Ko Te Fakatahi Faka Tisitilike 1997 “Ko Te Tui Ki Te Folafola ʼa Te ʼAtua”
1 Neʼe fakamanatuʼi age e te ʼapositolo ko Paulo kia Timoteo ko “te Tohi-Tapu katoa ʼe haʼu mai te ʼAtua.” (2 Tim. 3:16) Mai tona ʼaluʼaga ʼaē ʼe haʼu te Folafola mai te ʼAtua, koia ʼe tonu ke tou tui kiai. Koʼeni te kupu tāfito ʼo te fakatahi faka tisitilike ʼo te taʼu ʼaenī “Ko Te Tui Ki Te Folafola ʼa Te ʼAtua.” ʼE fakamālohiʼi anai e te polokalama tatatou tui ki te Tohi-Tapu, tatau aipe peʼe kua fualoa hatatou ʼiloʼi te moʼoni, pe neʼe mole heʼeki faʼa fualoa tatatou kau ki te kautahi ʼa Sehova. ʼE tonu ke tou fakatuʼutuʼu ke tou kau fuli ki te polokalama ʼaia. ʼE ko he meʼa fakaloto mālohi anai mo kapau ʼe ʼōmai te ʼu hahaʼi ʼaē neʼe hoki nātou ʼiloʼi te moʼoni ʼo fakatahitahi mo tatou, tāfito ia nātou ʼaē ʼe tou ako te Tohi-Tapu mo nātou!
2 Te Fakatahi ʼAho Tolu: ʼI te taʼu ʼaenī ko te fakatahi faka tisitilike ʼaho tolu neʼe teuteuʼi ke fua lelei kia tatou. Ko te ʼu fakatahi e lua ʼe fai anai ʼi Niumea ʼi te lea Fakafalani, ʼi te Fale ʼo Te ʼu Fakatahi ʼi Normandie, ʼi te ʼaho 12 ki te 14 ʼo Sepetepeli pea mo te ʼaho 19 ki te 21 ʼo Sepetepeli 1997. ʼI te temi ʼaenī, ʼe tonu ke koutou fakatuʼutuʼu ke koutou kau ki te ʼu ʼaho ʼaia e tolu. Neʼe kua koutou fakaʼui koa ki tokotou patolo hokotou ʼu ʼaho mālōlō?—Teu. 31:12.
3 ʼI Te Tule Leʼo ʼo te ʼaho 15 ʼo Fepualio 1997, ʼe tuʼu ai te lisi ʼo te ʼu fakatahi ʼaē ʼe fai ʼi te Potu Toga ʼo te Pasifika. ʼO feiā aipe mo Vanuatu, kapau ʼe mole fetogi te ʼu ʼaho mālōlō, ʼe fai anai te fakatahi ʼi te Fale ʼo te Puleʼaga ʼo Luganville, ʼi Santo, ʼi te ʼaho 29 ki te 31 ʼo ʼAukusito 1997. Ko te ʼu meʼa fuli ʼo ʼuhiga mo te ʼu Fakatahi Faka Tisitilike ʼi te tahi ʼu fenua ʼe takitaki totonu anai e te ʼu filiale.
4 ʼE kamata anai te polokalama ʼi te ʼaho fuli ʼi te hola 9 vaelua ʼi te uhu. ʼE avahi anai te ʼu matapā ʼi te hola 8. ʼE gata pe kia nātou ʼaē neʼe hinoʼi ki he gāue ʼe fakagafua anai hanatou hū fakatomuʼa ki loto, kae ʼe mole fakagafua anai tanatou tāʼofi he ʼu hekaʼaga ʼi muʼa ʼo te avahi ʼo te fale ki te hahaʼi fuli.—Filp. 2:4.
5 Tou Tokaga Fakalelei Ki Te Polokalama: Neʼe fakamanatuʼi e te ʼapositolo ko Petelo ki te ʼu Kilisitiano ʼo te ʼuluaki sēkulō, ʼe tonu ke nātou fakatokagaʼi lelei te lea faka polofeta ohage ko he mālama ʼe mū ʼi he faʼahi fakapōʼuli. (2 Pe. 1:19) ʼE tonu ke toe feiā mo tatou. Ko te maʼuli ʼi te mālama ʼāfea ʼaenī ʼaē ʼe puleʼi e Satana ʼe hage ko hatatou nonofo ʼi he koga meʼa fakapōʼuli. ʼE tou loto fakafetaʼi ʼi tatatou kua mavae mai te fakapōʼuli fakalaumālie. (Kol. 1:13; 1 Pe. 2:9; 1 Soane 5:19) Ke feala hatatou nonofo ʼi te mālama, ʼe tonu ke tou maʼu he tui mālohi ʼo tou fakatokagaʼi te Folafola ʼaē ʼe haʼu mai ia Sehova. Ko tatatou fakatahi faka tisitilike ʼe ina fakaloto mālohiʼi anai tatou ke tou fai te faʼahi ʼaia.
