Te ʼu Fakatahi Fakatisitilike—Ko He Temi Ki He Tauhi Fakafiafia
1. ʼE tatau feafeaʼi te ʼu ʼaho lalahi ʼo Iselaele pea mo te ʼu fakatahi fakatisitilike ʼaē ʼe tou fai iā ʼaho nei?
1 Ko Sosefo, mo Malia, mo tanā fānau pea mo ʼihi atu neʼe natou ʼolo tuʼumaʼu ki Selusalemi ki te ʼu ʼaho lalahi ʼaē neʼe fai ʼi te taʼu fuli. ʼI te ʼu lakaga ʼaia, ko nātou pea mo ʼihi atu kau ʼatolasio neʼe mole natou manatu ki tonatou ʼu fihifihia ʼo te ʼaho fuli kae neʼe natou tōkakaga tāfito ki te ʼu faʼahi fakalaumālie ʼo tonatou maʼuli ʼaē neʼe maʼuhiga age. ʼI te ʼu ʼaho lalahi ʼaia, neʼe natou maʼu ai he temi moʼo fakakaukauʼi pea mo fai palalau ʼo ʼuhiga mo te ʼu lelei ʼaē neʼe foaki age e Sehova pea mo vakaʼi ia tana Lao. ʼI tatatou ʼu fakatahi fakatisitilike ʼaē kā hoko mai, ʼe tou maʼu ai anai te ʼu faigamālie ʼe tatau ke tou tauhi fakafiafia ai kiā Sehova.
2. Koteā ʼaē ʼe tonu ke tou fai moʼo teuteu ki te fakatahi fakatisitilike kā hoko mai?
2 ʼE ʼAoga Ke Tou Teuteuʼi: Ko te fagona ʼa te fāmili ʼa Sesu mai Nasaleti neʼe fakamaʼua ke natou haʼele iā teitei kilometa e 200. Logolā tatatou mole ʼiloʼi ʼaē pē ko tehina mo tuagaʼane e toko fia ʼo Sesu, kae ʼe feala ke tou fakakaukauʼi ia te ʼu fakatuʼutuʼu pea mo te ʼu faiga ʼaē neʼe tonu ke fai e Sosefo pea mo Malia. Kua kotou fai koa te ʼu meʼa ʼaē ʼe tonu ke teuteuʼi ke kotou kau ai ki te ʼu ʼaho e tolu ʼo te fakatahi fakatisitilike kā hoko mai? ʼE lagi tonu ke kotou toʼo he ʼu ʼaho mālōlō ʼi takotou gāue, peʼe kotou palalau ki takotou pātolō peʼe ko te tagata peʼe ko te fafine faiako ʼo takotou fānau ʼo ʼuhiga mo tanatou mole kau ki te ako ʼi te temi ʼaia. Kua kotou fakatuʼutuʼu koa ke kotou kole he nofoʼaga mo kapau ʼe ʼaoga? ʼE feala koa ke kotou vakaʼi peʼe ʼaoga ke kotou tokoni ki he tahi ʼi te kōkelekāsio ke kau ki te fakatahi?—1 Soa. 3:17, 18.
3. ʼI te ʼu ʼaho lalahi ʼo Iselaele, neʼe lava maʼu feafeaʼi he ʼu faigamālie ki he ʼu fakatahitahi fakalotomālohi?
3 Ko He ʼu Fakatahitahi ʼe Fakalotomālohi: ʼI te ʼu ʼaho lalahi Fakasutea neʼe maʼu ai he ʼu faigamālie ki he ʼu fakatahitahi fakalotomālohi mo te tahi kau ʼatolasio! ʼE mahino ia neʼe fakaʼamu e te fāmili ʼo Sesu ke natou fakatahitahi mo nātou ʼaē neʼe kua natou kaumeʼa talu mai fualoa. Neʼe natou toe maʼu mo he ʼu faigamālie ke natou feʼiloʼiʼaki ai mo he ʼu hahaʼi foʼou ʼi te toe hahaʼi Sutea pea mo poloselite ʼaē neʼe natou kau ki te ʼu ʼaho lalahi ʼaia, pe neʼe natou fagona ki Selusalemi, peʼe natou mavae mai Selusalemi.
4. ʼE tou lava fakahā feafeaʼi ʼe tou leleiʼia totatou fale tautēhina Fakakilisitiano logotahi?
