Te Aga ʼAe ʼe Fakavikiviki Ki Te ʼAtua
1. He ko ʼe ʼe faigafua ia te iloʼi ʼo te kau Fakamoʼoni ʼa Sehova moka natou kau ki he fakatahi lahi?
1 ʼE faigafua ki te hahaʼi hanatou iloʼi ʼe tou kau ki he fakatahi lahi. ʼE lahi te ʼu kolo ʼe fai ai te ʼu fakatahi lalahi, ʼe fakaha fakatomuʼa ai e te sulunale peʼe ʼi te talalogo ʼo te fenua ʼe fai anai ia te fakatahi lahi. ʼI te agamahani, ʼe hahaʼi ia te ʼu teleke ʼe ʼomai ki te ʼu otele pea mo te ʼu fale kai, pea ʼe tokagaʼi e te hahaʼi ʼo te fenua tokolahi ia natou ʼe ʼi ai ʼanatou kate ʼo te fakatahi lahi. ʼI te ʼu fakamanatu ʼaeni, ʼe tokoni mai anai ke tou fakavikiviki ki te ʼAtua ʼaki te lelei ʼo tatatou aga ʼi te kolo ʼae ʼe fai ai te fakatahi lahi.—1 Pet. 2:12.
2. ʼE tou lava fakavikiviki feafeaʼi ki te ʼAtua ʼaki tatatou faʼahiga teu ʼi te ʼu aluʼaga fuli?
2 Te Teu Fakaʼapaʼapa: ʼE tonu ke tou teu fakaʼapaʼapa moka tou kau ki he fakatahi lahi. Koia, moka tou olo ki te otele peʼe moka tou olo ʼo kakai ʼi he fale kai, peʼe moka tou olo ʼo faifakatau peʼe tou olo ki he faʼahi pe, ʼe malave ia tatatou faʼahiga teu ki te hahaʼi. Kapau ʼe mole tou tui he ʼu teu ʼe tou tui mahani ki te ʼu fakatahi lalahi, kaʼe ʼi te ʼu aluʼaga ʼaia, ʼe tonu ke tou teu fakaʼapaʼapa pea mo fakapoipoi. ʼE tonu ke tokagaʼi e te hahaʼi ia totatou kehekehe pea mo te hahaʼi. (Loma 12:2) Pea tahi, ʼe tonu ke tou ai tatatou kate, ke iloʼi e te hahaʼi ʼe ʼi ai te fakatahi lahi, ko he tahi faʼahiga faifakamafola ʼaia kia natou, pea mo fakafealagia ki te ʼu tehina mo tuagaʼane ke natou iloʼi lelei tatou.
3. ʼE tou lava fakaha feafeaʼi te kataki fualoa pea mo te aga fakaʼapaʼapa?
3 Te Kataki Fualoa Pea Mo Te Aga Fakaʼapaʼapa: Ia ʼaho nei, tokolahi ʼe natou manatu pe kia natou totonu, pea ʼe mole natou lotofakafetaʼi, koia ʼe ko he aluʼaga fakafiafia ia te tokagaʼi e te kau gaue ʼo te ʼu otele pea mo te ʼu fale kai, ia tatatou maʼu te kataki fualoa pea mo te aga fakaʼapaʼapa. (2 Tim. 3:1-5) Moka tou taʼofi ia te ʼu hekaʼaga pea moka tou fakaʼatu ke tou toʼo te ʼu meʼa gaue foʼou, ʼaua naʼa tou manatu pe kia tatou totonu, kaʼe ke tou fai ia te meʼa ʼae ʼe lelei ki niʼihi. (1 Ko. 10:23, 24) ʼI tana kau ʼae ki tana ʼuluaki fakatahi lahi, neʼe ui fenei e te tagata: “ ʼE mole kei au manatuʼi ia he akonaki ʼo te ʼaho ʼaia, kaʼe neʼe malave kia au ia te aga ʼa te kau Fakamoʼoni.”
