ʼE Lava Feafeaʼi Hakita Taupau Tokita Fiafia ʼi Te Gāue Temi Katoa Ki Te Puleʼaga?
ʼE HĀ lelei mai ʼi te fakahoko ʼo te ʼu lea faka polofeta ʼa te Tohi-Tapu, ʼe tou maʼuʼuli ʼi te ʼu ʼaho fakamuli ʼo te tuʼu agakovi ʼaenī ʼaē ʼe mole tui ki te ʼAtua. ʼI tanatou ʼiloʼi ia te faʼahi ʼaia, ʼe fakaʼaogaʼi lahi e te kau kaugana ʼa Sehova ʼAtua tonatou temi ki te fai faka mafola ʼo te logo lelei ʼo tona Puleʼaga. Ko te toko 600 000 tupu kau Fakamoʼoni ʼa Sehova neʼe nātou fakatuʼutuʼu ʼi tonatou maʼuli ke nātou kau ki te gāue ʼaia, ʼo nātou gāue temi katoa. Ko ʼihi ia nātou ʼe nātou kalagaʼi te Puleʼaga ʼi te ʼaho fuli, ko nātou ʼaia ʼe ko te kau pionie. ʼE gāue ʼihi ʼi te ʼu Petele, peʼe ʼi te nofoʼaga faka malamanei ʼa te Sosiete Watch Tower peʼe ʼi tona ʼu filiale. Ko ʼihi ʼe nātou misionea peʼe nātou tagata taupau feʼaluʼaki.
ʼE fakahā mai e te Tohi-Tapu, ʼi te ʼu ʼaho fakamuli, ʼe ʼi ai anai “he ʼu temi faigataʼa.” (2 Timoteo 3:1-5) Ko te Tohi-Tapu Faka Keleka ʼe ina fakaʼaogaʼi te kupuʼi palalau ʼe faka ʼuhiga ki “he ʼu temi ʼe kua fakakatofa ki te aga fekai.” Koia, ʼe mole tonu ke kita ʼamanaki, ʼe fīmālie anai tokita maʼuli ia ʼaho nei. ʼE lagi faigataʼa ʼaupito te ʼu fihifihia ʼaē ʼe tau mo ʼihi minisi Kilisitiano, pea lagi nātou fai te fehuʼi ʼaenī, ‘ ʼE feala koa ke ʼau hoko atu taku gāue temi katoa, peʼe tonu koa ke ʼau tuku te gāue ʼaia?’
Koteā te ʼu meʼa ʼaē ʼe feala ke nātou uga he tahi ʼe pionie, peʼe gāue ʼi te Petele, peʼe ko he tagata taupau feʼaluʼaki peʼe ko he misionea, ke ina fai he ʼu fetogi ʼo ʼuhiga mo tana gāue temi katoa? ʼE lagi tau mo he mahaki peʼe lagi maʼua ke ina taupau he tahi ʼi te famili ʼe kua matuʼa peʼe mahaki. ʼE lagi ko he taumatuʼa kua nā maʼu hanā tamasiʼi. Ko he tahi ʼe ina tuku tana gāue temi katoa ʼuhi ko te ʼu meʼa ʼaia peʼe ʼuhi ko he ʼu maʼua ʼe fakatafito ki te Tohi-Tapu, ʼe mole tonu ke ufiufi koteʼuhi neʼe ina fai te fetogi ʼaia.
Kae e feafeaʼi mo kapau ʼe fakatuʼutuʼu e he tahi ke ina tuku tana gāue temi katoa koteʼuhi ʼe mole kei fiafia ʼi te gāue ʼaia? ʼE lagi sio he pionie, ʼe mole faʼa tali lelei e te hahaʼi tana fai faka mafola, pea ʼe ina lagaʼi te fehuʼi ʼaenī, ‘He koʼe ʼe tonu ke ʼau fai tuʼumaʼu he ʼu sakilifisio ʼi toku maʼuli, kae ʼe tokosiʼi ia nātou ʼaē ʼe nātou fakalogo ki te logo lelei?’ Lagi ʼe mole fiafia he tēhina pe ko he tuagaʼane ʼo te Petele ʼi te gāue ʼaē neʼe hinoʼi age ke ina fai. Peʼe lagi ko he mahaki fakakinakina, logope la ʼe mole ina fakamālohiʼi ia ia ke ina fakagata tona selevisi pionie, kae ʼaki te temi, ʼe feala ke fakatupu lotomamahi kia ia. ʼE lava feafeaʼi ki te kau Kilisitiano ke nātou taupau tanatou fiafia? Tou vakaʼi te manatu ʼa ʼihi tēhina mo tuagaʼane kua lahi te ʼu taʼu ʼaē neʼe nātou gāue temi katoa ai.
