Tou Tauʼi Te Fakapalatahi
Mole tuai, pea ʼe fakafimālieʼi anai e te Tupuʼaga te holi ʼa te hahaʼi ʼaē ke fai fakatatau kia nātou. ʼO fakatalitali ki te temi ʼaia, ʼe feala ke tou fai he ʼu puleʼaki moʼo tauʼi te fakapalatahi ʼaē ʼe fai mai kia tatou pea mo tatatou famili. Ohage ko tona ʼui e te pelesita ʼāfea ʼo Afelika Saute ko Nelson Mandela, “ ʼE hā tokita ʼuhiga ʼi te meʼa ʼaē ʼe kita fai ʼaki te meʼa ʼaē kua kita maʼu, ka mole ʼaki te meʼa ʼaē ʼe foaki mai kia kita.”
ʼE FAKAMOʼONI te hisitolia ki te ʼu palalau ʼaia. Tokolahi te hahaʼi tagata pea mo te hahaʼi fafine neʼe tutupu ʼi he loto fale masiva, kae ʼi tanatou fakaʼaogaʼi te ʼu meʼa ʼaē neʼe nātou maʼu, neʼe nātou fakahoko he ʼu fakatuʼutuʼu neʼe lahi age ʼi ʼihi hahaʼi ʼaē neʼe tutupu ʼi he loto fale ʼe fīmālie age. ʼI te tahi faʼahi, ʼe ʼi ai te hahaʼi neʼe lahi te ʼu meʼa neʼe foaki age ʼi tonatou temi tupu, kae neʼe nātou maumauʼi te ʼu meʼa ʼaia ʼo mole nātou fakaʼaogaʼi fakalelei.
Koutou Fakaʼaogaʼi Lahi Te Meʼa ʼAē Kua Koutou Maʼu!
ʼAki te ako ʼo te Tohi-Tapu, ʼe fia tokoni te kau Fakamoʼoni ʼa Sehova ki te hahaʼi ke nātou maʼu te ʼatamai mālama ʼo ʼuhiga mo te ʼu fakatuʼutuʼu ʼa Sehova. Kae ʼe mahino kia nātou, ʼe tonu ke poto te hahaʼi ʼi te lautohi ke feala hanatou mahino katoa ki te Tohi-Tapu. Ko te tupuʼaga la ʼaia ʼo te akoʼi e te kau Fakamoʼoni ʼa Sehova ki te toko lauʼi afe hahaʼi ke nātou faitohi pea mo lautohi, pea neʼe kau kiai te toko 23 000 (ʼi te ʼu taʼu 1990) ʼi te tahi fenua ʼo Afelika ʼo te Potu Hihifo. ʼO ʼuhiga mo te gāue fakaofoofo ʼaē ʼe fakahoko e te kau Fakamoʼoni ʼa Sehova, neʼe ʼui fēnei e te sulunale San Francisco Examiner: “Ko nātou ko he ʼu faʼifaʼitakiʼaga ki te hahaʼi. ʼE nātou totogi tuʼumaʼu te tukuhau, mo tokoni ki te hahaʼi ʼaē ʼe mahamahaki, pea mo nātou akoʼi te hahaʼi ʼaē ʼe mole poto lautohi.”
