Ko Te Hau Neʼe Poto Pea Mo Maʼu Koloā
ʼI takotou manatu, ʼe feala koa ke koutou maʼu te fiafia ʼi te ʼu koloā? Kapau neʼe foaki atu kia koutou he toe paʼaga, ʼe mole koutou fiafia anai koa? ʼE mahino ia. Lagi kua koutou ʼiloʼi pe koteā te meʼa ʼaē ʼe koutou fia totogi ʼaki te paʼaga ʼaia.
ʼE MOʼONI, ʼe lahi te ʼu meʼa ʼe feala ke tou totogi ke lelei age totatou maʼuli. Ko te paʼaga, ʼe feala ke liliu ko he “puipui” ki te ʼu faʼahiga fihifihia kehekehe, ohage la ko te mahaki peʼe ko te mole maʼu ʼo he gāue.—Tagata Tānaki 7:12.
Kae koteā te pikipikiga ʼo te paʼaga pea mo te fiafia? ʼE koutou manatu koa ohage ko te tokolahi ʼo te hahaʼi ʼaē ʼe nātou ʼui, ko tokita fiafia ʼe fakalogo ki tokita ʼu koloā? ʼE faigataʼa te tali ki te ʼu fehuʼi ʼaia, koteʼuhi ʼe faigafua hakita ʼiloʼi pe ko paʼaga ʼe fia ʼaē ʼe kita maʼu, kae ʼe mole feala ke kita fakafuafua te fiafia. ʼE mole feala hatatou fakaʼaogaʼi he meʼa fua moʼo ʼiloʼi te lahi ʼo tokita fiafia.
Tahi ʼaē, ʼe hage ʼe fiafia ʼihi hahaʼi maʼu koloā, ka ʼe lotomamahi ʼihi. ʼE toe feiā aipe ʼo ʼuhiga mo te kau māsisiva. Kae ko te tokolahi ʼo te hahaʼi—māʼiape la mo nātou ʼaē kua koloaʼia—ʼe nātou faka tui, kapau ʼe lahi tanatou falā, pea ʼe toe lahi age anai tonatou fiafia.
Ko te Hau ʼo te Iselaele ʼāfea ko Salomone neʼe talanoa ki te ʼu faʼahi ʼaia. Neʼe kau ʼi te ʼu tagata ʼaē neʼe lahi tokotahi tanatou ʼu koloā. ʼE koutou maʼu anai ʼi te kapite 10 ʼo te tohi faka Tohi-Tapu ʼo ʼUluaki Hau te fakamatala ʼo te tuʼuga koloā ʼaē neʼe ina maʼu. Ohage la, koutou fakatokagaʼi te meʼa ʼaē ʼe ʼui ʼi te vaega 14: “Ko te mamafa ʼo te aulo ʼaē neʼe ʼave kia Salomone ʼi te taʼu pe e tahi neʼe ko taleta aulo e onogeau onogofulu-ma-ono.” Ko te ʼu taleta fuli ʼaia ʼe tatau mo te ʼu tane aulo e 25. Ia ʼaho nei, ko te tuʼuga aulo ʼaia ʼe laka age tona totogi ʼi te 20 000 000 000!
Kae ko Salomone, neʼe mole gata ʼaki pe tana maʼu koloā, kae neʼe toe tapuakina foki ia ia e te ʼAtua ʼi tana foaki kia ia te poto. ʼE fakamatala fēnei e te Tohi-Tapu: “Neʼe lahi age te ʼu koloā pea mo te poto ʼo te Hau ko Salomone ʼi te tahi ʼu hau fuli ʼo te kele. Pea ko te hahaʼi fuli ʼo te malamanei neʼe nātou kumi ia Salomone moʼo fagono ki tona poto ʼaē neʼe ʼai e te ʼAtua ki tona loto.” (1 Hau 10:23, 24) ʼO toe feiā aipe, ʼe feala ke ʼaoga kia tatou te poto ʼo Salomone, heʼe tuʼu tana ʼu fakamatala ʼi te Tohi-Tapu. Tou vakaʼi pe koteā tana manatu ʼo ʼuhiga mo te pikipikiga ʼo te ʼu koloā pea mo te fiafia.
[Haʼuʼaga ʼo te paki pasina 3]
Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart