Te ʼu Fakatahi Faka Tisitilike ʼo Te Taʼu 1999 “Te ʼu Folafola Faka Polofeta ʼa Te ʼAtua”
1 ʼI te temi ʼaē neʼe teuteu ai te kau Iselaelite ke nātou hū ki te Kele ʼo te Fakapapau, neʼe kole mamahi age kia nātou e Moisese ke nātou faka maʼuhigaʼi te ʼu fakatotonu ʼa te ʼAtua. Neʼe ina ʼui fēnei: “ ʼE mole ko he folafola noa maʼa koutou, kae ʼe faka ʼuhiga ki tokotou maʼuli.” (Teu. 32:45-47) ʼE mole tou loto fakafetaʼi koa la ki te ʼAtua heʼe maʼuhiga kia te ia totatou maʼuli pea mo ina haga takitaki tatou ʼaki tana Folafola ʼaē ʼe maʼuhiga ʼaupito? Koia ʼe tou fakaʼamu lahi ki te Fakatahi Faka Tisitilike “Te ʼu Folafola Faka Polofeta ʼa Te ʼAtua” pea mo te ʼu meʼa ʼaē neʼe teuteuʼi e Sehova maʼa tatou.
2 ʼI te taʼu ʼaenī, neʼe fakatuʼutuʼu ke fai he ʼu fakatahi e tolu ʼi te telituale ʼo totatou Filiale. ʼUluaki ʼe fai anai te fakatahi ʼi te lea faka Pisilama ʼi te ʼaho 20 ʼo ʼAukusito ʼo aʼu ki te ʼaho 22 ʼo te taʼu 1999, ʼi Luganville, ʼi Santo. ʼOsi ʼaia pea fai anai te ʼu fakatahi Fakafalani e lua ʼi Niumea ʼi te Fale Fakatahi ʼo Normandie, ʼi te ʼaho 3 ki te ʼaho 5 ʼo Sepetepeli, pea mo te ʼaho 10 ki te ʼaho 12. Kua lagi fakahā atu ki tokotou kokelekasio pe ko te fakatahi fea ʼaē neʼe fakaafe atu koutou kiai. ʼE mahino papau ia, ʼuhi ko te totogi ʼo te folau, ʼe mole feala ke ʼōmai fuli te ʼu kaugā faka mafola ʼo Uvea pea mo Futuna. Koia neʼe fakatuʼutuʼu ke puke te ʼu akonaki tāfito ʼo te fakatahi pea ʼe momoli anai te ʼu foʼi fime viteo ʼaia ki te kokelekasio ʼo Uvea.
3 ʼE mahino papau ia, kua koutou fai hakotou ʼu fakatuʼutuʼu ke koutou kau ki te ʼu ʼaho fuli ʼo te fakatahi, heʼe koutou ʼiloʼi ʼe loto kiai Sehova. Koutou falala ʼe sio ki te ʼu faiga pea mo te ʼu sakilifisio ʼaē ʼe fai e tana ʼu kaugana fuli ke nātou kau ki te ʼu fakatahi, pea ʼe ina manatuʼi tuʼumaʼu te ʼu faʼahi ʼaia. (Hep. 6:10) ʼI tatatou kau ki te ʼu ʼaho fuli ʼo te fakatahi ʼo kamata mai ʼaki te ʼuluaki katiko ʼo aʼu ki te faikole fakaʼosi, ʼe tou fakahā ai ʼe tou fakamuʼamuʼa tana ʼu folafola. (Teu. 4:10) Tahi ʼaē meʼa, ʼe tou fakahā tatatou loto fakafetaʼi ki te gāue kinakina ʼaē neʼe fai e te tokolahi ʼo totatou ʼu tēhina moʼo teuteuʼi te fakatahi.
4 ʼE maʼua ke fai fakatomuʼa he ʼu fakatuʼutuʼu lelei ke feala ke fakatahi te ʼu toko lauʼi afe hahaʼi ʼa te ʼAtua. ʼI tatatou ʼiloʼi ʼaē neʼe fai te ʼu fakatuʼutuʼu ʼaia ʼaki te ʼofa, ʼe tou fia gāue fakatahi mo totatou ʼu tēhina pea ke tou “fai ia meafuape i te fakapotopoto mo te fakatokatoka.” (1 Ko. 14:40) ʼAki te ʼu fakamatala pea mo te ʼu fakamanatu ʼaē ʼe fai ʼi te pepa ʼaenī, ʼe feala anai ke tou leleiʼia te meʼa kai fakalaumālie ʼaē neʼe teuteuʼi maʼa tatou ʼi te fakatahi pea ke tou fakafiafia ʼi tatatou fakatahi mo totatou ʼu tēhina.
