mole nātou nonofo ʼo fakalogo ki te polokalama. Ko ʼihi ʼe nātou fai palalau ʼi tuʼa lolotoga te fakatahi, kae ʼe tonu la ke nātou heheka ʼi te loto fale fono ʼo fakalogo ki te ʼu akonaki. Tahi ʼaē meʼa, neʼe fakatokagaʼi ʼe ʼi ai te kau tūpulaga ʼe nātou mavae ʼi te fakatahi ʼi te lolotoga ʼo te polokalama ʼo te hili hoʼatā. ʼI te ʼu temi ʼāfea, neʼe fai ʼe ʼihi kaugana ʼa Sehova te ʼu hala mamafa, koteʼuhi neʼe mole nātou fakalogo fakalelei ki te ʼu fakamanatu ʼaē neʼe fai age e Sehova. ʼE mahino papau ia, ʼe mole tou fia faʼifaʼitaki kia nātou ʼaia. (2 Hau 17:13-15) Ko “te tagata kaugana agatonu mo poto” neʼe ina teuteuʼi he ʼu akonaki ʼe ʼaoga kia tatou fuli. Koia ʼe maʼuhiga ʼaupito anai ‘ke makehe tatatou tokagaʼi te ʼu meʼa ʼaē ka tou logo kiai’ ʼi te lolotoga ʼo te polokalama katoa ʼo te fakatahi ʼaho tolu. ʼE fakahā ai anai he ʼu meʼa maʼuhiga kia tatou ʼi te ʼaho fuli, ʼo kau kiai mo he ʼu logo ʼe malave anai ki totatou faʼahiga maʼuli ʼi te ka haʼu. Kapau ʼe tou fakalogo fakalelei pea mo tou fakaʼaogaʼi fuli te ʼu meʼa ʼaē ka foaki mai e Sehova ʼi te faʼahi fakalaumālie ʼi te fakatahi ʼaē ka hoko mai, ʼe mālohi anai tatatou ʼamanaki, “ke ʼaua naʼa tou tafea ʼi he temi” mai te faʼahiga maʼuli ʼaē ʼe fakamaʼua mai e te ʼAtua.​—Mateo 24:45; Hep. 2:⁠1.

¹² Ko He Faʼahiga Teu ʼe Ina Fakavikiviki Kia Sehova: ʼI te ʼu temi faigataʼa ʼaenī, ʼe tonu ke makehe tatatou tokaga ke ʼaua naʼa fakahalaʼi tatou e te manatu ʼo te mālama ʼaenī. (1 Ko. 2:​12) ʼE tonu ke tāu mo feʼauga tatatou teu mo te gaohi ʼo totatou ʼulu, pea ʼe tonu ke hā ai te ʼalikisia ʼo te ʼAtua ʼaē ʼe tou tauhi ki ai. (1 Tim. 2:​9, 10) ʼE mole maʼua ke tou toʼo he ʼu mutuʼi meʼa ʼe totogi kovi ke feala hatatou kau kia nātou ʼaē “ ʼe nātou fakamataleleiʼi te akonaki ʼo totatou Fakamaʼuli, ia te ʼAtua.” (Tito 2:​10) Koutou fakatokagaʼi te ʼu tokoni faka Tohi-Tapu lelei ʼaē ʼe tou maʼu ʼi te pasina 17 pea mo te 18 ʼo Te Tule Leʼo ʼo te ʼaho 15 ʼo Sūnio 1997, ʼi te palakalafe 14 ki te 18. ʼAua naʼa galo kia koutou te fakavikiviki ʼaē ʼe feala ke koutou fai kia Sehova mo kapau ʼe lelei takotou teuteu.

