Tou Haga Talitali Kiā Sehova
1. Koteā te kupu tāfito ʼo te fakatahi, pea heʼe koʼe ʼe lelei ia te kupu tāfito ʼaia?
1 Neʼe tohi fēnei e Isaia: “Ko Sehova ʼe ko he ʼAtua ʼo te fakamāu. Fiafia ia nātou fuli ʼaē ʼe nātou haga talitali kiā te ia.” (Isa. 30:18) ʼI te Tohi-Tapu, ʼe lahi ʼaupito ia te ʼu fakamatala ʼo ʼuhiga mo te ʼu tautea neʼe fai e te ʼAtua ki tona ʼu fili pea mo tana hāofaki ʼo tana ʼu kaugana agatonu. Koteā te ʼu ako ʼe maʼu mai te ʼu fakamatala ʼaia ki te kau atolasio ʼa Sehova iā ʼaho nei? Koteā ʼe tou lava fai ʼi te temi nei moʼo nofo teuteu ki “te ʼaho lahi pea mo fakamanavahe ʼo Sehova”? (Soe. 2:31, 32) Ko tatatou Fakatahi Faka Tisitilike ʼaē ka hoko mai ʼaē ko tona kupu tāfito ʼaenī “Kua Ōvi Mai Ia Te Hāofaki!” ʼe ina uga anai tatou ke tou fakakaukauʼi te ʼu fehuʼi ʼaia pea mo vakavakaʼi ia tatou totonu. ʼE tokoni mai anai ke tou haga talitali kiā Sehova.
2. E feafeaʼi hatatou fakahā totatou loto fakafetaʼi ki te fakatahi faka tisitilike?
2 Kua koutou fai koa he ʼu fakatuʼutuʼu ke koutou kau ki te ʼu ʼaho ʼaia e tolu ʼo te fakatahi? Kua koutou fakaʼui koa hokotou ʼu ʼaho mālōlō ki tokotou patolo? ʼAua naʼa koutou lotonoa ʼo ʼuhiga mo te faʼahi ʼaia. Koutou hūfakiʼi takotou ʼu fakatuʼutuʼu ʼaia, pea ʼosi ʼaia koutou kole leva ki tokotou patolo. (Neh. 2:4, 5) ʼO tou toe fai feiāʼo ʼuhiga mo te meʼa feʼaluʼaki, mo te nofoʼaga, pea mo he tahi age ʼu meʼa, ʼe tonu ke tou foimo fai ni ʼu fakatuʼutuʼu ki te ʼu faʼahi fuli ʼaia. Kapau ʼe tou fai te ʼu fakatuʼutuʼu lelei ʼaia, pea ʼe tou fakahā ai anai ia totatou loto fakafetaʼi ki te meʼa kai fakalaumālie ʼaē neʼe teuteuʼi e Sehova maʼa tatou. ʼE tonu ki te kau tagata ʼāfea ke nātou tōkakaga ʼo tokoni kiā nātou ʼaē ʼe ʼaoga kiai te ʼu fakatuʼutuʼu ʼaia ʼo ʼuhiga mo te fakatahi, tāfito ia te hahaʼi mātutuʼa ʼo te kokelekasio.—Kal. 6:10.
3. Ka fai he fakatahi ʼi he kolo, ko te ʼu kalitātē fea ʼaē ʼe tonu ke fakahā e te ʼu kaugana ʼa Sehova?
3 Ko Te Aga Fakapotopoto ʼe Ina Faka Kolōliaʼi Te ʼAtua: Ka tou māʼopoʼopo ʼi he ʼu fakatahi lalahi, pea ʼe liliu tatatou aga ko he fakamoʼoni ki te hahaʼi. Koteā ʼaē ʼe fakamaʼua mai kiā tatou? Ka tou ʼolo ki te ʼu potu ʼaē ʼe fai ai te fakatahi, ʼe tonu ki te hahaʼi ʼaē ʼe felogoi mo tatou ke nātou fiafia ʼi tanatou sisio ki totatou ʼu kalitātē faka Kilisitiano, ohage ko te kātaki fualoa, mo te agamalū, mo te loto lolomi, pea mo te agapoto. (Kal. 5:22, 23; Filp. 4:5) ʼE tonu kiā tatou fuli ke tou fakahā ia te faʼahiga ʼofa ʼaē “ ʼe mole ina fai he ʼu aga ʼe mole mata feʼauga, ʼe mole ina kumi pe te meʼa ʼaē ʼe ʼaoga kiā te ia, ʼe mole ʼita ia.” Tatau aipe peʼe malaga ni ʼu fihifihia, kae ʼe tou loto anai ke tou “fai ia meafuape ki te kololia o te Atua.”—1 Ko. 10:31; 13:5, MN.