ʼI Muʼa ʼo Te Fakatahi
5 Ko nātou ʼaē ʼe koutou fai hanatou ako Tohi-Tapu peʼe ko te hahaʼi ʼaē ʼe tou fai palalau mo nātou ki te moʼoni, ʼe ʼaoga koa ke fai age he tokoni ke nātou fai hanatou ʼu fakatuʼutuʼu ke feala hanatou kau ki te fakatahi? Ko te ʼu meʼa ʼaē ʼe nātou logo anai kiai ʼe lagi ina uga anai nātou ke nātou liliu ko he kau atolasio ʼa Sehova. (1 Ko. 14:25) ʼE tonu ke ʼiloʼi e te kau tagata ʼāfea pe ko ai ʼaē ʼe ʼaoga ki ai he nofoʼaga pea ko ai ʼaē ʼe mole hana meʼa feʼaluʼaki, tāfito la te kau matutuʼa ʼo te kokelekasio, pea ʼe tonu ke nātou fai he ʼu fakatuʼutuʼu maʼa nātou.—Kal. 6:10.
6 Kua koutou fai koa hakotou ʼu fakatuʼutuʼu ʼo ʼuhiga mo tokotou nofoʼaga? Kapau kua fakahā atu kia koutou pe ko te ʼapi fea ʼaē ka koutou ʼolo kiai, pea ʼe fakaloto mālohiʼi koutou ke koutou mulimuli ki te fakatuʼutuʼu ʼaia ʼaē neʼe fai e te Selevisi ʼo te Nofoʼaga. ʼI te temi nei, ko te ʼu Pepa Kole Nofoʼaga fuli ʼaē neʼe tali e te Komite Gāue ʼo te Kokelekasio neʼe kua momoli e te Taupau Sekelipa ʼo te kokelekasio ki te Selevisi ʼo te Nofoʼaga. Kapau ʼe mole kei koutou fia ʼolo ki te nofoʼaga ʼaē neʼe hinoʼi atu kia koutou, pea ʼe tonu ke koutou foimo fakahā te faʼahi ʼaia ki te Selevisi ʼo te Nofoʼaga, ke feala ke nātou foaki te nofoʼaga ʼaia ki he tahi kehe. ʼE ko he meʼa fakapotopoto kapau ʼe koutou fakalavelave ki te famili ʼaē ka koutou nonofo ai, pe kofea ʼaē ʼe feala ke koutou felāveʼi ai pea ko te hola fia.
7 ʼE ʼiloʼi anai e te sekelipa ʼo tokotou kokelekasio ia te numelo telefoni ʼo te Selevisi ʼo te Nofoʼaga. Kapau ʼe koutou fia ʼiloʼi he tahi ʼu meʼa ʼo ʼuhiga mo te fakatahi, pea koutou fakalavelave ki te sikalaipe ʼo tokotou kokelekasio.
8 Mai tona ʼuhiga ʼaē ko te Selevisi ʼAē ʼe Tokaga Ki Te Kau Mahaki ʼe gāue tāfito anai kia nātou ʼaē ʼe mahahaki lolotoga te fakatahi, koia ʼe kole atu ke koutou ʼaumai takotou ʼu faitoʼo ki te hela, mo te mamahi ʼulu, mo te mamahi fatu, pea mo te tahi ʼu foʼi ʼakau, heʼe mole foaki atu anai te ʼu faitoʼo ʼaia ʼi te fakatahi. Ko nātou ʼaē ʼe nātou ʼiloʼi ʼe feala ke kovi tonatou mahaki mafu, peʼe ko tonatou suka lolotoga te fakatahi, ʼe tonu ke nātou ʼōmai mo tonatou ʼu faitoʼo. ʼE tonu ke nofo mo nātou he tahi ʼo tonatou famili peʼe ko he tahi ʼo te kokelekasio ʼaē kua ina ʼiloʼi tonatou mahaki, ke feala hana tokoni ki ai mo kapau ʼe ʼaoga.