4. Kapau ʼe feala, he ko ʼe ʼe mole tou kau ki te kau gaue ʼaia ʼaki he lotolelei?
4 Ko Natou ʼAe ʼe Lotolelei Ke Natou Gaue: ʼE iloa te kau Kilisitiano moʼoni heʼe natou gaue ʼaki he lotolelei. (Pes. 110:3) ʼE kotou fia kau koa ki te kau gaue ʼaia? ʼI te tahi fakatahi lahi, ko tehina mo tuagaʼane ʼe toko 600 neʼe natou gaue ʼaki he lotolelei ki te fakamaʼa moʼo teuteuʼi ʼo te fakatahi lahi. Neʼe tokagaʼi fenei e te tagata gaue: “Ko taku hoki sio ʼae ki te meʼa fakaofoofo feia! ʼE faigataʼa ʼosi takita fakafuafua ko natou fuli ʼae ʼe gaue, ʼe natou gaue ʼaki he lotolelei.” ʼE tou fakaʼamu fuli ke tou kau ki te ʼu fakatahi makehe ʼaia pea ʼe mole gata ʼaki pe tatatou fakalogo pea mo tou ako ʼo ʼuhiga mo te ʼAtua kaʼe ʼe tou toe fakavikiviki ai kia te ia.
[Fakamatala ʼo te pāsina 3]
Te ʼu Fakamanatu ʼo ʼUhiga Mo Te Fakatahi Fakatisitilike ʼi Te Taʼu 2013
◼ Te ʼu Hola ʼo Te Polokalama: ʼE avahi anai te fale ʼo te fakatahi ʼi te hola 8 uhu (hola 7 uhu ʼi Uvea). ʼE kamata anai te fakatahi ʼi te ʼaho fuli ʼaki he musika ʼi te hola 9 ʼosi 20 (hola 8 ʼosi 20 ʼi Uvea). ʼE tonu anai kia tatou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼE fakaʼosi anai ʼaki he katiko pea mo he faikole ʼi te hola 4 ʼosi 50 hili hoʼata ʼo te Feliaono pea mo te Moeaki, pea ʼi te hola 3 ʼosi 35 hili hoʼata ʼo te ʼAhotapu. Ki Uvea, ʼe ʼosi anai ʼi te hola 3 ʼosi 50 hili hoʼata ʼo te Moeaki pea ʼi te hola 2 ʼosi 35 hili hoʼata ʼo te ʼAhotapu.
◼ Te Taulaga Motoka: Ko te taulaga motoka ʼo te fakatahiʼaga ʼae ʼe matou tokaga ki ai, ʼe mole fakamaʼua ke totogi. ʼI te ʼu potu ʼae ʼe mole faʼa lahi ai te taulaga motoka, ʼe lelei ke tou kauga ʼomai mo ʼihi ʼi tatatou motoka. ʼE gata pe ki te ʼu hahaʼi ʼae ʼe natou maʼu ʼi tanatou motoka te kate handicapé, ʼe feala ke natou tau tanatou motoka ki te ʼu taulaga ʼae kua ʼosi hinoʼi ki ai.
◼ Te Taʼofi ʼo Te ʼu Hekaʼaga: ʼE feala pe ke taʼofi he ʼu hekaʼaga maʼa natou ʼae ʼo totatou loto fale, peʼe maʼa natou ʼae ʼe tou motoka tahi, peʼe maʼa tatatou kau ako Tohi-Tapu.—1 Ko. 13:5.
◼ Te Temi Kai: ʼE kole atu ke kotou ʼaumai takotou meʼa kai, ke ʼaua naʼa kotou mavae ʼi te fakatahi ʼo olo ʼo toʼo meʼa kai ʼi tuʼa lolotoga te temi kai. ʼE feala hakotou ʼomai mo hakotou kiʼi ʼaisi. ʼE mole tonu ke kotou ʼaumai ki te ʼu fakatahi he ʼu ʼaisi ʼe lalahi fau pea mo he ʼu foʼi kava.
