ʼE Nātou Māsisiva Kae ʼe Nātou Maʼu Koloā—ʼO Feafeaʼi?

KUA hili ni ʼu sēkulō, neʼe faikole te tagata poto ʼo ina kole ke ʼaua naʼa liliu ko he tagata masiva. He koʼe neʼe fai te kole ʼaia? Koteʼuhi neʼe tuʼania naʼa fakatupu kovi tona ʼuhiga masiva ki tana ʼu felogoi mo te ʼAtua. Ko te faʼahi ʼaia ʼe hā lelei mai ʼi tana palalau ʼaenī: “Tuku ʼau ke ʼau kai te meʼa kai ʼaē neʼe foaki mai kia te ʼau . . . ke ʼaua naʼa ʼau liliu ʼo masiva pea ke ʼau kaihaʼa moʼoni pea mo fakafeagai ki te huafa ʼo toku ʼAtua.”—Tāʼaga Lea 30:​8, 9.

KO TE faʼahi ʼaia ʼe ina faka ʼuhiga koa, ko te hahaʼi māsisiva ʼe mole feala hanatou tauhi agatonu ki te ʼAtua? Kailoa ia! ʼI te ʼu temi fuli pe ʼo te hisitolia, neʼe tokolahi te kau kaugana ʼa Sehova ʼAtua, neʼe nātou nonofo agatonu kia te ia logope la te ʼu fihifihia ʼaē neʼe tau mo nātou ʼuhi ko tonatou māsisiva. ʼE ʼofa ia Sehova kia nātou ʼaē ʼe nātou falala kia te ia, pea ʼe ina foaki age kia nātou te ʼu meʼa ʼaē ʼe ʼaoga kia nātou.

Ko Te Kau Agatonu ʼo Te Temi Muʼa

Māʼiape la mo te ʼapositolo ko Paulo, neʼe hoko kia ia te ʼu temi faigataʼa. (2 Kolonito 6:​3, 4) Neʼe toe talanoa foki ʼo ʼuhiga mo te ‘ ʼao’ ʼo te kau fakamoʼoni agatonu ʼo te ʼu temi ki muʼa atu ʼo te temi faka Kilisitiano, pea ko ʼihi ia nātou “neʼe nātou feʼaluʼaki, teu ki te kiliʼi akeno mo te kiliʼi tao, neʼe nātou masiva . . . Neʼe nātou nofo holo ʼi te ʼu toafa, mo te ʼu moʼuga, mo te ʼu ʼana, pea mo te ʼu luo ʼo te kele.”​—Hepeleo 11:​37, 38; 12:1.

Ko Elia neʼe kau ʼi te kau agatonu ʼaia. Lolotoga te ʼu taʼu e tolu vaelua ʼaē neʼe hoge ai, neʼe foaki tuʼumaʼu e Sehova hana meʼa kai. ʼUluaki, neʼe fakaʼaogaʼi e te ʼAtua te ʼu kolevo ke nātou ʼave ki te polofeta ʼaia he ʼu moʼi pane pea mo he kanoʼi manu. (1 Hau 17:​2-6) Ki muli age, neʼe fakafonu faka milakulo e Sehova te falena pea mo te moʼi lolo ʼa te fafine vitua pea neʼe ina foaki he meʼa kai maʼa Elia. (1 Hau 17:​8-​16) Neʼe mole ko he toe meʼa kai, kae neʼe ina faka fealagia ki te polofeta mo te fafine pea mo tana tama ke nātou maʼuʼuli.

