Te ʼu Tauhi—Koteā Te ʼUhiga ʼo Nātou?
ʼI TE ʼaho 28 ʼo Fepualio 1993—ko te kau polisi faka puleʼaga toko teau tupu neʼe nātou ʼohofi te ʼu tuʼuga fale neʼe nofoʼi e te ʼu hahaʼi ʼe lauʼi hogofulu, mo fafine pea mo tamaliki. Ko te fakatuʼutuʼu neʼe ko te kumi ʼo te ʼu mahafu tau ʼe mole fakagafua e te lao pea mo puke te tagata ʼe lau ʼe fai fakapō. Kae neʼe punamaʼuli te kau polisi ʼi te fana ʼo nātou mai te ʼu loto fale ʼaia. Neʼe nātou fai fana mo nātou.
Ko te fihi ʼaia neʼe mamate ai te toko hogofulu pea mo lāvevea te tokolahi. Lolotoga te ʼu ʼaho e nimagofulu ʼaē neʼe hoa mai kiai, ko te kau polisi faka puleʼaga ʼe lauʼi teau neʼe nātou leʼoleʼohi te nofoʼaga mo te ʼu mahafu feʼauga moʼo tali ʼaki he kiʼi tau. Neʼe fakaʼosiʼosi te ʼaluʼaga ʼaē neʼe mole kei ʼi ai hona ikuʼaga ʼaki he fetauʼaki ʼo mamate ai te toko 86, ʼo kau ai teitei toko 17 tamaliki.
Kae neʼe ko ai te fili? Neʼe ko he kūtuga fai fakapō koa ʼe nātou fakatau te toloke pea mo maʼu mahafu tau? Ko he koga ʼo he kūtuga ʼe agatuʼu? Kailoa ia. Lagi kua koutou ʼiloʼi pe, ko te “fili” neʼe ko he kūtuga faka lotu, ʼe nātou kau ki te faʼahiga tauhi. Ko te malaʼia ʼaia neʼe hoko kia nātou neʼe ina fakaliliu te kiʼi nofoʼaga ʼi te ʼu kele halafalafa ʼo te potu loto ʼo Texas, ʼi Amelika, ko he faʼahi kua tokaga kiai te malamanei. Neʼe lahi te ʼu talanoa, pea mo te ʼu sivisivi ʼi te ʼu nusipepa pea mo te televisio ʼo ʼuhiga mo te ʼu tuʼutāmaki ʼo te ʼu tauhi ʼe fai fakavale.
Neʼe fakamanatuʼi ki te hahaʼi te ʼu meʼa ʼaē neʼe hoko, neʼe taki ai te hahaʼi ʼo te faʼahiga tauhi ki te mate e tanatou kau takitaki: ko te ʼu fakapō ʼa Manson ʼi te 1969 ʼi Californie; te fakamate fakahahaʼi ʼo te kūtuga ʼo te tauhi ʼi Jonestown, ʼi Kuiana ʼi te 1978; ʼi te 1987 ko te fakamate neʼe fakatuʼutuʼu e te tauhi neʼe takitaki e te fafine ko Park Soon-ja ʼi Kolea, ʼaē neʼe hoko ai te mamate ʼa te toko 32. ʼE mahino ia, tokolahi ʼi te ʼu hahaʼi ʼaia neʼe nātou lau ko nātou ko te kau Kilisitiano pea neʼe nātou lau tanatou tui ʼaē ki te Tohi-Tapu.