6 ʼE tonu ke tou faiga mālohi mo kapau ʼe tou fia mulimuli ki te polokalama, pea ʼe mahino papau ia ʼe tapuakina anai tatou ʼi tatatou fai te faʼahi ʼaia. ʼE tonu ke tou mālōlō fakalelei, ke feala hatatou nonofo ʼalaʼala lolotoga te ʼu akonaki ʼi te fakatahi. Tou ʼōmai fakatomuʼa ki te fakatahi ʼi te ʼu ʼaho ʼaia e tolu, ke feala ai hatatou heheka ʼi muʼa ʼo te kamata ʼo te polokalama, pea ke tou kau ki te katiko pea mo te faikole ʼi te kamata ʼo te polokalama ʼi te ʼaho fuli. ʼE tonu ke tuku e te hahaʼi lalahi he faʼifaʼitaki, pea ʼe tonu ke akoʼi e te ʼu mātuʼa tanatou tamaliki ʼo ʼuhiga mo te faʼahi ʼaia.—Ef. 6:4.
7 Kapau ʼe tou vakaʼi te ʼu kupu tāfito ʼo te ʼu akonaki ʼi muʼa ʼo te kamata ʼo te polokalama ʼo te ʼaho fuli, ʼe feala ke tou fakakaukauʼi fakatomuʼa te ʼu puani ʼaē ka talanoa anai kiai lolotoga te fakatahi. Ko te faʼahi ʼaia ʼe ina fakatuputupu anai tatatou fia logo ki te akonaki ʼaē ka fai. ʼE feala ke tou fakatokagaʼi lelei te ʼu puani ʼaē ʼe tokoni anai kia tatou ke tou fakahā ki te hahaʼi pe koʼe ʼe tou tui ki te ʼAtua pea mo tana fakapapau ʼaē ke ina fakapale ia nātou ʼaē ʼe nātou kumi fakamalotoloto ia ia. (Hep. 11:1, 6) ʼE fakatokagaʼi mai ke tou tohi he ʼu manatu fakanounou moʼo tokoni kia tatou ke tou manatuʼi te ʼu puani tāfito ʼo te polokalama. Kapau ʼe lahi fau te ʼu manatu ʼaē ʼe tou tohi, ʼe feala ai ke mole tou tokagaʼi te tahi ʼu puani tāfito, ʼuhi ko tatatou maʼumaʼua fau ʼi te tohi ʼo te ʼu manatu.
8 ʼI te taʼu kua hili neʼe fakatokagaʼi ʼe lahi te ʼu hahaʼi lalahi pea mo te ʼu tūpulaga ʼe nātou feʼoloʼaki ʼi tuʼa, pea ʼe nātou fai palalau mo ʼihi lolotoga te ʼu akonaki, kae mole nātou fakalogo ki te ʼu meʼa ʼaē ʼe foaki mai e “te tagata kaugana agatonu mo poto” ʼaē ʼe ʼaoga kia tatou. Neʼe fakapapau mai e Sesu ʼe ina foaki mai anai kia tatou te meʼa kai fakalaumālie ʼi te temi totonu. (Mat. 24:45-47) Koia, ʼe tonu ke tou ʼolo ki te fakatahi ke tou maʼu ai te meʼa kai ʼaia pea ke ʼaua naʼa tou meʼa noaʼi te faʼahi ʼaia. (2 Ko. 6:1) Tahi ʼaē meʼa, ʼe hage ko ʼihi tamaliki ʼaē ʼe mole nofo fakalelei, ʼe nātou tautau kole ke nātou ʼolo ki te fale vao ke feala hanatou ʼolo ʼo haʼele. Kapau ʼe akoʼi fakalelei te ʼu tamaliki e tanatou ʼu mātuʼa, pea ʼe nātou ʼiloʼi ai anai ʼe mole ʼaoga tanatou tatuʼu noa ki te fale vao. ʼI ʼihi temi, ko te ʼu tūpulaga ʼaē ʼe heheka fakatahi ʼe nātou fai palalau, mo nātou fai fanafana, pea mo nātou feʼāveʼaki he ʼu moʼi pepa. Ko tatatou ʼu tūpulaga, ʼaē ʼe tau mo te ʼu fihifihia lahi ia ʼaho nei, ʼe tonu ke nātou tokakaga ki te ʼu akonaki ʼaē ʼe fai, kae mole tonu ke nātou fai he tahi ʼu meʼa lolotoga te polokalama. ʼE mole tonu anai ke maʼu ʼi te fakatahi ʼaia te ʼu holi ʼa te kau tūpulaga ʼaē ʼe mole ʼalutahi mo te ʼu pelesepeto ʼa te Tohi-Tapu. (Vakaʼi ia 2 Timoteo 2:22.) Ko te fakalogo ʼa te hahaʼi fuli, ʼa te hahaʼi lalahi pea mo te kau tūpulaga, ʼe ina faka maʼuhigaʼi anai ia Sehova pea mo fakafiafia ia ia.
