Ko Te ʼu ʼAho e Lua ʼe Tapuakina Ai Tātou e Sehova
1. Koteā ʼaē kā tou maʼu anai ʼi te fakatahi fakatisitilike ʼo te taʼu ʼaenī?
1 ʼI te mālama ʼaenī ʼa Satana, ʼaē ʼe hagē ko he fenua ʼe magemage ʼi te faʼahi fakalaumālie, ʼe haga tapuakina aipē e Sehova tana ʼu kaugana. (Isa. 58:11) Ko te fakatuʼutuʼu ʼe fakaʼaogaʼi e Sehova moʼo fakalotomālohiʼi ʼo tātou ʼe ko te fakatahi fakatisitilike ʼaē ʼe fai ʼi te taʼu fuli. ʼI te ovi mai ʼo te fakatahi ʼo te taʼu ʼaenī, ʼe feafeaʼi hatatou teuteu ke tou lava maʼu te ʼu tapuakina fakalaumālie pea ke toe maʼu foki e niʼihi?—Taag. 21:5.
2. Koteā te ʼu faʼahi ʼaē ʼe ʼaoga ke tou fakatuʼutuʼu?
2 Kapau neʼe mole heʼeki kotou fai, kotou toʼo he temi ke kotou fai he ʼu fetogi ʼi takotou polokalama pea mo takotou gāue ke feala hakotou kau ki te ʼu ʼaho e lua ʼo te fakatahi. Kua kotou ʼiloʼi koa te temi ʼaē ʼe ʼaoga ʼi te ʼaho fuli ke kotou ʼolo ai ki te fakatahi, ke feala hakotou ʼomai pea mo kumi hokotou hekaʼaga ʼi muʼa ʼo te kamata ʼo te polokalama? ʼE mahino ia ʼe mole tou fia hala ʼi te meʼa kai fakalaumālie fakalotomālohi ʼaē neʼe teuteuʼi e Sehova maʼa tātou! (Isa. 65:13, 14) Kua kotou fai koa he ʼu fakatuʼutuʼu ʼo ʼuhiga mo hokotou nofoʼaga pea mo takotou feʼoloʼaki?
3. Koteā ʼaē ʼe feala ke tou fai ke maʼu e totatou fāmili te ʼu lelei fuli ʼo te polokalama?
3 Koteā ʼaē kā tokoni atu anai ke kotou fakalogo fakalelei ki te polokalama kātoa? Ko takotou mālōlō lelei ʼaē ʼi te ʼu afiafi fuli. Kotou sioʼi te tehina faiakonaki. Kotou toʼo te ʼu vaega fuli ʼi takotou Tohi-Tapu. Kotou tohi fakanounou he ʼu manatu. ʼE lelei ke nonofo fakatahi te ʼu fāmili, ke feala ai ki te ʼu mātuʼa ke natou tokoni ki tanatou fānau ke natou fakalogo fakalelei. (Taag. 29:15) Lagi ʼe feala ʼi te ʼu afiafi fuli, ke kotou fai palalau fakafāmili ki te ʼu puani maʼuhiga ʼo te polokalama. Ke feala ki takotou fāmili ke ina maʼu te ʼu lelei māʼia ʼi te kua hili ʼo te fakatahi, ʼe feala ke kotou fakaʼaogaʼi he temi ʼi takotou Tauhi Fakafāmili ʼaē ʼe fai ʼi te afiafi ke kotou vakaʼi ai te ʼu puani tāfito ʼaē kā maʼuliʼi e takotou fāmili.
4. ʼE tou lava tokoni feafeaʼi ki niʼihi ʼi tatatou kōkelekāsio ke natou maʼu te ʼu lelei fakalaumālie ʼo te fakatahi?
