Te Meʼa Fakafūfū ʼi Te Huafa ʼo Te ʼAtua

KO TE kasa kona neʼe ina matehi te toko 12 hahaʼi ʼi te ala ʼi te lalo kele ʼo Tokio, ʼi Saponia, ʼi Malesio 1995 pea ʼaki te meʼa ʼaia neʼe hoko, neʼe ʼiloʼi ai te meʼa neʼe fai fakafūfū. Ko te magaʼi lotu neʼe ʼiloa ko Aum Shinrikyo (Ko Te Moʼoni ʼAē ʼe Māʼoluga) neʼe ina faʼu fakafūfū te kasa ʼaē ko te sarin ʼaē neʼe fakaʼaogaʼi moʼo fakahoko ʼo te ʼu fakatuʼutuʼu fakafūfū.

Hili kiai te māhina pea pa te foʼi pulu ʼo ina maumauʼi te fale puleʼaga ʼo Oklahoma, ʼi Amelika, pea neʼe mamate ai te toko 167. ʼE hā mai ai, ko te fai fakapō ʼaia, ʼe ʼi ai tona pikipikiga mo te ʼohofi ʼaē neʼe fai e te puleʼaga ki te magaʼi lotu Davidien ʼi Waco, Texas, ʼaē neʼe hoko ia taʼu e lua ki muʼa atu. ʼI te ʼohofi ʼaia neʼe mamate ai te toko 80 ʼo te magaʼi lotu ʼaia. Ko te foʼi pulu ʼaia neʼe pa neʼe ina toe fakahā foki te meʼa neʼe mole ʼiloʼi e te tokolahi: ʼI te temi nei ʼe lahi te ʼu kūtuga ʼi Amelika ʼe nātou faʼifaʼitaki ki te ʼu meʼa ʼa te kau solia, pea ʼe nātou fai tanatou ʼu fakatuʼutuʼu fakafūfū ke nātou fakafeagai ki te puleʼaga.

Ki muli age, ʼi te kua vave fakaʼosi ʼo te taʼu 1995, neʼe maʼu ʼi te vao matuʼa ʼaē ʼe ōvi ki Grenoble, ʼi Falani, te ʼu sino ʼo te ʼu hahaʼi e toko 16 neʼe tutu. Neʼe ko te ʼu hahaʼi neʼe kau ki te magaʼi lotu ʼaē ko te Temple Solaire, ko he kiʼi kūtuga lotu neʼe talanoa kiai te ʼu tala logo ʼi ʼOketopeli 1994 ʼi Suisi pea mo Kanata, ʼi te temi ʼaē neʼe fakamate ai te toko 53 ʼo te magaʼi lotu ʼaia, pe neʼe fakapogi nātou. Kae logope la te ʼu fai fakapō ʼaia, neʼe hoko atu pe te gāue ʼa te magaʼi lotu ʼaia. ʼO aʼu mai ki te ʼaho ʼaenī ko tana ʼu gāue pea mo tana ʼu fakatuʼutuʼu ʼe mole heʼeki ʼiloʼi papau e he tahi.

Te ʼu Tuʼutāmaki ʼo Te ʼu Meʼa ʼAē ʼe Fai Fakafūfū e Te ʼu Lotu

ʼAki te ʼu meʼa ʼaia neʼe hoko, ʼe tonu koa ke tou punamaʼuli ki te tuʼania ʼa te hahaʼi ʼo ʼuhiga mo te ʼu kūtuga lotu ʼaia? ʼE mahino papau ia, ʼe mole he tahi ʼe fia lagolago ki he kautahi fakafūfū​—⁠peʼe ko he kautahi faka lotu peʼe kailoa⁠—​ʼe ina kākāʼi kita, pea mo ina fakaneke ke kita fai he ʼu fakatuʼutuʼu ʼe mole kita tali. Kae koteā te meʼa ʼaē ʼe feala ke fai e te hahaʼi ke ʼaua naʼa nātou tō ki te hele ʼa te ʼu kautahi fakafūfū?

ʼE mahino papau ia, ko he tahi ʼe fia kau ki he kūtuga feiā ʼe tonu ke ina ʼiloʼi papau pe koteā te ʼu fakatuʼutuʼu moʼoni ʼo te kūtuga ʼaia. ʼE mole tonu ke tou fili he neʼe fakakinauʼi tatou e totatou ʼu kaumeʼa pe ko totatou ʼu feʼilo, pea ko tatatou ʼu fakatotonu ʼe mole tonu ke fakatafito ki te meʼa ʼaē ʼe tou logoʼi ʼi totatou loto kae ki te ʼu meʼa ʼaē ʼe moʼoni. Tou manatuʼi, ʼe ko kita totonu ʼaē ka kita maʼu te ʼu fua ʼaē ʼe feala ke hoko, kae mole ko niʼihi.

Ko te mulimuli ki te ʼu pelesepeto ʼo te Tohi-Tapu ʼe ko te puleʼaki ʼaē ʼe lelei tokotahi ke ʼaua naʼa tou kau ki te ʼu kūtuga ʼaē ʼe kovi tanatou ʼu fakatuʼutuʼu pea mo te ʼu meʼa ʼaē ʼe nātou fai. (Isaia 30:21) Ko tona faka ʼuhiga, ʼe mole kau ki te ʼu meʼa faka politike, ʼe ʼofa ki te hahaʼi, ʼo feiā aipe ki tona ʼu fili, ʼe ina tekeʼi “te ʼu gāue ʼo te kakano,” pea ʼe ina maʼuliʼi te fua ʼo te laumālie ʼo te ʼAtua. Ia meʼa fuli, ko te kau Kilisitiano moʼoni ʼe mole tonu ke nātou kau ʼi te mālama, ohage pe ko Sesu, pea ko te faʼahi ʼaia ʼe ina tāʼofi nātou ke mole nātou kau ai ki te ʼu sosiete fakafūfū ʼo te mālama.​—⁠Kalate 5:​19-23; Soane 17:​14, 16; 18:36; Loma 12:17-21; Sake 4:⁠4.