◼ Te ʼu Meʼa ʼOfa: ʼAki ki te ʼu meʼa ʼae ʼe tou foaki ʼi te fakatahi moʼo lagolago ki te ʼu gaue fakamalamanei, ʼe tou fakaha ai tatatou lotofakafetaʼi ki te ʼu fakatuʼutuʼu ʼo te fakatahi. Ko te ʼu seki ʼae ʼe fai moʼo lagolago ki te fakatahi ʼe tonu ke tohi “Association chrétienne les Témoins de Jéhovah de Nouvelle-Calédonie” peʼe tohi fakanounou “A.S.T.J.”.
◼ Ka Hoko He Tuʼutamaki: Kapau ʼe hoko he aluʼaga ʼe ʼaoga fakavilivili ai he tokoni fakatoketa, pea kotou fakaha ki he tahi ʼe gaue ʼi te selevisi tali kaiga, heʼe ina foimo pauʼi anai te selevisi Haofaki Maʼuli ʼo te fakatahi, ʼae kua mahani ʼi te ʼu aluʼaga ʼaia, ke haʼu ʼo vakaʼi. Kapau ʼe ʼaoga pea ʼe natou pauʼi anai te 18, te selevisi tamate vela. Vakaʼi naʼa toe pauʼi ki he tahi age selevisi.
◼ Te ʼu Faitoʼo: Kapau ʼe ʼaoga he faitoʼo kia kotou, kotou ʼaumai ʼakotou faitoʼo koteʼuhi ʼe mole foaki anai ʼi te fakatahi. ʼE mole hoko laku anai te ʼu foʼi huki pea mo te ʼu hui ʼa te kau suka ki te ʼu pupele.
◼ Natou ʼAe ʼe Mole Logolelei: ʼE feala anai hanatou fakalogo te polokalama ʼi te latio FM. Ke feala hakotou fakalogo te polokalama, ʼe ʼaoga anai ke kotou ʼaumai hakotou kiʼi meʼa fakalogo latio FM pea mo hona ʼu foʼi maka hila.
◼ Te ʼu Saliote Toho Tamaliki Pea Mo Te ʼu Hekaʼaga ʼAe ʼe Peluki: ʼE mole tonu ke ʼaumai ia te ʼu saliote toho tamaliki pea mo te ʼu hekaʼaga ʼae ʼe peluki ki te ʼu fakatahi. Kaʼe ʼe fakagafua ia te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼae ia tafa ʼo ʼana matuʼā.
◼ Te Faimilimili: Tokolahi te ʼu fakatahi ʼe fai ki te ʼu fale ʼe mapunupunu, pea mo fakahaʼele ai te ʼu masini fakamokomoko. Koia, ʼe ko he agaʼofa anai ia tatatou fakafuafua lelei te faimilimili ke ʼaua naʼa fakatupu mahaki ki ʼihi.—1 Ko. 10:24.
◼ Te Kiʼi Pepa (S-43) Veuillez suivre lʼintérêt: Ke feala ke ʼaʼahi, fakaʼaogaʼi te kiʼi pepa ʼaia moʼo tohi ki ai te higoa ʼo he tahi ʼe fia logo ʼi te fai fagonogono lolotoga te fakatahi. ʼE feala ke ʼave te ʼu kiʼi pepa ʼae kua tohi ki te selevisi ʼaia peʼe ki te sikalaipe ʼo takotou kokelekasio.
◼ Te ʼu Fale Kai: Kotou fakakololiaʼi ia te huafa ʼo Sehova ʼaki takotou aga ʼae ʼe lelei ʼi te ʼu fale kai. Ke tuha ʼakotou teu mo tokotou ʼuhiga Kilisitiano.
◼ Te Selevisi Gaue: Ko he tahi ʼe fia tokoni ʼe tonu ke alu ki te Selevisi Gaue ʼi te fakatahi. ʼE feala ke toe tokoni lelei te ʼu fanau ʼae ʼe mole heʼeki taʼu 16 moka gaue tahi mo he tahi ʼo te ʼu matuʼā peʼe ko he tahi kua lahi neʼe fakagafua e te ʼu matuʼā, mo ʼona leʼoleʼo.