Kei Koutou Manatuʼi Koa?

Neʼe koutou fakatokagaʼi koa te ʼu alatike fakamuli ʼo Te Tule Leʼo? Kapau koia ʼaia, pea ʼe lagi koutou leleiʼia anai te ʼu fakamanatu ʼaenī:

◻ ʼI te temi nei, ʼe mulimuli feafeaʼi te tokolahi ʼo te ʼu taumatuʼa ki te faʼifaʼitaki lelei ʼaupito ʼaē neʼe tuku mai e Akila pea mo Pilisila?

Neʼe gāue ia Akila pea mo Pilisila ʼi te ʼu kokelekasio kehekehe. Ohage ko nāua, ʼe lahi te kau Kilisitiano faiva ia ʼaho nei ʼe nātou lotolelei ʼo ʼolo ki te ʼu koga meʼa ʼaē ʼe ʼaoga kiai he ʼu kaugā fai faka mafola. Tahi ʼaē meʼa, ʼe nātou fiafia ʼi tanatou sio ki te tuputupu ʼo te ʼu meʼa ʼo te Puleʼaga, pea mo tanatou maʼu te ʼu kaumeʼa faka Kilisitiano ʼe maʼuhiga ʼaupito.​—15/12, pasina 24.

◻ Koteā te manatu ʼa te Tohi-Tapu ʼo ʼuhiga mo te kava?

Ko te manatu ʼa te Tohi-Tapu ʼo ʼuhiga mo te kava ʼe fakapotopoto. ʼE ʼui mai e te Tohi-Tapu ko te vino ʼe ko te meʼa ʼofa mai te ʼAtua. (Pesalemo 104:​1, 15) Kae ʼe tauteaʼi te lahi fau ʼo te ʼinu kava. (Luka 21:34; 1 Timoteo 3:8; Tito 2:3; 1 Petelo 4:3)​—15/12, pasina 27.

◻ Koteā te faʼahi ʼaē ʼe maʼuhiga ʼaupito ʼi te tohi ʼa Asea?

Logope la ko te tohi ʼa Asea ʼe ko ʼona vaega pe e 38, ʼe fakaʼaogaʼi tuʼa 35 ai te huafa ʼo te ʼAtua. Ko te lea faka polofeta ʼaia, ʼe mole maʼuhiga mokā ʼe fetogi te huafa Sehova ʼaki te kupu “ ʼAliki.”​—1/1, pasina 6.

◻ Koteā te meʼa ʼaē ʼe feala ke tou ako ʼi te ʼu agahala ʼa Tavite pea mo Manase?

Logope la te fakamolemole ʼa Sehova kia Tavite pea mo Manase, neʼe hoko ki te ʼu tagata ʼaia e lua​—pea mo Iselaele—​te ʼu fua ʼo tanā ʼu agahala. (2 Samuele 12:11, 12; Selemia 15:​3-5) ʼO toe feiā aipe ʼi te temi nei, logope la ʼe fakamolemole ia Sehova kia nātou ʼaē neʼe agahala kae kua nātou fakahemala, ʼe lagi ʼe ʼi ai te ʼu fua ʼo te ʼu aga ʼaē neʼe nātou fai, ʼe mole feala ke tekeʼi.​—1/1, pasina 27.

◻ Koteā te faka ʼuhiga ʼo te ʼui ʼaē ʼe “matalelei” ‘te ʼu vaʼe ʼo nātou ʼaē ʼe nātou fagonogono te logo lelei’ ʼo te Puleʼaga ʼo te ʼAtua? (Isaia 52:7)

ʼI te agamāhani ʼe ko te ʼu vaʼe ʼaē ʼe nātou faka fealagia ki he tahi ke haʼele mokā ʼe ʼalu ʼo fai faka mafola ki te hahaʼi. ʼI tona ʼuhiga moʼoni, ko te ʼu vaʼe ʼaia ʼe nātou fakatā ia kita totonu. Koia ki te tokolahi ʼo nātou ʼaē ʼe nātou fagono ki te logo lelei ʼaia pea mo fakalogo kiai, ʼe ko he meʼa matalelei tanatou sisio ki te ʼu vaʼe ʼo te kau ʼave logo ʼaia.​—15/1, pasina 13.

◻ Koteā te ʼu koga ʼaē e lua ʼe pipiki ki te gāue ʼo te “fagonogono ʼo te logo lelei”? (1 Kolonito 9:​16)

ʼUluaki, ʼe tonu ke tou tala te logo lelei ʼo te Puleʼaga. Pea ko te lua koga ʼo te gāue ʼaia ʼe ko te akoʼi ʼo nātou ʼaē ʼe nātou tali lelei te logo ʼo te Puleʼaga.​—15/1, pasina 23.