Tou Tauʼi Te Lotomamahi
Ko Anny, ʼaē ʼe nofo ʼi Suisi, neʼe kau ki te Faleako ʼo Kalaate ʼa te Sosiete Watchtower ʼi te taʼu 1950. Neʼe ina ʼamanaki ke hinoʼi ia ia ke ʼalu ki he tahi fenua. Kae ʼi te temi ʼaē neʼe toe hinoʼi ai ke ʼalu ki Eulopa ʼo gāue ʼi te Petele, neʼe lotomamahi ia Anny. Kae neʼe ina tali tana gāue ʼaē ko te Fakaliliu pea ʼe kei ina fai te gāue ʼaia ʼi te temi nei. Neʼe ina tauʼi feafeaʼi tana lotomamahi? ʼE fakamahino fēnei e Anny, “neʼe lahi, pea ʼe kei lahi te gāue ʼaē ʼe tonu ke fai. ʼE maʼuhiga age te fai ʼo te gāue ʼaia ʼi te ʼu meʼa ʼaē ʼi toku loto pea mo te ʼu meʼa ʼaē ʼe ʼau leleiʼia.”
Kapau ʼe mole tou fiafia ʼi te gāue ʼaē neʼe hinoʼi mai ke tou fai, pea ʼe lagi feala ke tou maʼu te faʼahiga manatu ʼaē ʼa Anny. Ko te ʼu meʼa ʼaē ʼe tou leleiʼia ʼe mole ko te meʼa ʼaia ʼaē ʼe maʼuhiga. Ko te meʼa ʼaē ʼe maʼuhiga tāfito, ʼe ko te fakahoko fakalelei ʼo te ʼu maʼua fuli ʼaē ʼe pipiki ki te faka mafola ʼo te Puleʼaga. ʼE fakahā mai kia tatou ʼi te koga tohi ʼo Tāʼaga Lea 14:23: “Ko te ʼu gāue fuli, ʼe ʼi ai tona ʼu fua lelei.” Tatau aipe pe koteā te gāue ʼaē neʼe hinoʼi mai ke tou fai, ko tatatou fakahoko fakalelei ʼo te maʼua ʼaia ʼe lagolago ki te fakahoko ʼo te gāue ʼo te Puleʼaga. Pea ʼe feala ke tou maʼu ai he loto fīmālie—ei, ke tou fiafia—ʼi te gāue ʼaia ʼaē neʼe tuku mai e te ʼAtua ke tou fai.—Vakaʼi ia 1 Kolonito 12:18, 27, 28.
Tou Felogoi Lelei Mo ʼIhi
Ko te gāue temi katoa, ʼe kau kiai tatatou felāveʼi mo te ʼu hahaʼi kehekehe—ʼi te gāue faka mafola, ʼi te Petele, ʼi te ʼu nofoʼaga ʼo te kau misionea, ʼi te ʼu kokelekasio kehekehe mo kapau ko kita ko he tagata taupau feʼaluʼaki. Koia, ko te fiafia ʼe fakalogo ki te lelei ʼo tatatou ʼu felogoi mo ʼihi. Kae ko te ʼu ‘temi fekai’ ʼaē ʼe tou maʼuʼuli ai, ʼe fakatupu kovi ki te ʼu felogoi lelei ʼa te hahaʼi. Ko ia ʼaē ʼe gāue temi katoa, ʼe lava feafeaʼi hana taupau maʼu tona fiafia, tatau aipe pe neʼe fakatupu mamahi he tahi kia ia? ʼE ʼi ai te ʼu meʼa ʼe feala ke tou tāʼofi ʼi te faʼifaʼitaki ʼa Wilhelm.
Ko Wilhelm neʼe hū ki te famili ʼo te Petele ʼo Eulopa ʼi te taʼu 1947. Ki muli age, neʼe kau ki te gāue pionie pea neʼe tagata taupau feʼaluʼaki. ʼE fakamahino fēnei e Wilhelm, “kapau ʼe ma fakatokagaʼi mo toku ʼohoana he ʼu meʼa ʼe mole ma leleiʼia peʼe fakatupu tuʼania kia māua, ʼe ma fakahā kia Sehova te ʼu meʼa ʼaē ʼi tomā loto, pea ʼe ma tuku ke ina fai he ʼu puleʼaki moʼo fakatokatoka ʼo te ʼu fihifihia ʼaia.”—Pesalemo 37:5.
