Kua Kotou Teuteu Koa Ki Te Kātoaga Fakalaumālie?
1. Koteā te ʼu meʼa ʼaē ʼe tonu ke fai moʼo teuteuʼi he kātoaga?
1 ʼE lahi te ʼu meʼa ʼe tonu ke fai mokā tou tokonaki he kātoaga. ʼE tonu ke toʼo he meʼa kai, ke kano lelei tona kuka, pea ke heu leva ki he ʼu pā ʼo hili ki te laupapa. ʼE tonu ke fakahoahoa lelei te tufa ʼo te meʼa kai. Pea ʼe tonu ke toe tokalelei mo te koga meʼa ʼaē kā fai kiai te kai. ʼE tonu foki mo te kau fakaafe ke natou toe teuteu, tāfito lā mo kapau ʼe tonu ke natou folau mamaʼo. Logolā te lahi ʼo te ʼu gāue ʼaē ʼe fai kiai, kae ʼe ko he meʼa fakafiafia lahi hatatou vaevae mo totatou ʼu kaumeʼa pea mo totatou fāmili he meʼa kai kano lelei pea mo ʼaoga ki totatou sino. Kua vave pē anai ia te fakatahi ʼa te kau Fakamoʼoni ʼa Sehova ʼaē ʼi te mālamanei, ʼo natou ʼomai kaugamālie peʼe fakatuʼakoi ki te kātoaga fakalaumālie ʼaē neʼe natou fakatalitali kiai—te Fakatahi Fakatisitilike, ko tona kupu tāfito: “Kotou Nonofo ʼAlaʼala!” Kua lahi te ʼu gāue kua fai moʼo teuteuʼi ia te polokalama pea ke kātoa ia meʼa fuli. Neʼe fakaafe tātou fuli kiai. Ke feala hatatou kau kiai pea ke lahi tona ʼu fua lelei ʼaē kiā tātou, ʼe tonu foki mo tātou ke tou teuteu kiai takitokotahi.—Taag. 21:5.
2. Koteā ʼaē ʼe tonu ke tou fai ke feala ai hatatou kau ki tatatou kātoaga fakalaumālie?
2 Ke Lahi Te ʼu Lelei ʼe Tou Maʼu Mai Te Kātoaga ʼAia: Kua tokalelei koa takotou ʼu fakatuʼutuʼu ʼaē ke feala hakotou kau ki te kātoaga fakalaumālie kātoa? ʼE lagi ʼaoga anai ke kotou palalau ki tokotou pātolō ʼo fakahā age ki ai ʼe kotou kau anai ki te polokalama kātoa ʼo takotou fakatahi, ʼo kau kiai ia te ʼuluaki ʼaho ʼo te fakatahi. Kua tokalelei koa takotou ʼu fakatuʼutuʼu ʼo ʼuhiga mo te motokā pea mo te nofoʼaga? ʼE tonu ke vakaʼi e te ʼu tagata ʼāfea ia nātou ʼaē ʼi te kau mātutuʼa pea mo māʼimoa, ʼo fēia pē mo ʼihi, ʼaē ʼe ʼaoga ki ai he tokoni.—Sel. 23:4; Kal. 6:10.
3. He koʼē ʼe mole tonu ke tou kau ki he fakatahi fakamālamanei neʼe mole fakaafe tātou kiai?
3 ʼI ʼihi fenua, ʼe fai ai anai he ʼu fakatahi fakamālamanei. Kotou manatuʼi, neʼe kua fakaafe ki te ʼu fakatahi ʼaia ia te ʼu kōkelekāsio pea mo te ʼu telekē mai te tahi ʼu fenua. ʼAki te ʼu fakatuʼutuʼu ʼaia, neʼe lau fakalelei e te filiale ia nātou ʼaē neʼe fakaafe, mo vakaʼi ia te lahi ʼo te ʼu hekaʼaga pea mo te ʼu kogafale ʼo te otele. ʼE feala ke hahaʼi fau leva ia te ʼu fakatahi ʼaia mo kapau ʼe kau he ʼu kaugā fai fakamafola ki he fakatahi fakamālamanei kae neʼe mole fakaafe nātou kiai.