9 Lolotoga takotou ʼu feʼoloʼaki ki te fakatahi, ʼe lagi feala anai ke koutou fai he fagonogono faigamālie. ʼE koutou teuteu anai koa ke koutou fakahā te moʼoni ki te hahaʼi? ʼE feala kia tatou fuli, ʼo kau kiai te kau tamaliki, ke tou foaki te ʼu kiʼi pepa lotu ki te ʼu hahaʼi ʼo te ʼu ʼutuʼaga penisini pea mo he tahi ʼu hahaʼi ʼe tou felāveʼi mo nātou ʼi te ala. ʼE ʼi ai anai he ʼu faigamālie ke tou tuku te ʼu nusipepa, mo he ʼu kaupepa, pea mo ʼihi atu tohi. Koutou teuteu ke koutou fai te fagonogono faigamālie ki he ʼu hahaʼi ʼe mole lagi tou felāveʼi anai mo nātou ʼi tonatou ʼapi.
ʼI Te Lolotoga ʼo Te Fakatahi
10 ʼI te ʼaho fuli, ʼe avahi anai te fale fakatahi ʼi te hola valu uhu. ʼE feala ke koutou taupau pe he ʼu hekaʼaga ʼo tokotou famili pea mo nātou ʼaē neʼe ʼōmai mo koutou. ʼE mole feala anai ke taupau he ʼu kogafale makehe kia nātou ʼaē ʼe mahaki ʼi te ʼu allergies. ʼI te ʼaho fuli, ka koutou mavae, koutou fakasiosio lelei pe neʼe mole galo hakotou meʼa ʼi te faʼahi ʼaē neʼe koutou heheka ai.
11 Ke feala he fai ʼo hatatou ʼu fakatahi lalahi ohage ko te ʼu fakatahi faka tisitilike, ʼe tonu ke tou mulimuli ki te ʼu lekula ʼo te puleʼaga ʼo ʼuhiga mo te ʼu tuʼutāmaki ʼaē ʼe feala ke hoko, ohage ko te vela peʼe ko he tahi ʼu tuʼutāmaki. Koia ʼe mole fakagafua ke kita ʼave te ʼu saliote toho tamaliki peʼe ko te ʼu hekaʼaga lalahi ki te loto fale fakatahi. Kapau ʼe kita tuku te ʼu kiʼi saliote ʼaia ʼi te ʼu faʼahi ʼaē ʼe tou feʼoloʼaki ai, peʼe ʼi te vaha ʼo te ʼu hekaʼaga, pea ʼe feala ke fakatupu tuʼutāmaki. Kae ʼe fakagafua te ʼu hekaʼaga ʼo te ʼu kiʼi toe liliki peʼe ko te ʼu kiʼi hekaʼaga ʼaē ʼe nātou nonofo ai ʼi te ʼu motokā, kapau ʼe fakapipiki ki te hekaʼaga ʼaē ia tafa ʼo te ʼu mātuʼa.
12 ʼE koutou papitema anai koa ʼi te fakatahi faka tisitilike? ʼI te Moeaki uhu, ʼe tāʼofi anai he ʼu hekaʼaga maʼa nātou ʼaē ka papitema pea ʼe taki anai nātou e te ʼu tēhina ki te ʼu hekaʼaga ʼaia. Kapau ʼe feala pea ʼe kole atu ke koutou heheka ai ʼi muʼa ʼo te kamata ʼo te polokalama. Koutou ʼaumai hakotou Tohi-Tapu, mo te katiko, mo he tauveli pea mo he teu maʼanu ʼe mata fakaʼapaʼapa. ʼE mole tau mo feʼauga te ʼu vāvaʼe mumutu ʼaē ʼe makahaehae, mo te ʼu kofu sino ʼaē ʼe tohi ai te ʼu publicités pea mo te tahi faʼahiga teu feiā, heʼe ko he lakaga ʼe maʼuhiga ʼaupito. Ka vakaʼi anai e te kau tagata ʼāfea te ʼu fehuʼi ki te papitema ʼaē ʼe tuʼu ʼi te tohi Notre ministère, pea ʼe tonu anai ke nātou ʼiloʼi papau pe kua mahino lelei ki te kau papitema fuli te ʼu puani ʼaia. Ko tokita papitema moʼo fakahā te foaki ʼo tokita maʼuli kia Sehova ʼe ko he faʼahi pe ʼa kita tokotahi pea mo Sehova. Koia, ʼe mole tau mo feʼauga ke papitema fakatahi he toko lua ʼo nā tapiki lolotoga te papitema.