Ko te kau Fakamoʼoni ʼa Sehova ʼe ko te kau ako fakamalotoloto ʼo te Tohi-Tapu pea ʼe maʼuhiga kia nātou tanatou lotu, pea ʼe nātou faiga ke nātou mulimuli kiai. ʼI te malamanei katoa, ʼe ʼiloʼi lelei ia nātou ʼe ko he kūtuga ʼe nātou ‘kumi te tokalelei pea mo nātou haga muliʼi.’ (1 Petelo 3:​11) ʼE ʼui fakalelei e tanatou tohi Les Témoins de Jéhovah : Prédicateurs du Royaume de Dieu ʼo fēnei: “Ko te kau Fakamoʼoni ʼa Sehova ʼe mole ko he kautahi fakafūfū. Ko tanatou ʼu akonaki ʼaē ʼe fakatafito ki te Tohi-Tapu, ʼe fakahāhā lelei ʼi te ʼu tohi ʼaē ʼe feala ke maʼu e te hahaʼi fuli. Tahi ʼaē meʼa, ʼe nātou faiga tāfito ke nātou fakaafe te hahaʼi ki tanatou ʼu fono ke feala ai hanatou sisio pea mo fagono ki te ʼu meʼa ʼaē ʼe ʼui ʼi te ʼu fono ʼaia.”

Ko te lotu moʼoni ʼe mole ina fai he ʼu meʼa fakafūfū. Neʼe akoʼi te kau atolasio ʼa te ʼAtua moʼoni ke ʼaua naʼa nātou fūfū tonatou higoa, pea mo tanatou fakatuʼutuʼu ʼi tonatou ʼuhiga Fakamoʼoni ʼa Sehova. Ko te ʼu ʼuluaki tisipulo ʼa Sesu neʼe nātou fakafonu ia Selusalemi ʼaki tanatou akonaki. Neʼe nātou fakahā tanatou ʼu akonaki pea mo tanatou gāue ki te hahaʼi. ʼE toe feiā mo te kau Fakamoʼoni ʼa Sehova ia ʼaho nei. ʼE moʼoni, mokā tapuʼi e te ʼu puleʼaga aga fefeka tanatou tauhi, ʼe tonu ke tokakaga te kau Kilisitiano pea mo hoko atu tanatou gāue ʼaki he lototoʼa, ʼo nātou fakalogo ki te “ ʼAtua ohage ko [hanatou] fakalogo ki he pule, ʼi [hanatou] fakalogo ia ki te tagata.” Logope la te ʼu faʼahi ʼaia, ʼe nātou lototoʼa ʼo fagonogono ki te hahaʼi.​—⁠Gāue 5:​27-29; 8:⁠1; 12:​1-14; Mateo 10:16, 26, 27.

Neʼe lagi koutou manatu ko te kau Fakamoʼoni ʼa Sehova ʼe ko he kūtuga ʼe tauhi fakafūfū peʼe ko he magaʼi lotu, koteʼuhi neʼe mole koutou faʼa ʼiloʼi lelei ia nātou. Ko te faʼahi pe ʼaia neʼe hoko ki te tokolahi ʼi te ʼuluaki sēkulō.

ʼE fakahā mai kia tatou ʼi te kapite 28 ʼo te tohi ʼo Gāue, te fono neʼe fai ʼi Loma e te ʼapositolo ko Paulo mo “te ʼu tagata tāfito ʼo te kau Sutea.” Neʼe nātou ʼui age kia ia: “ ʼE mātou manatu ʼe lelei ke ke fakahā mai pe koteā tau ʼu manatu, heʼe ʼo ʼuhiga moʼoni mo te magaʼi lotu ʼaia, ʼe mātou ʼiloʼi ʼi te ʼu potu fuli pe ʼe palalau te hahaʼi kiai.” (Gāue 28⁠:​16-22) Moʼo tali kia nātou, ko Paulo “neʼe ina fakamahino age te meʼa ʼo fakamoʼoni katoa ʼo ʼuhiga mo te puleʼaga ʼo te ʼAtua,” pea “ko ʼihi neʼe kamata tui.” (Gāue 28: 23, 24) ʼE mahino ia, neʼe tonu ke fua lelei ʼo tuʼumaʼu kia nātou tanatou mahino totonu ki te Lotu Faka Kilisitiano.

Ko nātou ʼaē kua nātou foaki tonatou maʼuli ki te gāue ʼa te ʼAtua, ʼe nātou fai fagonogono pea mo nātou fai fakahāhā ki te hahaʼi, ʼo fiafia ai te kau Fakamoʼoni ʼa Sehova ʼi te fakahā ʼo tanatou gāue pea mo te ʼu meʼa ʼaē ʼe nātou tui kiai, ki he tahi ʼe ina fia ʼiloʼi te ʼu meʼa ʼaia. He koʼe ʼe mole koutou fai te faʼahi ʼaia ke feala ai hakotou fai he ʼu tonu ʼo mulimuli ki te meʼa ʼaē kua koutou ʼiloʼi?

[Paki ʼo te pasina 6]

Ko te kau Fakamoʼoni ʼa Sehova ʼe nātou fiafia ʼi te fakahā atu pe ko ai ia nātou pea mo te gāue ʼaē ʼe nātou fai