Tahi ʼaē faʼahi, ʼaki he ako ʼo ʼuhiga mo te faiakonaki, neʼe tokoni te kau Fakamoʼoni ʼa Sehova ki te toko lauʼi teau afe hahaʼi ke nātou poto ʼi te faiakonaki, ʼo feala ke nātou palalau ʼi muʼa ʼo he hahaʼi kaugamālie. Neʼe kau kiai ʼihi ʼaē neʼe faigataʼa ʼaupito kia nātou hanatou palalau. Koʼeni te meʼa neʼe tohi e te tagata mai Afelika Saute: “Neʼe mole ʼau lava puʼaki lelei te ʼu kupu, pea neʼe mole ʼau palalau ki te hahaʼi, he neʼe ʼau kole tuʼumaʼu ki he tahi ke ina fakahoko taku palalau. . . . ʼI te temi ʼaē neʼe ʼau kau ai ʼi te Ako ʼo Te Minisitelio Faka Teokalatike pea neʼe kole mai ke ʼau lau te Tohi-Tapu ʼi muʼa ʼo he kiʼi kūtuga . . . , neʼe faigataʼa ʼaupito taku puʼaki te ʼu kupu, pea neʼe ʼau fakalaka ʼi te temi ʼaē neʼe hinoʼi mai. ʼI te ʼosi fono, neʼe fai mai e te [tēhina takitaki ʼo te Ako] he ʼu tokoni ʼaoga. Neʼe ina ʼui mai ke ʼau lau leʼolahi. Neʼe ʼau fai te faʼahi ʼaia ʼi te ʼaho fuli, pea neʼe ʼau lau leʼolahi te Tohi-Tapu pea mo Te Tule Leʼo.” Neʼe tuputupu lelei te tagata ʼaia, pea kua ina fai ʼi te temi nei he ʼu akonaki ʼi muʼa ʼo te hahaʼi ʼe toko lauʼi teau peʼe lauʼi afe.
ʼE Fai Fakatatau Ki Te ʼu Tēhina Fuli
ʼI te faʼahi ʼo te faiako, mo te faitoʼo, mo te falā pea mo te tuʼulaga ʼi te sosiete, ʼe mole tatau fuli te kau Fakamoʼoni ʼa Sehova. Ko te ʼu ʼaluʼaga ʼaia ʼe tupu pe ko te kua fakaʼofaʼofa ʼo te mālama ʼaē ʼe nātou nonofo ai. Kae ʼe nātou kehe mo te tahi ʼu lotu, heʼe mole kei fai ia nātou he fakakehekehe ʼo tonatou lanu, peʼe ko tanatou gāue, peʼe ko tanatou falā.
Kua nātou lavaʼi te faʼahi ʼaia heʼe nātou faiga ke nātou maʼuliʼi te ʼu meʼa ʼaē ʼe nātou ako ʼi te Tohi-Tapu. ʼE nātou lagolago ki te ʼu pelesepeto ʼa te Tohi-Tapu ohage ko te ʼu pelesepeto ʼaenī: “Ko te sio ʼa te tagata ʼe mole ko te sio ʼa te ʼAtua, koteʼuhi ʼe sio te tagata ki te meʼa ʼaē ʼe hā ki te ʼu mata; kae kia Sehova ʼe sio ki te ʼuhiga ʼo te loto.” (1 Samuele 16:7) “E mole fakakehekehei e te Atua he tahi. Kae i te puleaga fuape, ko he tahipe e teki kia te ia mo gaue i te susitisia, e ina tali leleiʼi iaʼia.” (Gaue 10:34, 35) “Aua naa koutou liuaki ki he tahi te kovi uhi ko te kovi. Ke tomua tautou fakakaukauʼi te u mea e lelei o fai ia mua o te hahai fuape. Kapau e feala, i te temi e kei fakalogo ai kia koutou, koutou nofo tokalelei mo te hahai fuape.”—Loma 12:17, 18; vakaʼi ia 1 Timoteo 6:17-19; Sakopo 2:5, 9.
ʼI tanatou fakalogo ki te ʼu pelesepeto ʼaia ʼa te Tohi-Tapu moʼo taupau tonatou logo tahi, ʼe mole tali e te kau Fakamoʼoni ʼa Sehova ke fakakeheʼi he tahi ia nātou ʼuhi ko tana lanu, tana gāue peʼe ko tana falā. Ohage la, ʼe mole maʼuhiga te ʼu faʼahi ʼaia mokā tonu ke foaki he ʼu pilivilesio ʼi te kokelekasio faka Kilisitiano. Ko te ʼu pilivilesio ʼaia, ohage la ko he tēhina faiakonaki pea mo taupau, ʼe foaki ʼo fai pe ki te ʼu fealagia ʼa te ʼu tēhina ʼi te faʼahi fakalaumālie.—1 Timoteo 3:1-13; Tito 1:5-9.