Neʼe toe tokaga ia Sehova ki tana polofeta agatonu ko Selemia ʼi te ʼu temi faigataʼa ʼi te faʼahi ekonomike. Neʼe hāo ia Selemia ʼi te temi ʼaē neʼe puleʼi ai e te kau Papiloni ia Selusalemi, ʼi te temi ʼaē neʼe “kai fakafuafua [ai te hahaʼi] te pane pea mo nātou kai ʼi te tuʼania.” (Esekiele 4:​16) ʼAki te temi, neʼe liliu ʼo faigataʼa ʼaupito te hoge ʼi te kolo, pea neʼe kai e ʼihi fafine te kakano ʼo tanatou ʼu tamaliki. (Tagilāulau 2:​20) Logope la neʼe nofo popūla ia Selemia ʼuhi ko tana faka mafola lototoʼa, neʼe fakatuʼutuʼu e Sehova ke foaki age kia ia ʼi te ʼaho fuli “he moʼi pane . . . ʼo aʼu ki te ʼosi ʼo te pane ʼo te kolo.”​—Selemia 37:⁠21.

Koia, ko Selemia pea mo Elia, neʼe mole lahi tanā meʼa kai. ʼE mole fakahā mai e te Tohi-Tapu pe koteā te meʼa ʼaē neʼe kai e Selemia ʼi te temi ʼaē neʼe ʼosi ai te pane ʼi Selusalemi, pea mo feafeaʼi tana kai ʼi te ʼaho fuli. Kae ʼe tou ʼiloʼi ko Sehova neʼe tokoni kia ia pea neʼe hāo ʼi te temi neʼe faigataʼa ai te hoge.

Ia ʼaho nei, ʼe ʼi ai te hahaʼi māsisiva ʼi te ʼu potu fuli ʼo te malamanei. ʼO mulimuli ki te kautahi ʼo te ʼu Puleʼaga Fakatahi, ko te fenua ʼaē ʼe lahi tāfito ai te hahaʼi māsisiva, ʼe ko Afelika. ʼI te taʼu 1996, ko te kautahi ʼaia neʼe ina fai te tānaki makehe ʼi te ʼu tala logo, ʼo ina ʼui fēnei: “Ko te vaelua ʼo te hahaʼi ʼo Afelika ʼe nātou māsisiva.” Logope la te ʼāsili kovi ʼo te ʼaluʼaga faka ekonomike, kae ʼe tuputupu tuʼumaʼu te hahaʼi ʼo Afelika ʼaē ʼe nātou maʼuliʼi te ʼu pelesepeto faka Tohi-Tapu ʼi tonatou maʼuli pea mo nātou tauhi agatonu ki te ʼAtua, ʼo nātou falala ʼe tokoni anai kia nātou. Koutou vakaʼi te ʼu meʼa ʼaē neʼe hoko ki ʼihi ʼi te tahi ʼu fenua ʼo te mālama maveuveu ʼaenī.

ʼE Nātou Aga Fakahagatonu Tuʼumaʼu

Ko Mikaele,a ʼaē ʼe nofo ʼi Niselia, ʼe ko te tagata gāue kele pea ʼe tonu ke ina fafaga tana ʼu toe e toko ono. ʼE ina ʼui fēnei, “ ʼE faigataʼa ki te tagata ke aga fakahagatonu mokā tonu kia ia ke ina taupau tona famili pea ʼe mole feʼauga hana falā. Kae mokā ʼe ʼau fia fai he ʼu aga fakakākā, pea ʼe ʼau toe manatuʼi te koga tohi ʼo Efesi 4:​28, ʼaē ʼe ʼui fēnei ai: ‘Ko ʼaē ʼe kaihaʼa, ʼaua naʼa toe kaihaʼa, ka ke mamahi ʼo gāue lelei ʼi ʼona nima.’ Koia, kapau ʼe ʼau fia fai he meʼa ʼe kovi, ʼe ʼau ʼui fēnei ʼi toku loto, ‘Neʼe ʼau gāue koa ke ʼau maʼu te paʼaga ʼaia?’ ”

ʼE hoko atu fēnei e Mikaele, “ohage la ko te tahi ʼaho, neʼe ʼau haʼele tokotahi pea neʼe ʼau sio ki te kato neʼe tō ʼi te vesipa. Neʼe mole feala taku pāuiʼi ia ia ʼaē neʼe heka ʼi te vesipa, koia neʼe ʼau toʼo ai te kato ʼaia pea neʼe ʼau sio, ʼe fonu ai te falā! ʼI taku fakaʼaogaʼi te higoa ʼaē neʼe tohi ʼi te loto kato, neʼe ʼau maʼu te tagata ʼaia pea neʼe ʼau liufaki age te kato kia ia.”