¹³ Neʼe fakamatala e te taʼahine Fakamoʼoni ʼa Sehova ʼe taʼu 16, neʼe ʼalu ki te fale kai mo tona tokolua ʼi te ʼosi fai ʼo te fakatahi pea neʼe nā fakatokagaʼi ai, ko ʼihi tēhina mo tuagaʼane neʼe ʼi te fale kai ʼaia, neʼe mole lelei tanatou faʼahiga teu. Kae ko te tokolahi ʼo te hahaʼi ʼaē neʼe ʼi te fale kai neʼe nātou fiafia ʼi tanatou sio ʼaē ki ʼihi kau Fakamoʼoni ʼa Sehova neʼe nātou teuteu lelei pea neʼe nātou ʼai tanatou ʼu kiʼi pepa fakaʼiloga ki tonatou ʼu kofu. Neʼe ko he fealagia ʼaia ke nātou faka mafola ki te hahaʼi ʼo te fale kai.

¹⁴ Ko He Aga ʼe Ina Fakavikiviki Kia Sehova: Kua tou ʼiloʼi ko tatatou aga faka Kilisitiano ʼe feala ke ina fetogi te manatu ʼa te hahaʼi ʼo ʼuhiga mo te tauhi moʼoni. Koia, ʼe tou loto ke tāu mo feʼauga tatatou ʼu aga mo te logo lelei ʼaē ʼe tou faka mafola, pea ke vikiʼi ai ia Sehova.​—Filp. 1:​27.

¹⁵ ʼI te taʼu ʼaenī kua hili, neʼe ko te ʼuluaki fai ʼaia ʼo he fakatahi faka tisitilike ʼi te potu tokelau ʼo Angola. ʼI te lua ʼaho ʼo te fakatahi, neʼe fekauʼi te ʼu tagata polisi e toko lua ki te fakatahi ke nā leʼoleʼo naʼa hoko he maveuveu. Neʼe nā nonofo ai ʼi te ʼaho katoa. ʼI te ʼosi ʼo te ʼaho ʼaia, neʼe nā fakahā tanā leleiʼia te ʼu meʼa fuli ʼaē neʼe nā logo kiai pea mo te aga lelei ʼa te hahaʼi ʼaē neʼe nā sio ki ai. Neʼe ʼui fēnei e te tahi ia nāua: “Neʼe mole hona ʼaoga ke fekauʼi māua ki te fakatahi ʼaia. ʼE mātou ʼiloʼi ʼe fai e te kau Fakamoʼoni ʼa Sehova tanatou ʼu fakatahi ʼi te tokalelei.”

¹⁶ Ko te tagata neʼe kau ki te kūtuga faka politike ʼi he fenua ʼo Afelika, neʼe hola ki Eulopa ʼi te temi ʼaē neʼe matematehi ai te hahaʼi fuli ʼaē neʼe kau ki tona kūtuga faka politike. Neʼe lahi te ʼu fihifihia ʼaē neʼe hoko kia ia pea neʼe lotovaivai ʼaupito ai. ʼAki te temi, neʼe ina tali ke fai hana ako Tohi-Tapu. ʼI tana ʼuluaki kau ki he fakatahi faka tisitilike, neʼe ōfo ʼi tana sio ʼaē ki he ʼu hahaʼi ʼaē neʼe kehekehe tonatou ʼu ʼaluʼaga, neʼe nātou maʼopoʼopo fakatahi ʼi te tokalelei pea mo te fīmālie. Neʼe ina ʼiloʼi papau ai, ʼe kua ina maʼu te moʼoni, pea ʼi te lolotoga fai ʼo te fakatahi ʼaia, neʼe ina fakatotonu ai ke ina fakagata tana kau ki te ʼu meʼa faka politike. Ki muli age, neʼe papitema pea ʼi te temi nei, ko ia pea mo tana ʼu fānau ʼe nātou tauhi kia Sehova.

¹⁷ ʼI te ʼu fakatahi ʼo te taʼu ʼaenī, ʼe lave feafeaʼi anai tatatou ʼu aga kia nātou ʼaē ko tanatou ʼuluaki kau ki he fakatahi? ʼE nātou fakatokagaʼi koa tatatou logo tahi mokā tou gāue fakatahi? ʼE nātou ōfo anai koa ʼi tanatou sio ki te maʼa ʼo te koga meʼa ʼaē ʼe tou fakatahi ai, pea mo tanatou sio ʼaē, ko tatou pea mo totatou famili, ʼe tou tae te ʼu pepa ʼaē neʼe lagi tou tuku ʼi totatou ʼu lalo hekaʼaga? ʼE nātou sio anai koa ki tatatou aga ʼaē ʼe lelei mokā tou ʼolo ki te fakatahi pea mo mavae mai ai? ʼE nātou fakatokagaʼi anai koa, ko tatou mātuʼa ʼe tou leʼoleʼo tuʼumaʼu tatatou ʼu fānau? Tou faiga ke lelei te manatu ʼa te hahaʼi ʼaē ʼe nātou sioʼi tatou.