Lagi neʼe koutou lotomamahi ʼuhi ko te aga ʼa he tēhina pe ko he tuagaʼane, he neʼe ina fai atu he ʼu palalau heʼe fakaʼapaʼapa kia koutou. Koutou manatuʼi, ko tatou fuli ʼe ʼi ai te ʼu temi ʼe tou hala ai ʼi tatatou ʼu palalau. (Sake 3:2) He koʼe ʼe mole koutou fakaʼaogaʼi te lakaga ʼaia ke koutou fakaōvi ai kia “Ia ʼaē ʼe fagono ki te faikole”? (Pesalemo 65:2) Koutou fakahā kia Sehova tokotou fihifihia, pea koutou tuku ke ina fakatokatoka. Kapau ʼe loto e Sehova ke fetogi te ʼaluʼaga ʼaia, pea ʼe ina fai anai te faʼahi ʼaia. Ko nātou ʼaē ʼe nonofo ʼi te ʼu nofoʼaga ʼa te kau misionea, ʼe lagi ʼaoga ke nātou manatuʼi te faʼahi ʼaia, ʼaē ka tokoni anai kia nātou ke nātou taupau tonatou fiafia ʼi tanatou tauhi kia Sehova, māʼiape la mo te ʼu temi ʼaē ʼe faigataʼa ai te ʼu felogoi mo ʼihi.
Mokā Koutou Mahamahaki
Ko te tokolahi ʼo te hahaʼi ʼe nātou mahamahaki. Māʼiape la mo te kau tūpulaga ʼe nātou mamahi ʼuhi ko te lotohoha pe ko te ʼu mahaki. ʼUhi ko te mahaki, neʼe tonu ke fakagata e ʼihi tanatou gāue temi katoa, kae neʼe nātou haga fai aipe he gāue lelei ʼi te fai faka mafola ʼo te Puleʼaga. Kae ʼe ʼi ai ʼihi, ʼe nātou hoko atu tanatou gāue temi katoa logope la peʼe nātou mahaki. Ohage la, ko te faʼifaʼitaki ʼaenī ʼa Hartmut pea mo Gislind.
Ko Hartmut pea mo Gislind ʼe ko te taumatuʼa neʼe gāue pionie, mo misionea pea mo gāue feʼaluʼaki lolotoga taʼu e 30. Neʼe nā mahaki kovi ʼi ʼihi temi, ʼo fakatupu kovi ki tonā sino pea mo nā lotomamahi ai. Kae neʼe lelei ʼaupito tanā gāue pea neʼe nā fakaloto mālohiʼi ia nātou ʼaē ʼe tau mo te ʼu fihifihia ohage ko nāua. Koteā te tokoni ʼaē ʼe nā fai mai kia tatou? “Koutou tokagaʼi tāfito te ka haʼu ka mole ko te temi ki muʼa atu. Koutou faiga ke koutou fakaʼaogaʼi fakalelei tokotou temi. ʼI te ʼaho fuli, ʼe lagi ʼi ai anai he faka fealagia pe e tahi ke koutou fakavikiviki ai kia Sehova. Koutou fakaʼaogaʼi te faka fealagia ʼaia, pea ke koutou fiafia ai.”
Koutou vakaʼi te ʼu meʼa ʼaē neʼe hoko kia Hannelore. Neʼe mahaki kovi, pea neʼe faigataʼa tona maʼuli ʼi te ʼu taʼu e 30 ʼo tana gāue pionie, mo tana gāue misionea, mo tana feʼaluʼaki mo tona ʼohoana ʼi te ʼu kokelekasio, pea mo tana gāue ʼi te Petele. ʼE ʼui fēnei e Hannelore: “ ʼE ʼau manatuʼi tāfito te ʼu palalau ʼaē neʼe fai e Satana—ʼi tana ʼui ʼaē ko te tagata ʼe tauhi kia Sehova ʼi te temi pe ʼaē ʼe maui mālie ai. ʼI taku kātakiʼi ia te ʼu ʼahiʼahi, ʼe feala haku fakamoʼoni, ʼe loi ia Satana.” Ko te faʼahi ʼaia ʼe ko he fakaloto mālohi kia koutou. Koutou manatuʼi, ko takotou nofo agatonu kia Sehova ʼi te ʼu ʼahiʼahi, ʼe ko he meʼa maʼuhiga kia ia.—Sopo 1:8-12; Tāʼaga Lea 27:11.
Kapau ʼe koutou faiga ke koutou fakafuafua lelei peʼe tonu ke koutou tuku takotou gāue temi katoa ʼuhi ko tokotou mahaki, pea ʼe lelei ke koutou vakaʼi te ʼu agaaga e lua ʼo te lea faka polofeta ʼa Sesu Kilisito ʼo ʼuhiga mo te fakaʼosi ʼo te tuʼu ʼo te ʼu faʼahiga meʼa ʼaenī. Neʼe fakakikite e Sesu ʼe hoko anai te ʼu mahaki ʼi te potu fuli pe. Tahi ʼaē meʼa, neʼe ina ʼui fēnei: “Pea ʼe fagonogono anai te logo lelei ʼaenī ʼo te puleʼaga ki te kelekele katoa.” (Mateo 24:3, 14; Luka 21:11) Neʼe ʼiloʼi e Sesu, ʼi te ʼu ʼaho fakamuli ʼe tau anai tana kau tisipulo mo te ʼu mahaki. Kae neʼe mahino kia ia, ʼe fakahoko anai te gāue fai faka mafola e te hahaʼi ʼaē ʼe mālolohi, pea ʼo feiā mo nātou ʼaē ʼe mahamahaki. Kapau ʼe feala hatatou hoko atu tatatou gāue temi katoa logope la peʼe tou mahamahaki, pea ʼe manatuʼi anai e Sehova totatou ʼofa ʼaē ki tona Huafa.—Hepeleo 6:10.
Tou Taupau Totatou Fiafia Logope La Te Mole Tokagaʼi e Te Hahaʼi Ia Te Logo Lelei
ʼE feala ke tou lotomamahi ʼuhi ko te mole fia fakalogo ʼa te hahaʼi mokā tou ʼolo ʼo fakahā age te Puleʼaga kia nātou. ʼE ʼui fēnei e te tēhina pionie, “māʼiape la mo te kau pionie, ʼe faigataʼa tanatou fai palalau mo te hahaʼi. Ko tatou fuli, ʼe tonu ke tou faiga mālohi ke tou taupau totatou fiafia.” Ei, ʼe feala ke puli totatou fiafia ʼi te fai faka mafola ʼuhi ko te mole fia logo ʼa te hahaʼi ki te logo lelei. Koia, ʼe feala feafeaʼi ki te kau pionie ʼaē ʼe nātou tau mo te fihifihia ʼaia ke nātou taupau tonatou fiafia? Ko te ʼu tēhina mo tuagaʼane ʼe kua fualoa tanatou pionie, ʼe nātou fai te ʼu tokoni ʼaē ʼe hoa mai, he kua nātou ʼahiʼahiʼi pea mo nātou maʼu ai te ʼu fua lelei.
Ko te mole fia logo ʼa te hahaʼi ki te logo lelei ʼe ko he fihifihia moʼoni, kae ʼe feala ke fai he ʼu puleʼaki. Ko te fihifihia ʼaia ʼaē kua mafola, ʼe mole ko he tupuʼaga ke kita tuku ai takita gāue pionie. ʼE feala hatatou taupau totatou fiafia mo kapau ʼe tou fakatuʼutuʼu he temi ke tou ako fakalelei ai te Tohi-Tapu. ʼE ina ‘teuteuʼi tatou ʼo ʼuhiga mo te ʼu gāue lelei fuape,’ ʼo kau ai mo te faka mafola kia nātou ʼaē ʼe mole nātou fia logo ki te logo lelei. (2 Timoteo 3:16, 17) Logope la neʼe mole fia fakalogo te hahaʼi ki te polofeta ko Selemia, kae neʼe ina hoko atu tana gāue. (Selemia 7:27) Kapau ʼe tou ako te Tohi-Tapu ʼaki he tahi ʼu tohi faka Kilisitiano, pea ʼe fua lelei anai kia tatou, mo kapau ʼe tou fakatokagaʼi te ʼu puani ʼaē ʼe feala ke nātou fakamālohiʼi tatatou tui pea mo tokoni kia tatou ke tou kātakiʼi te mole fia logo ʼa te hahaʼi ki te logo lelei.