ʼE Tonu Ke Tekeʼi Te ʼu Manatu Kovi

Neʼe ʼui fēnei e te tagata ʼe nofo ʼi te Potu Tokelau ʼo Afelika: “Ko he tahi ʼe masiva ʼe hage ko he tahi kua tō ki he luo loloto, pea ʼe kei feala hana sio ki te hila ʼo tuʼa pea mo te hahaʼi ʼaē ʼe nātou fakalaka ia tafa ʼo te luo, kae ʼe mole hona mālohi moʼo pāuiʼi ki he tahi ke haʼu ʼo tokoni kia ia, peʼe ke ina foaki age he tuʼuga ke hake ai ʼo haʼu ki tuʼa.” Koia, ʼe mole ko he meʼa fakapunamaʼuli, mokā tuʼania te hahaʼi pea mo nātou lotomamahi ʼuhi ko te masiva! Māʼiape la mo te ʼu kaugana ʼa te ʼAtua, ʼi tanatou sio ʼaē ki te ʼu koloā ʼa ʼihi, ʼe feala ke nātou manatu ʼe mole ʼaoga ke nātou aga fakahagatonu ʼi tonatou maʼuli. (Vakaʼi ia Pesalemo 73:​2-​13.) ʼE lava feafeaʼi te tekeʼi ʼo te faʼahiga manatu ʼaia?

Ko Petelo, ʼaē ʼe nofo ʼi te Potu Hihifo ʼo Afelika, neʼe kamata tona temi letelete ʼi tana ʼosi gāue ia taʼu e 19 ki te puleʼaga. ʼI te temi nei, ʼe maʼuli ʼaki pe te ʼu kiʼi alokasio. ʼE ʼui e Petelo, “ ʼi te ʼu temi ʼaē ʼe ʼau lotovaivai ai, ʼe ʼau manatuʼi te ʼu meʼa ʼaē neʼe ʼau lau ʼi te Tohi-Tapu pea mo te ʼu tohi ʼo te Sosiete Watch Tower. Ko te tuʼu ʼaenī ʼe puli anai, pea ʼe tou ʼamanaki ki te tahi tuʼu ʼe lelei age.

“ ʼE ʼau toe manatuʼi foki te koga tohi ʼo 1 Petelo 5:​9, ʼaē ʼe ʼui fēnei ai: ‘Koutou fakafeagai [kia Satana], ʼo koutou tuʼu mālohi ʼi te tui, mo ʼiloʼi e koutou, ko te faʼahiga mamahi ʼaia ʼe fakahoko ki tokotou tēhina ʼi te malamanei.’ Koia, ʼe mole ko ʼau tokotahi pe ʼaē ʼe tau mo he ʼu fihifihia. Ko te faʼahiga fakamanatu ʼaia ʼe tokoni kia ʼau ke ʼau tekeʼi te ʼu manatu ʼaē ʼe fakatupu lotomamahi pea mo lotovaivai.”

ʼE hoko atu fēnei e Petelo, “tahi ʼaē meʼa, neʼe lahi te ʼu milakulo ʼaē neʼe fakahoko e Sesu ʼi te kele, kae neʼe mole ina fakalahi te ʼu koloā ʼa te hahaʼi. He koʼe koa ʼe ʼau loto anai ke ina fai te faʼahi ʼaia maʼaku?”

Te Mālohi ʼo Te Faikole

Ko te fakaōvi kia Sehova ʼi te faikole ʼe ko he tahi tokoni ʼaia ke tou tekeʼi te ʼu manatu ʼaē ʼe kovi. ʼI te temi ʼaē neʼe liliu ai ia Malia ko he Fakamoʼoni ʼa Sehova ʼi te taʼu 1960, neʼe līaki ia ia e tona famili. ʼI te temi nei, ʼe kua taʼu 50 tupu pea ʼe selipatea, pea ʼe mole faʼa sino pea ʼe mole lahi te ʼu koloā ʼaē ʼe ina maʼu. Kae ʼe mālohi ʼi te fai faka mafola.

