ʼE Mole Tuai Te ʼAtua ʼo ʼUhiga Mo Tana Fakapapau

“ ʼO AʼU koa ki ʼafea, Ê Sehova, ʼaē ʼe tonu ai ke ʼau kalaga ke hāofaki ʼau, ka mole ke logo kiai?” Neʼe fai te ʼu palalau ʼaia e te polofeta Hepeleo ko Hapakuke ʼaē neʼe maʼuli ʼi te fitu sēkulō ʼi muʼa ʼo totatou temi. Kae ʼe mahino papau ia, neʼe kua koutou logo ki te ʼu palalau ʼaia. ʼE ko he agamāhani ʼa te tagata tana loto ʼaē ke hoko fakavilivili te ʼu meʼa ʼaē ʼe ina fakaʼamu kiai. ʼE moʼoni tāfito la ʼi te temi ʼaenī ʼaē ʼe fakamuʼamuʼa ai e te hahaʼi ke nātou foimo maʼu te ʼu meʼa ʼaē ʼe nātou leleiʼia.​—Hapakuke 1:2.

ʼI te ʼuluaki sēkulō neʼe manatu e ʼihi neʼe tonu ke fakahoko fakavilivili e te ʼAtua tana ʼu fakapapau. Neʼe nātou fiu ʼi te fakatalitali, pea neʼe nātou ʼui neʼe tuai peʼe tauhala te ʼAtua. Koia neʼe tonu ai ke toe fakamanatuʼi age e te ʼapositolo ko Petelo, ko te manatu ʼa te ʼAtua ʼo ʼuhiga mo te temi ʼe mole tatau ia mo tatatou manatu. Neʼe tohi fēnei e Petelo: “Kae ko te mea aeni e tahi, e mole tonu ke galo kia koutou, u fanau ofaina: ko te aho e tahi ki te Aliki e hage ko tau e afe, pea ko tau e afe, e hage he aho e tahi.”​—2 Petelo 3:8.

Kapau ʼe kita fakaʼaogaʼi te faʼahiga lau ʼaia ʼo te temi, pea ko he tagata ʼe taʼu 80 ʼe hage ʼe maʼuli ia hola e lua, pea ko te hisitolia katoa ʼo te malamanei ʼe hage neʼe hoko ia ʼaho pe e ono. Kapau ʼe tou manatuʼi te faʼahi ʼaia pea ʼe faigafua age tatatou mahino ki te fakatuʼutuʼu ʼa te ʼAtua ʼo ʼuhiga mo tatou.

Kae ko te ʼAtua ʼe mole ina meʼa noaʼi te temi. ʼI tona fakahagatonu ʼe maʼuhiga te temi kia te ia. (Gaue 1⁠:⁠7) Koia la ʼaē neʼe toe ʼui fēnei ai e Petelo: “E mole tuai te fakapapau a te Aliki o hage ko te lau a ihi e tuai. E kataki o uhiga mo koutou, e mole loto ia ke mate niʼihi, kae ke tafoki te tagata fuape o fakahemala.” (2 Petelo 3⁠:⁠9) ʼE mole tatau te ʼAtua mo te tagata, heʼe mole ina fai vave he meʼa ʼi tana tuʼania ʼaē naʼa puli tona temi. ʼI tona ʼuhiga “Hau ʼo te temi heʼegata,” ʼe feala hana mahino kia meʼa fuli pea ʼe ina ʼiloʼi lelei peʼe ko te lakaga fea ʼaē ka tonu ai ke ina fakahoko tana ʼu fakatuʼutuʼu ke fua lelei ki te hahaʼi fuli.​—1 Timoteo 1:​17.

ʼI tana ʼosi fakamahino pe koʼe ʼe hage ʼe tuai te ʼAtua, neʼe fai e Petelo te fakatokaga ʼaenī: “E hokosia anai te aho o te Aliki o hage he kaihaa.” Ko tona faka ʼuhiga, ko te ʼaho ʼo te fakamāu ʼe hoko fakapunamaʼuli anai. Pea ʼi te ʼu vaega ʼaē ʼe hoa mai kiai ʼe talanoa Petelo ki te ʼamanaki taulekaleka ʼa te hahaʼi ʼaē ʼe nātou “mauli maonioni mo tauhi ki te Atua,” ʼe feala ke hāofaki nātou pea ke nātou hū ki “he lagi foou mo he kele foou” ʼaē neʼe fakapapauʼi mai e te ʼAtua.​—2 Petelo 3:​10-13.

