‘Ke Lelei Takotou Aga ʼi Te Lotolotoiga ʼo Te ʼu Puleʼaga’

1. He ko ʼe ʼe maʼuhiga ke lelei tatatou aga lolotoga te ʼu fakatahi lalahi ʼae ka hoko mai?

¹ ʼI te taʼu fuli, ka fai ʼatatou fakatahi lalahi, tokolahi ʼe natou tokagaʼi tatou. Koia ʼe maʼuhiga ke tuha tatatou aga pea mo te ʼAtua ʼae ʼe tou tauhi ki ai. (Lev. 20:26) ʼE iloʼi anai e te hahaʼi ko tatou ko te kau tisipulo moʼoni ʼa Kilisito mo kapau ʼe lelei tatatou aga pea mo totatou faʼahiga teu pea mo te faʼahiga faʼu ʼo totatou lauʼulu. Ka tou kau anai ki te ʼu fakatahi fakatisitilike peʼe fakamalamanei, kotea ʼae ʼe tonu ke tou fai ‘ke lelei tatatou aga ʼi te lotolotoiga ʼo te ʼu puleʼaga’ pea mo fakakololiaʼi ai ia Sehova?—1 Pet. 2:12.

2. Ko te ʼu aluʼaga fea ʼe feala ai ke tou fakaha te aga Fakakilisitiano?

² Tou Fakaha Te Aga Fakakilisitiano: ʼE mole tatau te faʼahiga manatu ʼo te malama pea tatatou feʼofaʼofani, mo tatatou felogoʼi ʼae mo “natou ae e nonofo i tua.” (Kol. 3:10; 4:5; 2 Tim. 3:1-5) ʼE tonu ke tou agalelei ki te kau gaue ʼo te ʼu fale kai, tatau aipe peʼe hoko he ʼu faigataʼaia.

3. Kotea ʼae ʼe tonu ke fai e te ʼu matuʼā, pea kotea tona tupuʼaga?

³ ʼE tonu ke tokakaga fakalelei te ʼu matuʼā ki ʼanatou fanau ʼi te fakatahiʼaga pea mo te ʼu fale kai. (Taag. 29:15) Neʼe ui fenei e te fafine gaue ʼi te fale kai ki te taumatuʼa: “ʼE matou leleiʼia takotou hahaʼi, te ʼu famili mo ʼakotou fanau, koteʼuhi ʼe kotou agalelei pea mo aga fakaʼapaʼapa. Ko natou fuli ʼae ʼe gaue ʼi heni ʼe natou fiafia ʼuhi ko koutou. Koia ʼe matou fakaʼamu ʼe kotou ʼomai anai ʼi te ʼu fakaʼosi vahaʼa fuli.”

4. He ko ʼe ʼe tonu ke tou tokakaga ki totatou faʼahiga teu, ʼi te koga meʼa ʼae ʼe fai ai te fakatahi?

⁴ He Teu Fakaʼapaʼapa: ʼE tonu ke tou tui he ʼu teu e mata fakaʼapaʼapa pea mo mata fiamalalo, kaʼe ke mole hage ko te ʼu faʼahiga teu ʼo te malama. (1 Tim. 2:9) Maʼia mo te ʼu temi malolō, ʼe tou tokakaga anai ki totatou faʼahiga teu. ʼE tou fiafia anai ʼi te ʼai tatatou kiʼi kate ʼo te fakatahi pea ʼe mole tou ufiufi anai ʼi te palalau mo te hahaʼi moka hoko he faigamalie. ʼI te ʼu fakatahi lalahi ʼae ka hoko mai, kapau ʼe lelei tatatou aga pea mo tou teu fakaʼapaʼapa, ʼe fia logo anai te hahaʼi fakamalotoloto ki te logo ʼo te Tohi-Tapu. Pea tahi, ʼe tou fakafiafiaʼi ia Sehova.—Sofo. 3:17.

Te ʼu Fakamanatu ʼo ʼUhiga Mo Te ʼu Fakatahi ʼi Te Taʼu 2014

◼ Te ʼu Hola ʼo Te Polokalama: ʼE avahi anai te fale ʼo te fakatahi ʼi te hola 7 uhu. ʼE kamata anai te fakatahi ʼo te ʼu ʼaho ʼe lua ʼaki he musika ʼi te hola 8 ʼosi 20. ʼE tonu anai kia tatou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼE fakaʼosi anai ʼaki he katiko pea mo he faikole ʼi te hola 3 ʼosi 55 hili hoʼata ʼo te Moeaki, pea ʼi te hola 2 ʼosi 50 hili hoʼata ʼo te ʼAhotapu.

◼ Fakatahi Fakamalamanei: ʼE ʼi ai ʼihi fenua ʼe fai anai ki ai te ʼu fakatahi fakamalamanei. Kotou manatuʼi ʼe ko te pilo ʼo te filiale ʼae ʼe ina fakaafe ia te ʼu kokelekasio pea mo te kau teleke. ʼE natou ʼuluaki fakafuafua te lahi ʼo te fakatahiʼaga, mo te ʼu taulaga motoka pea mo te ʼu koga fale ʼae ʼe ava ʼi te ʼu otele. ʼE feala ke mole feʼauga te ʼu lapalasi mo kapau ʼe kau ia natou ʼae neʼe mole fakaafe ki he fakatahi fakamalamanei. Kapau ʼe ke fia kau ki he fakatahi ʼi he tahi age koga meʼa, ʼe lelei ke ʼaua naʼa ke fili ke ke kau ki he fakatahi fakamalamanei.

◼ Te Taulaga Motoka: Ko te ʼu taulaga motoka ʼo te ʼu fakatahi fuli ʼae ʼe matou tokaga ki ai, ʼe mole totogi. ʼI te ʼu potu ʼae ʼe mole faʼa lahi ai te taulaga motoka, ʼe lelei ke tou kaugā ʼomai mo ʼihi ʼi tatatou motoka. ʼE gata pe ki te ʼu hahaʼi ʼae ʼe natou maʼu ʼi tanatou motoka te kate handicapé, ʼe feala ke natou tau tanatou motoka ki te ʼu taulaga ʼae kua ʼosi hinoʼi ki ai.

◼ Te Taʼofi ʼo Te ʼu Hekaʼaga: ʼE kole atu, ka avahi te ʼu matapa ʼi te uhu, ke ʼaua naʼa kotou feleleʼi ʼo taʼofi te ʼu hekaʼaga ʼae ʼe kotou leleiʼia. Kapau ʼe tou maʼu ia te lotofoaki, ʼo tou kumi te lelei ki ʼihi, ʼe tou fakaha ai ko tatou ko te kau Kilisitiano moʼoni, pea ʼe tou uga ai te hahaʼi ke natou vikiʼi ia te ʼAtua. (Soa. 13:34, 35; 1 Ko. 13:4, 5; 1 Pet. 2:12) ʼE feala pe ke taʼofi he ʼu hekaʼaga maʼa natou ʼae ʼo totatou loto fale, peʼe maʼa natou ʼae ʼe tou motoka tahi, peʼe maʼa tatatou kau ako Tohi-Tapu. ʼE ʼi ai te ʼu hekaʼaga ʼe fakaʼateaina anai maʼa te hahaʼi matutuʼa pea mo natou ʼae ʼe mahahaki. Mai tona aluʼaga ʼae ʼe mole lahi te ʼu hekaʼaga ʼaia, ʼe feala pe ki he tokotahi peʼe ko he tokolua ke tokakaga pea mo heheka tahi mo ia ʼae kua matuʼa peʼe mahaki.

◼ Te Temi Kai: ʼE kole atu ke kotou ʼaumai takotou meʼa kai, ke ʼaua naʼa kotou mavae ʼi te fakatahi ʼo olo ʼo toʼo meʼa kai ʼi tuʼa lolotoga te temi kai. ʼE feala hakotou ʼomai mo hakotou kiʼi ʼaisi. ʼE mole tonu ke kotou ʼaumai ki te ʼu fakatahi he ʼu ʼaisi ʼe lalahi fau pea mo he ʼu ipu sioʼata.

◼ Te ʼu Meʼa ʼOfa: ʼAki te ʼu meʼa ʼofa ʼae ʼe tou foaki ʼi te fakatahi moʼo lagolago ki te gaue fakamalamanei, ʼe tou fakaha ai tatatou lotofakafetaʼi ki te ʼu fakatuʼutuʼu ʼae neʼe fai ki te fakatahi. Kapau ʼe kotou fai he seki, kotou tohi ki te “Association Chrétienne Les Témoins de Jéhovah de Nouvelle-Calédonie (A.S.T.J.).”

◼ Te ʼu Faitoʼo: Kapau ʼe ʼaoga he faitoʼo kia koutou, kotou ʼaumai ʼakotou faitoʼo koteʼuhi ʼe mole foaki anai ʼi te fakatahi. ʼE mole hoko laku anai te ʼu foʼi huki ʼa te kau suka ki te ʼu pupele ʼi te fakatahi.

◼ Te ʼu Fakatokaga: ʼE kole atu ke kotou tokakaga koteʼuhi ʼe tokolahi neʼe lavevea he neʼe natou heke peʼe neʼe natou toka. ʼI te taʼu fuli ʼe lavevea ʼihi ʼuhi ko ʼanatou sulie, tafitō te ʼu sulie tuʼuete. Kotou filifili lelei ʼakotou sulie, ke ʼaua naʼa kotou heke ʼi te ʼu mata tuʼuga.

◼ Te ʼu Saliote Toho Tamaliki Pea Mo Te ʼu Hekaʼaga ʼAe ʼe Peluki: ʼE mole tonu ke ʼaumai ia te ʼu saliote toho tamaliki pea mo te ʼu hekaʼaga ʼae ʼe peluki ki te ʼu fakatahi. Kaʼe ʼe fakagafua ia te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼae ia tafa ʼo ʼana matuʼā.

◼ Te Kiʼi Pepa (S-43) Veuillez suivre lʼintérêt: Ke feala ke ʼaʼahi he tahi ʼe fia logo ʼi te fai fagonogono lolotoga te fakatahi, fakaʼaogaʼi te kiʼi pepa ʼaia moʼo tohi ki ai tona higoa. ʼE feala ke ʼave te ʼu kiʼi pepa ʼae kua tohi ki te selevisi ʼae ʼe tokaga ki te ʼu tohi peʼe ki te sikalaipe ʼo takotou kokelekasio.

◼ Te ʼu Fale Kai: Kotou fakakololiaʼi ia te huafa ʼo Sehova ʼaki takotou aga ʼae ʼe lelei ʼi te ʼu fale kai. Ke tuha ʼokotou teu mo tokotou ʼuhiga Kilisitiano.

◼ Te Selevisi Gaue: Ko he tahi ʼe fia tokoni ʼe tonu ke alu ki te Selevisi Gaue ʼi te fakatahi. ʼE feala ke toe tokoni lelei te ʼu fanau ʼae ʼe mole heʼeki taʼu 16 moka gaue tahi mo he tahi ʼo te ʼu matuʼā peʼe ko he tahi kua lahi neʼe fakagafua e te ʼu matuʼā, ke ina ʼona leʼoleʼo.