Ko He Lakaga Ke Tou Kakai Pea Mo Fakafiafia ʼi Te Faʼahi Fakalaumālie
1. ʼE tokaga feafeaʼi ia Sehova ki te ʼu meʼa ʼaē ʼe ʼaoga ki tana ʼu kaugana ʼi te faʼahi fakalaumālie?
1 ʼE tokaga fakalelei ia Sehova ki te ʼu meʼa ʼaē ʼe ʼaoga ki tana ʼu kaugana ʼi te faʼahi fakalaumālie. Logopē lā ko te tokolahi ʼi te mālamanei ʼe natou pakupaku ʼi te faʼahi fakalaumālie, kae ko tātou ʼe tou mākokona ʼi te faʼahi fakalaumālie. (Isa. 65:13) Ko he faʼahiga fafaga ʼo tātou e Sehova ʼi te faʼahi fakalaumālie, e ko tatatou ʼu fakatahi fakatisitilike ʼaē ʼe fai ʼi te taʼu fuli. Kua kotou fai koa hakotou ʼu fakatuʼutuʼu ke kotou kau ki te Fakatahi Fakatisitilike kātoa, pea ʼe ko tona kupu tāfito “Neʼe Takitaki e Te Laumālie ʼo Te ʼAtua”? Neʼe teuteuʼi ia te kātoaga fakalaumālie ke tou leleiʼia.
2. Koteā te ʼu fakatuʼutuʼu fakatomuʼa ʼe feala ke kotou fai?
2 Tou Fai Hatatou ʼu Fakatuʼutuʼu Fakatomuʼa: “Ko te ʼu fakatuʼutuʼu ʼa te tagata poto ʼe fua manūʼia moʼoni.” (Taag. 21:5) Koia lā ʼaē ʼe ʼaoga ai ke kotou fai hakotou ʼu fakatuʼutuʼu ke kotou kau ki te ʼu ʼaho ʼaia e tolu ʼo te fakatahi, ʼaua naʼa kotou tuʼania ʼi te kole ki tokotou pātolō hokotou ʼu ʼaho mālōlō ki te fakatahi ʼaia. Kapau ʼe kotou loto anai ki hokotou nofoʼaga, kua kotou fai koa hakotou fakatuʼutuʼu ki te ʼu faʼahi ʼaia? ʼE kotou ʼaumai anai takotou meʼa kai hoʼatā ke feala hakotou kakai fakatahi mo tokotou ʼu tehina ʼi te faʼahi ʼaē ʼe fai ai te fakatahi. Kotou fakatuʼutuʼu ke kotou ʼomai tautonu ki te fakatahi ʼi te ʼu ʼaho ʼaia e tolu ke maʼu hokotou hekaʼaga pea mo kotou hiva ia te kātiko pea mo kau ki te faikole ʼo te kamata.
3. Koteā te faʼahiga teu ʼaē kā tou fakatuʼutuʼu anai ke tou teu kiai?
3 ʼE tou tōkakaga anai ki te ʼu mutuʼi meʼa ʼaē kā tou tui ke mata fakapoipoi pea mo maʼa. (1 Tim. 2:9, 10) Ko te fakatahi fakatisitilike ʼe ko he faigamālie ʼaia kiā tātou ke tou tuku he fakamoʼoni ki te hahaʼi ʼaē kā ʼomai kiai. ʼAki totatou ʼu teu fakaʼapaʼapa ʼi te lolotoga ʼo te fakatahi pea mo tatatou ʼai ia te ʼu kiʼi fakaʼiloga ʼo te fakatahi, ʼe tou ʼiloga kehe anai mai te hahaʼi ʼaē ʼe mole ʼi te moʼoni pea ʼe tou tuku anai ia he fakamoʼoni ʼe lelei kiā nātou ʼaē ʼe sisio mai.