ʼE ʼui fēnei e Malia: “ ʼI te ʼu temi ʼaē ʼe ʼau lotovaivai ai, ʼe ʼau faikole kia Sehova. ʼE ʼau ʼiloʼi ʼe mole ʼi ai he tahi age ʼe feala ke tokoni kia ʼau ohage ko tona fai e Sehova. Kua ʼau ʼiloʼi, ko ia ʼaē ʼe falala kia Sehova, pea ko Sehova ʼe tokoni kia ia. ʼE ʼau manatuʼi tuʼumaʼu te ʼu palalau ʼaē neʼe fai e Tavite ia Pesalemo 37:25: ‘Neʼe ʼau tūpulaga, pea kua ʼau matuʼa foki, kae neʼe mole ʼau sio ki te agatonu kua līaki katoa, pea neʼe mole ʼau sio ki tona hākoga ʼe ina kumi he pane.’

“Tahi ʼaē meʼa, ʼe fakaloto mālohiʼi ʼau e te ʼu fakamatala ʼaē ʼe tou maʼu ʼi Te Tule Leʼo, ʼo totatou ʼu tēhina mo tuagaʼane ʼaē kua matutuʼa. Neʼe tokoni ia Sehova ʼAtua kia nātou, koia ʼe ʼau ʼiloʼi ʼe tokoni tuʼumaʼu anai kia ʼau. ʼE ina tapuakiʼi taku kiʼi gāue ko te fakatau ʼo te fufu [ko te meʼa kai ʼe fai ʼaki te mānioka], pea ʼe feala ke ʼau maʼu te ʼu meʼa ʼaē ʼe ʼaoga kia ʼau ʼi te ʼaho fuli. ʼI ʼihi lakaga, kapau ʼe mole haku falā pea ʼe mole ʼau ʼiloʼi pe koteā te meʼa ʼaē ʼe tonu ke fai, ʼe fekauʼi mai e Sehova he tahi ke ina foaki mai he meʼa ʼofa kia ʼau ʼo ina ʼui fēnei, ‘Tuagaʼane, fakalelei tou loto, ka ke toʼo te meʼa ʼofa ʼaenī.’ ʼE feala ke ʼau falala tuʼumaʼu kia Sehova.”

Te Maʼuhiga ʼo Te Ako ʼo Te Tohi-Tapu

Ko te kau Fakamoʼoni ʼa Sehova ʼe nātou faka maʼuhigaʼi te ako ʼo te Folafola ʼa te ʼAtua, ia te Tohi-Tapu, ʼo kau ai mo nātou ʼaē ʼe māsisiva. Ko Soane, ʼaē ʼe taʼu onogofulu, ʼe gāue pionie (ko te higoa ʼaia ʼo nātou ʼaē ʼe nātou faka mafola te Puleʼaga ʼi te ʼaho fuli) pea ʼe ko te tagata faifekau faka minisitelio ʼi tona kokelekasio. ʼE nofo ʼi te falefata ʼāfea ʼe laufata lua, pea ʼe nofo ai te ʼu famili e 13. Ko tona kogafale ʼe tuʼu ʼi te hūʼaga ʼo te falefata, pea ko tona ʼu kaupā ʼe faʼu ʼaki te ʼu papa. ʼI loto ʼe ʼi ai te ʼu hekaʼaga ʼāfea e lua pea mo te laupapa ʼe tuʼu ai te tuʼuga tohi moʼo ako te Tohi-Tapu, pea ʼe moe ʼi te kiʼi fala veliveli.

