Ko ʼAtatou Fakatahi Fakatisitilike ʼe Ko He Fakamoʼoni Lahi ʼAia Ki Te Moʼoni
1. Koteā te ʼu moʼoni fakalaumālie ʼaē ʼe maʼuhiga neʼe feala ke fakakaukau kiai te kau Iselaele pea mo natou fai palalau kiai ʼi te ʼu ʼaho lalahi?
1 Ko te kau Iselaele ʼo te temi muʼa neʼe natou fakatahitahi tuʼa tolu ʼi te taʼu ki te ʼu ʼaho lalahi. Logolā neʼe ko te hahaʼi tagata pē ʼaē neʼe tonu ke kau kiai, kae neʼe toe ʼolo foki mo te ʼu fāmili kātoa ki Selusalemi ke natou kau ki te ʼu fakatahi fakafiafia ʼaia. (Tet. 16:15, 16) Neʼe feala ai ke natou fakakaukau ki te ʼu moʼoni fakalaumālie ʼaē ʼe maʼuhiga pea mo fai palalau kiai. Koteā te ʼu moʼoni ʼaia? Ohagē lā ko te moʼoni ʼaē ko Sehova ʼe ina fakafonu nātou ʼaki te ʼu meʼa ʼaē ʼe ʼaoga kiā nātou. (Tet. 15:4, 5) Peʼe ko te tahi moʼoni ʼaē ʼe feala ke natou falala ko Sehova ʼe ina takitaki pea mo puipui nātou. (Tet. 32:9, 10) Neʼe toe feala ke fakakaukau te kau Iselaele ki te maʼua ʼaē ke hā te faitotonu ʼa Sehova ʼi tanatou aga heʼe natou fua ia tona huafa. (Tet. 7:6, 11) ʼO toe fēia iā ʼaho nei, ʼe tou maʼu ia te ʼu lelei ʼaia ʼi ʼatatou fakatahi fakatisitilike ʼaē ʼe fai ʼi te taʼu fuli.
2. ʼE tokoni feafeaʼi anai te polokalama ʼo te fakatahi fakatisitilike ke tou mahino ki te moʼoni?
2 ʼE Tokoni Mai Te Polokalama Ke Tou Mahino Ki Te Moʼoni: ʼI ʼatatou fakatahi fakatisitilike, ʼe tou fakalogo ai ki he ʼu akonaki, mo tou mamata ki he ʼu kiʼi gaoʼi Fakatohi-tapu, mo he ʼu faʼifaʼitaki pea mo he ʼu fakafehuʼi ʼe tokoni mai ke tou mahino ki te ʼu moʼoni ʼi te Tohi-Tapu. (Soa. 17:17) Kua lahi te ʼu gāue neʼe fai ki tatatou fakatahi ʼaē kā hoko mai. ʼE teuteuʼi e te kautahi ʼa Sehova he polokalama ʼe tali anai ki te ʼu faʼahi tāfito ʼaē ʼe ʼaoga ki te hahaʼi ʼi te kele kātoa. (Mat. 24:45-47) ʼE kotou fia sisio koa pea mo logo ki te ʼu faʼahi ʼaē kā fakahā ai?
3. Koteā ʼaē ʼe tonu ke tou fai ke tou maʼu te ʼu lelei mai te polokalama?
3 ʼE mahino ia ʼe tou maʼu anai te ʼu lelei mai te polokalama mo kapau ʼe tou kau kiai pea mo tou fakalogo lelei ʼi te ʼu ʼaho ʼaia e tolu. Kotou fakahā age ki takotou pātolō te ʼu ʼaho mālōlō ʼaē kā kotou toʼo mo kapau mole heʼeki kotou fai te faʼahi ʼaia. Kotou tokaga ke feʼauga takotou moe ke feala hakotou nonofo ʼalaʼala lolotoga te polokalama. Neʼe feala ki ʼihi ke natou fakalogo lelei he neʼe natou haga sioʼi te tehina faiakonaki pea mo tohi fakanounou he ʼu manatu. Ke ʼaua naʼa fakaleluʼi koutou peʼe ko ʼihi atu ʼaki he ʼu meʼa ohagē ko te telefoni feʼāveʼaki. ʼAua naʼa kotou hoko palalau, mo fakaʼaogaʼi takotou telefoni feʼāveʼaki moʼo faitohi ki he tahi, pea mo kakai lolotoga te polokalama.