ʼE tonu ke tou loto fakafetaʼi ki te ʼAtua he neʼe mole heʼeki ina fakahoko tana fakamāu. ʼUhi ko tana faʼa kātaki, kua feala kia tatou ke tou ʼiloʼi tana fakatuʼutuʼu pea mo fetogi totatou maʼuli ke tou maʼu te ʼu tapuakina ʼaē neʼe ina fakapapauʼi mai. ʼE mole matatonu koa la ke tou manatu “ko te kataki a te Aliki e uhiga ia ki [totatou] haofaki,” ohage ko tona fakamahino mai e Petelo? (2 Petelo 3⁠:15) Kae ʼe ʼi ai te tahi tupuʼaga ʼo te kātaki ʼa te ʼAtua.

ʼE Tonu Ke Katoa Te Hala

Ka tou ako pe neʼe feafeaʼi te aga ʼa te ʼAtua ki te hahaʼi ʼi te temi muʼa, ʼe tou fakatokagaʼi ai ʼi te agamāhani neʼe fakatalitali muʼa ke fetogi e te hahaʼi tanatou aga, pea hoki ina fakahoko ai leva tana fakamāu. Ohage la ʼo ʼuhiga mo te fakamāuʼi e te ʼAtua te kau Kanaane, neʼe kua fualoa tana fakatokagaʼi tanatou ʼu agahala kia Apalahamo. Kae neʼe mole heʼeki hoko te temi ʼaē ke ina fakahoko ai te fakamāu. Koteā tona tupuʼaga? ʼE ʼui fēnei e te Tohi-Tapu: “Koteʼuhi neʼe mole heʼeki katoa te hala ʼa te kau Amolite [Kananea],” peʼe ohage ko tona fakaliliu e Knox: “Ko te agakovi ʼa te kau Amolite [neʼe] mole heʼeki fakaaʼu ki tona gataʼaga.”​—Senesi 15:16.a

Kae ia teitei taʼu e 400 ki muli mai, neʼe hoko kia nātou te fakamāu ʼa te ʼAtua pea ko te kau Iselaelite, te hōloga ʼo Apalahamo, neʼe nātou faʼao te fenua. Neʼe hāo ʼihi kau Kanaane, ohage ko Laape pea mo te kau Kapaonite, ʼuhi ko te ʼu meʼa lelei ʼaē neʼe nātou fai kae ko te tokolahi ia nātou neʼe kovi age tanatou ʼu aga heʼemaʼa, ohage ko tona fakahā e te ʼu kumi akeolosia ʼo totatou temi. Neʼe nātou atolasio ki te ʼu fakatātā ʼo te sino tapu ʼo te tagata, neʼe ʼi ai tanatou ʼu paomutu ʼi te fale lotu pea neʼe nātou sakilifisioʼi te ʼu tamaliki. ʼE ʼui fēnei e te tohi Halley’s Bible Handbook: “ ʼE punamaʼuli te hahaʼi fai akeolosia ʼaē ʼe nātou fai te ʼu kumi ʼi te ʼu toega ʼo te ʼu kolo ʼo Kanaane, ki te mole foimo maumauʼi e te ʼAtua te ʼu kolo ʼaia ʼi muʼa atu.” Kae ki muli age, neʼe fakahaʼuhaʼu ʼo “katoa te hala” ʼa te kau Kanaane; pea ko tanatou agakovi neʼe “fakaaʼu ki tona gataʼaga.” Neʼe mole feala ke ʼui e he tahi ʼe heʼe faitotonu te ʼAtua he neʼe ina tuku ke fakamaʼa te fenua kae neʼe ina hāofaki ia nātou ʼaē neʼe lelei tanatou aga.

Neʼe toe feiā pe mo te meʼa ʼaē neʼe hoko ʼi te ʼu ʼaho ʼo Noe. Logope la te agakovi ʼo te hahaʼi ʼi muʼa ʼo te Tulivio, kae neʼe tuku kia nātou e te ʼAtua, ʼi tona manavaʼofa, taʼu e 120. Lolotoga he koga ʼo te temi ʼaia, “nee kalagai [e Noe] te susitisia.” (2 Petelo 2⁠:⁠5) Kae ʼaki te temi, neʼe toe lahi ai tanatou agakovi. “Neʼe sio te ʼAtua ki te kele pea koʼeni neʼe kua fakalialia, he neʼe kua fakalialia te aga ʼa te hahaʼi ʼi te kele.” (Senesi 6⁠:​3, 12) Neʼe ‘kua katoa tanatou agahala’; ʼaki te temi neʼe hā lelei ai tanatou ʼu holi kovi. Koia ʼi te temi ʼaē neʼe fakaʼauha ai nātou e te ʼAtua, neʼe ko he meʼa faitotonu. Neʼe ko te toko valu pe neʼe nātou faitotonu kia mata ʼo te ʼAtua, pea neʼe ina hāofaki nātou.

