ʼE Nātou Kaugana Koa Ki Te Tagata Peʼe Nātou Tauhi Ki Te ʼAtua?

“ ʼI HONA faʼahiga ʼaluʼaga, ʼe tonu ke vikiʼi te kau Fakamoʼoni ʼa Sehova.” ʼE ko te palalau ʼaia ʼe tuʼu ʼi te tohi Siamani Seher, Grübler, Enthusiasten (Ko te ʼu hahaʼi ʼe nātou ʼiloʼi te ka haʼu, mo fakakaukau, mo loto fiafia). Logope la ʼe valoki e te tohi ʼaia te kau Fakamoʼoni, kae ʼe ina ʼui fēnei: “ ʼI te agamāhani, ʼe mole hanatou hala pea ʼe nātou maʼuʼuli ohage ko te hahaʼi fuli pe. ʼE nātou faʼa gāue pea mo fai fakalelei tanatou gāue, ʼe nātou leleiʼia te tokalelei pea mo nātou totogi fakalelei tanatou ʼu tukuhau. ʼE mole nātou kumi fakavale te ʼu koloā. . . . ʼE feala ke tou vikiʼi te fakaʼaluʼalu lelei ʼo tanatou ʼu fakatahi lalahi. Ko tanatou loto faka sakilifisio ʼe tatau ia mo te tahi ʼu lotu; ʼo ʼuhiga mo te minisitelio, ʼe nātou lelei age ʼi te hahaʼi fuli. Kae ko te faʼahi ʼaē ʼe nātou māʼoluga ai ʼi te tahi ʼu lotu peʼe ko te ʼu kūtuga faka Kilisitiano ʼi te temi ʼaenī, ʼe ko tanatou lotomālohi ʼaē ke nātou tala tanatou tui ʼi te ʼu ʼaluʼaga fuli, tatau aipe peʼe feala ke nātou tuʼutāmaki ai.”a

Logope la te manatu lelei ʼaia, kae ʼe ʼi ai te tahi ʼu manatu kehe ʼo ʼuhiga mo te kau Fakamoʼoni ʼa Sehova. ʼE lahi te ʼu fenua ʼi te malamanei, ʼe faʼifaʼitaliha ai te kau Fakamoʼoni ʼi tanatou ʼu gāue faka lotu talu mai te ʼu taʼu ʼe lauʼi hogofulu, pea ʼe mole he fakafeagai ʼe fai age kia nātou. ʼE ʼiloʼi ia nātou e te lauʼi miliona hahaʼi, ʼe fakaʼapaʼapaʼi nātou, pea ʼe lotolelei e te hahaʼi ke nātou maʼuliʼi tanatou lotu. Kae he koʼe koa ʼe ʼi ai ni ʼu mahalohalo ki te ʼuhiga ʼo te kau Fakamoʼoni ʼa Sehova?

ʼE lagi tupu te ʼu mahalohalo ʼaia, koteʼuhi mole heʼeki faʼa fualoa, neʼe kau ʼihi kūtuga faka lotu ki te fakaʼalikiʼi ʼo te ʼu tamaliki, ki te fakapogi ʼo te hahaʼi tokolahi, pea mo te ʼu ʼohofi ʼo te ʼu hahaʼi fai fakapō. ʼE mahino papau ia, ko te ʼu taʼi aga fakalialia ʼaia ʼe hoko ʼi te ʼu faʼahi fuli, kae mole hoko pe ia nātou ʼaē ʼe lotu. Kae ʼo ʼuhiga mo te lotu, ko te tokolahi kua nātou lotolotolua, pea ko ʼihi kua fakafeagai kiai.

ʼE Tuʼutāmakiʼia Te Mulimuli Ki Te Tagata

Neʼe fakamahino te kupu “magaʼi lotu” ohage ko “he kūtuga ʼe mulimuli ki he akonaki makehe peʼe ki he tagata takitaki.” ʼO toe feiā pe, ko nātou ʼaē ʼe kau ki he “lotu” ʼe nātou “tauhi fakamalotoloto ki he tahi, ki he manatu, peʼe ki he meʼa.” Koia ko te mulimuli fakalelei ʼo nātou ʼaē ʼe kau ki he kūtuga faka lotu, ki he ʼu tagata takitaki pea mo tanatou ʼu manatu, ʼe nātou tuʼutāmakiʼia, heʼe feala ke nātou liliu ʼo kaugana ki te tagata. Kapau ʼe puleʼi e te tagata takitaki te maʼuli ʼo te hahaʼi, pea ʼe feala ke fua kovi ki te ʼu meʼa ʼaē ʼe nātou logoʼi ʼi tonatou loto pea ʼe feala ke nātou liliu ʼo fakalogo katoa kia ia ʼi te faʼahi fakalaumālie. ʼE toe ʼāsili te tuʼutāmaki ʼaia mokā ʼe lahilahi ake he tahi ʼi he magaʼi lotu talu mai tana kei veliveli.

Ko nātou ʼaē ʼe nātou maʼu te ʼu taʼi manatu ʼaia ʼo ʼuhiga mo te lotu, ʼe tonu ke nātou maʼu he ʼu manatu totonu kiai. Neʼe ʼui ki ʼihi, ko te kau Fakamoʼoni ʼa Sehova ʼe nātou kau ki te kautahi faka lotu, ʼe ina fakakaugana te hahaʼi, mo puleʼi fakafefeka ia nātou, mo ina faka tuʼakoi ʼaupito tonatou ʼāteaina, pea mo ina toʼo kehe ia nātou mai te sosiete katoa.

ʼE ʼiloʼi e te kau Fakamoʼoni ʼa Sehova ʼe mole moʼoni te ʼu manatu ʼaia. Koia ʼe nātou fakaafe atu koutou, ke koutou fakasiosio totonu ia te faʼahi ʼaia. ʼI takotou ʼosi vakaʼi fakalelei, koutou fai hakotou tonu ʼa koutou totonu ʼo ʼuhiga mo te faʼahi ʼaia. ʼE tauhi koa te kau Fakamoʼoni ʼa Sehova ki te ʼAtua, ohage ko te meʼa ʼaē ʼe nātou ʼui, peʼe nātou kaugana ki te tagata? Koteā te matapuna ʼo tonatou mālohi? Ko te ʼu alatike e lua ʼi te pasina 12 ki te 23 ʼe tali lelei anai ki te ʼu fehuʼi ʼaia.

[Nota ʼi te lalo pasina]