4 Tou Tokoni Ki Niʼihi Ke Natou Maʼu Te ʼu Lelei ʼo Te Fakatahi: ʼE tou loto ke toe maʼu e niʼihi te ʼu lelei fakalaumālie ʼo te fakatahi. ʼE ʼi ai koa he kau fai fakamafola kua mātutuʼa peʼe ko ʼihi ʼi te kōkelekāsio ʼe ʼaoga ke tokoni kiā nātou ke feala hanatou kau ki te fakatahi? ʼE feala koa ke kotou tokoni kiā nātou? (1 Soa. 3:17, 18) Ko te kau tagata ʼāfea, tāfito te ʼu taupau ki te kūtuga, ʼe lelei ke natou vakaʼi he tokoni ki te kau fai fakamafola ʼaia.
5. ʼE feafeaʼi anai tatatou tufa te ʼu pepa fai fakaafe ki te fakatahi? (Vakaʼi mo te fakamatala ʼaē ʼe ʼātakai ʼi lalo ifo.)
5 Ohagē ko tatatou fai ʼi te taʼu kua hili, iā vāhaʼa e tolu ʼi muʼa ʼo te kamata ʼo tatatou fakatahi, ʼe tou fakaafe anai te hahaʼi ke natou kau ki te fakatahi. ʼE lelei ke fakatuʼutuʼu e te ʼu kōkelekāsio ke natou tufa tanatou ʼu pepa fai fakaafe fuli pea mo natou faiga ke lahi te ʼu telituale ʼaē kā natou gāueʼi. Kae kapau neʼe mole tufa e tokotou fāmili te ʼu pepa fai fakaafe fuli kae kua ʼosi tona temi tufa, ʼe tonu ke ʼaumai ki te fakatahi ke fakaʼaogaʼi moʼo fakaafe nātou ʼaē kā tou fai fagonogono faigamālie anai ki ai. ʼI te fakatahi, ʼe fakahā mai anai peʼe feafeaʼi te fakaʼaogaʼi ʼo te ʼu pepa ʼaia. Ko te ʼu pepa fai fakaafe ʼaē kā mole tufa anai e tokotou fāmili ʼi te fagonogono faigamālie, ʼe lelei ke foaki ki he tehina fakatalitali kāiga mokā kotou hū ki te fale fakatahi ʼi te Moeaki. Kotou taupau maʼu he pepa fai fakaafe e tahi ʼo te fakatahi, mokā tonu ke kotou fakaʼaogaʼi ʼo ʼuhiga mo te akonaki fakaʼosi ʼo te ʼAhotapu.
6. ʼE feafeaʼi anai hatatou fakahā te aga fakaʼapaʼapa ʼi te fakatahi?
6 ʼE Lotomālohi Te Hahaʼi ʼi Tanatou Sisio Ki Te Aga Fakaʼapaʼapa: ʼI te temi ʼaenī ʼaē ʼe tokolahi ai te hahaʼi ʼe natou “kaumeʼa pē . . . mo nātou” pea ʼe mole kei natou fakaʼapaʼapa ki te hahaʼi, ʼe fakalotomālohi te fakatahi mo totatou ʼu tehina mo tuagaʼane Kilisitiano ʼe natou faiga ke natou fakahā te aga fakaʼapaʼapa! (2 Tim. 3:2) ʼE tou fakahā te aga fakaʼapaʼapa mokā ʼe tou hū fakatokatoka ki te fale fakatahi ʼi te temi ʼaē ʼe ʼavahi ai te ʼu matapā ʼi te hola 7 vaelua, pea mo tou tāʼofi pē he ʼu hekaʼaga maʼa nātou ʼo totatou loto fale, peʼe maʼa nātou ʼaē neʼe tou motokā tahi, peʼe maʼa tatatou ʼu kau ako. ʼE tou fakalogo ʼi te temi ʼaē ʼe kole mai ai e te tehina pelesitā ke tou tahi heheka lā ʼo fakalogo ki te musika ʼi muʼa ʼo te kamata ʼo te polokalama. ʼE ko he aga fakaʼapaʼapa te matehi ʼo te ʼu telefoni feʼāveʼaki ke mole fakalelu lolotoga te polokalama. ʼE tou toe fakahā te aga fakaʼapaʼapa ʼaki tatatou mole fai palalau, peʼe tou fakaʼaogaʼi tatatou telefoni feʼāveʼaki, peʼe tou kakai, peʼe tou feʼoloʼaki noa ʼi tuʼa lolotoga te polokalama.