4 Ko te tahi tupuʼaga ʼo te fakatuʼutuʼu maʼa tātou ʼa te tagata kaugana agatonu mo poto ke tou fakatahitahi moʼo fakalogo ki he ʼu akonaki ʼi te ʼu fakatahi fakatisitilike kae mole ina tā mai pē ʼi he ʼu tohi, heʼe feala ai ke tou fefakalotomālohiʼaki. (Hep. 10:24, 25) Koia, kotou fakatuʼutuʼu ke kotou ʼomai fakatomuʼa ki te fakatahi ʼi te ʼaho fuli ke kotou fakatahitahi ai mo ʼihi atu ʼi muʼa ʼo te tala ifo e te pelesitā ʼo te polokalama te fakatatagi ʼo te musika, ʼaē ʼe ko he fakatokaga ke tou ʼolo ʼo heheka. ʼI te temi kai, ʼe mole tou mavae anai ʼi te faʼahi ʼaē ʼe fai ai te fakatahi moʼo kumi he meʼa kai, kae ʼe fakalotomālohi tātou ke tou ʼomai mo hatatou meʼa kai pea mo nonofo ʼi te fakatahi ke tou felāveʼi pea mo fai palalau ai mo te ʼu tehina mo tuagaʼane. Ko totatou fale tautēhina Fakakilisitiano logotahi ʼe ko he meʼa ʼofa mai iā Sehova, pea ʼe tonu ke tou leleiʼia fuli ia te meʼa ʼofa ʼaia.—Mik. 2:12.
5. Koteā ʼaē kā tokoni mai anai ke tou ako lahi mai te polokalama?
5 He Temi Ke Tou Ako Ai: Talu mai tana kei veliveli, neʼe ko te faigamālie kiā Sesu lolotoga te ʼu ʼaho lalahi ʼaia ke ina ako ke mālama ki tana Tamai ʼe ʼi selō. (Luka 2:41-49) Koteā ʼaē kā tokoni mai anai kiā tātou pea mo totatou fāmili ke tou ako lahi mai te ʼu akonaki ʼaē kā fai anai? Lolotoga te polokalama, kotou heheka maʼu, pea ʼaua naʼa kotou hoko palalau. Ke ʼaua naʼa fakaleluʼi koutou peʼe ko ʼihi atu ʼaki he ʼu meʼa ohagē ko te telefoni feʼāveʼaki. Kotou sioʼi maʼu ia te tehina faiakonaki, pea mo toʼo he ʼu nota nounou. Kotou heheka fakafāmili ke kotou ʼiloʼi lelei ai ʼe toe fakalogo mo takotou fānau. ʼI te afiafi, kotou toʼo he temi ke kotou fai palalau fakatahi ai ki he ʼu manatu neʼe kotou leleiʼia.
6. Koteā ʼaē ʼe tonu ke tou manatuʼi ʼo ʼuhiga mo totatou ʼu mutuʼi meʼa pea mo te faʼu ʼo totatou lauʼulu?
6 Te Mutuʼi Meʼa Pea Mo Te Faʼu ʼo Te Lauʼulu: Ko te ʼu hahaʼi matāpule faifakatau koloa ʼaē neʼe fagona ʼi te ala, neʼe faigafua tanatou ʼiloʼi ia te fāmili ʼo Sesu pea mo te tahi kau ʼatolasio Sutea ʼaē neʼe ʼolo ki te ʼu ʼaho lalahi pea mo ʼomai mai ai, he neʼe natou sipi tonatou ʼu tapaʼi kofu pea mo tui he kauʼi filo ʼuʼui ʼi ʼoluga ʼo te ʼu tapaʼi kofu ʼaia. (Fkau. 15:37-41) Logolā ʼe mole kofuʼi e te kau Kilisitiano ia he ʼu kofu fēia, kae ʼe ʼiloʼi tātou heʼe fakapoipoi totatou ʼu mutuʼi meʼa pea mo maʼa. ʼE tonu ke tou tōkakaga tāfito ki totatou ʼu mutuʼi meʼa pea mo te faʼu ʼo totatou lauʼulu mokā tou ʼolo ki te fakatahi pea mo mavae mai ai pea ʼi te koga meʼa ʼaē ʼe fai te fakatahi. Tatau aipē peʼe tou fetogi mutuʼi meʼa ʼi te hili ʼo te polokalama, kae ʼe tonu pē ke fakakolōliaʼi Sehova ʼaki totatou ʼu mutuʼi meʼa pea mo tou fakapipiki kiai tatatou kiʼi kate ʼo te fakatahi. Kā tou fai fēia, pea ʼe tou kehe ai anai mai te hahaʼi ʼaē ʼe mole ko he kau Fakamoʼoni pea ʼe malave anai ki te hahaʼi ʼaē ʼe sisio mai.