ʼE mahino ia, ko te tokolahi ʼaē ʼe nātou fakaʼapaʼapa ki te Tohi-Tapu ohage ko te Folafola ʼa te ʼAtua ʼe nātou punamaʼuli ki te fakaʼaogaʼi fakaufiufi ʼo te ʼu vaega e te ʼu tauhi ʼaia. Ko te meʼa ʼe hoko ai, ko te ʼu kautahi ʼe lauʼi teau neʼe fakatuʼu moʼo sivisivi te ʼu tauhi pea mo fakaʼilo ʼanatou ʼu aga fakatupu tuʼutāmaki. ʼE fakakikite e te hahaʼi popoto ʼaē ʼe nātou sivisivi te ʼu tauhi, ʼe feala pe ke tuputupu te ʼu tauhi ʼaki te ʼu taʼu e afe ʼaē ʼe ʼamanaki ke hoko mai. Neʼe fakahā e te nusipepa, ʼi te lau ʼa te ʼu kūtuga ʼe fakafeagai ki te ʼu tauhi, ʼe lauʼi afe te ʼu tauhi ʼe nātou “puleʼi tokotou ʼu sino, ʼe nātou puleʼi takotou ʼu ʼatamai, ʼe nātou ʼulihi tokotou ʼu nefesi. . . . ʼE ʼi ai ʼihi ʼe nātou maʼu mahafu tau kae ʼe lau ko te tokolahi ʼe nātou fakatupu tuʼutāmaki. ʼE nātou kākāʼi anai koutou pea mo kaihaʼa koutou, pea mo nātou fakaʼohoanaʼi anai koutou pea mo fai fakatuʼutuʼu ʼo ʼuhiga mo te tanu ʼo koutou.”
Koteā Te Tauhi?
Ko te kupu “tauhi” ʼe mole fakaʼaogaʼi lelei e te tokolahi e lagi ʼe mole nātou mālama katoa ki tona ʼu faka ʼuhiga. Ke mole fakatupu ai he fakapōʼuli, ʼe mole fakaʼaogaʼi te kupu ʼaia e ʼihi hahaʼi teolosia.
ʼE fakamahino e te encyclopédie (The World Book Encyclopedia): “ ʼI te agamāhani, neʼe faka ʼuhiga te kupu tauhi ki he faʼahiga tauhi peʼe ko he mulimuli ki he failaulau.” ʼO mulimuli ki te manatu ʼaia, neʼe feala ke ʼui ko te ʼu kautahi faka lotu fuli ko he ʼu tauhi. Kae ʼi tona fakaʼaogaʼi ʼi te temi nei, kua kehe age te faka ʼuhiga ʼo te kupu “tauhi.” ʼE fakahā fēnei e te encyclopédie ʼaia, “talu mai te vaelua ʼo te ʼu taʼu 1900, ko te lahi ʼo te talanoa ki te ʼu tauhi neʼe ina fetogi te faka ʼuhiga ʼo te kupu ʼaia. ʼI te temi nei, ʼe faka ʼuhiga te kupu ʼaia ki he kūtuga ʼe mulimuli ki he takitaki ʼe ina fakaneke he ʼu akonaki pea mo he ʼu aga foʼou ʼe mole mulimuli ki te ʼu akonaki pea mo te ʼu aga neʼe fai ʼāfea.”
ʼI tana talanoa ʼaē ki te faka ʼuhiga ʼo te kupu ʼe lahi tona fakaʼaogaʼi, ʼe fakamahino e te nusipepa (Newsweek) ko te ʼu tauhi “ ʼi te agamāhani ʼe veliveli, ko te ʼu kūtuga ia ʼe nātou maʼuʼuli fakatafa ʼi te sosiete pea ko nātou ʼaē ʼe kau ai ʼe nātou fakapipiki te ʼuhiga ʼo nātou pea mo te fakatuʼutuʼu ʼo nātou ki te tagata e tahi ʼe aga fakamanamana.” ʼO toe feiā aipe, ʼe fakahā e te nusipepa (Asiaweek) “ko te kupu [tauhi] ʼe lahi tona faka ʼuhiga, kae ʼe tau faka ʼuhiga ki he tui foʼou faka lotu neʼe fakatuʼu e he takitaki ʼe aga fakamanamana, ʼe ina tau ʼui ko ia ko te fakatā tonu ʼo te ʼAtua.”