Ki muʼa atu, neʼe maʼu e Soane ʼi te ʼaho fuli te tola ʼi tana fakatau pane, kae ʼi te tapuʼi ʼo te fakahū ʼo te fulumeto ki te fenua, neʼe gata ai tana gāue. ʼE ina ʼui fēnei: “ ʼI ʼihi temi, ʼe faigataʼa ʼaupito te maʼuli, kae ʼe ʼau hoko atu taku gāue pionie. ʼE ko Sehova ʼaē ʼe tokoni kia ʼau. ʼE ʼau fai te ʼu kiʼi gāue fuli ʼaē ʼe feala ke ʼau fai, pea ʼe mole ʼau kole ki he tahi ʼu hahaʼi ke nātou fafaga ia ʼau, logope la ʼe tokoni kia ʼau te ʼu tēhina ʼo te kokelekasio. ʼE nātou tokoni mai kia ʼau ʼi taku kumi gāue pea ʼi ʼihi lakaga, ʼe nātou foaki mai haku falā.

“ ʼE ʼau fakatuʼutuʼu hoku temi ke ʼau lau te Tohi-Tapu pea mo te ʼu tohi ʼa te Sosiete Watch Tower. ʼE ʼau ako ʼi te māfoatā ʼi te temi ʼaē ʼe kei momoe ai te hahaʼi ʼo te loto fale, pea ʼe ʼau lautohi ʼi te afiafi ʼosi, mo kapau ʼe haʼele te hila. ʼE ʼau ʼiloʼi ʼe tonu ke ʼau fai tuʼumaʼu taku ako takitokotahi.”

ʼE Nātou Akoʼi Tanatou ʼu Fānau Ke Nātou Maʼu Te Maʼuli Heʼegata

Ko Taniela, kua mate tona ʼohoana pea ko ʼana toe e toko ono. ʼI te taʼu 1985, ʼi tana ʼosi gāue ia taʼu e 25, neʼe mole kei ʼi ai hana gāue, kae neʼe ina maʼu he tahi gāue ʼi te fale koloā. ʼE ina ʼui fēnei, “ ʼe faigataʼa te maʼuli ʼo te famili ʼi te faʼahi faka ekonomike. ʼI te temi nei, ʼe feala pe ke mātou kakai tuʼa tahi ʼi te ʼaho. ʼI te tahi temi, neʼe mole mātou kakai lolotoga ʼaho e tolu. Neʼe mātou maʼuʼuli ʼaki pe te moʼi vai.”

Ko Taniela ʼe ko te tagata ʼāfea ʼi te kokelekasio. ʼE ina ʼui fēnei, “ ʼe ʼau ʼalu tuʼumaʼu ki te ʼu fono faka Kilisitiano, pea ʼe ʼau fakahoko toku ʼu maʼua faka teokalatike. Kapau ʼe ʼi ai he ʼu gāue ʼe tonu ke fai ʼi te Fale ʼo te Puleʼaga, pea ʼe ʼau faiga ke ʼau kau ki te ʼu gāue ʼaia. Pea ʼi te temi ʼaē ʼe faigataʼa ʼaupito ai toku maʼuli, ʼe ʼau manatuʼi te ʼu palalau ʼaē neʼe fai e Petelo kia Sesu ia Soane 6:​68: ‘ ʼAliki, ke mātou ʼolo la kia ai?’ Kapau ʼe ʼau tuku taku tauhi kia Sehova, pea ʼe ʼau ʼalu anai kifea? Ko te ʼu palalau ʼa Paulo ʼaē ʼe tou maʼu ia Loma 8:​35-​39, ʼe ko he fakaloto mālohi kia ʼau koteʼuhi ʼe nātou fakahā mai, ʼe mole he meʼa ʼe feala ke ina fakamavae tatou mai te ʼofa ʼa te ʼAtua pea mo Kilisito. ʼE ʼau akoʼi ki taku fānau te faʼahiga manatu ʼaia. ʼE ʼau ʼui tuʼumaʼu kia nātou ʼe mole tonu ke nātou mavae ia Sehova.” Ko te ʼu faiga mālohi ʼa Taniela, ʼo feiā mo tana fai tuʼumaʼu te ako faka famili ʼo te Tohi-Tapu, neʼe ina uga tana fānau ke nātou fai te meʼa ʼaē ʼe lelei.