9 Kapau ʼe ʼaoga ke foaki ki he tahi he tokoni ʼo ʼuhiga mo te faʼahi ʼaia, pea ʼe tonu anai ke ina tali ohage ko he fakatuʼutuʼu ʼofa ʼe haʼu mai ia Sehova. (Kal. 6:1) ʼE tonu ke tou manatuʼi fuli ʼe tou faiga ke tou kau ki te fakatahi heʼe tou fia ‘fakalogo pea mo tou ako.’ (Teu. 31:12) Tahi ʼaē meʼa, ko “te tagata poto ʼe fakalogo anai pea ʼe lahi anai te ʼu meʼa ʼaē ka ina ako.” (Taag. 1:5) ʼI muʼa ʼo takotou kau ki te fakatahi, koutou palalau mo tokotou famili ki te maʼuhiga ʼaē ke koutou heheka fakatahi ʼi te fakatahi, ʼo koutou heheka lolotoga te polokalama, pea mo koutou fakalogo lelei, ke feala ai hakotou maʼu te ʼu fua lelei katoa ʼo te polokalama.
10 Te Faʼahiga Teuteu ʼAē ʼe Leleiʼia e Sehova: Ko te hahaʼi ʼa Sehova ʼe sioʼi e te hahaʼi ʼo te mālama. (1 Ko. 4:9) ʼI te agamāhani ʼe fakatokagaʼi e te hahaʼi te lelei ʼo tatatou faʼahiga teuteu pea mo te gaohi ʼo totatou ʼulu. Ko te mulimuli ki te ʼu pelesepeto faka Tohi-Tapu ʼaē ʼe tuʼu ia 1 Timoteo 2:9, 10 pea mo 1 Petelo 3:3, 4, neʼe hoko ai te ʼu fetogi lahi ʼi te faʼahiga teuteu ʼa te tokolahi, ʼo mole kei tatau mo tanatou faʼahiga teuteu ʼi tanatou kamata fakatahitahi ki te kokelekasio faka Kilisitiano. Ko te faʼahi ʼaia ʼe kehekehe mo te faʼahiga teuteu pea mo te faʼahiga gaohi ʼo te ʼulu ʼo te hahaʼi ʼo te mālama ʼaē kua kovi ʼaupito. ʼE tonu ke tou tokakaga ke ʼaua naʼa tou faʼifaʼitaki ki te ʼu teu ʼo te hahaʼi ʼo te mālama—ʼo tou tui he ʼu mutuʼi meʼa faikehe, mo gaohi totatou ʼulu ohage ko nātou, peʼe tou ʼai he ʼu teu ʼe mole aga fakapoipoi. Kapau ʼe tou tuku he faʼifaʼitaki lelei ʼi tatatou faʼahiga teuteu pea mo te faʼahiga gaohi ʼo totatou ʼulu, pea ʼe tokoni anai te faʼahi ʼaia ki te hahaʼi foʼou ʼaē ʼe kau ki te fakatahi ke nātou sio peʼe feafeaʼi te teuteu ʼa te kau Kilisitiano.
11 Logope la neʼe lahi te hahaʼi ʼaē neʼe nātou fai he ʼu talanoa lelei ʼo ʼuhiga mo te ʼu fakatahi ʼo te taʼu kua hili, ko ʼihi ʼu tēhina mo tuagaʼane neʼe nātou mulimuli ki te faʼahiga teuteu pea mo te faʼahiga gaohi ʼo te ʼulu ʼo te hahaʼi ʼo te mālama, tāfito ʼi te ʼosi ʼo te fakatahi. Lolotoga tatatou fakatuʼutuʼu ke tou kau ki te fakatahi, ʼe tonu ke tou sivi ia tatou totonu ʼo ʼuhiga mo tatatou faʼahiga teuteu pea mo te faʼahi gaohi ʼo totatou ʼulu. ʼU mātuʼa, koutou tokaga fakalelei ki te ʼu teu ʼaē ka ʼai e takotou ʼu tamaliki. Tou tokakaga ke ʼaua naʼa tou faʼifaʼitaki ki te hahaʼi ʼo te mālama ʼo ʼuhiga mo tatatou teuteu pea mo te gaohi ʼo totatou ʼulu.