7. ʼE lava feafeaʼi hatatou maʼu pea mo foaki he fakalotofīmālie ʼi tatatou fakatahitahi mo totatou ʼu tehina?
7 ʼE Tou Lotofīmālie ʼi Tatatou Fakatahi Mo Te ʼu Tehina Mo Tuagaʼane: ʼE tou maʼu ʼi te ʼu fakatahi te faigamālie ʼaē ke tou fiafia ʼi te logotahi Fakakilisitiano pea mo te fale tautēhina fakalotofīmālie. (Pes. 133:1-3) He koʼē koa ʼe mole kotou kumi ke kotou “ ʼavahi ke lahi iā koutou” pea ke kotou felāveʼi mo te ʼu tehina mo tuagaʼane mai te tahi atu ʼu kōkelekāsio. (2 Ko. 6:13) ʼE feala ke kotou fakatuʼutuʼu ke kotou feʼiloʼiʼaki ʼi te ʼaho fuli mo he tahi peʼe ko he fāmili. ʼI te temi kai ʼe kotou maʼu ai he faigamālie moʼo fai ia te faʼahi ʼaia. Koia ke mole lahi fau takotou kakai pea mo kotou fiafia ʼi te kai fakatahi mo niʼihi ʼi te faʼahi ʼaē ʼe fai ai te fakatahi, ʼe mole kotou mavae anai ʼo ʼolo ʼo kakai ʼi he fale kai. ʼE lagi feala ke iku ai ki he ʼu fakakaumeʼa foʼou pea mo tologa.
8. He koʼē ʼe lelei ke tou tohi ke tou gāue ʼi te fakatahi, pea ʼe tou fai feafeaʼi ia te faʼahi ʼaia?
8 ʼI fakalotofīmālie tatatou gāue fakatahi mo te kau ʼatolasio ʼi te tauhi taputapu! ʼE feala koa ke kotou tokoni ki he selevisi peʼe kotou tokoni ki takotou kōkelekāsio ki te fakamaʼa? (Pes. 110:3) Kapau neʼe mole hinoʼi atu he gāue ke kotou fai, kotou fakalelei ʼo fakaovi ki te Selevisi ʼo Te Kau Gāue ʼi te fakatahi. Kapau ʼe tokolahi te kau gāue pea ʼe lahi ai mo te fiafia pea mo maʼamaʼa anai te gāue.
9. He koʼē ʼe tonu ke tou tōkakaga tāfito ki tatatou aga, mo totatou ʼu mutuʼi meʼa pea mo te faʼu ʼo totatou lauʼulu lolotoga ia te fakatahi?
9 Ko Tatatou Aga ʼe Ina Fakalotomālohiʼi Nātou ʼAē ʼe Mamata Kiā Tātou: Ko tātou ko te ʼu telekē lolotoga te ʼu ʼaho ʼaē e lua ʼo te fakatahi, kae mole gata pē lolotoga te polokalama. Ko nātou ʼaē ʼe mamata kiā tātou ʼi te faiʼaga ʼo te fakatahi ʼe feala anai ke natou sio ki te kehekehe ʼaē ʼo tātou pea mo te hahaʼi ʼaē ʼe mole ko he kau Fakamoʼoni, pea ʼe fakalotomālohiʼi te faʼahi ʼaia. (1 Pet. 2:12) ʼI te koga meʼa ʼaē ʼe fai ai te fakatahi, mo te faʼahi ʼaē ʼe tou nonofo ai, pea ʼi te ʼu fale kai ʼe tou fakakolōliaʼi ia Sehova ʼaki totatou ʼu mutuʼi meʼa pea mo te faʼu ʼo totatou lauʼulu. (1 Tim. 2:9, 10) Kapau ʼe tou ʼai tatatou ʼu kiʼi kate ʼo te fakatahi, ʼe feala anai kiā nātou ʼaē ʼe mamata kiā tātou ke natou ʼiloʼi ai anai ko tātou ko te kau Fakamoʼoni ʼa Sehova pea ʼe lagi tou maʼu ai he faigamālie ke tou palalau age ʼo ʼuhiga mo tatatou fakatahi pea mo tou fai he fagonogono faigamālie.