4. Ko te ʼu fakamanatu fea ʼe tokoni mai anai ke tou teuteu lelei ʼi te kamata ʼo te polokalama ʼi te ʼu ʼaho fuli?
4 Kotou teuteu ke kotou ʼomai tautonu ʼi te ʼu ʼaho fuli ki te fakatahi, ke kotou maʼu hokotou hekaʼaga ʼi muʼa ʼo te kamata ʼo te polokalama. ʼI muʼa ʼo te kamata ʼo te fakatahi, kotou fakaʼaogaʼi he ʼu kiʼi minuta moʼo vakaʼi ia te polokalama ʼaē ʼe tuʼu ʼi te pepa. ʼE tokoni atu anai ke kotou teuteuʼi tokotou loto ki te ʼu manatu ʼaē kā akonakiʼi mai. (Esita. 7:10) Kā tala ifo e te tehina pelesitā ia te fakatagi ʼo te musika, kotou fakalogo ki te musika ʼaia pea kotou nonofo teuteu lelei ki te hiva ʼo te ʼuluaki kātiko pea mo fakalogo ki te faikole.
5. ʼE lava maʼu feafeaʼi e tokotou fāmili he ʼu lelei ʼe lahi age mai te polokalama ʼo te fakatahi?
5 Kapau ʼe heheka fakatahi ia he fāmili lolotoga te fakatahi, pea ʼe feala anai ki te ʼu mātuʼa ke natou ʼiloʼi papau peʼe fakalogo lelei tanatou fānau ki te polokalama. (Teu. 31:12) ʼE fakalotomālohiʼi ia te nofoʼaki kātoa ke natou mulimuli ʼi tanatou Tohi-Tapu ki te lau ʼo te ʼu vaega. Ko te tohi ʼo he ʼu kiʼi nota nounou ʼe tokoni atu ke kotou fakalogo lelei. Ki muli age, ko takotou ʼu nota ʼe tokoni atu anai ke kotou manatuʼi ia te ʼu puani tāfito ʼo te ʼu akonaki. ʼAua naʼa tou fai palalau lolotoga te polokalama peʼe tou hoko feʼoloʼaki. Kapau ʼe ʼi ai hakotou telefoni feʼāveʼaki, kotou tōkakaga naʼa ina fakalelu koutou peʼe ko ʼihi age lolotoga te polokalama. ʼI te hili ʼo te polokalama ʼo te ʼu ʼaho ʼaia, he koʼē ʼe mole kotou fai palalau mo niʼihi ki te ʼu puani ʼaē neʼe kotou leleiʼia ʼi te polokalama?
6. Koteā te faʼahi ʼaē ʼe fakaofoofo ai tatatou ʼu fakatahi, pea ʼe tou lava maʼu feafeaʼi ia te ʼu lelei kātoa mai ai?
6 ʼI te fakatahi fakatisitilike, ʼe tou maʼu te faigamālie ke tou felōgoi lelei ai mo ʼotatou tehina mo tuagaʼane, pea ko te taʼi felōgoi ʼaia ʼe mole tou maʼu ʼi te mālamanei. (Pes. 133:1-3; Mko. 10:29, 30) He koʼē ʼe mole kotou fakatuʼutuʼu ke kotou feʼiloʼiʼaki mo nātou ʼaē ʼe heheka ʼi ʼokotou tafa, pea mo fai palalau mo nātou ʼi te temi kai? ʼE ko he meʼa lelei ʼaia mokā ʼe maʼamaʼa tatatou kai pea mo tou nonofo ʼi te fale fakatahi kae mole tou ʼolo ki he fale kai. Kotou tōkakaga ʼo fakaʼaogaʼi ia te faigamālie ʼaia ke kotou fefakalotomālohiʼaki.—Loma 1:11, 12.
