Ko Te Kau Fakamoʼoni ʼa Sehova ʼe Ko He Maga ʼi Lotu Koa?

Kailoa, ko te kau Fakamoʼoni ʼa Sehova ʼe mole ko he magaʼi lotu ia. ʼI tomatou ʼuhiga Kilisitiano, ʼe matou faiga ke matou mulimuli ki te faʼifaʼitaki ʼa Sesu Kilisito pea mo maʼuliʼi ʼana akonaki.

Kotea ia te magaʼi lotu?

ʼE mole manatu tahi te hahaʼi ʼo ʼuhiga mo te fakaʼuhiga ʼo te kupu “magaʼi lotu.” Koia, tou vakaʼi ia manatu ʼe lua ʼo ʼuhiga mo te ʼu magaʼi lotu pea he koʼe ʼe mole kau ki ai ia te Kau Fakamoʼoni ʼa Sehova.

• ʼE manatu e ʼihi ko te magaʼi lotu ʼe ko he lotu foʼou pe ʼe ko he lotu mavae. Neʼe mole fakatuʼu e te kau Fakamoʼoni ʼa Sehova he lotu foʼou. Kailoa, ʼe mulimuli tamatou tauhi ki te faʼifaʼitaki ʼa te kau ʼuluaki Kilisitiano ʼo te temi muʼa, ʼae neʼe fakatafito ʼanatou akonaki ki te Tohi-Tapu. (2 Timoteo 3:​16, 17) ʼE matou fakatui ʼe ko te Tohi-Tapu pe ʼae ʼe feala ke ina fakaha mai te faʼahiga tauhi ʼae ʼe moʼoni.

• ʼE manatu e ʼihi ko te magaʼi lotu ʼe ko he lotu fakatupu tuʼutamaki pea ʼe pule e te tagata. ʼE mole takitaki ia te kau Fakamoʼoni ʼa Sehova e he tagata. ʼE matou fakaʼapaʼapa ki te pelesepeto ʼae neʼe foaki e Sesu ki ʼana tisipulo: “Ko tokotou takitaki, ko Kilisito.”​—Mateo 23:10.

Ko te kau Fakamoʼoni ʼa Sehova ʼe mole ko he magaʼi lotu fakamataku. ʼE ko he lotu ʼe fua lelei ia ki te maʼuli ʼo tana hahaʼi ʼo toe feia ki te hahaʼi fuli. Ohage la, ʼi tamatou gaue faifakamafola, ʼe matou tokoni ai ki te hahaʼi ke natou tekeʼi ʼanatou agamahani ʼae ʼe kovi, ohage la ko te toloke pea mo te inu kava fakavale. ʼE matou tokoni ki te hahaʼi fuli ke natou ako te lautohi pea mo te faitohi. Pea ʼe matou foaki he tokoni moka hoko ia he tuʼutamaki fakanatula. ʼE matou faiga malohi ke matou foaki ia te meʼa ʼae ʼe lelei ki tomatou tatau, ohage ko tona kole e Sesu ki ʼana tisipulo.​—Mateo 5:​13-​16.