¹⁸ Ko Te Totogi ʼo Te ʼu Meʼa ʼAē ʼe ʼAoga Ki Te Fakatahi: ʼI te mālama ʼaenī, ʼe totogi kovi te tikite ʼaē ʼe kita toʼo mokā kita fia tāʼofi he hekaʼaga ʼi he malaʼe faigaoʼi, koteʼuhi ʼe lahi te ʼu maʼua ʼaē ʼe tonu ke huʼi ki te kolo ʼaē ʼe tuʼu ai te malaʼe faigaoʼi ʼaia. Neʼe ʼui tuʼumaʼu e te Sosiete “ko te ʼu hekaʼaga ʼe mole totogi, pea ʼe mole he tae falā” ʼi te ʼu fakatahi. Kae ʼe lava feafeaʼi anai hatatou totogi te ʼu maʼua ʼaia ʼo te fakatahi? ʼE tou fai anai ʼaki te ʼu meʼa ʼofa ʼo nātou ʼaē ʼe nātou kau ki te fakatahi. ʼE tou ʼiloʼi papau ʼe tou fakahā anai he loto fia foaki ohage ko te hahaʼi kaugana ʼa te ʼAtua ʼo te temi muʼa, ʼo tou faʼifaʼitaki ai kia Sehova ʼAtua pea mo Sesu Kilisito. (2 Ko. 8:7) ʼE tou tokaga lelei anai ki te falā ʼaia ke ʼaua naʼa kaihaʼa e he tahi, pea ʼe tou tohi te falā ʼaia ʼaē ʼe tānaki, pea ʼe tou fakaʼaogaʼi ki te meʼa ʼaē kua ʼosi fakatuʼutuʼu kiai. Kapau ʼe koutou tohi takotou seki, pea ʼe tonu ke koutou tohi ai ʼe fai ki te “Association Les Témoins de Jéhovah.”

¹⁹ Ko Te ʼu Hekaʼaga: ʼE toe fai pe anai te ʼu fakatuʼutuʼu ʼaē neʼe fai lolotoga te ʼu taʼu, ko tona faka ʼuhiga, ʼE TONU KE TOU TAUPAU PE HE ʼU HEKAʼAGA ʼO TOTATOU FAMILI PEA MO NĀTOU ʼAĒ NEʼE ’ŌMAI MO TATOU. ʼE ko he meʼa lelei tatatou fakatokagaʼi, ko te tokolahi ʼe nātou mulimuli ki te fakatuʼutuʼu ʼaia, ʼo tuputupu ai te ʼofa ʼaē ʼe fakahā e te ʼu tēhina mo tuagaʼane ʼi te ʼu fakatahi. ʼI te fale fakatahi, ʼe ʼi ai te ʼu hekaʼaga ʼe lelei age ʼi te tahi ʼu hekaʼaga, koia koutou fakahā tokotou ʼofa ʼo koutou tuku te ʼu hekaʼaga lelei ʼaia ki te hahaʼi ʼaē kua matutuʼa pea mo nātou ʼaē ʼe ʼaoga moʼoni kia nātou ke nātou nonofo ai. Koutou manatuʼi, ‘ko te ʼofa ʼe mole ina kumi pe te meʼa ʼaē ʼe ʼaoga kia ia.’​—1 Ko. 13:​4, 5; Filp. 2:4.

