Te ʼu Fakamanatu ʼo ʼUhiga Mo Te ʼu Fakatahi
Te ʼu Hola ʼo Te Polokalama: ʼE avahi anai te fale ʼo te fakatahi ʼi te hola 7 uhu. ʼE kamata anai te fakatahi ʼo te ʼu ʼaho ʼe lua ʼaki he musika ʼi te hola 8 ʼosi 20. ʼE tonu anai kia tatou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼE fakaʼosi anai ʼaki he katiko pea mo he faikole ʼi te hola 4 ʼosi 35 hili hoʼata ʼo te Moeaki, pea ʼi te hola 3 ʼosi 10 hili hoʼata ʼo te ʼAhotapu.
‘Kotou Hiva Moʼo Fakavikiviki Kia Sehova’: Talu mai te temi muʼa neʼe hiva fakavikiviki ia te hahaʼi ʼa te ʼAtua kia Sehova. ʼO toe feia ia ʼaho nei, ʼe maʼuhiga ia te musika ʼi te tauhi moʼoni. (Pes. 28:7) ʼE kamata ia te ʼu fakatahi fakafenua fuli ʼaki te fakatagi ʼo te musika. ʼE ina teuteuʼi tatou ke feala hatatou ako ʼo ʼuhiga mo te tauhi ʼae kia Sehova. Koia, ka tala ifo mai muʼa e te pelesita ʼe fakatagi anai ia te musika, ʼe tonu ke tou olo ʼo heheka pea mo fakalogo ʼaki he lotofakafetaʼi ki te musika. Kapau ʼe tou fai ia te faʼahi ʼaia, ʼe tou fakaha ai ʼe tou fakamaʼuhigaʼi ia te gaue ʼae neʼe fai e natou ʼae ʼe kau ki te foʼi maholo ʼa te kautahi. Tuʼa lua ʼi te taʼu, ʼe totogi e te ʼu tehina mo tuagaʼane ʼaia tanatou faifolau ki Patterson, ʼi New York, ke feala hanatou puke te musika maʼa tatou. Hili tatatou fakalogo ki te musika, kua feala leva ke tou hiva fakatahi te ʼu katiko ʼo te Puleʼaga moʼo fakavikiviki kia Sehova.
Te Taulaga Motoka: Ko te ʼu taulaga motoka ʼo te ʼu fakatahi fuli ʼae ʼe matou tokaga ki ai, ʼe mole totogi. ʼI te ʼu potu ʼae ʼe mole faʼa lahi ai te taulaga motoka, ʼe lelei ke tou kaugā ʼomai mo ʼihi ʼi tatatou motoka. ʼE gata pe ki te ʼu hahaʼi ʼae ʼe natou maʼu ʼi tanatou motoka te kate handicapé, ʼe feala ke natou tau tanatou motoka ki te ʼu taulaga ʼae kua ʼosi hinoʼi ki ai.
Te Taʼofi ʼo Te ʼu Hekaʼaga: ʼE kole atu, ka avahi te ʼu matapa ʼi te uhu, ke ʼaua naʼa kotou feleleʼi ʼo taʼofi te ʼu hekaʼaga ʼae ʼe kotou leleiʼia. Kapau ʼe tou maʼu ia te lotofoaki, ʼo tou kumi te lelei ki ʼihi, ʼe tou fakaha ai ko tatou ko te kau Kilisitiano moʼoni, pea ʼe tou uga ai te hahaʼi ke natou vikiʼi ia te ʼAtua. (Soa. 13:34, 35; 1 Ko. 13:4, 5; 1 Pet. 2:12) ʼE feala pe ke taʼofi he ʼu hekaʼaga maʼa natou ʼae ʼo totatou loto fale, peʼe maʼa natou ʼae ʼe tou motoka tahi, peʼe maʼa tatatou kau ako Tohi-Tapu. ʼE ʼi ai te ʼu hekaʼaga ʼe fakaʼateaina anai maʼa te hahaʼi matutuʼa pea mo natou ʼae ʼe mahahaki. Mai tona aluʼaga ʼae ʼe mole lahi te ʼu hekaʼaga ʼaia, ʼe feala pe ki he tokotahi peʼe ko he tokolua ke tokakaga pea mo heheka tahi mo ia ʼae kua matuʼa peʼe mahaki.