Neʼe tatau te aga ʼaia ʼa te ʼAtua pea mo Iselaele. Logope la neʼe heʼe faitotonu pea mo heʼeʼaoga tanatou aga kae neʼe loto faʼa kātaki te ʼAtua lolotoga taʼu ʼe lauʼi teau. ʼE ʼui mai e te Tohi-Tapu: “Ko Sehova . . . neʼe ina [fekauʼi] kia nātou . . . tana kau ʼave logo, ʼo ina fekauʼi liuliuga, koteʼuhi neʼe manavaʼofa ki tana hahaʼi . . . Kae neʼe hoholo atu pe tanatou . . . meʼa noaʼi tana ʼu palalau, pea mo manukiʼi tana kau polofeta, ʼo aʼu ki te temi ʼaē neʼe hoko ai te hāūhāū ʼa Sehova ki tana hahaʼi, ʼo aʼu ki te mole kei ʼi ai ʼo he fakamālōlō.” (2 Fakamatala 36:15, 16) Neʼe kua aʼu te hahaʼi ki he ʼaluʼaga neʼe mole kei feala ai ke nātou fetogi. Neʼe hāo pe ia Selemia pea mo te hahaʼi tokosiʼi. Neʼe mole feala ke lau neʼe heʼe faitotonu te ʼAtua ʼi tana fakahoko tana fakamāu ki te toe ʼo te hahaʼi.

Kua Hoko Mai Te Temi ʼAē Ka Fai Ai e Te ʼAtua Tana Gāue

ʼAki te ʼu faʼifaʼitaki ʼaia ʼe feala ke tou sio ai ʼe faʼa kātaki te ʼAtua heʼe fakatalitali ʼo aʼu ki te temi ʼaē ka tonu ai ke fakamāuʼi te mālama ʼaenī. ʼE hā lelei te faʼahi ʼaia ʼi te fakatotonu ʼaenī neʼe fai kia ia ʼaē ka ina fakahoko te fakamāu ʼa te ʼAtua: “ ‘Li tau hele masila pea toli te fua o te vite o te kelekele, koteuhi kua momoho tona fua.’ Pea nee li e te aselo tana hele ki te kelekele, nee ina toli te vite o te kelekele pea nee ina laku ki te huaʼaga vite lahi o te hauhau o te Atua.” Koutou fakatokagaʼi ʼe ʼui ai kua “momoho” te agakovi ʼa te malamanei, ko tona faka ʼuhiga, kua nātou aʼu ki te ʼaluʼaga ʼaē ʼe mole kei feala ai ke nātou fetogi tanatou aga. Ka fakahoko anai e te ʼAtua tana fakamāu, ʼe mahino papau ia, ʼe lākatonu anai te faʼahi ʼaia.​—Apokalipesi 14:18, 19.

Ka tou vakaʼi te ʼu fakamoʼoni ʼaia, ʼe mahino mai kia tatou, kua ōvi mai te ʼaho ʼo te fakamāu ʼo te ʼAtua, koteʼuhi ko te ʼu ʼaluʼaga ʼo te mālama ʼaenī ʼe tatau mo te ʼaluʼaga ʼo te mālama ʼaē neʼe ina fakaʼauha ʼi te temi muʼa. ʼI te potu fuli, kua fonu te kele ʼi te agamālohi, ohage pe ko te temi ʼo Noe ʼi muʼa ʼo te Tulivio. Ko te aga ʼa te hahaʼi ʼe fakahaʼuhaʼu ʼo kovi ohage ko te aga ʼaē ʼe talanoa kiai ia Senesi 6⁠:5: “Ko te ʼu fakakaukau fuli ʼo [te] loto [ʼo te tagata] neʼe kovi tuʼumaʼu pe ia.” Māʼiape la mo te ʼu agahala fakalialia ʼaē neʼe fai e te kau Kanaane ʼaē neʼe iku ki tonatou fakamāuʼi e te ʼAtua, ʼe ko he ʼu meʼa ʼe fai māhani ia ʼaho nei.