Ko He Loto Fia Foaki

ʼE feala pe ke kita manatu, ko nātou ʼe māsisiva ʼaupito ʼe mole feala ke nātou foaki he paʼaga moʼo fakahaʼele ki muʼa te ʼu meʼa ʼo te Puleʼaga. Kae ʼe mole tonu te manatu ʼaia. (Vakaʼi ia Luka 21:​1-4.) Ko ʼihi Fakamoʼoni ʼi Ghana ʼaē ʼe nātou gāue kele neʼe nātou faka tuʼakoi he kiʼi koga ʼo tonatou kele ke fakaʼaogaʼi ki te fakahaʼele ki muʼa ʼo te ʼu meʼa ʼo te Puleʼaga ʼa te ʼAtua. Ka fakatau te ʼu fua ʼo te koga ʼaia ʼo tanatou kele, pea ʼe nātou fakaʼaogaʼi te falā ʼaia ki te meʼa ʼaē neʼe kua fakatuʼutuʼu ke nātou fai ʼaki, ʼo nātou ʼai te falā ʼaia ki te kesi ʼo te Fale ʼo te Puleʼaga ʼo te kau Fakamoʼoni ʼa Sehova ʼo te potu ʼaia.

Ko Joan, ʼaē ʼe nofo ʼi te lotomalie ʼo Afelika, ʼe pionie. ʼE ina fakatau he ʼu pane, ke feala hana taupau tona ʼohoana ʼaē ʼe māʼimoa pea mo te tahi ʼu hahaʼi e toko fā. ʼI te temi ʼaē neʼe ʼaoga ai ki tana kokelekasio ke ʼi ai hona ʼu hekaʼaga ki te Fale ʼo te Puleʼaga, neʼe loto e te famili ʼa Joan ke nātou foaki fuli tanatou falā. ʼI tanatou fai te faʼahi ʼaia, neʼe mole kei ʼi ai hanatou falā. Kae ʼi te ʼaho ake, neʼe haʼu te tahi ʼo huʼi tona maʼua kia nātou, neʼe kua tonu ke ina huʼi kia nātou talu mai fualoa, ʼo ina foaki kia nātou he falā neʼe mole kei nātou ʼamanaki ʼe huʼi age anai!

ʼE fiafia ia Joan pea ʼe mole tuʼania fau ki te paʼaga. “ ʼE ʼau fakahā age kia Sehova toku ʼu fihifihia ʼi te faikole, pea ʼe ʼau ʼalu ʼo faka mafola. ʼE tou ʼiloʼi, ʼe mole feala ke fetogi te tuʼu ʼo te ʼu faʼahiga meʼa ʼaenī. Kae ʼe tou ʼiloʼi ʼe tokaga anai ia Sehova ke tou maʼu te ʼu meʼa ʼaē ʼe ʼaoga kia tatou.”

Tou Faiga Ke Tou Gāue

ʼE ʼiloa te kau Fakamoʼoni ʼa Sehova ʼuhi ko tanatou feʼofaniʼaki. (Soane 13:35) Ko nātou ʼaē ʼe maʼu koloā ʼe nātou tokoni kia nātou ʼaē ʼe māsisiva. Ko te meʼa ʼaē ʼe nātou tau fai, ʼe nātou foaki age kia nātou he ʼu meʼa ʼofa pea ʼi ʼihi temi ʼe nātou kumi he ʼu gāue maʼa nātou.

Ko Mark, ʼaē ʼe nofo ʼi Congo, ʼe ko te tagata kilia. ʼE māʼimoa tona ʼu vaʼe pea mo tona ʼu kauʼi tuhi ʼuhi ko te mahaki ʼaia. Kae ʼe ina fakaʼaogaʼi te ʼu toko moʼo lagolago ki tana haʼele. ʼI te temi ʼaē neʼe fia tauhi ai ia Mark kia Sehova, neʼe ina kamata fai te ʼu fetogi maʼuhiga ʼi tona maʼuli. Neʼe mole kei kole meʼa kai, kae neʼe kamata gaohi e ia totonu tana meʼa kai. Tahi ʼaē meʼa, neʼe ina kamata fakatau te ʼu piliki neʼe ina faʼu ʼaki te kele.

