He Koʼe ʼe Tonu Ke Tou Tui Kia Sesu Kilisito?
“MĀʼIA mo te hahaʼi ʼaē ʼe mole ko he kau Kilisitiano ʼe nātou tui, ko Ia ko te faiako lahi pea mo poto. Neʼe ko te tagata ʼaē neʼe ina lava fetogi te maʼuli ʼa te hahaʼi.” (The World Book Encyclopedia) Ko ai ia “Ia”? ʼE ko Sesu Kilisito, ia ia ʼaē neʼe ina fakatuʼu te Lotu Faka Kilisitiano.
Logola te meʼa ʼaē ʼe ʼui e te tohi ʼaia, kae ko te toko lauʼi miliona hahaʼi ʼo te Potu Hihifo pea mo te tahi ʼu fenua, ʼe mole nātou faʼa mālama kia Sesu, pea kia nātou, ʼe ko he higoa pe ia neʼe nātou lau ʼi he ʼu tohi ʼi te faleako. Māʼia ʼi te ʼu ʼēkelesia ʼo te Keletiate, ʼe ʼi ai te hahaʼi fai teolosia pea mo te kau takitaki lotu ʼe nātou ʼui, ʼe mole nātou ʼiloʼi moʼoni ia Sesu pea ʼe nātou lotolotolua ʼo ʼuhiga mo te moʼoni ʼo te ʼu tohi e fā ʼaē ʼe nātou fakamatala tona maʼuli (te ʼu Evaselio) ʼaē ʼe maʼu ʼi te Tohi-Tapu.
Neʼe feala koa ke tohi feiā pe e te ʼu tagata tohi Evaselio te maʼuli ʼo Sesu kae mole ko he meʼa neʼe hoko moʼoni? Kailoa ia! Ko te tagata tohi hisitolia ʼiloa ko Will Durant, neʼe ina sivi fakalelei te ʼu Evaselio ʼaia, pea neʼe ina ʼui fēnei: “Kapau neʼe feala ke tupu feiā ʼi te fakakaukau ʼa he ʼu tagata māhani ʼe tokosiʼi ʼo te taʼiake pe e tahi, he ʼulugaaga ʼa he tagata mālohi pea mo lelei feiā, mo he aga ʼe māʼoluga ʼaupito, pea mo he feʼofaʼofani moʼoni ʼa te hahaʼi, pea ko te faʼahi ʼaia ʼe hage anai ko he milakulo ʼe faigataʼa age hakita tui kiai ʼi hakita tui ki te ʼu milakulo ʼaē ʼe talanoa kiai te Evaselio. Logola te gāue ʼa te hahaʼi sivi Tohi-Tapu lolotoga sēkulō e lua, kae kei tou mahino pe ki te maʼuli, mo te ʼulugaaga, pea mo te ʼu akonaki ʼa Kilisito, pea ʼe ko te tagata ʼaē ʼe lelei tokotahi tona sivi ʼi te tahi ʼu hahaʼi ʼo te hisitolia ʼo te Potu Hihifo.”
Kae ʼe ʼi ai te hahaʼi ʼe nātou situʼa kia Sesu Kilisito ʼuhi ko te ʼu gāue ʼaē neʼe fai e nātou ʼaē neʼe nātou lau ko hana kau tisipulo. ʼE lagi ʼui anai e ʼihi ʼi Saponia, ‘neʼe nātou fakatō te foʼi pulu ki Nagasaki. Pea ʼe hahaʼi age te kau Kilisitiano ʼi Nagasaki ʼi te tahi ʼu kolo ʼo Saponia.’ Kae ʼe feala koa hakotou tukugakoviʼi he tōketā ʼuhi ko te mahaki ʼa he tahi, mo kapau ʼe mole fakalogo te mahaki ki te ʼu tokoni ʼa te tōketā? Ko te tokolahi ʼo nātou ʼaē ʼe nātou lau ko nātou ko te kau Kilisitiano, kua fualoa tanatou mole kei tokagaʼi te ʼu tokoni ʼa Sesu moʼo fakamālōlō te malamanei. Kae neʼe fakahā mai e Sesu te ʼu puleʼaki ki te ʼu faigataʼaʼia ʼo totatou maʼuli takitokotahi, ʼo feiā ki te ʼu fihifihia ʼo te malamanei. Koia ʼe mātou fakaafe koutou ke koutou lau te alatike ʼaē ka hoa mai pea ke koutou vakaʼi ai pe neʼe feafeaʼi te tagata ko Sesu.