²⁰ Te ʼu Kamela, Pea Mo Te ʼu Meʼa Puke Leʼo: ʼE feala ke tou fakaʼaogaʼi te ʼu kamela pea mo te ʼu meʼa puke leʼo ʼi te ʼu fakatahi. Kae kapau ʼe tou fakaʼaogaʼi te ʼu meʼa ʼaia, pea ʼe mole tonu ke fakalelu kia nātou ʼaē ʼi te fakatahi. Kapau ʼe tou feʼoloʼaki lolotoga te ʼu akonaki ʼo toho paki, ʼe fakalelu anai kia nātou ʼaē ʼe faiga ke nātou fakalogo ki te polokalama. ʼE mole fakagafua anai ke kita fakaʼaogaʼi te ʼu hunukiʼaga hila peʼe ko te fakatagi ʼo te fale fakatahi moʼo puke ʼo te ʼu akonaki, pea ʼe mole tonu anai ke tuʼu te ʼu meʼa ʼaia ʼi te ʼu ala, peʼe gaohaʼa ki te hahaʼi.

²¹ Te Selevisi ʼAē ʼe Tokaga Ki Te Kau Mahaki: Ko te selevisi ʼaia ʼe fakaʼaogaʼi tāfito kia nātou ʼaē ʼe mahahaki lolotoga te fakatahi. ʼE kole atu ke koutou ʼaumai takotou ʼu faitoʼo ki te mamahi ʼulu, mo te mamahi fatu, pea mo te tahi ʼu foʼi ʼakau, heʼe mole foaki atu anai te ʼu faitoʼo ʼaia ʼi te fakatahi. Ko nātou ʼaē ʼe nātou ʼiloʼi ʼe feala ke kovi tonatou mahaki mafu, peʼe ko tonatou suka lolotoga te fakatahi, ʼe tonu ke nātou ʼaumai tonatou ʼu faitoʼo mo nātou. ʼE tonu ke nofo mo nātou he tahi ʼo tonatou famili peʼe ko he tahi ʼo te kokelekasio ʼaē kua ina ʼiloʼi tonatou mahaki, ke feala hana tokoni ki ai kapau ʼe ʼaoga. Neʼe hoko te ʼu fihifihia ʼi te ʼu fakatahi, he neʼe nofo tokotahi ʼihi ʼaē neʼe mahamahaki kovi, pea neʼe kovi ai tanatou mahaki. Kapau ko ʼihi ʼe mahamahaki pea ʼe mole honatou famili moʼo tokoni kia nātou, pea ʼe tonu anai ke fakalavelave ki te ʼu tagata ʼāfea ke feala hanatou fai he ʼu fakatuʼutuʼu moʼo tokoni kia nātou ʼaia. ʼE mole feala anai ke fai he ʼu fakatuʼutuʼu ʼi te fakatahi ke ʼi ai he ʼu kogafale maʼa nātou ʼaē ʼe mahaki.

²² Te Meʼa Kai ʼi Te Fakatahi: ʼE fakatau anai he ʼu meʼa kai pea mo he ʼu meʼa ʼinu ʼi te fakatahi ohage ko tona fai ʼi muʼa atu. Kae kapau ʼe kita haʼu mo hakita meʼa kai, pea ʼe lelei ke kita ʼaumai ʼi he kiʼi glacière peʼe ʼi he kato, ka mole tonu ke kita mavae ʼi te fale fakatahi ʼi te fetapā moʼo totogi hakita meʼa kai peʼe kita toe liliu kiō kita. ʼE tonu ke tou manatuʼi, ʼe feʼauga pe he kiʼi meʼa kai ʼe faigafua tona ʼai ki he kiʼi kato. Ko te kiʼi glacière ʼe tonu ke veliveli ke feala hakotou tuku ʼi tokotou lalo hekaʼaga. ʼE fakamanatuʼi mai kia tatou fuli, ʼe mole feala ke ʼaumai he ʼu ipu, mo he ʼu foʼi hina pea mo he ʼu pa sioʼata pea mo he kava ki te fakatahi. Neʼe fakatokagaʼi ko ʼihi neʼe kakai pea mo ʼiʼinu lolotoga te fakatahi, kae ʼe hā mai ai tonatou mole fakaʼapaʼapa ki te fakatahi.