10. Koteā te ʼu meʼa neʼe hoko ʼe fakahā ai te fagonogono lelei neʼe fai ʼaki totatou aga Fakakilisitiano?
10 ʼE feafeaʼi ki te hahaʼi ʼi tanatou sisio mai ki tatatou aga ʼaē ʼe lelei lolotoga te fakatahi? Ohagē ko tona tuʼu ʼi te ʼalatike ʼi te sulunale, neʼe ʼui fēnei e te tagata pule ʼo te fale neʼe fakaʼaogaʼi ki te fakatahi: “Ko te hahaʼi ʼe aga fakaʼapaʼapa. ʼE matou fiafia ʼi tanatou ʼomai ki henī ʼi te taʼu fuli.” ʼI te taʼu ʼaenī kua hili, neʼe puli te kato ʼa te tagata mole ko he Fakamoʼoni ʼi te otele ʼaē neʼe nonofo ai te kau telekē neʼe ʼomai ki te fakatahi. ʼI te temi ʼaē neʼe fakaliliu age te kato ki te tagata pule ʼo te otele pea neʼe mole puli he meʼa ʼi loto, neʼe ʼui fēnei e te tagata pule ki te tagata ʼaē ʼa ʼana te kato: “Meʼa lelei foki te ʼomai ʼa te kau Fakamoʼoni ʼa Sehova ki tanatou fakatahi ʼaē ʼe fai ʼo ovi mai ki te otele, pea mo fonu te otele ʼaki te kau Fakamoʼoni. Kanaʼaualā ia ʼe mole lagi ke toe maʼu tau kato.”
11. ʼI te ovi mai ʼo te fakatahi, koteā tatatou fakatuʼutuʼu, pea koteā tona tupuʼaga?
11 Kua ovi mai te ʼu fakatahi ʼo te taʼu ʼaenī. ʼE lahi te temi pea mo te ʼu faiga neʼe foaki e te ʼu tehina ke tou maʼu ai he ʼu lelei mai te polokalama pea mo te faʼahi ʼaē ʼe fai ai te fakatahi. Kotou fakatuʼutuʼu ke kotou kau ki te ʼu ʼaho fuli ʼaia e lua, pea kotou teuteu ki te meʼa kai fakalaumālie ʼaē neʼe teuteuʼi e Sehova pea mo tana kautahi maʼa koutou. Kotou fakatotonu ke kotou fakalotomālohiʼi niʼihi ʼaki takotou aga fakaʼapaʼapa, takotou fakatahitahi fakafiafia, pea mo takotou aga ʼaē ʼe lelei. Pea ko koutou pea mo ʼihi atu ʼe kotou hagē anai ko te tuagaʼane ʼaē neʼe telekē ʼi te taʼu ʼaenī kua hili, ʼaē neʼe ina tohi fēnei: “Neʼe mole heʼeki hoko kiā au he meʼa fakafiafia fēia!”