4. Koteā ʼaē kā tokoni mai anai kiā tātou pea mo totatou fāmili ke lahi age tatatou leleiʼia te polokalama?
4 Tou Fakalogo Fakalelei: ʼE mahino ia, ʼe mole tou fia hala anai ʼi he vahe ʼo te kātoaga fakalaumālie ʼaia! (Taag. 22:17, 18) Kapau ʼe tou mulimuli lelei ki te lau ʼo te koga tohi ʼi tatatou Tohi-Tapu pea mo tou toʼo ia he ʼu kiʼi nota fakanounou, pea ʼe feala ai anai ke tou fakalogo lelei ki te polokalama pea ʼe mole tou tōkakaga anai ki he tahi age ʼu meʼa. Pea ʼi te fakaafiafi ʼi ʼotatou ʼapi, ʼe feala ke tou fai palalau mo niʼihi ki he ʼu puani maʼuhiga ʼo te polokalama neʼe tou tohi. ʼI te ʼu taʼu ʼaenī, ʼe fakatokagaʼi ko ʼihi kau tūpulaga ʼe natou heheka tahi ʼi te fakatahi pea mo natou fai palalau lolotoga te polokalama peʼe natou fefaitohiʼaki ʼi tanatou ʼu kiʼi telefoni feʼaveʼaki. Kapau ʼe ʼi ai hatatou ʼu fānau, ʼe kei tūpulaga, ʼe lagi lelei anai ke heheka tahi mo te fāmili pea mo fakalogo ki te polokalama, ʼi hakotou tuku takotou ʼu fānau ke heheka pea mo ʼihi kau tūpulaga.
5. ʼE feafeaʼi ia hatatou fakatuputupu ia tatatou leleiʼia ia te fakatahi?
5 Tou Leleiʼia Te Fakatahi: ʼE hoki tou leleiʼia he meʼa kai mokā ʼe tou kai fakatahi mo hotatou ʼu kaumeʼa. (Taag. 15:17) ʼO toe fēia pē, ko tatatou fakatahi mo totatou ʼu tehina mo tuagaʼane ʼe ina hikihiki ai ia tatatou leleiʼia ia te fakatahi. Koia, ʼi te temi ʼaē heʼeki kamata ai ia te polokalama ʼo te fakatahi, ʼe lelei hatatou fakatuʼutuʼu ke tou feʼiloʼiʼaki mo niʼihi pea mo tou fakafiafia mo nātou! (Pes. 133:1) Kā kua fakaafe mai tātou e te pelesitā ke tou heheka ʼi muʼa ʼo te kamata ʼo te musika, ʼe tonu anai ke tou fakagata tatatou fai palalau pea mo heheka kae kamata te polokalama.
6. Kotou fakamatala he ʼaluʼaga neʼe hoko neʼe kotou tuku he fakamoʼoni ki te hahaʼi ʼi te kolo ʼaē ʼe fai ai ia te fakatahi.
6 Tou Fakaʼaogaʼi Ia Te ʼu Faigamālie Fuli Ke Tuku Ia He Fakamoʼoni: ʼI te agamāhani, ko te ʼu fakatahi ʼe ko he ʼu temi faigamālie ʼaia ke kita tuku he fakamoʼoni lelei. Tokolahi ʼi te ʼu tehina mo tuagaʼane ʼaē neʼe kau ki te fakatahi kā natou liliu kiō nātou ʼi te hili ʼo te polokalama, pea neʼe fehuʼi age e tonatou ʼu vāhaʼa fale pea mo ʼihi ia te kupu tāfito ʼo te kiʼi fakaʼiloga ʼo te fakatahi ʼaē ʼe natou fakapipiki ki ʼonatou ʼu kofu. Neʼe iku ai ki te ʼu fai palalau pea mo natou foaki ai ia he fagonogono lelei ki te moʼoni. Ko ʼihi iā nātou ʼaia neʼe fai fehuʼi, neʼe fakaafe nātou ki te fakatahi pea neʼe natou ʼomai kiai.