4. Koteā ʼaē ʼe lava fai e te ʼu mātuʼa moʼo tokoni ki tanatou fānau ke nātou faka kolōliaʼi ia Sehova ʼaki tanatou aga?
4 ʼI te ʼosi ʼo te tahi fakatahi, ko te pule ʼo te otele neʼe punamaʼuli ʼi tana sio ki te aga pea mo te faiteuteu ʼo tatatou kau tūpulaga, ʼo ina fakahā ia tana fakaʼamu ʼaē “ke ʼōlo tuʼumaʼu age ia te kau Fakamoʼoni ʼa Sehova ʼo nonofo ʼi tona fale otele.” ʼE ko he meʼa fakaloto fiafia! ʼE ko he fakavikiviki kiā koutou ʼu mātuʼa ʼo ʼuhiga mo takotou ako fānau pea mo takotou tokaga kiā nātou. ʼE mole tonu ki te ʼu mātuʼa ke nātou tuku ʼāteaina tanatou fānau ʼi he kogafale ʼo he otele kae mole he tahi moʼo leʼoleʼo ʼo nātou. ʼI te temi fuli pe, ʼe tonu ke leʼoleʼo ia te tamaliki. (Taag. 29:15) ʼOfa pe ke faka kolōliaʼi ia Sehova ʼaki tanatou aga pea mo fakafiafia ia tona loto!—Taag. 27:11.
5. E feafeaʼi hatatou faka kolōliaʼi ia Sehova ʼaki totatou ʼu teu pea mo te faʼahiga helu ʼo totatou ʼulu?
5 Ke Fakaʼapaʼapa Totatou ʼu Teu Pea Mo Te Helu ʼo Totatou ʼUlu: ʼE feala anai ki te fakatahi ke vikiʼi e te hahaʼi mo kapau ʼe mole tou mulimuli ki te ʼu faiteuteu ʼaē ʼe fai māhani e te hahaʼi ʼo te tuʼu ʼaenī, ʼaē ʼe heʼe fakaʼapaʼapa pea mole tāu mo te ʼu meʼa fakalaumālie. ʼE tou fakahā anai ia te faʼahi ʼaia mokā tou ʼōmai ki te kolo ʼaē ʼe fai ai te fakatahi, mokā tou kau ki te fakamaʼa ʼo te koga meʼa ʼaē ʼe fai ai te fakatahi, pea mokā tou kau ki te fakatahi. ʼI totatou ʼuhiga kaugana ʼo te ʼAtua, ʼe mole fakamuʼamuʼa anai ia te ʼu meʼa ʼaē ʼe tou loloto tāfito kiai, kae ʼe tou tōkakaga tāfito ke maʼa ia te huafa pea mo te matagafua ʼo Sehova. ʼE tonu ki te ʼu pule famili ke nātou tōkakaga ke hā ʼi te temi fuli ia te aga fakapoipoi pea mo fakapotopoto ʼi te ʼu teu pea mo te aga ʼo tonatou famili.—1 Tim. 2:9.
6. He koʼe ʼe tonu ke toe fakaʼapaʼapa mo totatou ʼu teu ʼi tuʼa atu ʼo te ʼu temi ʼo te fakatahi?
6 Tou toe fakahā te faʼahi ʼaia ʼi te ʼu temi ʼaē ʼe tou ʼolo ai ki te otele, ki te ʼu fale koloā pea mo te ʼu fale kai. ʼE toe ʼaoga pe foki ke tou teuteu lelei mo kapau ʼe tou ʼolo ʼo kakai ʼi te hili ʼo te fakatahi. ʼE tou maʼu anai ni ʼu faigamālie moʼo fagonogono mo kapau ʼe tou ʼai tatatou kiʼi kate ʼo te fakatahi.—2 Ko. 6:3, 4.
7. Koteā ʼaē ʼe tou lava fai ke māui mālie pea mo fakafiafia te fakatahi? (Vakaʼi “Te ʼu Fakamanatu ʼo ʼUhiga Mo Te Fakatahi Faka Tisitilike.”)
7 Neʼe fakakikite fēnei e Isaia: “ ʼE haga talitali anai ia Sehova ke ina fakahā atu tona ʼofa, pea koia, ʼe tuʼu ake anai moʼo fakahā atu tona manavaʼofa.” (Isa. 30:18a) ʼE tou tokaga anai ki tatatou aga pea mo totatou ʼu teu mokā tou fakatahitahi ʼi tatatou ʼu fakatahi lalahi ʼuhi heʼe tou fakafetaʼi ki te loto manavaʼofa pea mo lotoʼofa ʼa Sehova. ʼOfa pe ke liliu ia te Fakatahi Faka Tisitilike “Kua Ōvi Mai Ia Te Hāofaki!” ʼo faka kolōliaʼi totatou ʼAtua pea mo tokoni mai kiā tatou ke tou haga talitali kiā te ia!