Te ʼu Teu Fakaʼapaʼapa: ʼE tonu ke tou tui he ʼu teu e mata fakaʼapaʼapa pea mo mata fiamalalo, kaʼe ke mole hage ko te ʼu faʼahiga teu ʼo te malama. (1 Tim. 2:9) Maʼia mo te ʼu temi malolō, ʼe tou tokakaga anai ki totatou faʼahiga teu. ʼE tou fiafia anai ʼi te ʼai tatatou kiʼi kate ʼo te fakatahi pea ʼe mole tou ufiufi anai ʼi te palalau mo te hahaʼi moka hoko he faigamalie. ʼI te ʼu fakatahi lalahi ʼae ka hoko mai, kapau ʼe lelei tatatou aga pea mo tou teu fakaʼapaʼapa, ʼe fia logo anai te hahaʼi fakamalotoloto ki te logo ʼo te Tohi-Tapu. Pea tahi, ʼe tou fakafiafiaʼi ia Sehova.—Sofo. 3:17.
Tou Fakaʼaogaʼi Fakapotopoto Ia Te ’u Kiʼi Masini Hila: ʼE tou agafakaʼapaʼapa mo kapau ʼe tou matehi ia tatatou telefoni toʼotoʼo, ke ʼaua naʼa tou fakaleluʼi te nofoʼaki. Kapau ʼe tou fakaʼaogaʼi he kamela viteo, peʼe ko he telefoni toʼotoʼo peʼe ko he tahi age kiʼi masini hila, ʼe tonu ke tou tokakaga ke ʼaua naʼa tou fakaleluʼi te nofoʼaki. Pea ʼe mole tou momoli anai he ʼu kiʼi logo ʼaki tatatou telefoni toʼotoʼo lolotoga te fakatahi.
Te Temi Kai: ʼE kole atu ke kotou ʼaumai takotou meʼa kai, ke ʼaua naʼa kotou mavae ʼi te fakatahi ʼo olo ʼo toʼo meʼa kai ʼi tuʼa lolotoga te temi kai. ʼE feala hakotou ʼomai mo hakotou kiʼi ʼaisi. ʼE mole tonu ke kotou ʼaumai ki te ʼu fakatahi he ʼu ʼaisi ʼe lalahi fau pea mo he ʼu ipu sioʼata.
Te ʼu Meʼa ʼOfa: ʼAki te ʼu meʼa ʼofa ʼae ʼe tou foaki ʼi te fakatahi moʼo lagolago ki te gaue fakamalamanei, ʼe tou fakaha ai tatatou lotofakafetaʼi ki te ʼu fakatuʼutuʼu ʼae neʼe fai ki te fakatahi. Kapau ʼe kotou fai he seki, kotou tohi ki te “Association Chrétienne Les Témoins de Jéhovah de Nouvelle-Calédonie (A.S.T.J.).”
Te ʼu Faitoʼo: Kapau ʼe ʼaoga he faitoʼo kia koutou, kotou ʼaumai ʼakotou faitoʼo koteʼuhi ʼe mole foaki anai ʼi te fakatahi. ʼE mole hoko laku anai te ʼu foʼi huki ʼa te kau suka ki te ʼu pupele ʼi te fakatahi.
Te ʼu Fakatokaga: ʼE kole atu ke kotou tokakaga koteʼuhi ʼe tokolahi neʼe lavevea he neʼe natou heke peʼe neʼe natou toka.
Natou ʼAe ʼe Mole Logo Lelei: ʼE feala anai hanatou fakalogo te polokalama ʼi te latio FM. Ke feala hakotou fakalogo te polokalama, ʼe ʼaoga anai ke kotou ʼaumai hakotou kiʼi meʼa fakalogo latio FM, mo hona ʼu foʼi maka hila.
Te ʼu Saliote Toho Tamaliki Pea Mo Te ʼu Hekaʼaga ʼAe ʼe Peluki: ʼE mole tonu ke ʼaumai ia te ʼu saliote toho tamaliki pea mo te ʼu hekaʼaga ʼae ʼe peluki ki te ʼu fakatahi. Kaʼe ʼe fakagafua ia te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼae ia tafa ʼo ʼana matuʼā.
Te Kiʼi Pepa (S-43) Veuillez suivre lʼintérêt: Ke feala ke ʼaʼahi he tahi ʼe fia logo ʼi te fai fagonogono lolotoga te fakatahi, fakaʼaogaʼi te kiʼi pepa ʼaia moʼo tohi ki ai tona higoa. ʼE feala ke ʼave te ʼu kiʼi pepa ʼae kua tohi ki te selevisi ʼae ʼe tokaga ki te ʼu tohi peʼe ki te sikalaipe ʼo takotou kokelekasio.
Te Selevisi Gaue: Ko he tahi ʼe fia tokoni ʼe tonu ke alu ki te Selevisi Gaue ʼi te fakatahi. ʼE feala ke toe tokoni lelei te ʼu fanau ʼae ʼe mole heʼeki taʼu 16 moka gaue tahi mo he tahi ʼo te ʼu matuʼā peʼe ko he tahi kua lahi neʼe fakagafua e te ʼu matuʼā moʼona leʼoleʼo.