12 Tou Taupau He ʼu Aga ʼe Lelei: Ko te ʼu aga ʼaē ʼe lelei ʼe ko te fakaʼiloga ʼaia ʼo te kau Kilisitiano moʼoni. (1 Pe. 2:12) Ko te ʼu aga ʼaē ʼe tou fai—ʼi te fakatahi, ʼi te kolo, ʼi te ʼapi ʼo he tahi, pea mo te temi ʼaē ʼe tou folau ai—ʼe feala ke nātou foaki he fakamoʼoni ʼe lelei pea mo tokoni ki te hahaʼi ke nātou tokagaʼi pe koteā te ʼu fua ʼaē ʼe maʼu e te hahaʼi, mo kapau ʼe nātou tui ki te ʼAtua pea mo tana Folafola. Ko te faʼahi ʼaia ʼe lagi feala ke ina uga ai niʼihi ke nātou fia ʼiloʼi ia Sehova. (Vakaʼi ia 1 Petelo 3:1, 2.) ʼE tou maʼu te pilivilesio ʼaē ke tou faka kolōliaʼi te ʼAtua ʼaki tatatou aga. Neʼe ʼui e te tagata ʼi te otele ʼi Alabama ʼo ʼuhiga mo te kau Fakamoʼoni ʼa Sehova ʼe “ko te kūtuga ʼe agalelei ʼaupito.” Neʼe ina toe ʼui fēnei: “ ʼE ʼau fiafia anai mokā ʼe koutou toe ʼōmai ki henī.” Neʼe tohi fēnei e te pilō ʼo te puleʼaga ʼo te Potu Hihifo ʼo Amelika: “ ʼI te taʼu fuli, ʼe fakatalitali tāfito te hahaʼi fuli ʼo tomatou fenua ki te fakatahi ʼa te Sosiete Watchtower. ʼE ko he meʼa fakafiafia moʼoni tamatou sio ki takotou hahaʼi heʼe nātou aga fakaʼapaʼapa. Ko te ʼu hahaʼi ʼo te fenua ʼaē ʼe gāue ʼi te kolo ʼe nātou fakamoʼoni ki te faʼahi ʼaia, pea ʼe nātou leleiʼia anai ke toe liliu mai te ‘kūtuga’ ʼaia ki henī ʼi te taʼu fuli.” ʼE mole fakafiafia koa la tatatou lau te ʼu fakamatala ʼaenī? Kae ʼe tonu ke tou tokakaga, ke feala hatatou taupau maʼu te lelei ʼo te matagafua ʼo te hahaʼi ʼa Sehova.
13 ʼE lahi te ʼu fakamanatu neʼe foaki mai ʼo ʼuhiga mo te tokaga ʼaē ki tatatou ʼu tamaliki, ke ʼaua naʼa nātou feleleʼaki ʼi te loto Fale ʼo te ʼu Fakatahi heʼe fakalelu ai ki te hahaʼi. ʼE toe ʼaoga ke tou mulimuli ki te faʼahi ʼaia ʼi te ʼosi ʼo te fakatahi. ʼI te taʼu fuli, ʼe maʼu e te Sosiete te ʼu fakamatala ʼe fakahā ai ʼe pago tatatou ʼu tamaliki ʼi te hili ʼo te polokalama. Ko te tagata neʼe moe ʼi te otele neʼe fafagu tuʼa lua e te ʼu tamaliki, ka kua hili te matahi afiafi, he neʼe nātou fisifisi te ʼu matapā ʼo te ʼu kogafale fuli ʼo nātou kumi te tahi ʼu Fakamoʼoni ʼa Sehova. Logope la ʼe feala ʼi te ʼu fakatahi ke tou ʼaʼahi pea ke tou fakatahi mo totatou ʼu tēhina, kae ʼe tonu ke manatuʼi e te ʼu mātuʼa tonatou maʼua ʼaē ko te tokakaga ki tanatou ʼu tamaliki ʼi te temi fuli. Ko te maʼua ʼaia ʼaē ʼe fakatotonu e Sehova ki te ʼu mātuʼa fuli. (Taag. 1:8; Ef. 6:4) Ko te pago ʼa te ʼu tamaliki ʼe feala ke fakatupu kovi ai ki te matagafua ʼo ʼihi ʼu Fakamoʼoni ʼa Sehova ʼaē ʼe faiga ke nātou fai te meʼa ʼaē ʼe lelei.—Taag. 29:15.
14 Ko Te ʼu Fakatuʼutuʼu ʼi Te Loto Fale Pea Mo Te Feʼoloʼaki: Kapau ʼe koutou ʼolo ʼo nonofo mo te ʼu tēhina pea mo tuagaʼane ʼi Niumea, ʼe mahino papau ia ʼe koutou fakahā anai takotou loto fakafetaʼi ʼi tanatou tali koutou ʼi tonatou ʼapi. ʼE mole tonu ke tou fakaʼaogaʼi te fealagia ʼaia ke tou faʼifaʼitaliha ʼi te ʼu ʼapi ʼo totatou ʼu tēhina. Koia, ʼe tou fakaʼapaʼapa ai ki te ʼu meʼa ʼo tonatou loto fale, pea ʼe tou lagolago ki te totogi ʼo te meʼa kai ʼaē ʼe nātou fai maʼa tatou. ʼE ko he ʼu faʼahi lelei ʼaia ke tou fakahā ai tatatou loto fakafetaʼi. Kapau ʼe tou fakatokagaʼi he aga ʼe kovi ʼa nātou ʼaē ʼe tou tali ʼi totatou ʼapi, pea ʼe ko he meʼa lelei anai te fakamanatuʼi age kia nātou te aga ʼaē ʼe tonu ke nātou fai.