13 ʼE feala hakotou fakaʼaogaʼi he ʼu kamela viteo peʼe ko he ʼu meʼa puke leʼo ʼi te fakatahi. Kae ʼe mole tonu anai ke tuʼu te ʼu meʼa ʼaia ʼi te ʼu faʼahi ʼaē ʼe alaʼi, peʼe gaohaʼa ki te hahaʼi, peʼe fakalelu kia nātou ʼaē ʼe fakalogo ki te polokalama. ʼE mole fakagafua anai ke kita fakaʼaogaʼi te ʼu meʼa hunukiʼaga hila peʼe ko te fakatagi ʼo te fale fakatahi moʼo puke ai te ʼu akonaki.
14 Neʼe fakatuʼutuʼu e te Sosiete ke fakatau he ʼu kiʼi meʼa kai ʼi te fakatahi. Ko te tokolahi ʼo te ʼu tēhina neʼe nātou ʼui, ʼaki te fakatuʼutuʼu faigafua ʼaia, ʼe feala hanatou ʼai hanatou kiʼi mālōlō ʼi muʼa ʼo te polokalama ʼo te hili hoʼatā, pea ʼe nātou fiafia heʼe lahi age te temi ʼaē ʼe feala ke nātou fai palalau ai mo te ʼu tēhina mo tuagaʼane. ʼE feala anai hakotou totogi te ʼu tikite ki te meʼa kai ʼi tokotou kokelekasio ʼi muʼa ʼo te ʼu ʼaho ʼaē ka fai ai te fakatahi.
15 ʼE feala anai koa hakotou tokoni ki te fakamaʼa ʼo te fale fakatahi ʼi te fakaʼosi ʼo te polokalama ʼi te ʼaho fuli? Peʼe feala anai koa hakotou gāue ʼi he tahi selevisi? Ohage pe ko te meʼa ʼaē neʼe tou fai ʼi te taʼu ʼaenī kua ʼosi, ko te ʼu tēhina ʼaē ʼe tokaga ki he selevisi, ʼe nātou faʼufaʼu anai he ʼu kūtuga gāue ʼaki te ʼu tēhina mo tuagaʼane ʼo tonatou kokelekasio, pea ʼe nātou foaki fakatomuʼa anai te ʼu lisi ʼaia ki te selevisi kia nātou ʼaē ʼe fia gāue. Kae kapau ʼe mole tuʼu tokotou higoa ʼi he lisi, pea ʼe feala pe hakotou tokoni ki te ʼu gāue ʼaia, ʼo koutou ʼolo ki te Selevisi kia nātou ʼaē ʼe fia gāue ʼi te fakatahi. ʼE tali anai ke gāue te kau tūpulaga ʼaē ʼe mole heʼeki taʼu 16, mo kapau ʼe nātou gāue fakatahi mo tanatou ʼu mātuʼa peʼe ko he tahi kua lahi. ʼE mahino papau ia, ʼe feala kia tatou fuli ke tou taupau ke maʼa te fale fakatahi ʼo tou tae te ʼu ʼotaʼota ʼo lī ki te foʼi tuka.