ʼI tatatou ʼiloʼi ia te faigataʼa ʼo te faʼahi ʼaia, tou vakaʼi peʼe feafeaʼi tatatou aga kia nātou ʼaē ʼe tou faka mafola ki ai. He koʼe ʼe mole nātou fia logo ki te logo lelei? Ko te tahi tupuʼaga ʼo te faʼahi ʼaia ʼi te ʼu fenua ʼo Eulopa, ʼe ko te mole kei leleiʼia e te hahaʼi ia te ʼu lotu hala. ʼE mole kei manatu te hahaʼi, ʼe ʼaoga kia nātou te lotu ʼi tonatou maʼuli, pea ʼe mole kei nātou fia kau kiai. ʼE tonu ke tou fai palalau ʼo ʼuhiga mo te ʼu meʼa ʼaē ʼe nātou leleiʼia pea mo te ʼu fihifihia ʼaē ʼe tau mo nātou, ohage la ko te mole maʼu ʼo he gāue, ko te ʼu mahaki, te agamālohi, te fakapalatahi, te agaaga ʼo te kele, pea mo te ʼu tau ʼaē ʼe feala ke hoko.
ʼI tatatou ʼu ʼuluaki palalau, ʼe lagi tou talanoa anai ki he meʼa ʼe leleiʼia e te hahaʼi ʼo te potu ʼaia. Ko te meʼa ʼaia, ʼaē neʼe faiga ke fai e Dietmar ʼi tana fai faka mafola ʼi te kolo ʼaē neʼe mole faʼa fia logo ai te hahaʼi. Ko te tagata neʼe ina ʼui kia ia, neʼe hoko te meʼa fakaʼofaʼofa ʼaupito ʼi te kolo ʼi te ʼanāfi. ʼI te ʼu ʼapi fuli ʼaē neʼe ʼalu kiai ia Dietmar, neʼe ina fakahā tona ʼofa ki te hahaʼi ʼi te meʼa fakaʼofaʼofa ʼaē neʼe hoko. ʼE ina ʼui fēnei, “ ʼI te temi pe ʼaia, ko te hahaʼi neʼe nātou kamata fai palalau mo ʼau. Neʼe nātou manatu fuli ki te meʼa fakaʼofaʼofa ʼaia ʼaē neʼe hoko. Neʼe lahi te hahaʼi ʼaē neʼe ʼau fai palalau mo nātou ʼi te ʼaho ʼaia, koteʼuhi neʼe ʼau fia ʼiloʼi papau te ʼu meʼa ʼaē neʼe hoko ʼi tonatou maʼuli.”
ʼE tonu ke tou fakahā te logo ʼo te Puleʼaga ki te hahaʼi, ʼi te potu fuli pe ʼaē ʼe tou felāveʼi ai mo nātou. Ko te fagonogono faigamālie ʼe feala ke fua lelei, pea ʼe feala hatatou teuteuʼi ki te gāue ʼaia ʼo tou fakaʼaogaʼi te ʼu faʼifaʼitaki ʼaē ʼe tou maʼu ʼi te ʼu tohi ʼa te Sosiete. ʼE feala hatatou fiafia mo kapau ʼe tou fai palalau mo te hahaʼi peʼe tou tuku ki te hahaʼi te ʼu nusipepa ʼo Te Tule Leʼo pea mo te Réveillez-vous! Kapau neʼe tou fai he ʼu ʼaʼahi pea mo kamata he ako Tohi-Tapu, ʼe lagi tou maʼu anai te tahi ako mo kapau ʼe tou fai te fehuʼi ʼaenī: “ ʼE koutou ʼiloʼi koa la peʼe ʼi ai he tahi kehe ʼe ina fia ako te Tohi-Tapu?” ʼE lagi feala ke kamata ai te tahi ako Tohi-Tapu. ʼI te ʼu lakaga fuli pe, tou faiga mālohi, ʼo tou falala kia Sehova ʼi te faikole, pea ke ʼaua naʼa tou lotovaivai ʼuhi ko te mole fia logo ʼa te hahaʼi ki te logo lelei.
Ko Te Fakaloto Mālohi ʼa ʼIhi
Ko Jürgen pea mo Christiane neʼe nā pionie pea mo gāue feʼaluʼaki lolotoga taʼu e 30. Neʼe hinoʼi nāua ke nā fai faka mafola ʼi te fenua neʼe fehiʼa ai te hahaʼi ki te logo lelei pea mole nātou fia logo kiai. Neʼe ʼaoga ʼaupito kia Jürgen pea mo tona ʼohoana ke nā maʼu he fakaloto mālohi! Kae neʼe mole foaki e te kokelekasio te fakaloto mālohi ʼaia ʼi te temi ʼaē neʼe ʼaoga ai kia nāua.