7. Koteā ʼaē ʼe tonu ke tou teuteuʼi ʼo ʼuhiga mo te ʼu mutuʼi meʼa ʼaē kā tou kofuʼi?
7 Te ʼu Mutuʼi Meʼa: ʼE lelei ke tou tokagaʼi, ko Sehova neʼe ina fakatotonu ki te kau Iselaele ke natou sipi he ʼu tapaʼi kofu pea ke natou tui he kauʼi filo ʼuʼui ʼi ʼoluga ʼo tonatou ʼu tapaʼi kofu. (Fkau. 15:37-41) Kā sisio kiai te hahaʼi, pea neʼe manatuʼi ai neʼe tuku keheʼi nātou ke natou tauhi kiā Sehova. Iā ʼaho nei, kā tou kofuʼi he ʼu mutuʼi meʼa ʼe fakaʼapaʼapa pea mo fakapoipoi ʼi te fakatahi, pea ʼe tou kehe ai mai te mālama. ʼE ko he fakamoʼoni mālohi ʼaia ki te hahaʼi ʼaē ʼe sisio mai ʼi te ʼu temi ʼaē ʼe lagi tou ʼolo ʼo kakai ʼi he falekai mokā hili te polokalama ʼo te ʼaho. Koia, kotou fakakaukauʼi fakatomuʼa ki te ʼu mutuʼi meʼa ʼaē kā kotou kofuʼi anai.
8. ʼE lava feafeaʼi hatatou fai fakamafola ki te hahaʼi ʼaē ʼe nonofo ʼi te kolo ʼaē ʼe fai ai te fakatahi?
8 Tou Fai Fakamafola: ʼE tou lava fai fakamafola ki te hahaʼi ʼaē ʼe nonofo ʼi te kolo ʼaē ʼe fai ai te fakatahi. Ko te tehina neʼe ʼalu ki te falekai mo tona ʼohoana ʼi te hili ʼo te polokalama, neʼe palalau ʼo ʼuhiga mo tona kiʼi kate ʼo te fakatahi pea neʼe ina fehuʼi fēnei age ki te tagata ʼaē neʼe gāue ʼi te falekai: “Neʼe kua ke sio koa lā ki te hahaʼi tokolahi mo te kiʼi kate ʼaenī?” Neʼe ʼui age e te tagata gāue ʼo te falekai, neʼe ina tokagaʼi ia te hahaʼi ʼaia pea neʼe ina feʼekeʼaki pe koʼē ʼe natou tau ia te kiʼi kate ʼaia. Neʼe hoko ai te fai palalau, pea neʼe fakaafe e te tehina ia te tagata ʼo te falekai ki te fakatahi.
9. ʼE tou lava fakahā feafeaʼi tatatou loto fakafetaʼi kiā Sehova ia Ia ʼaē neʼe ina fakaafe tātou?
9 Logolā ko totatou ʼu tehina ʼaē kā natou fai anai ia te ʼu akonaki fuli, mo te ʼu fakafehuʼi pea mo te ʼu faʼifaʼitaki, kae ʼe ko totatou Tamai ʼaē ʼe ʼi selō ko Sehova, ʼaē ʼe ina foaki ʼofa mai ia te kātoaga fakalaumālie ʼaia ʼi te taʼu fuli. (Isa. 65:13, 14) ʼE tou fakahā tatatou loto fakafetaʼi kiā te Ia ʼaē neʼe ina fakaafe tātou, ʼaki tatatou kau kiai ʼi te ʼaho fuli pea mo leleiʼia ia te meʼa kai fakalaumālie ʼaē kā ina foaki mai. Kua tokalelei koa takotou ʼu fakatuʼutuʼu ki te faʼahi ʼaia?