16 Neʼe foaki mai he ʼu pelesepeto lelei ʼo ʼuhiga mo te faʼahiga teu pea mo te gaohi ʼo totatou ʼulu ke tau mo feʼauga mo te fakatahi. Ohage la, ʼe foaki mai te takitaki ʼo ʼuhiga mo te faʼahi ʼaia ʼi te ʼu pepa ʼaē ʼe ʼalutahi mo Te Minisitelio ʼo Te Puleʼaga, ʼo tou toe maʼu foki mo te ʼu paki ʼi te ʼu tohi pea tāfito te ʼu folafola ʼa Sehova ʼi te Tohi-Tapu. (Loma 12:2; 1 Tim. 2:9, 10) ʼE ʼiloʼi e te hahaʼi pe ko ai te kau Fakamoʼoni ʼa Sehova pea he koʼe ʼe tou fakatahi ʼi tonatou kolo. Koia ko tatatou faʼahiga teu pea mo te gaohi ʼo totatou ʼulu ʼe ko he ʼu fakamoʼoni maʼuhiga ki totatou ʼuhiga kaugana ʼo te ʼAtua. Ko te tokolahi ʼo te hahaʼi ʼa Sehova ʼe nātou tuku he faʼifaʼitaki lelei. Kae ʼi ʼihi temi ʼe tou fakatokagaʼi ʼe hā te manatu ʼa te mālama ʼi te ʼu faʼahiga teu pea mo te gaohi ʼo te ʼulu ʼo he ʼu hahaʼi ʼaē ʼe nātou kau ki te fakatahi. Ko ʼihi mutuʼi meʼa ʼe lahi fau tanatou fakahā te ʼu agaaga ʼo te sino pea ʼe hā ai te kua vaivai ʼo he tahi ʼi te faʼahi fakalaumālie. Koia ʼe tonu ki totatou teu ke lelei mo maʼa pea mo aga fakapoipoi. Ko te ʼu pule famili ʼe tonu ke nātou vakaʼi fakalelei pe koteā te ʼu mutuʼi meʼa ʼaē ka ʼai anai e tonatou famili. ʼE toe feiā pe anai mo tatatou teu mokā tou hū ki tuʼa ʼo te fale fakatahi. ʼE tonu ke tou ʼai hatatou kiʼi pepa fakaʼiloga ʼi muʼa ʼo te fakatahi pea mokā ʼosi te fakatahi, heʼe feala ke sio ai te hahaʼi ʼe tou kau ki te hahaʼi maʼa ʼa Sehova.—Vakaʼi ia Maleko 8:38.
17 Ko te laumālie maʼoniʼoni neʼe ina uga te Hau poto ko Salomone ke ina tohi fēnei: “ ʼE nonoʼo te agavale ʼi te loto ʼo te tama,” pea “ko he tama ʼe tuku ke faʼitaliha ʼe ina fakaufiufiʼi anai tana faʼe.” (Taag. 22:15; 29:15) ʼI te lolotoga ʼo te polokalama, ko te kau tūpulaga ʼaē neʼe mole tokaga ki ai tanatou ʼu mātuʼa, neʼe nātou fakalelu ki te ʼu tēhina pea mo tuagaʼane ʼaē neʼe fia fakalogo. ʼE fakamāuʼi e Sehova te ʼu mātuʼa ʼo ʼuhiga mo te aga ʼa tanatou fānau, koia ʼe hoki feala ki he ʼu mātuʼa ke nātou ʼiloʼi papau peʼe fakalogo tanatou fānau ki te akonaki ʼo Sehova, peʼe nātou aga fakaʼapaʼapa, mo kapau ʼe nātou heheka fakatahi. ʼI te lolotoga ʼo te polokalama, ʼe mole tonu ke ʼolo ʼāteaina te kau tamaliki ki te fale vao. ʼI te taʼu ʼaenī kua ʼosi, neʼe fakatokagaʼi ko ʼihi kau tūpulaga neʼe nātou ʼolo ki te ʼu fale vao ʼo tuʼusi te haʼuʼaga vai pea nātou tohi tonatou ʼu higoa ʼi te ʼu kaupā. Ko ʼihi ʼe lahi te ʼu akonaki ʼe mole nātou fakalogo kiai heʼe nātou fai piga ʼi tuʼa mo tonatou ʼu kaumeʼa, peʼe ʼi te taulaga motokā. Ko te ʼu tēhina tali fagona ʼe nātou kole anai ki te hahaʼi fuli ʼaē ʼe nātou fakalelu ki te tahi hahaʼi ke nātou tuku te meʼa ʼaē ʼe nātou fai, pea mo nātou fakamanatuʼi fakalelei age kia nātou, ke nātou fakalogo fakalelei ki te ʼu akonaki.