15 ʼO ʼuhiga mo te falā, ko te ʼu famili ʼaē ʼe ʼolo ki te fakatahi, kua nātou fakatokagaʼi ʼe maʼuhiga ke nātou kamata tānaki fakatomuʼa he falā lolotoga ni ʼu māhina. Ko ʼihi ʼe ʼōmai mai te ʼu motu, peʼe nātou ʼōmai mai Uvea pea mo Futuna, ʼi te vaka peʼe ʼi te vakalele. Ko ʼihi ʼe ʼōmai anai mai te vao ʼi te kā peʼe ʼi tanatou ʼu motokā. ʼI te faʼahi ʼaia, ʼe tonu ke tou teuteu fakatomuʼa ia meʼa fuli ke ʼaua naʼa tou tō ʼi te fakatahi. ʼE toe maʼuhiga foki ke tou mulimuli ki te fakatuʼutuʼu ʼaē neʼe tou fai mo nātou ʼaē ʼe ʼōmai ʼo fakatalitali tatou, mo kapau ʼe fetogi te hola ʼaē ʼe tou tau mai ai, peʼe fetogi te ʼapi ʼaē ʼe tou ʼolo kiai. ʼE tonu ke tou telefoni kia nātou, pea kapau ʼe mole hanatou telefoni, pea tou faka felogoi ki te Selevisi ʼo te Nofoʼaga.
16 Te ʼu Meʼa ʼAē ʼe Totogi Ki Te Fakatahi: Ko tatou fuli ʼe ʼi ai te ʼu meʼa ʼe tou totogi ke feala ai hatatou kau ki te ʼu fakatahi. ʼE ʼi ai te tahi meʼa ʼe tonu ke tou tokaga kiai ʼo ʼuhiga mo te ʼu meʼa ʼaē ʼe tou totogi. Ko te ʼu fale ʼaē ʼe fakaʼaogaʼi ki te fakatahi ʼe totogi kovi pea ʼe tonu ke tou taupau lelei. ʼE ʼi ai foki mo te tahi ʼu meʼa ʼe totogi pea ʼe tonu ke tou tokakaga kiai. Ko tatatou ʼu meʼa ʼofa ʼaē ka tou foaki ʼi te ʼu fakatahi ʼaia, ʼe ʼaoga anai ki te ʼu faʼahi ʼaia.—Gāue 20:35; 2 Ko. 9:7, 11, 13.
17 Te ʼu Hekaʼaga: ʼE toe fai pe anai te ʼu fakatuʼutuʼu ʼaē ʼe fai lolotoga te ʼu taʼu, ko tona faka ʼuhiga, ʼE TONU KE TOU TAUPAU PE HE ʼU HEKAʼAGA ʼO TOTATOU FAMILI PEA MO NĀTOU ʼAĒ NEʼE ’ŌMAI MO TATOU. ʼE ko he meʼa lelei tatatou fakatokagaʼi ko te tokolahi ʼe nātou mulimuli lelei ki te ʼu fakatuʼutuʼu ʼaia, pea ʼe uga ai te ʼu tēhina mo tuagaʼane ke nātou fakahā tonatou ʼofa ʼi te ʼu fakatahi ʼaia. ʼI te ʼu fale fakatahi, ʼe ʼi ai te ʼu hekaʼaga ʼe lelei age ʼi te tahi ʼu hekaʼaga, koia koutou aga fakaʼapaʼapa, ʼo tuku te ʼu hekaʼaga ʼaia kia nātou ʼaē ʼe ʼaoga tāfito kiai. Koutou fakahā takotou agaʼofa, pea koutou tuku te ʼu hekaʼaga ʼaē ʼe ʼaoga ke heheka ai ia nātou ʼaē ʼe ʼaoga ke nonofo ai.
18 Te ʼu Kamela Viteo, Pea Mo Te ʼu Meʼa Pukeleʼo: Ko te ʼu kamela pea mo te ʼu meʼa pukeleʼo ʼe feala ke tou fakaʼaogaʼi ʼi te ʼu fakatahi. Kae kapau ʼe tou fakaʼaogaʼi te ʼu meʼa ʼaia pea ʼe mole tonu anai ke fakalelu kia nātou ʼaē ʼi te fakatahi. ʼE mole tonu anai ke tou feʼoloʼaki lolotoga te fakatahi ʼo fai he ʼu paki, heʼe fakalelu ai anai kia nātou ʼaē ʼe fia mulimuli ki te ʼu akonaki. ʼE mole fakaʼaogaʼi anai te ʼu meʼa hunukiʼaga hila ʼo te fale fakatahi moʼo puke ʼo te ʼu akonaki heʼe fakatupu gaohaʼa ki te feʼoloʼaki ʼa te hahaʼi.