[Talanoa ʼo te pasina 6, 7]
Te ʼu Fakamanatu ʼo ʼUhiga Mo Te Fakatahi Fakatisitilike
◼ Te ʼu Hola ʼo Te Polokalama: ʼI te ʼu ʼaho ʼaia ʼe lua, ʼe kamata anai ia te polokalama ʼo te ʼuhu ʼi te hola hiva. ʼE ʼavahi anai ia te ʼu matapā ʼi te hola valu. Kā tala ifo ia te kamata ʼo te polokalama musika, ʼe tonu anai kiā tātou fuli ke tou tahi ʼomai ʼo heheka ki tona hekaʼaga ke kamata ia te polokalama ʼi te fakaʼapaʼapa. ʼI te Moeaki ʼe ʼosi anai ia te polokalama ʼi te hola nima ʼosi hogofulu afiafi, pea ko te ʼAhotapu ʼe ʼosi anai ia te polokalama ʼi te hola fā hili hoʼatā. ʼO ʼuhiga mo te ʼu fakatahi fakamālamanei, ʼe kamata anai ia te polokalama ʼi te Felianima ʼi te hola tahi ʼosi ʼuafulu hili hoʼatā pea fakaʼosi ʼi te hola nima toe nima afiafi.
◼ Te Temi Kai: ʼE kole atu ke kotou ʼaumai takotou meʼa kai, kae ke ʼaua naʼa kotou mavae ʼi te fakatahi ʼo ʼolo ʼo toʼo meʼa kai mai tuʼa lolotoga te temi kai. ʼE feala hakotou ʼomai mo hakotou kiʼi glacière veliveli. ʼE mole tonu ke kotou ʼaumai ki te ʼu fakatahi he ʼu glacières ʼe lalahi fau, pea mo he ʼu foʼi kava.
◼ Te ʼu Meʼa ʼOfa: ʼAki te ʼu meʼa ʼofa ʼaē ʼe tou foaki ʼi te Fale ʼo Te Puleʼaga peʼe ʼi te fakatahi moʼo lagolago ki te gāue fakamālamanei, ʼe tou fakahā ai tatatou loto fakafetaʼi ki te ʼu fakatuʼutuʼu ʼaē neʼe fai ki te fakatahi.
◼ Kā Hoko He Tuʼutāmaki: ʼE lahi te hahaʼi ʼe natou pāui ia te selevisi ʼo te lōpitali ʼaē ʼe tokaga ki te ʼu tuʼutāmaki, māʼiapē lā mokā ko he ʼu kiʼi meʼa noa. Koia, kapau ʼe ʼaoga fakavilivili he Faitoʼo kiā koutou ʼi te fakatahi, kotou kole age ki he tehina ʼe ovi atu kiā koutou, ke foimo pāui ki te selevisi ʼaē ʼe tokaga ki te kau māhahaki ʼaē kua fakatuʼutuʼu ʼi te fakatahi, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga ki ai he faitoʼo. Kapau leva ʼe ʼaoga ki ai he faitoʼo, ʼe pāui anai te selevisi ʼo te lōpitali.
◼ Te ʼu Kamela Pea Mo Te ʼu Meʼa Puke Leʼo: Ko te ʼu meʼa ʼaia ʼe mole tonu anai ke hunuki ki te ʼu hunukiʼaga hila peʼe ko te fakatagi ʼo te fale fakatahi pea ʼe mole tonu ke gaohaʼa ki te nofoʼaki mokā tou fakaʼaogaʼi ia te ʼu meʼa ʼaia.
◼ Te ʼu Sāliote Toho Tamaliki Pea Mo Te ʼu Hekaʼaga ʼAē ʼe Peluki: ʼE mole tonu ke kotou ʼaumai ia te ʼu sāliote toho tamaliki pea mo te ʼu hekaʼaga ʼaē ʼe peluki ki te ʼu fakatahi. Kae ʼe fakagafua ia te ʼu hekaʼaga ki te ʼu tamaliki liliki mo kapau ʼe fakapipiki ki te hekaʼaga ʼaē iā tafa ʼo te ʼu mātuʼa.