[Fakamatala ʼo te pasina 4]
Ohagē ko tatatou fai ʼi te ʼu taʼu kua hili, iā vāhaʼa e tolu ʼi muʼa ʼo te kamata ʼo tatatou fakatahi, ʼe tou fakaafe anai te hahaʼi ke natou kau kiai
[Fakamatala ʼo te pasina 6]
ʼI te koga meʼa ʼaē ʼe fai ai te fakatahi, mo te faʼahi ʼaē ʼe tou nonofo ai, pea ʼi te ʼu fale kai ʼe tou fakakolōliaʼi ia Sehova ʼaki totatou ʼu mutuʼi meʼa pea mo te faʼu ʼo totatou lauʼulu
[Fakamatala ʼo te pasina 7]
Kotou fakatotonu ke kotou fakalotomālohiʼi niʼihi ʼaki takotou aga fakaʼapaʼapa, takotou fakatahitahi fakafiafia, pea mo takotou aga ʼaē ʼe lelei
[Talanoa ʼo te pasina 4-7]
Te ʼu Fakamanatu ʼo ʼUhiga Mo Te Fakatahi Fakatisitilike ʼo Te Taʼu 2011
◼ Te ʼu Hola ʼo Te Polokalama: ʼI te ʼu ʼaho ʼaia e lua, ʼe kamata anai te polokalama ʼi te ʼuhu ʼi te hola 8 ʼosi ʼuafulu. ʼE ʼavahi anai te ʼu matapā ʼi te hola 7 vaelua. Kā tala ifo anai ia te kamata ʼo te polokalama musika, ʼe tonu anai kiā tātou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼE ʼosi anai te polokalama ʼi te hili hoʼatā ʼi te hola 3:55 ʼo te Moeaki pea ʼi te hola 2:40 ʼo te ʼAhotapu.
◼ Te Tauʼaga Motokā: ʼE gata pē ki te hahaʼi ʼaē ʼe natou maʼu ʼi tonatou motokā te fakaʼiloga ʼo te hahaʼi māʼimoa, ʼaē ʼe feala ke natou tau tanatou motokā ki te ʼu tauʼaga ʼaē kua ʼosi hinoʼi kiai. ʼI te ʼu potu ʼaē ʼe mole faʼa lahi ai te tauʼaga motokā, ʼe lelei ke tou kaugā ʼomai mo ʼihi ʼi tatatou motokā.
◼ Te Tāʼofi ʼo Te ʼu Hekaʼaga: ʼE feala pē ke tāʼofi he ʼu hekaʼaga maʼa nātou ʼaē ʼo totatou loto fale, peʼe maʼa nātou ʼaē ʼe tou motokā tahi, peʼe maʼa tatatou kau ako Tohi-Tapu.—1 Ko. 13:5.
◼ Te Temi Kai: ʼE kole atu ke kotou ʼaumai takotou meʼa kai, kae ke ʼaua naʼa kotou mavae ʼi te fakatahi ʼo ʼolo ʼo toʼo meʼa kai ʼi tuʼa lolotoga te temi kai. ʼE feala hakotou ʼomai mo hakotou kiʼi ʼaisi. ʼE mole tonu ke kotou ʼaumai ki te ʼu fakatahi he ʼu ʼaisi ʼe lalahi fau, pea mo he ʼu foʼi kava.
◼ Te ʼu Meʼa ʼOfa: ʼAki te ʼu meʼa ʼaē ʼe tou foaki ʼi te fakatahi moʼo lagolago ki te gāue fakamālamanei, ʼe tou fakahā ai tatatou loto fakafetaʼi ki te ʼu fakatuʼutuʼu ʼaē neʼe fai ki te fakatahi. Ko te ʼu seki ʼaē ʼe fai moʼo lagolago ki te fakatahi ʼe tonu ke tohi ki te “Association chrétienne les Témoins de Jéhovah de Nouvelle-Calédonie.”
◼ Kā Hoko He Tuʼutāmaki: Kapau ʼe ʼaoga fakavilivili he faitoʼo kiā koutou ʼi te fakatahi, kotou kole age ki he tahi ʼe ovi atu kiā koutou ke foimo pāui ki te selevisi ʼaē ʼe tokaga ki te kau māhahaki ʼaē kua fakatuʼutuʼu ʼi te fakatahi, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga ki ai he faitoʼo. Kapau leva ʼe ʼaoga ki ai he faitoʼo, ʼe pāui anai te selevisi ʼo te lōpitali. ʼE mole lahi ai anai te ʼu fai telefoni ki te selevisi ʼo te lōpitali.