19 Te Selevisi ʼAē ʼe Tokaga Ki Te Kau Mahaki: Ko te selevisi ʼaē ʼe tokaga ki te kau mahaki ʼe fakaʼaogaʼi tāfito kia nātou ʼaē ʼe mahahaki lolotoga te fakatahi. ʼE mole feala ke tokaga te selevisi ʼaia kia nātou ʼaē ʼe mahahaki kovi. Koia la ʼaē, ʼe tonu ai ke koutou vakaʼi fakatomuʼa te ʼu meʼa ʼaē ʼe ʼaoga kia koutou totonu pea mo tokotou famili, ʼi te faʼahi fakasino. Koutou ʼaumai takotou ʼu meʼa faitoʼo ʼaē ʼe ʼaoga ki tokotou mahaki, heʼe mole maʼu anai te ʼu meʼa ʼaia ʼi te fakatahi. Ko nātou ʼaē ʼe nātou ʼiloʼi ʼe feala ke kovi tonatou mahaki lolotoga te fakatahi, ʼe tonu ke nātou fai fakatomuʼa te ʼu meʼa ʼaē ʼe ʼaoga ki te faʼahi ʼaia. ʼE tonu anai ke nātou ʼave te ʼu faitoʼo ʼaē ʼe ʼaoga ki te faʼahi ʼaia, pea ko he tahi ʼi te famili peʼe ʼi te kokelekasio ʼaē ʼe mahino ki tonatou ʼu mahaki, ʼe tonu ke nofo tuʼumaʼu mo nātou ke feala ai hanatou tokoni kia nātou. Neʼe hoko te ʼu fihifihia ʼi te ʼu fakatahi, he neʼe ʼi ai ʼihi ʼe mahamahaki kovi neʼe tuku tokotahi pea neʼe kovi ai tonatou mahaki. Pea neʼe tonu ki te fakatuʼutuʼu ʼo te fakatahi ke faka felogoi mo te ʼu tōketā ke ʼave ia nātou ki te lopitali. Ko nātou ʼaē ʼe mahahaki ʼihi ʼi tanatou famili ʼe tonu ke nātou tokakaga ke ʼi ai he tahi moʼo tokaga kia nātou. Kapau ko ʼihi ʼe ʼi ai honatou faʼahiga mahaki kae ʼe mole honatou ʼu famili ʼe feala ke tokoni kia nātou, pea ʼe tonu anai ki te ʼu tagata ʼāfea ʼo te kokelekasio ke nātou vakaʼi peʼe feafeaʼi ʼo ʼuhiga mo nātou ʼaia, pea mo fai te ʼu fakatuʼutuʼu ʼaē ʼe ʼaoga ki te faʼahi ʼaia. ʼE mole fai anai he fakatuʼutuʼu ʼi te ʼu fakatahi ke ʼi ai he ʼu kogafale makehe ke nonofo ai ia nātou ʼaē ʼe mahahaki.
20 Te Meʼa Kai ʼi Te Fakatahi: ʼE mole ʼi ai anai he selevisi meʼa kai ʼi te ʼu fakatahi, ke feala te tokakaga tāfito ʼa te tokolahi ki te ʼu meʼa kai fakalaumālie. Ko te tokolahi neʼe nātou fakahā tanatou leleiʼia te fetogi ʼaia ʼaē kua fai moʼo fakanounou ʼo te faʼahi ʼaia. ʼE tonu ke tou fakatuʼutuʼu ke tou ʼaumai tatatou meʼa kai ki te hoʼatā, ohage ko te meʼa ʼaē neʼe talanoa kiai ʼi te pepa ʼe ʼalutahi mo Te Minisitelio ʼo Te Puleʼaga ʼo Sūnio 1995, palakalafe 23. ʼE mole ʼaoga anai ke ʼaumai he ʼu ipu sioʼata pea mo he foʼi kava ki te fakatahi. ʼE feala hakita ʼave he kiʼi ʼaisi veliveli ke feala hakotou tuku ʼi lalo ʼo tokotou hekaʼaga. Neʼe fakatokagaʼi ko ʼihi neʼe kakai pea mo ʼiʼinu lolotoga te fakatahi. Ko te fai ʼo te faʼahi ʼaia ʼe mole ko he aga fakaʼapaʼapa.
21 ʼE tou loto fakafetaʼi moʼoni ki tatatou meʼa kai fakalaumālie pea mo totatou temi mālōlō, mo te temi tokalelei ʼe tou nonofo ai mo totatou ʼu kaugā fagona lolotoga te temi nounou ʼaē ʼe tou kakai ai. Kapau ʼe tou fia mulimuli ki te ʼu fakatuʼutuʼu ʼaia, pea ʼe tonu ke tou tahi ʼaumai tana meʼa kai, kae ke ʼaua naʼa tou ʼolo ʼi te ʼu temi kakai, ʼo toʼo meʼa kai ʼi te ʼu fale koloā. Koia, ʼe lahi anai te temi ʼaē ka koutou fai palalau ai mo tokotou ʼu tēhina pea mo tuagaʼane.