4. Koteā ʼaē ʼe feala ke fai e te ʼu mātuʼa ke fua lelei te fakatahi ki ʼanatou fānau?
4 ʼI te ʼu taʼu Fakasāpato, mokā neʼe fakatahitahi te ʼu fāmili Iselaele moʼo fakalogo ki te lau ʼo te Lao lolotoga te ʼAho Lahi ʼo Te ʼu Fale Pola, neʼe kau kiai mo ʼanatou “fanau . . . o tupu ke natou logo” pea ke natou ako. (Tet. 31:12) ʼI meʼa fakalotomālohi tatatou sio ki te heheka tahi ʼa te ʼu fāmili ʼi te fakatahi pea mo te nonofo ʼalaʼala ʼa te ʼu fānau ʼo fakalogo lelei. ʼE lelei anai hakotou vakaʼi fakatahi ʼi te ʼu afiafi te ʼu manatu ʼaē neʼe kotou leleiʼia ʼi te polokalama. Mai tona ʼaluʼaga ʼaē “e nonoo te vale ki te loto o te fanau” koia ʼe tonu ke leʼoleʼo e te ʼu mātuʼa ʼanatou fānau ʼaē ʼe kei liliki pea mo ʼaē kua lalahi ʼi te temi kai pea mo te hili ʼo te polokalama. ʼE lelei age hanatou fai te faʼahi ʼaia ʼi hanatou “tuku ke faifaitaliha” ʼanatou fānau.—Taag. 22:15; 29:15.
5. ʼE tou fakakolōliaʼi feafeaʼi te moʼoni ʼaki tatatou aga ki te fāmili ʼaē ʼe tou nonofo ai?
5 Ko Tatatou Aga ʼAē ʼe Lelei ʼe Ina Fakakolōliaʼi Te Moʼoni: Ko tatatou aga ʼaē ʼe lelei ʼe ina fakakolōliaʼi te moʼoni ʼi te koga meʼa ʼaē ʼe fai ai te fakatahi. (Tito 2:10) Ko tatatou faʼa kātaki pea mo tatatou aga fakaʼapaʼapa ki te fāmili ʼaē ʼe tou nonofo ai, ʼe feala ke tou tuku ai he faʼifaʼitaki lelei. (Kol. 4:6) ʼE tonu ke lelei tatatou aga ki tatatou fāmili peʼe ʼi te ʼu loto fale ʼo ʼotatou tehina mo tuagaʼane.
6. ʼE feala ke tou fakakolōliaʼi feafeaʼi te moʼoni ʼaki tatatou faʼahiga teuteu ʼi te koga meʼa ʼaē ʼe fai ai te fakatahi?
6 Kā tou ʼai tatatou kiʼi kate ʼo te fakatahi, ʼe tou fakatokagaʼi te hahaʼi ʼo ʼuhiga mo te fakatahi pea mo ʼiloʼi tātou e nātou ʼaē ʼe kau ki te fakatahi. Pea ʼe tou toe fai ai mo he fagonogono ki te hahaʼi ʼaē ʼe sisio mai. ʼE tokagaʼi anai e te hahaʼi ko nātou ʼaē ʼe natou ʼai tanatou kiʼi kate ʼo te fakatahi ʼe natou teuteu maʼa pea mo fakapoipoi, kae mole hagē ia ko te ʼu faʼahiga teu ʼo te mālama ʼaē ʼe mole maʼa pea mo pipiki fau. (1 Tim. 2:9, 10) Koia ʼe tonu ai ke tou tōkakaga ki tatatou faʼahiga teuteu pea mo te faʼu ʼo totatou lauʼulu ʼi te koga meʼa ʼaē ʼe fai ai te fakatahi. Kapau ʼe tou fia fetogi mutuʼi meʼa ʼi te hili ʼo te polokalama heʼe tou ʼolo ʼo fale kai, ʼe tonu ke tou manatuʼi neʼe tou kau ki te fakatahi, pea ʼe mole tonu ke tou teuteu ohagē ko hatatou ʼolo ʼo mālōlō.