Tāfito talu mai te ʼUluaki Tau Faka Malamanei, kua fetogi te ʼu agaaga ʼo te mālama ʼaenī. Neʼe liligi te toto ʼo te lauʼi miliona hahaʼi. ʼI te malamanei katoa ʼe hoko te ʼu tau, mo te matematehi ʼo te hahaʼi, mo te fai fakapō pea mo te maumauʼi ʼo te lao. ʼE toe lahi foki mo te ʼu hoge, mo te ʼu mahaki pea mo te ʼu aga heʼeʼaoga. Ko te ʼu meʼa fuli ʼaia ʼe fakamoʼoni ʼaki ai ʼe tou maʼuʼuli ʼi te taʼiake agakovi ʼaē neʼe talanoa kiai Sesu ʼi tana ʼui fēnei: “E mole fakamole anai te taitupu aeni o aùpe ki te hoki hoko o meafuape alâ.” (Mateo 24⁠:34) Ko te mālama ʼaenī kua “katoa tana agahala.” Kua “momoho” te “fua o te vite o te kelekele” pea kua hoko mai te temi ʼo te taʼukai.

Koutou Foimo Gaūgaūe

Neʼe fakahā ki te ʼapositolo ko Soane ʼe ʼi ai anai he ʼu faʼahiga “momoho” e lua ʼi te ōvi mai ʼo te fakamāu. ʼI te tahi faʼahi, “kia ia e mole faitotonu ke hoko atu tana mole faitotonu, ke hoko atu e ia ae e agauli tana agauli.” Kae ʼi te tahi faʼahi, “kia ia e ina fai te faitotonu ke hoko atu tana faitotonu, pea ke hoko e te maonioni tona fakamaonioniʼi.” (Apokalipesi 22⁠:​10, 11) Ko te lua faʼahi ʼaia, ʼe lolotoga hoko nei ʼaki te ʼu ako Tohi-Tapu ʼaē ʼe fai e te kau Fakamoʼoni ʼa Sehova ʼi te malamanei katoa. ʼE nātou fia akoʼi ki te hahaʼi pe koteā te meʼa ʼaē ʼe fakamaʼua e te ʼAtua kia nātou ke feala ai ke nātou tāu mo te maʼuli heʼegata. ʼE hoko atu te gāue ʼaia ia fenua e 233 pea mo kokelekasio e 87 000.

ʼE mole tuai te ʼAtua. ʼI tana faʼa kātaki neʼe ina faka fealagia ki te hahaʼi ke nātou “kofu ki te tagata foou” ke feala ai ke fakahoko kia nātou te ʼu fakapapau ʼa te ʼAtua. (Efeso 4⁠:24) Ia ʼaho nei, ʼe kei talitali te ʼAtua, logola te fakahaʼuhaʼu ʼo kovi ʼo te ʼaluʼaga ʼo te malamanei. Ko te kau Fakamoʼoni ʼa Sehova ʼi te kele katoa, ʼe nātou fai ia meʼa fuli moʼo fakahā ki te hahaʼi te ʼatamai mālama ʼaē ʼe ina taki ki te maʼuli heʼegata. (Soane 17:​3, 17) Meʼa fakafiafia foki, heʼe ʼi te taʼu fuli ko te toko 300 000 hahaʼi ʼe nātou tali te faʼahi ʼaia pea mo nātou papitema.

ʼAki tatatou ʼamanaki ki te maʼuli heʼegata, ʼe tonu ai ʼi te temi ʼaenī ke tou gāue, kae ke mole tou fakatalitali fakafīfīmālie pe. Koteʼuhi kua ōvi mai te temi ʼaē ka tou sio ai ki te fakahoko ʼo te fakapapau ʼa Sesu: “Ko ae e mauli mo tui mai kia te au e mole mate ia o heegata.”​—Soane 11:⁠26.

[Nota ʼi te lalo pasina]

[Paki ʼo te pasina 6]

Neʼe ʼui kia ia ʼaē ka ina fakahoko te fakamāu ʼa te ʼAtua, ke ina fakaʼaogaʼi tana hele māsila mokā momoho anai te vite ʼo te kele

[Paki ʼo te pasina 7]

ʼI te malamanei katoa ʼe tokoni te kau Fakamoʼoni ʼa Sehova ki te hahaʼi ke nātou maʼu te ʼu tapuakina heʼegata ʼa te ʼAtua