22 ʼE ko he meʼa fakafiafia te kua ōvi mai ʼo te Fakatahi Faka Tisitilike “Ko Te Tui Ki Te Folafola ʼa Te ʼAtua”! ʼE tonu ke tou vakavakaʼi lelei peʼe kua tou tokalelei ke tou kau ki te polokalama katoa ʼo te fakatahi, ke tou fakaʼaogaʼi katoa te meʼa kai fakalaumālie ʼaē neʼe teuteuʼi e Sehova maʼa tatou ʼaki tana kautahi. ʼI te faʼahi ʼaia ʼe tou “maʼu [anai] ia meʼa fuli ʼaē ʼe ʼaoga ki te gāue lelei fuli pe” ʼi te ʼu ʼaho ʼaenī.—2 Tim. 3:17.
[Talanoa ʼo te pasina 6]
Te ʼu Fakamanatu ʼo ʼUhiga Mo Te Fakatahi Faka Tisitilike
Papitema: ʼI muʼa ʼo te kamata ʼo te fakatahi ʼi te Moeaki uhu, ʼe tonu anai ke heheka ia nātou ʼaē ka papitema ʼi te ʼu hekaʼaga ʼaē kua tāʼofi maʼa nātou. Ko nātou ʼaē neʼe fakatuʼutuʼu ke papitema ʼe tonu anai ke nātou ʼōmai mo honatou ʼu teu maʼanu ʼe mata fakaʼapaʼapa pea mo he tauveli. Neʼe fakatokagaʼi ko ʼihi ʼe nātou ʼōmai mo tonatou ʼu teu maʼanu ʼe mole mata fakaʼapaʼapa pea ʼe fakatupu kovi ki te maʼuhiga ʼo te papitema. Ko te ʼu tagata ʼāfea ʼo te kokelekasio ʼaē ka nātou vakaʼi te ʼu fehuʼi ʼi te tohi Organisés pour bien remplir notre ministère mo nātou ʼaē ʼe fia papitema, ʼe tonu ke nātou ʼiloʼi papau peʼe kua mahino lelei ia nātou ʼaē ʼe papitema, ki te ʼu puani ʼaia. ʼI te ʼosi ʼo te akonaki ʼo te papitema, pea mo te faikole ʼa te tēhina, ʼe fakahivaʼi anai te katiko e te pelesita ʼo te fakatahi. ʼI te ʼosi ʼo te katiko, ko nātou ʼaē ʼe kau ki te gāue fakatalitali ʼe nātou taki anai ia nātou ʼaē ka ʼolo ʼo papitema ki te faʼahi ʼaē ʼe fai ai. Ko te papitema ʼe ko te fakatā ʼaia ʼo te foaki ʼo tokita maʼuli ki te ʼAtua pea ʼe ko he faʼahi pe ia ʼa kita tokotahi pea mo Sehova. Koia, ʼe mole lelei ke papitema fakatahi he toko lua ʼo nā fāʼufua pea mo nā fetapikiʼaki lolotoga te papitema.
Te ʼu Pepa Fakaʼiloga: Koutou ʼai takotou pepa fakaʼiloga ʼo te taʼu 1997 ʼi te fakatahi, pea mo koutou ʼai mokā koutou liliu ki tokotou ʼapi. ʼAki te faʼahi ʼaia, ʼe feala ai hatatou tuku he faʼifaʼitaki lelei ʼi tatatou feʼaluʼaki. ʼE tonu ke koutou toʼo takotou ʼu pepa fakaʼiloga ʼi tokotou kokelekasio. ʼAua naʼa koutou talitali ke fakaōvi mai te fakatahi pea koutou ʼolo ai leva ʼo fakaʼui he ʼu kate maʼa koutou pea mo tokotou famili. Koutou manatuʼi ʼo ʼave takotou kate Instructions médicales/Carte dʼidentité.
Nofoʼaga: ʼE mātou kole atu ke tou gāue tahi ʼo ʼuhiga mo te tali ʼo te ʼu nofoʼaga ʼaē ʼe foaki ki te fakatahi. Kapau ʼe mole tou mulimuli ki te Fakatuʼutuʼu ʼo ʼuhiga mo te Nofoʼaga pea tou ʼolo ki he tahi koga meʼa, ʼe feala ke hoko te fihifihia. KAPAU ʼE KOUTOU FELĀVEʼI MO HE ʼU FAIGATAʼAʼIA ʼO ʼUHIGA MO TE NOFOʼAGA, ʼe kole atu ke koutou fakahā ki te tagata taupau ʼaē ʼi te selevisi ʼo ʼuhiga mo te nofoʼaga ʼi te temi ʼaē ʼe koutou nonofo ai ʼi te fakatahi, ke feala hana fakatokatoka fakavilivili te faʼahi ʼaia. Ko te ʼu sikalaipe ʼo te ʼu kokelekasio ʼe nātou tokakaga anai ke foimo ʼave te ʼu kiʼi pepa ʼo ʼuhiga mo te nofoʼaga ki te tuʼasila ʼi Niumea. Kapau ʼe koutou fakafisi ki takotou kole ʼo ʼuhiga mo te nofoʼaga ʼaē neʼe hinoʼi atu kia koutou, ʼe tonu ke koutou foimo fakahā kia ia ʼaē ʼe ina fakatalitali koutou ʼo toe feiā aipe mo te selevisi ʼaē ʼe ina kumi te ʼu nofoʼaga, ke ina foaki te nofoʼaga ʼaia ki he tahi kehe.