7. He koʼē ʼe tonu ke kotou kau ki te fakatahi fakatisitilike?
7 Neʼe lahi ʼaupitō ia te temi ʼaē neʼe fakaʼaogaʼi moʼo teuteuʼi te polokalama, ki te maʼu ʼo te ʼu koga meʼa ʼaē ke fai ai te ʼu fakatahi, mo te fakatuʼutuʼu ʼo ʼihi gāue ki te ʼu fakatahi, pea mo te teuteuʼi ʼo te ʼu akonaki. Ko te ʼu gāue manavaʼofa fuli ʼaē neʼe fai ki te teuteuʼi ʼo te kātoaga fakalaumālie ʼe hā ai ia te tokaga ʼofa ʼa Sehova ki tana hahaʼi. ʼOfa pē ke tou kau fuli kiai pea mo tou fakaʼaogaʼi ke lahi te ʼu akonaki ʼaē kā tou logo kiai! Pea kapau ʼe tou fai te faʼahi ʼaia, ʼe tou kehe mai te mālamanei, ʼe tou ‘kalaga fakafiafia anai, heʼe lelei totatou loto.’—Isa. 65:14.
[Talanoa ʼo te pasina 4]
Te ʼu Fakamanatu ʼo ʼUhiga Mo Te Fakatahi Fakatisitilike
◼ Te ʼu Hola ʼo Te Polokalama: ʼI te ʼu ʼaho ʼaia e tolu, ʼe kamata anai ia te polokalama ʼo te ʼuhu ʼi te hola hiva ʼosi ʼuafulu. ʼE ʼavahi anai ia te ʼu matapā ʼi te hola valu. Kā kamata ia te polokalama musika, ʼe tonu anai kiā tātou fuli ke tou tahi ʼolo ʼo heka ki tona hekaʼaga ke kamata te polokalama ʼi te fakaʼapaʼapa. ʼI te Feliaono mo te Moeaki ʼe ʼosi anai te polokalama ʼi te hola nima ʼosi nima, pea ko te ʼAhotapu ʼe ʼosi anai te polokalama ʼi te hola fā hili hoʼatā.
◼ Te Taulaga Motokā: Mai tona ʼaluʼaga ʼaē ʼe mole feʼauga ia te taulaga motokā maʼa te ʼu motokā fuli, koia ʼe tonu anai ke tou fakafonufonu ʼi he motokā e tahi kae ʼaua naʼa haʼu tokotahi pē he tahi ʼi he motokā peʼe ko he toko lua.
◼ Te Tāʼofi ʼo Te ʼu Hekaʼaga: ʼE feala ke tou tāʼofi he ʼu hekaʼaga maʼa nātou pē ʼaē ʼe ʼomai fakatahi mo tātou ʼi te motokā peʼe ko nātou ʼaē ʼe nonofo ʼi totatou lotofale.
◼ Te Temi Kai: ʼE kole atu ke kotou ʼaumai hakotou meʼa kai, kae ke ʼaua naʼa kotou mavae ʼi te fakatahi ʼo ʼolo ʼo toʼo meʼa kai mai tuʼa lolotoga te temi kai. ʼE feala hakotou ʼomai mo hakotou kiʼi foʼi glacière veliveli. ʼE mole tonu ke kotou ʼaumai ki te ʼu fakatahi he ʼu foʼi glacières ʼe lalahi fau, pea mo he ʼu foʼi kava.
◼ Te ʼu Meʼa ʼOfa: ʼAki te ʼu meʼa ʼofa ʼaē ʼe tou foaki ʼi te Fale ʼo te Puleʼaga peʼe ʼi te fakatahi, ʼe tou fakahā ai totatou loto fakafetaʼi pea tatatou lagolago ki te gāue fakamālamanei.
◼ Kā Hoko He Tuʼutāmaki: Kapau ʼe ʼaoga fakavilivili he faitoʼo kiā koutou, kotou kole age ki he tehina ʼe ovi atu kiā koutou, ke foimo pāui ki te selevisi ʼaē ʼe tokaga ki te kau mahaki, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga kiai he faitoʼo. Kapau leva ʼe ʼaoga ki ai he faitoʼo, ʼe fai anai e te selevisi ʼaia tana gāue.