²³ ʼE tou fiafia ʼaupito ʼi tatatou ʼiloʼi ʼaē, kua vave hoko mai te Fakatahi Faka Tisitilike 1998 “Te Faʼahiga Maʼuli ʼAē ʼe Fakamaʼua Mai e Te ʼAtua”! Kua ʼosi fai koa hakotou ʼu fakatuʼutuʼu ke koutou kau kiai? ʼOfa pe ke haohaoa takotou ʼalu kiai pea ke koutou toe lotomālohi ʼi takotou liliu mai kiō koutou, ʼo koutou fakatotonu ke koutou hoko atu takotou selevisi maʼuhiga kia Sehova, pea ke koutou haga mulimuli ki Te Faʼahiga Maʼuli ʼAē ʼe Fakamaʼua Mai e Te ʼAtua, ke feala hakotou maʼu he ʼu tapuakina heʼegata.

[Talanoa ʼo te pasina 6]

Te ʼu Fakamanatu ʼo ʼUhiga Mo Te Fakatahi

▪ Te Papitema: ʼI muʼa ʼo te kamata ʼo te fakatahi ʼi te Moeaki uhu, ʼe tonu anai ke heheka ia nātou ʼaē ka papitema ʼi te ʼu hekaʼaga ʼaē kua tāʼofi maʼa nātou. Ko nātou fuli ʼaē ʼe fakatuʼutuʼu ke papitema ʼe tonu anai ke nātou ʼaumai honatou ʼu teu maʼanu ʼe mata fakaʼapaʼapa pea mo he tauveli. Neʼe fakatokagaʼi ko ʼihi neʼe nātou ʼōmai mo hanatou teu maʼanu neʼe mole mata fakaʼapaʼapa pea neʼe fakatupu kovi ki te maʼuhiga ʼo te papitema. Ka vakaʼi anai e te kau tagata ʼāfea te ʼu fehuʼi ʼaē ʼe tuʼu ʼi te tohi Notre ministère, pea ʼe tonu anai ke nātou ʼiloʼi papau pe kua mahino lelei te kau papitema ki te ʼu puani ʼaia. Ko tokita papitema moʼo fakahā te foaki ʼo tokita maʼuli kia Sehova ʼe ko he faʼahi pe ʼa kita tokotahi pea mo Sehova. Koia, ʼe mole tāu mo feʼauga ke papitema fakatahi he toko lua ʼo nā fāʼufua pea mo nā fetapikiʼaki lolotoga te papitema.

▪ Te ʼu Pepa Fakaʼiloga: ʼE kole atu ke koutou ʼai tokotou pepa fakaʼiloga ʼo te taʼu 1998 ʼi te ʼu temi fuli ʼaē ʼe koutou ʼolo ai ki te fakatahi pea mo takotou liliu mai. ʼE tupu ai te ʼu fealagia ke koutou fai faka mafola. ʼE tonu ke koutou toʼo takotou pepa fakaʼiloga ʼi tokotou kokelekasio, heʼe mole maʼu anai ʼi te fakatahi. ʼAua naʼa koutou talitali ke fakaōvi mai te ʼaho ʼo te fakatahi pea koutou ʼolo ai leva ʼo fakaʼui he ʼu kate maʼa koutou pea mo tokotou famili. Tahi ʼaē meʼa, koutou manatuʼi ʼo ʼave mo koutou takotou kate Instructions médicales/Attestation prévisionnelle.

▪ Te ʼu Nofoʼaga: KAPAU ʼE KOUTOU FELĀVEʼI MO HE ʼU FAIGATAʼAʼIA ʼO ʼUHIGA MO TE NOFOʼAGA, pea ʼe kole atu ke koutou fakahā ki te Selevisi ʼo Te Nofoʼaga ʼi takotou kei nonofo ʼi te fakatahi, ke feala hanatou foimo maʼu he puleʼaki ki te faʼahi ʼaia. Ko te ʼu sikalaipe ʼo te ʼu kokelekasio ʼe nātou tokakaga anai ke foimo ʼave te ʼu kiʼi pepa ʼo ʼuhiga mo te nofoʼaga ki te Selevisi ʼo Te Nofoʼaga ʼi te fakatahi. Kapau ʼe mole kei koutou fia ʼolo ki te nofoʼaga ʼaē neʼe hinoʼi atu kia koutou, pea ʼe tonu ke koutou foimo fakahā kia ia ʼaē ʼe ina fakatalitali koutou ʼo toe feiā aipe mo te Selevisi ʼo Te Nofoʼaga, ke feala ke nātou foaki te nofoʼaga ʼaia ki he tahi kehe.

