Neʼe Nātou Fai Te Finegalo ʼo Te ʼAtua

ʼE Hikihiki e Elia Te ʼAtua Moʼoni

NEʼE ko te tagata ʼaē neʼe holi ʼaupito e Iselaele ke ina maʼu. ʼE mahino papau ia neʼe feala ke matehi te tagata ʼaia mo kanapaula neʼe maʼu ia ia e te hau. Ko ai koa te tagata ʼaia neʼe kumi? Neʼe ko te polofeta ʼa Sehova ko Elia.

ʼI Iselaele, neʼe faka mafola e Akape pea mo tona ʼohoana ko Sesapele te tauhi kia Paale. ʼUhi ko te faʼahi ʼaia, neʼe fakahoko ai e Sehova te hoge ki te fenua, pea neʼe ko tona taʼu fā ʼaia. ʼI tona ʼita lahi, neʼe fakatuʼutuʼu e Sesapele ke ina matehi te ʼu polofeta ʼa Sehova, kae neʼe fia maʼu tāfito e Akape ia Elia. Neʼe ko Elia ʼaē neʼe ina ʼui fēnei kia Akape, taʼu e tolu ki muʼa atu: “ ʼE mole ʼi ai anai lolotoga te ʼu taʼu ʼaia he hahau pea mo he ʼua, gata pe mo kapau ʼe ko te fakatotonu ʼo taku folafola!” (1 Hau 17:1) Pea neʼe kei hoko atu pe te hoge.

ʼI tana nofo ʼi te ʼaluʼaga tuʼutāmakiʼia ʼaia, neʼe ʼui fēnei e Sehova kia Elia: “ ʼAlu, ʼo fakahā ia koe kia Akape, heʼe ʼau fakatotonu ke ʼau fakatō te ʼua ki te fuga kele.” Logope neʼe feala ke matehi ia Elia, kae neʼe fakalogo ia ki te fakatotonu ʼa Sehova.​—1 Hau 18:​1, 2.

Te Fefakafeagaiʼaki ʼo Te ʼu Fili e Toko Lua

ʼI tana sio kia Elia, neʼe fehuʼi fēnei e Akape: “ ʼE ko koe koa ʼaē neʼe ke ʼaumai te mamahi ki Iselaele?” Neʼe tali fēnei e Elia ʼaki he lototoʼa: “Neʼe mole ʼau ʼaumai te mamahi ki Iselaele, kae ʼe ko koe pea mo te ʼapi ʼo tau tāmai, heʼe neʼe koutou līaki te ʼu fakatotonu ʼa Sehova, pea mo ke mulimuli ki te ʼu Paale.” Pea neʼe fakatotonu e Elia ke fakatahi ia Iselaele katoa ʼi te Moʼuga ʼo Kalemeli, ʼo kau kiai “te toko fāgeau nimagofulu kau polofeta ʼo Paale pea mo te toko fāgeau kau polofeta ʼo te pou taputapu.” Pea neʼe ʼui fēnei e Elia ki te hahaʼi: “ ʼE aʼu anai ki ʼafea takotou lotolotolua ki he ʼu manatu kehekehe e lua?a Kapau ʼe ko Sehova te ʼAtua moʼoni, koutou mulimuli kia te ia; kae kapau ʼe ko Paale, koutou mulimuli kia te ia.”​—1 Hau 18:17-​21.

Neʼe nofo fakalogologo te hahaʼi. Neʼe lagi nātou mahino ki tanatou hala ʼi tanatou mole tauhi ʼāteaina pe kia Sehova. (Ekesote 20:​4, 5) Pe neʼe lagi fefeka fau tonatou leʼo ʼo loto, ʼo mole nātou manatu neʼe nātou agahala ʼi tanatou vaevae tanatou agatonu kia Sehova pea mo Paale. Tatau aipe pe koteā tanatou manatu, kae neʼe fakatotonu e Elia ki te hahaʼi ke nātou ʼaumai te ʼu vitulo kei mui e lua​—te tahi maʼa te kau polofeta ʼo Paale pea ko te tahi maʼa ia. Neʼe tonu ke teuteu te ʼu vitulo ʼaia e lua ke sakilifisioʼi, kae neʼe mole tonu ke tutu. Neʼe ʼui fēnei e Elia: “ ʼE tonu ke koutou pāui ki te huafa ʼo tokotou ʼatua, pea ko ʼau, ʼi toku faʼahi, ʼe ʼau pāui anai ki te huafa ʼo Sehova; pea ko te meʼa ʼaē ʼe tonu ke hoko, ko te ʼAtua moʼoni ʼaē ka ina tali ʼaki te afi ʼe ko te ʼAtua moʼoni ʼaia.”​—1 Hau 18:23, 24.