18 Koteʼuhi ʼe kau te kaugamālie ki totatou ʼu fakatahi, koia ʼe ko he aga fakapotopoto ke tou tokaga lelei ki tatatou fānau pea mo tatatou ʼu meʼa. Ko tatatou fānau ʼe ko he meʼa ʼofa maʼuhiga mai ia Sehova. Kae ʼe fakaʼata e te mālama te aga fefeka ʼo Satana. Koia la ʼaē ʼe tonu ke koutou ʼiloʼi ʼi te temi fuli peʼe ʼifea takotou fānau. Tahi ʼaē meʼa, ʼe mole tonu ke koutou tuku ʼi tokotou hekaʼaga he kamela, he kiʼi kato pea mo he tahi ʼu meʼa maʼuhiga. Koutou kalaviʼi tuʼumaʼu takotou motokā, pea koutou ʼai takotou ʼu meʼa ʼi te muli motokā peʼe koutou ʼave mo koutou. Kapau ʼe koutou fai te faʼahi ʼaia, pea ʼe mole feala anai ke koutou fakahalaʼi te ʼu hahaʼi kaihaʼa ke nātou toʼo te ʼu meʼa ʼaia.
19 ʼE fia tokoni atu kia koutou te Selevisi ʼo te Nofoʼaga mokā hoko he fihifihia. Koutou fakahā age kia nātou te faʼahi ʼaia ʼi takotou kei ʼi te fakatahi. ʼE fiafia anai te ʼu tēhina ʼi tanatou tokoni atu ke koutou fakatokatoka te fihifihia ʼaia pea ke koutou leleiʼia te fakatahi.
20 ʼE ko he meʼa fakaloto mālohi hatatou sio ki te ʼu tēhina pea mo tuagaʼane ʼe nātou tohi he ʼu nota ʼi te lolotoga ʼo te polokalama. Ko te ʼu kiʼi nota nounou ʼaia ʼe tokoni anai kia koutou ke koutou fakalogo lelei pea mo koutou manatuʼi te ʼu puani tāfito. Kapau ʼe koutou toe lau te ʼu nota ʼaia mo tokotou famili peʼe ʼaki takotou ʼu kaumeʼa, ʼe feala anai ke koutou metitasioʼi te ʼu puani maʼuhiga ʼo te fakatahi pea ke mole koutou galoʼi.
21 ʼI te temi fuli, neʼe foaki e te hahaʼi ʼa Sehova te ʼu meʼa ʼofa lahi moʼo lagolago ki te ʼu meʼa faka teokalatike. (Ek. 36:5-7; 2 Fkma. 31:10; Loma 15:26, 27) Ko te ʼu meʼa ʼofa ʼaē ʼe koutou momoli ki te gāue faka malamanei, ʼe fakaʼaogaʼi ki te totogi ʼo te ʼu meʼa ʼaē ʼe ʼaoga ki te fakatahi, ʼo kau kiai tona taupau pea mo tona gaohi.
22 Ohage ko tona fakahā mai ia Amosi 3:7, neʼe ʼui e Sehova “ ʼe mole ina fai anai he meʼa ka neʼe mole heʼeki ina tala tana meʼa fakalilo ki tana kau kaugana, te kau polofeta.” ʼI tona ʼuhiga ʼAtua ʼaē ʼe “ina Fakahā te ʼu meʼa fakalilo,” neʼe tohi e Sehova ʼi te Tohi-Tapu te ʼu lea faka polofeta ʼe lauʼi teau pea neʼe hoko moʼoni. (Tan. 2:28, 47) ʼE kei tonu ke fakahoko te tahi ʼu fakapapau taulekaleka. Ko te fakatahi faka tisitilike ʼo te taʼu 1999 ʼaē ko tona kupu tāfito ko “Te ʼu Folafola Faka Polofeta ʼa Te ʼAtua” ʼe ina fakaloto mālohiʼi anai takotou tui ki te ʼu fakapapau ʼa te ʼAtua. Koutou fakalogo fakalelei ki te folafola ʼa Sehova ʼaē ʼe ina fai atu kia koutou. Ko te ʼu meʼa ʼaē ka koutou sio kiai pea mo logo kiai, koutou maʼuliʼi ʼi te minisitelio, mo te kokelekasio pea mo tokotou maʼuli. Tou faikole ke tapuakinaʼi lahi e Sehova te ʼu fakatuʼutuʼu fuli ʼaē neʼe koutou fai ke feala hakotou kau ki te ʼu ʼaho fuli ʼo te kaitahi fakalaumālie ʼaia!
[Talanoa ʼo te pasina 3]
Koutou fakatuʼutuʼu ke koutou kau ʼi te ʼaho katoa ʼo te Feliaono, mo te Moeaki, pea mo te ʼAhotapu!