7. Koteā ʼaē ʼe feala ke tou fai ke tou fiafia ʼi tatatou logotahi Fakakilisitiano ʼi te fakatahi?
7 ʼI te ʼu ʼaho lalahi, neʼe fiafia te kau Iselaele he neʼe fakalotomālohiʼi nātou ʼi tanatou fakatahi mo te kau ʼatolasio mai te tahi ʼu potu ʼo te fenua pea mo te mālamanei, pea neʼe natou logotahi ai. (Gaue 2:1, 5) ʼI ʼatatou fakatahi fakatisitilike, ʼe hā lelei te makehe ʼo tatatou felōgoi fakatautēhina. ʼI te agamāhani ʼe ko te faʼahi ʼaia ʼo tatatou palatiso fakalaumālie ʼaē ʼe punamaʼuli kiai te hahaʼi. (Pes. 133:1) ʼE lelei age hatatou ʼomai mo he kiʼi meʼa kai ʼe maʼamaʼa ʼi hatatou ʼolo ʼo toʼo mai he meʼa kai ʼi te temi kai. ʼE feala anai hatatou felāveʼi mo ʼihi pea mo fai palalau mo ʼotatou tehina mo tuagaʼane.
8. He koʼē ʼe lelei ke tou kau ki te ʼu gāue ʼi te fakatahi mo kapau ʼe feala?
8 ʼE toe punamaʼuli te hahaʼi ʼi tanatou sisio ki te lelei ʼo te ʼu fakatuʼutuʼu pea mo te fakatokatoka ʼo te ʼu gāue ʼi te fakatahi, tāfito mokā natou ʼiloʼi ko te hahaʼi ʼe natou loto lelei ke natou fai te ʼu gāue ʼaia. ʼE feala koa ke kotou kau ʼaki he loto lelei ki te ʼu gāue ʼi te fakatahi? ʼI ʼihi temi ʼe ko he fāmili kātoa ʼaē ʼe gāue moʼo akoʼi te fānau ke natou tokoni ki te hahaʼi. Kapau ʼe kotou umiuminoa, ʼe feala anai hakotou feʼiloʼiʼaki mo ʼihi mo kapau ʼe kotou kau ki te ʼu gāue ʼi te fakatahi. Neʼe ʼui fēnei e he tuagaʼane: “Neʼe mole au ʼiloʼi he tahi, gata pē ko toku fāmili pea mo ʼihi ʼu kaumeʼa. Kae ʼi taku tokoni ʼaē ki te fakamaʼa, neʼe au felāveʼi ai mo te ʼu tehina mo te ʼu tuagaʼane ʼe tokolahi. Neʼe ko he toe temi fakafiafia lahi!” ʼE tou maʼu anai he toe fiafia lahi mo kapau ʼe tou fakalahi ʼotatou kaumeʼa ʼi tatatou kau ki te ʼu gāue ʼi te fakatahi. (2 Ko. 6:12, 13) Kapau neʼe mole heʼeki kotou kau kiai, kotou fehuʼi ki te kau tagata ʼāfea pe koteā ʼaē ʼe tonu ke kotou fai ke feala hakotou kau kiai.
9. ʼE feafeaʼi anai tatatou fakaafe te hahaʼi ke natou kau ki te fakatahi?
9 Tou Fakaafe Te Hahaʼi Ke Natou Logo Ki Te Moʼoni: Ohagē ko te ʼu taʼu kua hili, ʼi te ʼu vāhaʼa e tolu ʼi muʼa ʼo te fakatahi, ʼe tou fakaafe anai te hahaʼi ke natou kau kiai. ʼE loto anai e te ʼu kōkelekāsio ke lahi te ʼu telituale ʼaē kā natou gāueʼi moʼo tufa ai te ʼu pepa fakaafe. (Vakaʼi ia te fakamatala ʼaē ʼe ʼātakai “ ʼE Feafeaʼi Anai Tatatou Tufa Te Pepa Fakaafe?”) Kapau ʼe kei toe he ʼu pepa fakaafe pea ʼe tonu ke ʼaumai ki te fakatahi. ʼE fakaʼaogaʼi anai te ʼu pepa ʼaia moʼo fai he fagonogono faigamālie ʼi te koga meʼa ʼaē ʼe fai ai te fakatahi.
