ʼE Koutou Tui Koa Ki Te Réincarnation?

NEʼE faitohi fēnei ia Mukundbhai ki tona foha, ʼaē ʼe ako ʼi te univelesitē ʼi Amelika: “ ʼE kei ke manatuʼi te taʼahine ʼaē neʼe tou vāhaʼa fale mo ia, pea neʼe ke manako ki ai ʼi tau ʼi henī ʼi Initia? Kua vave ʼohoana. Neʼe ʼau manatu ʼe lagi ʼe ke fia ʼiloʼi anai te faʼahi ʼaia.”

He koʼe koa neʼe fakahā e te tāmai te logo ʼaia ki tona foha? Kua hili kiai ni ʼu taʼu, neʼe ko Mukundbhai ʼaē neʼe ina fakagata te fakatahi ʼo tona foha pea mo te taʼahine ʼaia. Tahi ʼaē meʼa, neʼe ako tona foha ʼi te univelesitē ʼi Amelika lolotoga taʼu e ono. Neʼe mole nā fefaitohiʼaki mo te taʼahine lolotoga te ʼu taʼu ʼaia, pea neʼe ʼiloʼi e Mukundbhai.

Kae he koʼe koa neʼe ina fakahā te faʼahi ʼaia? Koteʼuhi neʼe tui ia Mukundbhai ki te réincarnation, peʼe ko te toe tupu.a Kapau neʼe femanakoʼaki te ʼu toe ʼaia, koteʼuhi ʼi tonā ʼuluaki maʼuli, neʼe kua nā ʼohoana, ʼe ko he agakovi anai ʼi te temi nei te fakamavete ʼo nāua ʼaia mo kapau kua feala hanā ʼohoana. Neʼe loto e Mukundbhai ke ʼiloʼi e tona foha te meʼa ʼaia ka hoko, ʼi muʼa ʼo te liliu ʼo te taʼahine ʼaia ko he ʼohoana ʼo he tahi age ʼi te maʼuli ʼaenī.

Koʼeni te tahi faʼifaʼitaki. Ko te taʼahine ʼe taʼu fā, neʼe tau nofo ʼi te lopitali ʼo Mumbai, ʼi Initia, ʼuhi ko tona mahamahaki. Neʼe mole lelei te ʼu ivi ʼo tona mafu. Ko tana ʼu mātuʼa maʼu koloā neʼe mole feala ke nā faʼa kātakiʼi te mamahi ʼo tanā tamasiʼi. Kae neʼe nā manatu fēnei: “ ʼE tonu ke tā tali te faʼahi ʼaenī. Neʼe lagi ina fai he meʼa ʼi tona maʼuli ʼi muʼa atu, ʼaē ʼe tupu ai tana maʼu ia te mahaki ʼaenī.”

Ko te tui ki te réincarnation ʼe maʼuhiga ʼaupito ki te maʼuli ʼo te toko miliona hahaʼi ʼaē ʼe lotu Inituisi, Putisi, Jaïnistes, Sikhs, pea mo ʼihi ʼu lotu ʼaē ʼe haʼu mai Initia. Ko te ʼu meʼa ʼaē ʼe hoko ʼi te maʼuli, ohage ko te manako ki he tahi pea mo he mahaki ʼe tau mo kita, ʼe ʼui ko te ʼu fua ʼo te ʼu aga ʼaē neʼe fai ʼi te maʼuli, peʼe ʼi te ʼu maʼuli ʼi muʼa atu.

Ko te tokolahi ʼi te ʼu fenua ʼo te Potu Hihifo ʼe nātou fia ʼiloʼi te ʼu meʼa ʼaē ʼo ʼuhiga mo te réincarnation. ʼE ʼui e te fafine gaoʼi ʼata Amelika ko Shirley MacLaine ʼe tui ki te akonaki ʼaia. Ko te tagata faitohi ko Laurel Phelan, mai Vancouver, ʼi British Columbia, ʼi Kanata, ʼe ina ʼui ʼe ina manatuʼi tona ʼu maʼuli e 50 ki muʼa atu. ʼI te sivisivi ʼaē neʼe fai ʼi te taʼu 1994 maʼa te sulunale CNN/USA Today, ko te toko 270 ʼi te toko 1 016 hahaʼi neʼe nātou ʼui ʼe nātou tui ki te réincarnation. Ko te tui ki te réincarnation ʼe toe kau foki ki te meʼa ʼaē ʼe fakahigoaʼi ko te Nouvel Âge. Kae koteā koa te ʼu fakamoʼoni ʼaē ʼe lagolago moʼoni ki te akonaki ʼaia?

ʼE ʼui fēnei e nātou ʼaē ʼe tui ki te réincarnation: “ ʼE ko te ʼu meʼa ʼaē ʼe mātou manatuʼi neʼe mātou fai ʼi tomatou ʼuluaki maʼuli!” Koia, ʼi Bangkok, ko Ratana, ʼi tona taʼu tolu, neʼe ina kamata “manatuʼi te ʼu meʼa ʼaē neʼe ina fai ʼi tona ʼuluaki maʼuli, neʼe ko he fafine lotu neʼe mate ʼi tona taʼu 60,” pea ko te tokolahi neʼe nātou ʼui ko te meʼa ʼaē neʼe hoko kia ia, ʼe ko he fakamoʼoni ʼaia ki te réincarnation.

Kae ʼe lahi te ʼu lotolotolua ʼo ʼuhiga mo te faʼahi ʼaia. Pea ʼe feala ke fai he tahi ʼu fakamahino ʼo ʼuhiga mo te ʼui ʼaē ko te ʼu meʼa ʼe kita manatuʼi neʼe kita fai ʼi tokita ʼuluaki maʼuli.b ʼI tana tohi Hinduism: Its Meaning for the Liberation of the Spirit, ʼe ʼui ai e te tagata filosofia Initia ko Nikhilananda, ko ‘te ʼu meʼa ʼaē ʼe hoko ʼi te hili ʼo te mate ʼe mole feala ke fakamoʼoni ʼaki te poto fakakaukau.’ Pea tahi ʼaē meʼa, ʼe ina fakamoʼoni ko “te akonaki ʼo ʼuhiga mo te toe tupu ʼe mahino papau ia ʼe moʼoni.”

Kae ʼe lagolago koa te Tohi-Tapu ki te akonaki ʼaia? Pea koteā te ʼamanaki ʼaē ʼe foaki mai e te Folafola ʼa te ʼAtua ʼo ʼuhiga mo te kau mate?

[Nota ʼi te lalo pasina]

[Paki ʼo te pasina 4]

ʼE tautea anai koa ia ia ʼuhi ko te ʼu agahala ʼaē neʼe ina fai ʼi tona ʼuluaki maʼuli?