Te ʼu Saliote Toho Tamaliki: ʼE lahi te ʼu faʼahi ʼe mole feala ke fakaʼaogaʼi ai te ʼu saliote toho tamaliki ʼi te ʼu fakatahi lalahi. Ko te ʼu fakatuʼutuʼu ʼaē naʼa hoko he tuʼutāmaki, ʼe mole nātou fakagafua ke tou tuku te ʼu kiʼi saliote ʼaia ʼi te faʼahi ʼaē ʼe tou feʼoloʼaki ai, peʼe ʼi te vaha ʼo te ʼu hekaʼaga. Mai tona ʼaluʼaga ʼaē, ʼi te kaugamālie ʼo te hahaʼi, ʼe feala pe ke nātou feʼīʼaki, ko te ʼu meʼa toho tamaliki ʼe ko he ʼu meʼa fakatupu tuʼutāmaki ki te ʼu kiʼi tamaliki ʼo toe feiā pe ki te hahaʼi ʼaē ʼe tūkia anai kiai. Koutou tokakaga ke ʼaua naʼa koutou ʼaumai te ʼu meʼa ʼaia ki te fakatahi. Kae, ko te ʼu hekaʼaga ʼo te ʼu kiʼi toe liliki peʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala tona fakapipiki ki he hekaʼaga ia tafa ʼo te ʼu mātuʼa. Ko takotou faʼifaʼitaki ʼi te faʼahi ʼaia ʼe maʼuhiga pea ʼe leleiʼia anai.
Selevisi Kia Nātou ʼAē ʼe Fia gāue: ʼE feala koa hakotou fakaʼaogaʼi he kiʼi temi moʼo tokoni ki he koga ʼo te ʼu gāue ʼaē ka fai ʼi te ʼu fakatahi ʼaia? ʼE ʼaoga lahi anai tatatou tokoni, pea mo fakafiafia anai, tatau aipe peʼe tou fai pe ʼi he ʼu kiʼi hola. Kapau ʼe feala hakotou tokoni, koutou ʼolo ʼo vakaʼi te selevisi ʼo ʼuhiga mo te gāue ʼi te fakatahi. Ko te ʼu tamaliki ʼaē ʼe mole heʼeki katoa tonatou taʼu 16, ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou ʼu tāmai, tanatou ʼu faʼe peʼe ko he tahi kua lahi pea mo fakapotopoto. ʼI te taʼu ʼaenī ko nātou fuli ʼaē ʼe fia gāue ʼe feala ke nātou ʼolo ʼo tohi ʼi te tagata taupau ʼo te selevisi kehekehe. Kapau ʼe mole koutou tohi ʼi te lisi ʼo te Selevisi ʼo ʼuhiga mo te gāue, kae ʼe koutou ʼolo anai ʼo faka felogoi mo te tēhina ʼe gāue ʼi te selevisi ʼaia. Pea ko te lisi ʼo nātou ʼaē ʼe fia gāue ʼe foaki fakahagatonu anai ki te tēhina ʼaē ʼe ina takitaki te Selevisi ʼaia.
Te ʼu Fakatokaga: Tou tokakaga ki te ʼu fihifihia ʼaē ʼe feala ke hoko ai he ʼu tuʼutāmaki. ʼI te agamāhani ko nātou ʼaē ʼe mole heʼeki māhani ʼi te koga meʼa ʼaia ʼe kākāʼi nātou e te hahaʼi kaihaʼa pea mo te hahaʼi aga fakakākā. Koutou kalaviʼi tuʼumaʼu te ʼu matapā ʼo takotou motokā, pea ʼaua naʼa koutou tuku he ʼu faʼahiga meʼa ʼe feala ke sio kiai te hahaʼi ʼaē ʼe feʼoloʼaki ʼi te ala. Ko te ʼu hahaʼi kaihaʼa ʼe nātou tokagaʼi te ʼu fakatahi lalahi. ʼE mole lelei anai te tuku fakahāhā ʼo he meʼa maʼuhiga ʼi tokotou hekaʼaga. ʼE mole feala ke koutou ʼiloʼi papau peʼe ko nātou fuli ʼaē ʼi ʼokotou tafaʼaki ʼe ko te kau Kilisitiano. Koia ʼaia naʼa koutou fai he meʼa ke kaihaʼa ai te ʼu meʼa ʼo takotou motokā.