◻ Koteā te ʼu fua lelei ʼaē ʼe feala ke tou maʼu takitokotahi ʼi tatatou hiva te ʼu katiko ʼo te Puleʼaga ʼi te ʼu fono ʼo te kokelekasio?

Ko te hiva ʼe ina faka fealagia kia tatou ke tou fakahā ki totatou Tupuʼaga te ʼu meʼa ʼaē ʼe ʼi totatou loto. (Pesalemo 149:​1, 3) Ko tatatou hiva ʼaki totatou loto katoa ʼi te kokelekasio, ʼe feala ke ina teuteuʼi totatou ʼatamai pea mo totatou loto ki te polokalama ʼo te fono. ʼE feala ke ina uga ai tatou ke toe lahi age tatatou tauhi ki te ʼAtua.​—1/2, pasina 28.

◻ E feafeaʼi te lelei age ʼo te ʼaho mate ʼi te ʼaho ʼaē ʼe kita tupu ai? (Tagata Tānaki 7:1)

ʼE feala ke lelei age te ʼaho ʼo tokita mate ʼi te ʼaho ʼaē ʼe kita tupu ai, mo kapau ʼe maʼu e he tahi he higoa ʼe lelei ia muʼa ʼo Sehova, ʼaē ʼe feala ke ina fakatuʼuake te ʼu hahaʼi agatonu mokā mamate. (Soane 11:25)​—15/2, pasina 12.

◻ He koʼe ko te tohi ʼo te Tagata Tānaki ʼe tonu ke tokoni kia tatou takitokotahi?

ʼE feala ke tokoni kia tatou takitokotahi ke tou fakatonutonuʼi tatatou manatu ʼo ʼuhiga mo te maʼuli pea mo te ʼu meʼa ʼaē ʼe tou tokakaga kiai. (Tagata Tānaki 7:2; 2 Timoteo 3:​16, 17)​—15/2, pasina 16.

◻ Ko te kau Fakamoʼoni ʼa Sehova ʼe ko he kau fondamentalistes koa?

Kailoa. Logope la ʼe nātou tui mālohi ki tanatou lotu, kae ʼe mole ko he kau fondamentalistes ohage ko te meʼa ʼaē kua mahino kiai ia te hahaʼi ʼo ʼuhiga mo te kupu ʼaia. ʼE mole nātou fai he ʼu agamālohi moʼo fakafeagai kia nātou ʼaē ʼe mole nātou tali tanatou ʼu manatu. ʼE nātou faʼifaʼitaki ki tonatou Pule, ia Sesu Kilisito.​—1/3, pasina 6.

◻ Ko tanatou mole ʼiloʼi te temi totonu ʼaē ka haʼu ai ia Sesu moʼo fakahoko te lagavaka ʼo te ʼAtua, koteā ʼaē ʼe uga ai te kau Kilisitiano ke nātou fai?

Ko te faʼahi ʼaia ʼe ina uga ai te kau Kilisitiano ke nātou haga nonofo tokaga, pea ʼe ko he faka fealagia ʼaia kia nātou ke nātou fakahā ai ʼe nātou tauhi kia Sehova ʼaki tonatou loto katoa.​—1/3, pasina 13.

◻ Koteā te meʼa ʼaē ʼe tonu ke tou vakaʼi ʼi muʼa ʼo hatatou ʼave he tēhina ki te telepinale, mo kapau neʼe ina kākāʼi tatou?

ʼE tonu ke tou vakaʼi pe koteā anai tona ʼu fua kia tatou takitokotahi, kia nātou ʼaē ʼe kau ki te fihifihia ʼaia, ki te kokelekasio, pea mo te hahaʼi ʼo te mālama. (1 Kolonito 6:7)​—15/3, pasina 20.

◻ ʼE lava feafeaʼi ke kita maʼu te fiafia moʼoni?

Ko te fiafia moʼoni ʼe fakalogo ki te loto, ʼe fakatafito ki te tui moʼoni pea mo te felogoi lelei mo Sehova. (Mateo 5:3)​—15/3, pasina 23.

◻ Koteā ʼaē ʼe tonu ke fai e he Kilisitiano mokā pāui ia ia ke kau ki te kūtuga ʼaē ʼe nātou fai he tonu ʼi he fai fakamāu?

Ko te ʼu Kilisitiano fuli ʼaē ʼe pāui ke nātou kau ki te hahaʼi ʼaē ʼe nātou fai he tonu ʼi he fai fakamāu, ʼe tonu ke nātou fakafuafua pe ko te tonu ʼaē ka nātou fai, ʼo mulimuli ki tanatou mahino ki te Tohi-Tapu pea mo tonatou leʼo ʼo loto. (Kalate 6:5)​—1/4, pasina 29.