Koia, ʼe ʼiloʼi papau e Jürgen “ko te kau pionie, ʼe tau mo nātou te ʼu temi faigataʼa. ʼE tonu ke lahi te ʼu fakaloto mālohi ʼaē ʼe foaki kia nātou e te kau tagata ʼāfea pea mo te ʼu tēhina.” Neʼe ʼui age e Sehova kia Moisese ke ina fakaloto mālohiʼi pea mo fakamālohiʼi ia Sosue. (Teutalonome 3:26-28) Ko te kau Kilisitiano, ʼe tonu ke nātou fefakaloto mālohiʼaki. (Loma 1:11, 12) Ko te ʼu kaugā fai faka mafola ʼo te Puleʼaga, ʼe feala ke nātou fakaloto mālohiʼi ia nātou ʼaē ʼe gāue temi katoa, ʼo nātou fai he ʼu palalau fakaloto mālohi pea mo nātou kaugā ʼolo mo nātou ʼi te gāue fai faka mafola.
Ko Te Fiafia ʼa Sehova ʼe Ko Totatou Tule Mālohi
Ko te kau Kilisitiano ʼaē ʼe nātou gāue pionie, peʼe misionea, peʼe nātou gāue ʼi te Petele, peʼe nātou gāue feʼaluʼaki ʼi te ʼu kokelekasio lolotoga tonatou maʼuli katoa, ʼe nātou ʼiloʼi ʼe faka temi pe te ʼu fihifihia, kae ko ʼihi fihifihia ʼe hoko fualoa. Māʼiape la mo te ʼu fihifihia ʼaē ʼe mole hona puleʼaki, ʼe mole tonu ke nātou pulihi totatou fiafia. Ko Ramon, ʼaē neʼe gāue ʼi te tahi fenua lolotoga taʼu e 45 tupu, ʼe ina fai te tokoni ʼaenī ʼo ina ʼui, tatau aipe pe koteā te ʼu fihifihia ʼaē ʼe feala ke tou lotomamahi ai, kae “ ʼe tonu ke tou manatuʼi te ʼu tapuakina lahi ʼaē ʼe tou maʼu pea mo tou manatuʼi te tahi ʼu lauʼi afe tēhina mo tuagaʼane ʼaē ʼe lahi age tonatou ʼu mamahi.” ʼE mahino ia, ʼe hoko te ʼu mamahi ki totatou ʼu tēhina mo tuagaʼane ʼi te malamanei katoa, pea ʼe tokaga moʼoni ia Sehova kia tatou fuli.—1 Petelo 5:6-9.
Koia, kapau ʼe feala hatatou gāue temi katoa pea mo hoko atu te gāue ʼaia, tou taupau totatou fiafia ʼo tou falala ki tatatou Tāmai ʼaē ʼe ʼi selo. ʼE ina fakamālohiʼi tana ʼu kaugana, pea ko tatou fuli, ʼe tonu ke tou manatuʼi ‘ko te fiafia ʼa Sehova ʼe ko totatou tule mālohi.’—Nehemia 8:10.
[Paki ʼo te pasina 21]
“ ʼE maʼuhiga age te fai ʼo te gāue ʼaia ʼi te ʼu meʼa ʼaē ʼi toku loto pea mo te ʼu meʼa ʼaē ʼe ʼau leleiʼia”
[Paki ʼo te pasina 22]
“ ʼE ma fakahā kia Sehova te ʼu meʼa ʼaē ʼi tomā loto, pea ʼe ma tuku ke ina fai he ʼu puleʼaki moʼo fakatokatoka ʼo te ʼu fihifihia ʼaia”
[Paki ʼo te pasina 23]
“Koutou faiga ke koutou fakaʼaogaʼi fakalelei tokotou temi. ʼI te ʼaho fuli, ʼe lagi ʼi ai anai he faka fealagia pe e tahi ke koutou fakavikiviki ai kia Sehova”
[Paki ʼo te pasina 23]
“ ʼI taku kātakiʼi ia te ʼu ʼahiʼahi, ʼe feala haku fakamoʼoni, ʼe loi ia Satana”
[Paki ʼo te pasina 24]
“Ko te kau pionie, ʼe tau mo nātou te ʼu temi faigataʼa. ʼE tonu ke lahi te ʼu fakaloto mālohi ʼaē ʼe foaki kia nātou e te kau tagata ʼāfea pea mo te ʼu tēhina”
[Paki ʼo te pasina 24]
“ ʼE tonu ke tou manatuʼi te ʼu tapuakina lahi ʼaē ʼe tou maʼu”