Logope la tona māʼimoa, kae neʼe haga fai aipe e Mark tana gāue ʼaia. ʼAki te temi, neʼe ina totogi tona moʼi kele pea neʼe ina laga ai tona kiʼi ʼapi. Ia ʼaho nei, ko Mark ʼe ko te tagata ʼāfea ʼi tana kokelekasio, pea ʼe fakaʼapaʼapa te hahaʼi ʼo tona kolo kia ia. Pea ʼi te temi nei, ʼe tokoni ki te hahaʼi ʼaē ʼe māsisiva.

ʼE mahino ia, ʼe lahi te ʼu fenua ʼe mole feala ke kita maʼu ai hakita gāue. Ko te tahi tagata ʼāfea ʼe gāue ʼi te filiale ʼo te Sosiete Watch Tower ʼi te lotomalie ʼo Afelika neʼe ina tohi fēnei: “ ʼE tokolahi te ʼu tēhina ʼe mole hanatou gāue. ʼE faiga e ʼihi ke nātou maʼu hanatou matani gāue ʼa nātou totonu, kae ʼe faigataʼa te fai ʼo te faʼahi ʼaia. Neʼe fai e ʼihi te tonu ʼaē, mai tona ʼuhiga ʼaē ʼe nātou mamahi anai tatau aipe pe koteā tonatou ʼu faiga, koia ʼe mole nātou faka maʼuhigaʼi anai te ʼu meʼa fakasino pea ʼe nātou gāue pionie anai. ʼI tanatou fai te faʼahi ʼaia, ʼe tokolahi ia nātou ʼaē ʼe nātou ʼui, ʼe lahi age te ʼu tapuakina ʼaē ʼe nātou maʼu ai ʼi te ʼu kiʼi falā ʼaē neʼe feala ke nātou maʼu ʼaki he gāue.”

ʼE Tokaga Ia Sehova Ki Tana Hahaʼi

Neʼe ʼui e Sesu Kilisito ʼo ʼuhiga mo ia: “ ʼE maʼu luo te ʼu lenato mo te ʼu manulele ʼo te lagi ʼonatou fātaʼi, kae ʼe mole maʼu e te Foha ʼo te tagata he faʼahi ke maleʼe kiai tona ʼulu.” (Luka 9:​58) ʼE tatau mo te ʼu meʼa ʼaē neʼe tohi e te ʼapositolo ko Paulo, ʼo fēnei: “ ʼO kaku mai ki te hola ʼaenī, ʼe mātou hālofia mo fia ʼinu, ʼe mātou telefua, ʼe nukinuki mātou pea ʼe mātou hala mo ʼapi.”​—1 Kolonito 4:​11.

Ko Sesu pea mo Paulo neʼe mole nā loto ke lahi tonā ʼu koloā, ke feala ai hanā fakahoko fakalelei tonā minisitelio. ʼE tokolahi te kau Kilisitiano ia ʼaho nei ʼe nātou māsisiva koteʼuhi ʼe mole feala ke fetogi tonatou ʼaluʼaga. Kae ʼe nātou maʼuliʼi te ʼu pelesepeto faka Tohi-Tapu pea mo faiga mālohi ke nātou tauhi ki te ʼAtua. ʼE nātou ʼiloʼi ʼe ʼofa moʼoni ia Sehova kia nātou, heʼe nātou sio ki te fakahoko moʼoni ʼo te ʼu palalau ʼaenī ʼa Sesu: “Kae koutou fua kumi te puleʼaga ʼo selo mo tana susitisia pea ʼe foaki atu anai kia koutou ia meʼa [fakasino] fuape ʼaia.” (Mateo 6:​25-​33) Tahi ʼaē meʼa, ko te ʼu kaugana māsisiva ʼaia ʼa te ʼAtua ʼe nātou sio tonu ki te moʼoni ʼo te ʼu palalau ʼaenī, “ko te tapuakina ʼa Sehova​—koʼena te meʼa ʼaē ʼe ina fakakoloaʼia.”​—Tāʼaga Lea 10:22.

