Neʼe Nātou Fai Te Finegalo ʼo Te ʼAtua

Neʼe Fakapale Te Agatonu ʼa Sopo

KO SOPO neʼe ko he tagata manavaʼofa neʼe lagolago ki te ʼu fafine vitua, mo te fānau ʼe hala tāmai mo faʼe pea mo nātou ʼaē ʼe maʼuli mamahi. (Sopo 29:12-17; 31:16-21) Pea fakafokifā neʼe hoko kia ia te ʼu malaʼia lahi, neʼe puli tona ʼu koloā, neʼe mate tana ʼu fānau pea neʼe mahaki. Meʼa fakaʼofaʼofa foki, he ko te tagata agalelei ʼaia ʼaē neʼe lagolago tuʼumaʼu kia nātou ʼaē neʼe maʼuʼuli taʼomia, neʼe mole tokoni age he tahi kia ia ʼi te temi ʼaē neʼe ʼaoga ai kia ia. Māʼiape la mo tona ʼohoana, neʼe ina ʼui age ki ai ke “laukovi ki te ʼAtua pea ke mate!” Pea neʼe mole fakafimālieʼi ia ia e tana ʼu “kaumeʼa” ko Elifasi, mo Pilitate pea mo Sofale. Kae neʼe nātou fakamahalohalo kia Sopo neʼe agahala pea neʼe tāu mo feʼauga ke hoko ki ai te ʼu mamahi ʼaia.​—Sopo 2:9; 4:7, 8; 8:​5, 6; 11:13-15.

Logope la te ʼatu mamahi ʼaē neʼe hoko kia ia, kae neʼe nofo agatonu ia Sopo. Koia neʼe fakahā ai e Sehova tana manavaʼofa kia Sopo pea ina tapuakina ia ia. Ko te fakamatala ʼo ʼuhiga mo te faʼahiga fai ʼa te ʼAtua, ʼe ina foaki mai te falala ʼaē ʼe ina toe fakapale anai tana kau kaugana ʼaē ʼe nātou nonofo agatonu.

Kua Faka Lākatonuʼi Pea Kua Toe Lelei Tona Maʼuli

ʼUluaki, neʼe fakatonutonuʼi e Sehova ia Elifasi, mo Pilitate pea mo Sofale. ʼI tana palalau kia Elifasi ʼaē neʼe lagi matuʼa age ia nātou, neʼe ina ʼui fēnei: “Ko toku hāūhāū kua lahi kia te koe pea mo tou ʼu kaumeʼa, koteʼuhi neʼe mole koutou fakamatala ʼo ʼuhiga mo ʼau te meʼa ʼaē ʼe moʼoni, ohage ko taku tagata kaugana agatonu ko Sopo. Pea ʼi te temi nei koutou toʼo maʼa koutou he ʼu vitulo e fitu pea mo he ʼu matuʼaʼi akeno e fitu, pea koutou ʼolo ki taku tagata kaugana ko Sopo, pea ʼe tonu anai ke koutou mōlaga he holokoseta maʼa koutou, pea ko Sopo, taku tagata kaugana, ʼe faikole anai maʼa koutou.” (Sopo 42:​7, 8) Koutou fakakaukauʼi age muʼa pe neʼe faka ʼuhiga kiteā te faʼahi ʼaia!

Neʼe fakamaʼua e Sehova ke fai e Elifasi mo Pilitate pea mo Sofale te sakilifisio lahi, lagi moʼo fakahā lelei kia nātou te mamafa ʼo tanatou agahala. Neʼe nātou leakovi ki te ʼAtua, tatau aipe pe neʼe nātou mālama ki te faʼahi ʼaia peʼe kailoa, ʼo nātou ʼui fēnei ‘ ʼe mole falala ki tana ʼu kaugana’ pea neʼe mole faʼa maʼuhiga kia ia peʼe nofo agatonu anai ia Sopo peʼe kailoa. Neʼe ʼui e Elifasi, kia mata ʼo te ʼAtua ko Sopo neʼe tatau pe mo te ane! (Sopo 4:​18, 19; 22:​2, 3) ʼE mole fakapunamaʼuli ai te ʼui fēnei ʼa Sehova: “Neʼe mole koutou fakamatala ʼo ʼuhiga mo ʼau ia te meʼa ʼaē ʼe moʼoni”!

Kae neʼe mole gata pe ki te faʼahi ʼaia. Ko Elifasi mo Pilitate pea mo Sofale neʼe nātou toe agahala foki kia Sopo totonu ʼi tanatou ʼui ʼaē, neʼe ko ia totonu ʼaē neʼe ina fakatupu tana ʼu fihifihia. ʼUhi ko te ʼu tukugakovi ʼaē neʼe nātou fai ka mole hona tafitoʼaga pea ʼuhi ko tanatou heʼe ʼofa, neʼe lotomamahi pea mo lotohoha ai ia Sopo ʼo ina ʼui fēnei: “ ʼE aʼu anai ki ʼafea takotou fakakinakina ki toku nefesi, pea mo moloki ʼoʼoku ʼaki he ʼu palalau?” (Sopo 10:1; 19:2) Koutou fakakaukauʼi age muʼa te ufiufi ʼaē neʼe hā ʼi te fofoga ʼo te ʼu tagata ʼaia e tolu, he neʼe fakamaʼua age kia nātou ke nātou fai he mōlaga kia Sopo ʼuhi ko tanatou ʼu agahala!