◼ Te ʼu Sāliote Toho Tamaliki Pea Mo Te ʼu Hekaʼaga ʼAē ʼe Peluki: ʼE mole tonu ke kotou ʼaumai ia te ʼu sāliote toho tamaliki pea mo te ʼu hekaʼaga ʼaē ʼe peluki ki te ʼu fakatahi. Kae ʼe fakagafua te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼaē iā tafa ʼo te ʼu mātuʼa.
◼ Te ʼu Kiʼi Pepa Moʼo Hoko Atu Te Fia Logo: Ko te ʼu kiʼi pepa Veuillez suivre lʼintérêt (Ke ʼAʼahi) (S-43), ʼe fakaʼaogaʼi anai moʼo tohi kiai te higoa ʼo nātou ʼaē ʼe fia logo ʼi tata fai fagonogono ʼi te fakatahi. ʼE tonu anai ki te kau fai fakamafola ke natou maʼu ʼi te faʼahiga pepa ʼaia e tahi peʼe lua ki te fakatahi. Ko te ʼu kiʼi pepa ʼaē ʼe tohi kiai te higoa, ʼe feala ke ʼavage ki te selevisi ʼaia peʼe ki te sīkalaipe ʼo takotou kōkelekāsio ʼi takotou fono mo takotou kōkelekāsio.—Vakaʼi Te Minisitelio ʼo Te Puleʼaga ʼo Fepualio 2005, pāsina 6.
◼ He Nofoʼaga Pea Mo He Motokā: ʼE ʼui fēnei iā Tāʼaga Lea 3:27: “ ʼAua naʼa ke fakafisi ia te meʼa ʼaē ʼe lelei kiā nātou ʼaē ʼe tonu ke fai kiai, mo kapau ʼe feala ki tou nima ke ina fai ia te faʼahi ʼaia.” ʼE lava feafeaʼi hakotou fai he meʼa ʼe lelei ki ʼihi ʼo ʼuhiga mo te fakatahi? Ko he kau fai fakamafola ʼe nonofo mamaʼo ʼe ʼomai anai ki te fakatahi. ʼE tonu ke fai fakatomuʼa he ʼu fakatuʼutuʼu ʼo ʼuhiga mo he ʼu nofoʼaga pea mo he motokā moʼo feʼaveʼaki ʼo nātou. Ko te kau fai fakamafola ʼaē kua mātutuʼa, mo nātou ʼaē ʼe māʼimoa, te kau pioniē kātoa, pea mo ʼihi atu ʼe lagi ʼaoga ke tokoni age kiā nātou ʼo ʼuhiga mo te motokā peʼe ko he nofoʼaga. ʼE ko te ʼuluaki maʼua ʼaia ʼo te fāmili ke tōkakaga ki te ʼu meʼa ʼaē ʼe ʼaoga kiā nātou ʼaia. (1 Tim. 5:4) Kapau ʼe mole feala, pea ʼe feala ke tokoni kiai te ʼu tehina mo tuagaʼane. (Kal. 6:10) Ko te kau taupau ʼo te ʼu ako tohi ʼe tonu ke natou vakaʼi pe ko ai ʼi tanatou ako tohi ʼe ʼaoga kiai he tokoni, ke fai ai he ʼu fakatuʼutuʼu ʼi muʼa atu ʼo te fakatahi.
◼ Ko te ʼu pepa Demande de logement (Kole ʼo He Nofoʼaga) ʼe foaki anai kiā nātou ʼaē kā kau ki te fakatahi. ʼE fakalotomālohi ke tohi te ʼu pepa ʼaia pea mo foaki fakatomuʼa. Ko te Komitē Gāue ʼo Te Kōkelekāsio ʼe tonu ke natou sivisivi te maʼuli fakalaumālie ʼo te kaugā fagona. Neʼe fai te fakatuʼutuʼu ʼaia maʼa te kau fai fakamafola ʼaē ʼe natou tuku he faʼifaʼitaki lelei, ʼo fēia mo tanatou fānau.