10. Kotou fakamatala he ʼu ʼaluʼaga neʼe hoko ʼe hā ai te ʼu fua ʼo te tufa ʼo te ʼu pepa fakaafe ʼi te taʼu fuli.
10 ʼE tali koa e te hahaʼi ia te fakaafe ʼaia ʼe fai ʼi te taʼu fuli? ʼI he fakatahi, neʼe tokoni te tehina ki te taumātuʼa ke nā maʼu honā hekaʼaga. Neʼe nā ʼui ki te tehina neʼe foaki age te pepa fakaafe pea “neʼe nā fia ʼiloʼi peʼe feafeaʼi.” Neʼe nā fai kilometa e 320 moʼo kau ki te fakatahi. Pea ko te tuagaʼane neʼe fai fakamafola ʼi te ʼu ʼapi pea neʼe ina foaki te pepa fakaafe ki he tagata. Neʼe hagē neʼe fia ʼiloʼi e te tagata pe feafeaʼi te fakatahi ʼaia, pea neʼe fai palalau ai te tuagaʼane mo ia ʼo ʼuhiga mo te fakaafe. Hili he ʼu ʼaho, neʼe sio te tuagaʼane ki te tagata pea mo tona kaumeʼa ʼi te fakatahi ʼaki te tohi foʼou neʼe fakahā ʼi te fakatahi.
11. He koʼē ʼe maʼuhiga ke tou kau ʼi te taʼu fuli ki ʼatatou fakatahi fakatisitilike?
11 Ko te ʼu ʼaho lalahi ʼaē neʼe fai ʼi te taʼu fuli e te kau Iselaele neʼe ko he fakatuʼutuʼu ʼofa mai iā Sehova moʼo tokoni kiā nātou ke natou “tauhi kia ia i [tonatou] loto katoa mo he loto agatonu.” (Sos. 24:14) ʼO toe fēia pē, ko tatatou kau ʼi te taʼu fuli ki ʼatatou fakatahi fakatisitilike ʼe tokoni mai ke tou haga “haele i te mooni” pea ʼe ko he koga maʼuhiga ʼo tatatou tauhi kiā Sehova. (3 Soa. 3) ʼOfa pē ke tapuakina e Sehova te ʼu faiga ʼaē ʼe fai e nātou fuli ʼe ʼoʼofa ki te moʼoni moʼo kau ki te fakatahi pea ke fua lelei kiā nātou.
[Fakamatala ʼo te pāsina 4]
Ko tatatou aga ʼaē ʼe lelei ʼe ina fakakolōliaʼi te moʼoni ʼi te koga meʼa ʼaē ʼe fai ai te fakatahi
[Fakamatala ʼo te pāsina 5]
ʼI te ʼu vāhaʼa e tolu ʼi muʼa ʼo te fakatahi, ʼe tou fakaafe anai te hahaʼi ke natou kau kiai
[Talanoa ʼo te pāsina 3]
Te ʼu Fakamanatu ʼo ʼUhiga Mo Te Fakatahi Fakatisitilike ʼo Te Taʼu 2012
◼ Te ʼu Hola ʼo Te Polokalama: ʼI te ʼu ʼaho ʼaia e lua, ʼe kamata anai te polokalama ʼi te ʼuhu ʼi te hola 8:20. ʼE ʼavahi anai te ʼu matapā ʼi te hola 7:00. Kā tala ifo anai ia te kamata ʼo te polokalama musika, ʼe tonu anai kiā tātou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼE ʼosi anai te polokalama ʼi te hili hoʼatā ʼi te hola 4:05 ʼo te Moeaki pea ʼi te hola 3:30 ʼo te ʼAhotapu.
◼ Te Tauʼaga Motokā: ʼE gata pē ki te ʼu hahaʼi ʼaē ʼe natou maʼu ʼi tanatou motokā te fakaʼiloga ʼo te hahaʼi māʼimoa, ʼe feala ke natou tau tanatou motokā ki te ʼu tauʼaga ʼaē kua ʼosi hinoʼi kiai. ʼE kole atu ke kotou mulimuli lelei ki te takitaki ʼa natou ʼaē ʼe gāue ki te tau ʼaga motokā.
