Te ʼu Fihifihia ʼo Te ʼu Famili ʼAē Neʼe Toe ʼOhoana Ai Te ʼu Mātuʼa
ʼE LAVA FEAFEAʼI TE MAʼULI FIAFIA ʼO TE ʼU FAMILI ʼAĒ NEʼE TOE ʼOHOANA AI TE ʼU MĀTUʼA?
Kua maʼu ʼi te malamanei katoa te ʼu famili kua toe ʼohoana ai te ʼu mātuʼa. Kae ʼe ʼi ai te ʼu fihifihia makehe ʼe tau mo te ʼu famili ʼaia. Ko te lagi fihifihia tāfito ʼe ko te pusiaki ʼo te fānau. Kae ohage ko te meʼa ʼaē ka fakahā anai ʼi te ʼu alatike ʼaē e lua ka hoa mai, ʼe feala ke taupau lelei te fānau ʼi he famili neʼe toe ʼohoana ai te ʼu mātuʼa.
ʼI TE AGAMĀHANI, ʼE MOLE TOU FAʼA LELEIʼIA TE ʼU TĀMAI FOʼOU PEA MO TE ʼU FAʼE FOʼOU. ʼI TATATOU kei liliki, lagi neʼe tou logo ki te hisitolia ʼo Cendrillon, ʼaē neʼe maʼuli mamahi ʼuhi ko tana faʼe foʼou agakovi. Ko te ʼu tamaliki ʼo Eulopa, ʼe akoʼi kia nātou te hisitolia ʼo Blanche Neige et les sept Nains. Ko te faʼe foʼou ʼa Blanche Neige neʼe ko te fafine faifakalauʼakau agakovi!
ʼE fakahā koa e te ʼu hisitolia ʼaia te ʼuhiga moʼoni ʼo te ʼu famili ʼaē neʼe toe ʼohoana ai te ʼu mātuʼa? Ko te ʼu tāmai foʼou pea mo te ʼu faʼe foʼou, ʼe nātou agakovi moʼoni feiā koa? Kailoa. Ko te tokolahi ia nātou ʼe nātou loto moʼoni ke nātou foaki he ʼu meʼa lelei ki te fānau ʼaē ʼe nātou maʼu ʼi tanatou toe ʼohoana. Kae ʼe tonu ke nātou tauʼi te ʼu fihifihia ʼaē ʼe hoko māhani ʼi te ʼu famili ʼaē ʼe toe ʼohoana ai te ʼu mātuʼa.
Te Faigataʼa ʼo Te Taupau Fānau
Ka mavete he taumatuʼa, ʼe hoko te faʼahi ʼaia heʼe mole nā aga fakapotopoto. ʼI te lua ʼohoana, ʼe ko te ʼu felogoi mo te fānau ʼaē ʼe feala ke fakatupu kovi ki te taumatuʼa. ʼE hā ʼi te ʼu tānaki ʼaē neʼe fai ʼo ʼuhiga mo te ʼu famili ʼaē neʼe toe ʼohoana ai te ʼu mātuʼa, ko famili e 4 ʼi te ʼu famili e 10 ʼe mavete ai te taumatuʼa ʼi tanā ʼosi ʼohoana ia taʼu e nima.
ʼE mole lagi mahino ki te taumatuʼa foʼou te lotohoha, mo te mole kei ʼiloʼi ʼa te fānau pe ko ai ʼaē ʼe tonu ke nātou ʼofa ki ai, pea mo te maheka ʼaē ʼe feala ke tupu ʼi te fānau ʼaia ʼi tanatou sio ki tanatou tāmai pe ki tanatou faʼe foʼou. ʼE lagi manatu e te fānau, ʼe lahi age te ʼofa ʼaē ʼe foaki e tanatou tāmai pe ko tanatou faʼe ki tona ʼohoana foʼou, ʼi te ʼofa ʼaē ʼe ina foaki age kia nātou. Tahi ʼaē meʼa, ko he tāmai pe ko he faʼe neʼe līaki e tona ʼohoana, ʼe lagi faigataʼa anai kia ia tana sio ʼaē, ʼe kei ʼofa te fānau kia ia ʼaē neʼe mavae. Neʼe faiga e te kiʼi tama ke ina fakamahino ki tana faʼe pe koʼe neʼe felogoi lelei mo tana tāmai, ʼo ina ʼui fēnei, “Mama, ʼe ʼau ʼiloʼi neʼe gaohi koviʼi koe e Papa, kae ʼe agalelei kia ʼau!” Ko te taʼi palalau ʼaia, tatau aipe peʼe fai fakamalotoloto, kae ʼe feala ke nofo ʼita ai te faʼe ki te matuʼa ʼa te tamasiʼi.
Neʼe ʼui fēnei e te tāmai neʼe ʼohoana mo te fafine neʼe kua maʼu fānau: “Neʼe mole ʼau ʼiloʼi moʼoni peʼe feafeaʼi te tauʼi ʼo te ʼu fihifihia ʼaē ʼe pipiki ki te taupau ʼo he ʼu fānau ʼe mole ʼaʼaku. Neʼe ʼau ʼohoana ʼi taku manatu ʼaē, ʼe ʼau ʼohoana mo tanatou faʼe, koia kua ʼau liliu leva ko tanatou tāmai. Neʼe hage kia ʼau neʼe faigafua ʼosi! Kae neʼe mole mahino kia ʼau te kei ʼofa mamahi ʼa te ʼu fānau ki tanatou tāmai moʼoni, pea neʼe lahi te ʼu hala neʼe ʼau fai.”
ʼE feala ke hoko tāfito he ʼu faigataʼaʼia mokā tonu ke tokoniʼi te fānau. ʼE ʼaoga ke tokoniʼi te fānau ʼaki te ʼofa, kae ʼe mole nātou tali te faʼahi ʼaia māʼiape la mokā fakahoko e tanatou ʼu mātuʼa moʼoni. Koia ʼe faigataʼa age mokā fakahoko e he tāmai pe ko he faʼe foʼou! ʼI te agamāhani, mokā tokoniʼi nātou, ko te tamasiʼi ʼe ina ʼui feiā, “ ʼE mole ko koe taku matuʼa moʼoni!” ʼE feala ke lave kovi ʼaupito te ʼu palalau ʼaia ki he tāmai pe ko he faʼe foʼou ʼaē ʼe faiga fakamalotoloto ke tokoni ki te fānau!
ʼE feala koa ke taupau lelei te fānau ʼi he famili neʼe toe ʼohoana ai te ʼu mātuʼa? ʼE feala koa ki te ʼu tāmai pea mo te ʼu faʼe foʼou ke nātou hikihiki te lelei ʼo te famili? ʼE feala ke tou ʼio ki te ʼu fehuʼi ʼaia e lua, mo kapau ʼe tou mulimuli fuli ki te ʼu tokoni ʼaē ʼe tuku mai e te Folafola ʼa te ʼAtua, te Tohi-Tapu.
[Paki ʼo te pasina 3]
“ ʼE mole ko koe taku matuʼa moʼoni!”