ʼE Hikihiki Ia Sehova

Ko te kau polofeta ʼo Paale neʼe nātou kamata “haʼele ketu ʼo takafoli te ʼaletale ʼaē neʼe nātou faʼu.” ʼI te uhu katoa neʼe nātou kalaga fēnei: “Ê Paale, tali mai kia mātou!” Kae neʼe mole tali age e Paale. (1 Hau 18:26) Pea neʼe kamata vāʼi nātou e Elia: “Koutou pāui leʼolahi, heʼe ko ia ʼe ko he ʼatua.” (1 Hau 18:27) Neʼe kamata helehele e te kau polofeta ʼo Paale ia nātou totonu ʼaki te ʼu hele mo te ʼu tao​—ko te aga neʼe fai tuʼumaʼu e te hahaʼi pagani ke fakatupu ai te manavaʼofa ʼo tonatou ʼu ʼatua.b​—1 Hau 18:28.

ʼI te temi ʼaenī kua fakalaka te fetapā, pea ko te hahaʼi ʼaē neʼe tauhi kia Paale, neʼe kei hoko atu pe tanatou “fai te ʼu aga ohage ko he kau polofeta”​—pea ʼe hā ʼaki te ʼu palalau ʼaia tanatou kua avea, ʼo mole kei nātou aga fakatātāʼofi. ʼI te hili hoʼatā, neʼe ʼui leva e Elia ki te hahaʼi fuli: “Koutou fakaōvi mai kia te ʼau.” Neʼe nātou mamata fakalelei fuli ki te toe laga e Elia ia te ʼaletale ʼo Sehova, mo keli te tafega vai ʼi ʼona tafaʼaki, mo hifihifi te vitulo ʼo ina hili ki te ʼaletale, ki te fafie. ʼOsi ʼaia, pea ina fakavai te vitulo, mo te ʼaletale, pea mo te fafie, pea mo fonu vai te tafega vai (ʼe mahino papau ia neʼe ʼohu te vai ʼaia mai te Tai ʼo Metitelanea). Pea neʼe faikole fēnei ia Elia kia Sehova: “Ke nātou ʼiloʼi ʼi te ʼaho ʼaenī ʼe ko koe te ʼAtua ʼo Iselaele, pea ko ʼau tau kaugana pea ʼaki tau folafola neʼe ʼau fai te ʼu meʼa fuli ʼaenī. Tali mai kia te ʼau, Ê Sehova, tali mai, ke feala ai ki te hahaʼi ʼaenī ke nātou ʼiloʼi ko koe, Sehova, te ʼAtua moʼoni pea neʼe ko koe ʼaē neʼe ke fakatafoki tonatou loto.”​—1 Hau 18:29-​37.

Fokifā pe neʼe tō ifo te afi mai te lagi “pea ina fakaulo te holokoseta pea mo te ʼu fafie pea mo te ʼu maka pea mo te efu, pea mo ina fakamoamoa te vai fuli ʼaē neʼe ʼi te tafega vai.” Ko te hahaʼi ʼaē neʼe nātou mamata ki te meʼa ʼaia, neʼe nātou tulolo atu aipe, ʼo nātou ʼui fēnei: “Ko Sehova ʼe ko te ʼAtua moʼoni! ʼE ko Sehova te ʼAtua moʼoni!” ʼI te fakatotonu ʼa Elia, neʼe puke te ʼu polofeta ʼo Paale pea ʼave nātou ki te liuʼa ʼo Kisone, ʼo matehi ai nātou.​—1 Hau 18:38-​40.

Te Ako Kia Tatou

Neʼe fakahā e Elia he lototoʼa ʼe hage ko he lototoʼa ʼe laka age ʼi te lototoʼa fakatagata. Kae ʼe fakahā mai e Sake, te tagata faitohi ʼo te Tohi-Tapu, ko “Elia neʼe ko he tagata neʼe tatau pe te ʼu meʼa ʼaē neʼe ina logoʼi mo tatou.” (Sake 5:​17) Neʼe ina logoʼi ʼi tona loto te mataku pea mo te tuʼania. Ohage la, ʼi te fakapapau ki muli age e Sesapele ʼe ina lagavaka te mate ʼa te kau polofeta ʼa Paale, neʼe hola ia Elia pea mo kalaga fēnei kia Sehova ʼi te faikole: “Kua feʼauga! ʼI te temi nei, Ê Sehova, ke ke toʼo toku nefesi.”​—1 Hau 19:4.

Neʼe mole toʼo e Sehova te nefesi ʼo Elia, ʼo ina matehi ia ia. Kae neʼe tokoni kia ia ʼaki te lotoʼofa. (1 Hau 19:​5-8) ʼE feala ke falala te ʼu kaugana ʼa te ʼAtua ʼi te temi nei, ʼe toe fai anai e Sehova te meʼa ʼaia mokā hoko kia nātou he ʼu temi fakatupu tuʼania lahi, lagi ʼuhi ko te ʼu fakafeagai. Kae kapau ʼe nātou faikole ke tokoni age ia Sehova kia nātou, pea ʼe feala ke ina foaki age kia nātou “te mālohi ʼaē ʼe laka age ʼi te mālohi māhani,” he kapau ʼe nātou “taʼomia ʼi te ʼu faʼahi kehekehe,” ʼe mole nātou “efihia ʼo mole kei nātou gaūgaūe.” Koia, ʼe tokoni anai kia nātou ke nātou kātakiʼi, ohage ko Elia.​—2 Kolonito 4:​7, 8.

[Nota ʼi te lalo pasina]