◼ Te Tāʼofi ʼo Te ʼu Hekaʼaga: ʼE feala pē ke tāʼofi he ʼu hekaʼaga maʼa nātou ʼaē ʼo totatou loto fale, peʼe maʼa nātou ʼaē ʼe tou motokā tahi, peʼe maʼa tatatou kau ako Tohi-Tapu.—1 Ko. 13:5.
◼ Te Temi Kai: ʼE kole ʼatu ke kotou ʼaumai takotou meʼa kai, ke ʼaua naʼa kotou mavae ʼi te fakatahi ʼo ʼolo ʼo toʼo meʼa kai ʼi tuʼa lolotoga te temi kai. ʼE feala hakotou ʼomai mo hakotou kiʼi ʼaisi. ʼE mole tonu ke kotou ʼaumai ki te ʼu fakatahi he ʼu ʼaisi ʼe lalahi fau, pea mo he ʼu foʼi kava.
◼ Te ʼu Meʼa ʼOfa: ʼAki te ʼu meʼa ʼaē ʼe tou foaki ʼi te fakatahi moʼo lagolago ki te ʼu gāue fakamālamanei, ʼe tou fakahā ai tatatou loto fakafetaʼi ki te ʼu fakatuʼutuʼu ʼaē neʼe fai ki te fakatahi. Ko te ʼu seki ʼaē ʼe fai moʼo lagolago ki te fakatahi ʼe tonu ke tohi ki te “Association Chrétienne les Témoins de Jéhovah de Nouvelle-Calédonie peʼe tohi fakanounou: A.S.T.J.”
◼ Kā Hoko He Tuʼutāmaki: Kapau ʼe ʼaoga fakavilivili he faitoʼo kiā koutou ʼi te fakatahi, kotou kole age ki he tahi ʼe ovi atu kiā koutou ke foimo pāui ki te selevisi ʼaē ʼe tokaga ki te kau mahaki ʼaē kua fakatuʼutuʼu ʼi te fakatahi, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga kiai he faitoʼo. Kapau leva ʼe ʼaoga kiai he faitoʼo, pea ʼe pāuiʼi anai te lōpitali.
◼ Te ʼu Faitoʼo: Kapau ʼe ʼi ai he ʼu foʼi ʼakau faitoʼo ʼe tonu ke kotou folo, kotou fakalelei ʼo ʼaumai he ʼu foʼi ʼakau ʼe feʼauga, koteʼuhi ʼe mole tufa anai he ʼu foʼi ʼakau ʼi te fakatahi.
◼ Te Selevisi Gāue: Ko tatatou fiafia ʼi tatatou kau ki te fakatahi ʼe toe lahi age anai mo kapau ʼe tou fia gāue moʼo tokoni ki te ʼu gāue ʼaē ʼe tonu ke fai. (Gāue 20:35) Ko he tahi ʼe fia tokoni ʼe tonu ke ʼalu ki te Selevisi Gāue ʼi te fakatahi. Ko te ʼu fānau ʼaē ʼe mole heʼeki taʼu 16 ʼe feala ke natou toe tokoni lelei mo kapau ʼe ʼi ai he tahi ʼi te ʼu mātuʼa moʼo natou leʼoleʼo peʼe ko he tahi kua lahi ʼe tali e te ʼu mātuʼa.
[Talanoa ʼo te pāsina 6]
ʼE Feafeaʼi Anai Tatatou Tufa Te Pepa Fakaafe?
Ke feala hatatou gāueʼi kātoa tatatou telituale, ʼe tonu ke nounou ʼatatou palalau. ʼE feala ke tou ʼui fēnei: “Mālo te maʼuli. ʼE matou kau ki te tufa ʼo te pepa fakaafe ʼaenī, ʼaē ʼe fai ʼi te kele kātoa. Koʼenī tau pepa fakaafe. ʼE tuʼu ai te tahi ʼu fakamahino ʼo ʼuhiga mo te fakatahi.” Kotou fakahā takotou fiafia. Kā kotou kau ki te tufa ʼi te ʼu fakaʼosi vāhaʼa, ʼe feala ke kotou toe tufa mo te ʼu nusipepa mokā feala.