7. He koʼē ʼe tonu ke tou vakaʼi peʼe feala ke tou kau ki te kau gāue ʼi te fakatahi?
7 ʼE ʼAoga He Kau Gāue: ʼE ʼaoga he kau gāue ʼe tokolahi ke haʼele lelei te fakatahi. ʼE feala koa ke kotou tokoni? (Pes. 110:3) Ko te gāue ʼaē ʼe fai ʼi te ʼu fakatahi ʼe pipiki ki tatatou tauhi taputapu pea mo foaki ai he fakamoʼoni lelei. Ko te tagata pule ʼo te fale neʼe fai ai te fakatahi, neʼe punamaʼuli ʼaupitō ʼi te kau gāue ʼaē neʼe natou fakamaʼa ia te fale, ʼo ina tohi fēnei ai: “ ʼE au fia fakamālo atu ʼo ʼuhiga mo te meʼa fakapunamaʼuli ʼaupitō neʼe mole heʼeki au sio kiai ʼi muʼa atu. Neʼe au logo tuʼumaʼu pē ki te ʼui ʼaē ko te kau Fakamoʼoni ʼa Sehova ʼe ko he hahaʼi makehe pea ʼe ʼiloʼi talu mai fualoa ʼi tamatou ʼu fale gāue tanatou tuku tuʼumaʼu ia he fale ʼe maʼa age ʼi te temi ʼaē neʼe natou maʼu ai. Ko koutou pea mo takotou kautahi, neʼe kotou fakaliliu ia te fale ʼaenī ʼo te kolo ko he koga meʼa kua laka age tona lelei pea neʼe kotou fai te faʼahi ʼaia ʼaki te hahaʼi ʼe agalelei ʼaupitō neʼe mole heʼeki matou maʼu ia te fiafia lahi ʼaē ke matou feʼiloʼiʼaki mo nātou.”
8. Koteā te ʼu faigamālie ʼe tou maʼu anai ke tou fai fakamafola ʼi te koga meʼa ʼaē ʼe fai ai te fakatahi?
8 Ko He ʼu Faigamālie Ke Tou Fai Fakamafola Ai: Tokolahi te hahaʼi ʼi te koga meʼa ʼaē ʼe fai ai te fakatahi, ʼe natou tokagaʼi anai ia te teuteu maʼa ʼo te hahaʼi ʼaki tanatou ʼu kiʼi kate ʼo te fakatahi, pea ʼe feala ke fakatupu ai hanatou fia ʼiloʼi, ʼo tou maʼu ai he ʼu faigamālie ke tou palalau kiā nātou ʼo ʼuhiga mo te fakatahi. Ko te kiʼi tama taʼu fā neʼe ina ʼave ia tana tohi foʼou ʼaē neʼe fakahā ʼi te fakatahi ʼi te ʼosi ʼo te polokalama pea neʼe ina fakahā age ki te fafine ʼe gāue ʼi te fale kai. Neʼe tupu ai te fakaafe e te ʼu mātuʼa ʼa te kiʼi tama ia te fafine ki te fakatahi.
9. ‘E tou lava faʼifaʼitaki feafeaʼi ia te fiafia ʼa te fāmili ʼo Sesu ʼo ʼuhiga mo te ʼu fakatuʼutuʼu fakalaumālie ʼaē ʼe fai e Sehova?
9 Ko te ʼu ʼaho lalahi ʼo te temi muʼa, neʼe ko he ʼu lakaga fakafiafia neʼe fakaʼamu kiai ia te kau Sutea ʼaē neʼe natou fia ako lahi age ʼo ʼuhiga mo Sehova. (Teu. 16:15) Ko te fāmili ʼo Sesu neʼe fiafia ʼi te fai ʼo he ʼu sākilifisio moʼo kau kiai pea mo maʼu ia te ʼu lelei fuli ʼo te ʼu fakatahi ʼaia. ʼE tou maʼu mo tātou ia te fiafia ʼaia ʼo ʼuhiga mo tatatou ʼu fakatahi fakatisitilike, heʼe hagē kiā tātou ko he meʼa ʼofa mai tatatou Tamai ʼofa ʼaē ʼi selō. (Sake 1:17) ʼE ko te temi ʼaenī ke tou teuteu ki te lakaga ʼaia ʼaē ʼe fai ʼi te taʼu fuli ke tou tauhi fakafiafia ai kiā Sehova!