▪ Te ʼu Saliote Toho Tamaliki: ʼE lahi te ʼu fale fakatahi, ʼe mole feala ke fakaʼaogaʼi ai te ʼu saliote toho tamaliki. ʼUhi ko te ʼu lekula ʼo ʼuhiga mo te ʼu tuʼutāmaki, ʼe tapu ke kita tuku te ʼu kiʼi saliote ʼaia ʼi te ʼu faʼahi ʼaē ʼe tou feʼoloʼaki ai, peʼe ʼi te vaha ʼo te ʼu hekaʼaga. Mai tona ʼaluʼaga ʼaē ʼe lagi feʼīʼaki anai te hahaʼi ʼuhi ko tonatou kaugamālie, koia ʼe feala pe ke fakatupu tuʼutāmaki te ʼu meʼa toho tamaliki ki te ʼu kiʼi toe liliki pea mo te hahaʼi ʼaē ʼe nātou tūkia anai kiai. Koia ʼe kole atu ke ʼaua naʼa koutou ʼaumai he ʼu kiʼi saliote feiā ki te fakatahi. Kae ʼe fakagafua te ʼu hekaʼaga ʼo te ʼu kiʼi toe liliki peʼe ko te ʼu kiʼi hekaʼaga ʼaē ʼe nātou nonofo ai ʼi te ʼu motokā, kapau ʼe fakapipiki ki te hekaʼaga ia tafa ʼo te ʼu mātuʼa. ʼE maʼuhiga takotou lagolago ki te fakatuʼutuʼu ʼaia pea ʼe leleiʼia anai.

▪ Te Selevisi Kia Nātou ʼAē ʼe Fia Gāue: ʼE feala koa hakotou fakaʼaogaʼi he kiʼi temi moʼo tokoni ki te ʼu gāue ʼaē ka fai anai ʼi te fakatahi? ʼE ʼaoga lahi anai takotou tokoni ki tokotou ʼu tēhina pea ʼe koutou fiafia ai anai, tatau aipe peʼe koutou fai lolotoga he ʼu kiʼi hola. Kapau ʼe feala hakotou tokoni, pea koutou fakahā ki te selevisi ʼaē ʼe tokaga kia nātou ʼe fia gāue ʼi te fakatahi. Ko te ʼu tamaliki ʼaē mole heʼeki nātou taʼu 16, ʼe feala ke nātou tokoni lelei ki te gāue ʼo nātou gāue fakatahi mo tanatou tāmai peʼe ko tanatou faʼe, peʼe ko he tahi kua lahi pea mo fakapotopoto.

▪ Te ʼu Fakatokaga: Koutou kalaviʼi tuʼumaʼu tokotou motokā, pea ʼaua naʼa koutou tuku he faʼahiga meʼa ʼe feala ke sio kiai te hahaʼi. Ko te ʼu hahaʼi kaihaʼa ʼe nātou leleiʼia te ʼu fakatahi lalahi. ʼE mole ko he agapoto ia mo kapau ʼe koutou tuku he ʼu meʼa maʼuhiga ʼi tokotou hekaʼaga. ʼE mole feala ke koutou ʼiloʼi papau peʼe ko nātou ʼaē ʼe ʼi ʼokotou tafaʼaki ʼe ko he kau Kilisitiano. ʼE koutou tuku anai koa he ʼu meʼa ʼi takotou hekaʼaga ke tupu ai hanatou fia kaihaʼa? Tahi ʼaē, ʼe ʼui neʼe ʼi ai te ʼu hahaʼi neʼe mole kau ki te fakatahi, neʼe nātou fia kaihaʼa he ʼu tamaliki. KOUTOU LEʼOLEʼO TUʼUMAʼU TOKOTOU KIʼI FĀNAU.