Ko te lea ʼaē ʼe fakaʼaoga ʼi te fakatotonu fakatahi ʼo te 100 Fono ʼo te koga fenua ʼo Maryland, ʼi Amelika, ʼe ina toe fakaʼaogaʼi mo ia te faka ʼuhiga ʼo te faʼahi kovi ʼo te kupuʼi palalau tauhi. ʼE ʼui fēnei e te fakatotonu ʼaia “ko he tauhi ko he kūtuga peʼe ko he hahaʼi ʼe nātou fakahā tanatou pipiki mālohi ki he tagata peʼe ko he manatu, pea ʼe nātou fakaʼaogaʼi te ʼu faʼahiga fakamālohi moʼo fakalotoʼi pea mo puleʼi, ko te faiga ʼaia ke fakahaʼele ki muʼa te ʼu fakatuʼutuʼu ʼo tanatou ʼu takitaki.”
Ko te meʼa ʼe mātala mai, ʼe tau faka ʼuhiga te ʼu tauhi ki he ʼu kūtuga faka lotu ʼaki he ʼu manatu pea mo he ʼu aga ʼe maʼu, ʼe nātou fakafifihi ki te faʼahiga aga ʼo te maʼuli ʼe tali ʼi te temi nei. ʼE tau fai fakafūfū ʼanatou ʼu gāue. ʼE lahi te ʼu kiʼi kūtuga feiā ʼe nātou mavae kehe ʼo nātou nonofo faka kautahi. ʼE nātou pipiki maʼu pea mo katoa ki he tagata ʼe lau tona ʼuhiga takitaki. ʼE tau laupisi te kau takitaki ʼaia te fili ʼo nātou e te ʼAtua peʼe nātou laupisi ki tonatou ʼuhiga fakaʼatua.
ʼI ʼihi lakaga, ʼe talanoa te ʼu kautahi ʼaē ʼe fakafeagai ki te ʼu tauhi, ki te kau Fakamoʼoni ʼa Sehova ohage ko he tauhi. ʼE fakapipiki e te ʼu alatike ʼo te ʼu nusipepa mole heʼeki faʼa fualoa te Fakamoʼoni ki te ʼu kūtuga ʼe fakatuʼatuʼania ʼanatou ʼu gāue. ʼE matatonu koa te talanoa ki te kau Fakamoʼoni ʼa Sehova ohage ko he kūtuga faka lotu ʼe maʼuli fakatafa ʼi te sosiete? Ko nātou ʼaē ʼe nātou kau ki he tauhi ʼe nātou mavae mai ʼonatou ʼu kaumeʼa, mo ʼonatou famili, pea mai te sosiete katoa. Kae ʼe feiā koa te kau Fakamoʼoni ʼa Sehova? ʼE fakaʼaogaʼi koa e te kau Fakamoʼoni ʼa Sehova he ʼu faʼahiga meʼa fakamālohi pea mo fakakākā moʼo maʼu ʼo hanatou ʼu hahaʼi?
ʼE ʼiloa te kau takitaki ʼo te ʼu tauhi ki te fakaʼaogaʼi e nātou te ʼu faʼahiga meʼa fakamālohi moʼo puleʼi te ʼu ʼatamai ʼo tanatou ʼu tisipulo. ʼE ʼi ai koa he fakamoʼoni ʼe hā ʼaki mai ai ʼe fai e te kau Fakamoʼoni ʼa Sehova te faʼahi ʼaia? ʼE fai fakafūfū koa tanatou tauhi? ʼE nātou mulimuli koa pea mo fakaʼapaʼapa ki he takitaki fakatagata? ʼI tona fakahagatonu, ko te kau Fakamoʼoni ʼa Sehova ʼe ko he tauhi koa?
[Haʼuʼaga ʼo te paki pasina 3]
Jerry Hoefer/Fort Worth Star Telegram/Sipa Press