◼ Te ʼu Faitoʼo: Kapau ʼe ʼi ai he ʼu foʼi ʼakau faitoʼo ʼe tonu ke kotou folo, kotou fakalelei ʼo ʼaumai he ʼu foʼi ʼakau feʼauga, koteʼuhi ʼe mole tufa anai he ʼu foʼi ʼakau ʼi te fakatahi.
◼ Te ʼu Sāliote Toho Tamaliki Pea Mo Te ʼu Hekaʼaga ʼAē ʼe Peluki: ʼE mole tonu ke kotou ʼaumai ia te ʼu sāliote toho tamaliki pea mo te ʼu hekaʼaga ʼaē ʼe peluki ki te ʼu fakatahi. Kae ʼe fakagafua ia te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼaē iā tafa ʼo te ʼu mātuʼa.
◼ Te ʼu Kiʼi Pepa Moʼo Hoko Atu Te Fia Logo: Ko te ʼu kiʼi pepa Veuillez suivre lʼintérêt (Ke ʼAʼahi) (S-43), ʼe fakaʼaogaʼi anai moʼo tohi kiai te higoa ʼo nātou ʼaē ʼe fia logo ʼi te fai fagonogono ʼi te fakatahi. ʼE tonu anai ki te kau fai fakamafola ke natou maʼu te faʼahiga pepa ʼaia e tahi peʼe lua ki te fakatahi. Ko te ʼu kiʼi pepa ʼaē ʼe tohi kiai te higoa, ʼe feala ke ʼavage ki te selevisi ʼaia peʼe ki te sīkalaipe ʼo takotou kōkelekāsio ʼi takotou fono mo takotou kōkelekāsio.—Vakaʼi Te Minisitelio ʼo Te Puleʼaga ʼo Novepeli 2009, pāsina 4.
◼ Te ʼu Fale Kai: Kotou fakakolōliaʼi ia te huafa ʼo Sehova ʼaki takotou aga ʼaē ʼe lelei ʼi te ʼu fale kai.
◼ Te Selevisi Gāue: Ko tatatou fiafia ʼi tatatou kau ki te fakatahi ʼe toe lahi age anai mo kapau ʼe tou lava gāue moʼo tokoni ki te ʼu gāue ʼaē ʼe tonu ke fai. (Gāue 20:35) Ko he tahi ʼe fia tokoni ʼe tonu ke ʼalu ki te Selevisi Gāue ʼi te fakatahi. Ko te ʼu fānau ʼaē ʼe mole heʼeki taʼu 16 ʼe feala ke natou toe tokoni lelei mo kapau ʼe ʼi ai he tahi ʼi te ʼu mātuʼa mo ʼonatou leʼoleʼo peʼe ko he tahi kua lahi ʼe tali e te ʼu mātuʼa.
[Talanoa ʼo te pasina 5]
ʼE Feafeaʼi Anai Tatatou Tufa Te Pepa Fai Fakaafe?
Ke feala hatatou fai tatatou telituale kātoa, ʼe tonu ke nounou tatatou ʼu palalau. ʼE feala ke tou ʼui fēnei: “Mālo te maʼuli. ʼE matou kau ki te tufa ʼo te pepa fai fakaafe ʼaenī, ʼaē ʼe fai ʼi te kele kātoa. Koʼenī tau pepa fai fakaafe. ʼE tuʼu ʼi te pepa ʼaia te tahi ʼu fakamahino ʼo ʼuhiga mo te fakatahi.” Ko te ʼuluaki pāsina ʼo te pepa fai fakaafe neʼe fai moʼo uga te fia ʼiloʼi ʼa te hahaʼi, koia kotou foaki age tana pepa ʼo kotou fakahā lelei te ʼuluaki pāsina. Kotou fakahā takotou fiafia. Kā kotou kau ki te tufa ʼi te ʼu fakaʼosi vāhaʼa, ʼe feala ke kotou toe tufa mo te ʼu nusipepa mokā feala.