Kae neʼe mole tonu ke fiafia ia Sopo ki tonatou fakalainoaʼi. Kae neʼe fakatotonu e Sehova kia ia ke faikole maʼa nātou ʼaē neʼe nātou tukugakoviʼi ia ia. Neʼe fai e Sopo ʼo mulimuli pe ki te meʼa ʼaē neʼe fakamaʼua age kia ia, pea neʼe ina maʼu ai tana ʼu tapuakina. ʼUluaki, neʼe fakamālōlō e Sehova tona mahaki fakamataku. Pea ko te ʼu tēhina, mo te ʼu tokolua ʼa Sopo pea mo nātou ʼaē neʼe felogoi mo ia ki muʼa atu, neʼe nātou ʼōmai moʼo fakaloto fīmālieʼi ia ia, “pea neʼe nātou foaki takitokotahi he foʼi piesi pea mo he mama aulo.”a Pea ko Sopo “neʼe ina maʼu te ʼu faga ōvi e hogofulu-ma-fā afe pea mo te ʼu kamelo e ono afe pea mo te ʼu taluaʼi pipi e afe pea mo te ʼu asino fafine e afe.”b Pea ʼe mahino papau ia neʼe toe fakatokatoka tona ʼohoana mo ia. ʼAki te temi neʼe toe tapuakiʼi ia Sopo ʼo ina toe maʼu tana ʼu foha e toko fitu pea mo tana ʼu ʼofafine e toko tolu, pea ʼi muʼa ʼo tana mate neʼe sio ai ki te ʼu taʼiake e fā ʼo tona hōloga.​—Sopo 42:10-17.

Ko He ʼu Ako Maʼa Tatou

Neʼe tuku e Sopo he faʼifaʼitaki fakaofoofo ki te kau kaugana ʼo te ʼAtua ʼo te temi ʼaenī. Neʼe “mole hana lākahala pea neʼe totonu ia,” pea neʼe fiafia ia Sehova ʼi tana fakahigoaʼi ia ia ko “taku tagata kaugana.” (Sopo 1:8; 42:​7, 8) ʼE mole faka ʼuhiga leva neʼe haohaoa ia Sopo. ʼI te tahi lakaga ʼi tana ʼu ʼahiʼahi, neʼe faihala ʼi tana manatu ʼaē neʼe ko te ʼAtua ʼaē neʼe ina fakahoko te ʼu malaʼia kia ia. Māʼiape la mo te tahi lakaga, neʼe ina valokiʼi te faʼahiga aga ʼo te ʼAtua ki te tagata. (Sopo 27:2; 30:20, 21) Pea neʼe ina ʼui ʼe ko ia ʼaē ʼe faitotonu kae mole ko te ʼAtua. (Sopo 32:2) Kae neʼe mole fia lītuʼa ia Sopo ki tona Tupuʼaga, pea neʼe ina tali ʼaki he agavaivai tona fakatonutonuʼi e te ʼAtua. Neʼe ina fakamoʼoni ʼo ina ʼui fēnei: “Neʼe ʼau palalau, kae neʼe mole ʼau mahino . . . ʼe ʼau fakahemala ki ʼaku palalau pea ʼe ʼau fakahemala ʼi te efu pea mo te lefulefu.”​—Sopo 42:3, 6.

ʼE toe feiā pe mo tatou mokā tou tau mo ni ʼu ʼahiʼahi, ʼe feala ke tou manatu hala, mo tou fai he ʼu palalau pea mo he aga ʼe mole lelei. (Vakaʼi ia Tagata Tānaki 7:7.) Kae kapau ʼe loloto tatatou ʼofa ki te ʼAtua, pea ʼe mole tou agatuʼu anai kia ia peʼe tou ʼiʼita anai heʼe ina fakagafua ke hoko kia tatou he ʼu faigataʼaʼia. Kae ʼe tou taupau anai totatou agatonu pea ʼe tou maʼu ai anai he tapuakina lahi. Neʼe ʼui fēnei e te tagata fai pesalemo ʼo ʼuhiga mo Sehova: “ ʼAki ia ia ʼaē ʼe faitotonu ʼe ke faitotonu anai.”​—Pesalemo 18:25.

ʼI muʼa ʼo tana fakamālōlō ia Sopo, neʼe fakamaʼua e Sehova kia ia ke faikole maʼa nātou ʼaē neʼe agahala kia ia. ʼE ko he faʼifaʼitaki lelei ʼaupito kia tatou! ʼE fakamaʼua mai e Sehova ke tou fakamolemole muʼa kia nātou ʼaē ʼe nātou agahala kia tatou ke feala ai hana fakamolemole tatatou ʼu agahala. (Mateo 6:​12; Efesi 4:32) Kapau ʼe mole tou fia fakamolemole ki ʼihi mokā ʼe ʼi ai he ʼu tupuʼaga lelei ke tou fai te faʼahi ʼaia, pea ʼe matatonu koa ke tou ʼamanaki ke manavaʼofa ia Sehova kia tatou?​—Mateo 18:21-35.

Ko tatou fuli ʼe tou tau mo te ʼu fihifihia. (2 Timoteo 3:​12) Kae ohage pe ko Sopo ʼe feala ke tou nofo agatonu. Kapau ʼe tou fai te faʼahi ʼaia, pea ʼe tou maʼu anai he fakapale lahi. Neʼe tohi fēnei e Sake: “Koutou vakaʼi, ʼe mātou kalagaʼi ʼe manuʼia ia nātou ʼaē neʼe nātou faʼa kātaki. Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe tuku ake e Sehova, ko Sehova ʼe fonu ʼi te ʼofa pea mo te manavaʼofa.”​—Sake 5:​11.

[Nota ʼi te lalo pasina]