[Nota ʼi te lalo pasina]

[Talanoa ʼo te pasina 6]

Ko Ai Te ‘Hahaʼi ʼAē ʼe Nātou Maʼuliʼi Te Folafola’?

ʼO MULIMULI ki te sivi ʼaē neʼe fai e te tagata fai sivisivi ko Gallup ʼi te taʼu 1994, ko te toko 96 Amelika ʼi te teau “ ʼe nātou tui ki te ʼAtua peʼe ki he laumālie ʼe ina puleʼi te ʼatulaulau.” Tahi ʼaē meʼa, neʼe ʼui fēnei e te sulunale U.S.News & World Report, “ ʼe lahi age te ʼu ʼēkelesia ʼi Amelika ʼi te tahi ʼu fenua ʼo te Kele.” Logope la ʼe hage ko te hahaʼi ʼo te fenua ʼaia ʼe nātou pipiki ki te ʼAtua, kae neʼe ʼui fēnei e te tagata fai sivisivi ko George Gallup, Jr.: “Ko te meʼa ʼaē ʼe fakapunamaʼuli tāfito, ko te tokolahi ʼo te hahaʼi Amelika, ʼe mole nātou ʼiloʼi pe koteā te meʼa ʼaē ʼe nātou tui kiai pe koteā te tupuʼaga ʼo tanatou tui kiai.”

ʼE hā lelei ʼi te ʼu sivisivi ʼaia, ʼe lahi ʼaupito te kehekehe ʼo te ʼu meʼa ʼaē ʼe tui kiai te hahaʼi pea mo te ʼu aga ʼaē ʼe nātou fai. Ohage la, ʼe ʼui fēnei e te tagata faitohi ko Jeffery Sheller, “ko te hahaʼi ʼaē ʼe nātou sivi te ʼu meʼa faka sosiale ʼe nātou fakatokagaʼi, ko te ʼu potu ʼaē ʼe lahi ʼaupito ai te ʼu fai fakapō, ʼe ko te ʼu potu ʼaē ʼe lahi ai te hahaʼi ʼaē ʼe nātou kau ki he ʼu lotu pea mo nātou maʼuliʼi tanatou tui.”

ʼE mole tonu ke tou punamaʼuli ki te faʼahi ʼaia. Koteā tona tupuʼaga? Koteʼuhi ʼi te ʼuluaki sēkulō, neʼe fai e te ʼapositolo ko Paulo te fakatokaga ki te kau Kilisitiano ke nātou fakamamaʼo mai ia nātou ʼaē “ ʼe nātou fakahā ʼe nātou ʼiloʼi te ʼAtua, kae ʼe nātou fakafisi ki ai ʼi ʼanatou gāue.” (Tito 1:16) Tahi ʼaē meʼa, neʼe fakahā e Paulo ki te talavou ko Timoteo, ko “te ʼu ʼaho fakamuli,” ʼe ʼi ai anai te ʼu hahaʼi “ ʼe hage ʼe nātou pipiki ki te ʼAtua, kae nātou lītuʼa ki tona mālohi.”​—2 Timoteo 3:1, 5.

Ko te kau Kilisitiano moʼoni, ʼe nātou faiga mālohi ke nātou mulimuli ki te fakatotonu ʼa Sesu Kilisito, ke nātou “ ʼolo ʼo fakahoko he ʼu tisipulo ʼi te ʼatu puleʼaga.” (Mateo 28:19) ʼI tanatou fai te faʼahi ʼaia, ʼe nātou “liliu ai ko he ʼu hahaʼi ʼe nātou maʼuliʼi te folafola, ka mole ko he ʼu hahaʼi ʼe nātou fagono pe kiai”​—Sake 1:​22.

[Paki ʼo te pasina 7]

ʼE faka maʼuhigaʼi te ako ʼo te Tohi-Tapu e te hahaʼi ʼi te malamanei katoa