[Talanoa ʼo te pasina 4]
TE ʼU FAKAMANATU ʼO ʼUHIGA MO TE FAKATAHI FAKA TISITILIKE
◼ Te ʼu Hola ʼo Te Polokalama: ʼI te ʼu ʼaho ʼaia e tolu ʼe kamata anai ia te polokalama ʼo te uhu ʼi te hola hiva vaelua. ʼE ʼavahi anai ia te ʼu matapā ʼi te hola valu. ʼI he kiʼi temi siʼi ʼi muʼa ʼo te kamata ʼo te polokalama, ʼe heka anai te pelesita mai muʼa lolotoga te musika ʼo te kātiko. ʼI te temi ʼaia, ʼe tonu anai kiā tatou fuli ke tou tahi ʼolo ʼo heka ki tona hekaʼaga ʼi muʼa ʼo te kamata ʼo te polokalama. ʼI te Feliaono ʼe ʼosi anai te polokalama ʼi te hola nima ʼosi kuata, ʼi te Moeaki ʼe ʼosi anai te polokalama ʼi te hola nima ʼosi nima, pea ʼi te ʼAhotapu ʼe ʼosi anai ʼi te hola fā ʼosi hogofulu.
◼ Te Taulaga Motokā: Mai tona ʼaluʼaga ʼaē ʼe mole feʼauga te taulaga motokā maʼa te ʼu motokā fuli, koia ʼe tonu anai ke fakafonufonu te ʼu motokā ke ʼaua naʼa ʼōmai ʼi he motokā ko he tokotahi peʼe ko he toko lua.
◼ Te Tāʼofi ʼo Te ʼu Hekaʼaga: ʼE feala ke tou tāʼofi he ʼu hekaʼaga maʼa nātou pe ʼaē ʼe ʼōmai fakatahi mo tatou ʼi te motokā peʼe ko nātou ʼo totatou loto fale pea mo nātou ʼaē ʼe tou fakaʼapi.
◼ Te Temi Kai: ʼE kole atu ke koutou toʼo takotou meʼa kai ʼi te selevisi meʼa kai peʼe koutou ʼaumai hakotou meʼa kai, kae ke ʼaua naʼa koutou mavae ʼi te fakatahi ʼo ʼolo ʼo toʼo meʼa kai mai tuʼa lolotoga te temi kai. ʼE feala hakotou ʼōmai mo hakotou kiʼi glacière veliveli. ʼE mole tonu ke koutou ʼaumai ki te ʼu fakatahi he ʼu foʼi glacières ʼe lalahi fau, pea mo he ʼu kava.
◼ Te ʼu Meʼa ʼOfa: ʼE lahi te ʼu meʼa ʼe totogi ki te ʼu fakatahi faka tisitilike. ʼAki te ʼu meʼa ʼofa ʼaē ʼe tou foaki ʼi tatatou ʼu Fale ʼo Te Puleʼaga peʼe ʼi te fakatahi, ʼe tou fakahā ai totatou loto fakafetaʼi pea mo tatatou lagolago ki te gāue faka malamanei. Ko te ʼu seki ʼaē ʼe fai ʼi te fakatahi, ʼe tonu ke tohi ki te higoa “A.S.T.J.”
◼ Te Selevisi ʼAē ʼe Tokaga Fakavilivili Ki Te Kau Mahaki: Neʼe fakatokagaʼi e te Selevisi ʼaia ia tona pāuiʼi noa ʼaē ʼo ʼuhiga mo he ʼu kihiʼi meʼa noa. Kapau ʼe ʼaoga fakavilivili he faitoʼo kiā koutou, koutou kole age ki he tēhina ʼe ōvi atu kiā koutou, ke foimo pāui ki te selevisi ʼaē ʼe tokaga ki te kau mahaki, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga ki ai he faitoʼo. Kapau leva ʼe ʼaoga ki ai he faitoʼo, ʼe fai anai e te selevisi ʼaia tana gāue.
◼ Te Nofoʼaki: ʼU mātuʼa, ʼaua naʼa koutou tuku ʼakotou fānau ke nātou feleleʼaki, kae koutou leʼoleʼo nātou ke feala hanatou fai he ʼu aga ʼe hā ai ʼe nātou fakalogo ki te ʼAtua.—Taag. 29:15.
◼ Te ʼu Kamela Pea Mo Te ʼu Meʼa Puke Leʼo: ʼE mole tonu anai ke hunuki te ʼu meʼa ʼaia ki te ʼu meʼa hunuki hila peʼe ko te fakatagi ʼo te fale fakatahi moʼo puke ʼo te ʼu akonaki, kae ʼe feala pe hona fakaʼaogaʼi mo kapau ʼe mole gaohaʼa ki te nofoʼaki.
◼ Te ʼu Meʼa Fai Pāki: Kapau ʼe koutou toho pāki lolotoga te fakatahi, ʼaua naʼa koutou fakaʼaogaʼi te hila ʼo takotou meʼa fai pāki.
◼ Te ʼu Bippers Pea Mo Te ʼu Telefoni Fēʼaveʼaki: ʼE mole tonu anai ki te ʼu meʼa ʼaia ke nātou fakalelu ki te nofoʼaki.