◼ Te ʼu Kiʼi Pepa Moʼo Hoko Atu Te Fia Logo: Ko te ʼu kiʼi pepa Veuillez suivre lʼintérêt (Ke ʼAʼahi) (S-43), ʼe fakaʼaogaʼi anai moʼo tohi kiai te higoa ʼo nātou ʼaē ʼe fia logo ʼi tata fai fagonogono ʼi te fakatahi. ʼE tonu anai ki te kau fai fakamafola ke natou maʼu te faʼahiga pepa ʼaia e tahi peʼe lua ki te fakatahi. Ko te ʼu kiʼi pepa ʼaē ʼe tohi kiai te higoa, ʼe feala ke ʼavage ki te selevisi ʼaia peʼe ki te sīkalaipe ʼo takotou kōkelekāsio ʼi takotou fono mo takotou kōkelekāsio.—Vakaʼi Te Minisitelio ʼo Te Puleʼaga ʼo Fepualio 2005, pāsina 6.
◼ He Nofoʼaga Pea Mo He Motokā: ʼE ʼui fēnei iā Tāʼaga Lea 3:27: “ ʼAua naʼa ke fakafisi ia te meʼa ʼaē ʼe lelei kiā nātou ʼaē ʼe tonu ke fai ki ai, mo kapau ʼe feala ki tou nima ke ina fai ia te faʼahi ʼaia.” ʼE lava feafeaʼi hakotou fai he meʼa ʼe lelei ki ʼihi ʼo ʼuhiga mo te fakatahi? Ko he kau fai fakamafola ʼe nonofo mamaʼo ʼe ʼomai anai ki te fakatahi. ʼE tonu ke fai fakatomuʼa he ʼu fakatuʼutuʼu ʼo ʼuhiga mo he ʼu nofoʼaga pea mo he motokā moʼo feʼāveʼaki ʼo nātou. Ko te kau fai fakamafola ʼaē kua mātutuʼa, mo nātou ʼaē ʼe māʼimoa, te kau pioniē kātoa, pea mo ʼihi atu ʼe lagi ʼaoga anai ke foaki kiā nātou he tokoni ʼo ʼuhiga mo te motokā peʼe ko he nofoʼaga. ʼE ko te ʼuluaki maʼua ʼaia ʼo te fāmili ke tōkakaga ki te ʼu meʼa ʼaē ʼe ʼaoga kiā nātou ʼaia. (1 Tim. 5:4) Kapau ʼe mole natou lava fai te ʼu faʼahi ʼaia, pea ʼe feala ke tokoni ki ai te ʼu tehina mo tuagaʼane. (Kal. 6:10) Ko te kau taupau ki te ʼu kūtuga ʼe tonu ke natou vakaʼi pe ko ai ʼi tanatou kūtuga ʼe ʼaoga ki ai he tokoni, ke fai he ʼu fakatuʼutuʼu ʼi muʼa atu ʼo te fakatahi.
◼ Ko te ʼu pepa Demande de logement (Kole ʼo He Nofoʼaga) ʼe feala anai ke kole e nātou ʼaē kā kau ki te fakatahi. ʼE fakalotomālohi ke tohi te ʼu pepa ʼaia pea mo foaki fakatomuʼa. Ko te Komitē Gāue ʼo Te Kōkelekāsio ʼe tonu ke natou sivisivi ia te maʼuli fakalaumālie ʼo te kaugā fagona. Neʼe fai te fakatuʼutuʼu ʼaia maʼa te kau fai fakamafola ʼaē ʼe natou tuku he faʼifaʼitaki lelei, ʼo fēia mo tanatou fānau.