Ko nātou ʼaē neʼe maʼuli mamahi ʼuhi ko te fakapalatahi ʼo te mālama ʼaenī, kua nātou fiafia ʼaupito ʼi tanatou fakatahi mo he ʼu hahaʼi ʼe nātou faka ʼuhigaʼi nātou ko honatou ʼu tēhina mo tuagaʼane ʼe tatau ʼi muʼa ʼo te Tupuʼaga! Neʼe hoko te faʼahi ʼaia kia Martina. ʼI te ʼosi mavae ʼa tana tāmai ʼi tonatou ʼapi, neʼe lahi ake ʼi he famili masiva neʼe taupau tokotahi e tana faʼe. Neʼe fakakeheʼi tuʼumaʼu ia ia ʼuhi ko te ʼaluʼaga ʼo tona famili, pea neʼe mole falala kia ia totonu, pea neʼe faigataʼa tana felogoi mo te hahaʼi. Neʼe tupu ai tana mole kei tokagaʼi te ʼu meʼa ʼaē neʼe hoko ki ʼihi. Kae neʼe fetogi te ʼaluʼaga ʼaia ʼi tana kamata ako te Tohi-Tapu pea mo tana liliu ko he Fakamoʼoni ʼa Sehova. ʼE ina ʼui fēnei: “ ʼE kei ʼi ai te ʼu temi ʼe ʼau loto vaivai ai, kae kua feala haku tauʼi te fihifihia ʼaia. Kua tuputupu taku falala ʼaē kia ʼau totonu, ʼo faigafua age taku palalau ki te hahaʼi. ʼAki te moʼoni, kua ʼau ʼiloʼi ʼe ʼi ai toku ʼu maʼua. Tahi ʼaē, ʼe ʼofa ia Sehova kia ʼau pea kua ʼi ai he ʼuhiga moʼoni ʼo toku maʼuli.”
Ko te foʼi famili faka malamanei ʼa te kau Fakamoʼoni ʼa Sehova ʼi te ʼu fenua e 230 tupu, ʼe fai fakatatau kia nātou fuli, ʼo kehe ʼaupito ia mo te tahi ʼu hahaʼi ʼo te malamanei. ʼE feala koa ki he tahi lotu hana ʼui te faʼahi ʼaia pea mo fakamoʼoni kiai?
ʼE mahino ia, ʼe mole ʼui e te kau Fakamoʼoni ʼa Sehova, ʼe nātou fai anai ke feiā te malamanei katoa. ʼE mahino kia nātou, ko nātou ko te hahaʼi heʼe haohaoa, pea ʼe mole feala anai ke nātou pulihi katoa te fakapalatahi, ohage pe ko ʼihi ʼaē neʼe nātou faiga ke nātou fai te faʼahi ʼaia lolotoga ni ʼu sēkulō—kae neʼe mole hona fua. Kae ʼe nātou fiafia, heʼe nātou fakasiʼisiʼi te fihifihia ʼaia ʼi te lotolotoiga ʼo nātou. Pea ʼi tanatou tui mālohi ʼaē ki te fakapapau ʼa te ʼAtua, ʼe nātou talitali ki te mālama faitotonu ʼaē ka pulihi katoa ai te fakapalatahi.
Ei, kua vave hoko mai te temi ʼaē ka foaki tatau ai ki te hahaʼi talagafua fuli “te fakaʼapaʼapa pea mo te ʼu fealagia” ʼaē neʼe fakatuʼutuʼu maʼa nātou e te Tupuʼaga ʼi te kamata. ʼI ʼamanaki taulekaleka leva! ʼI te temi ʼaia, ʼe fai fakatatau moʼoni anai ki te hahaʼi fuli!
[Paki ʼo te pasina 7]
ʼE tauʼi e te kau Fakamoʼoni ʼa Sehova te mole akoʼi ʼo te hahaʼi ʼo nātou tokoni kia nātou ke nātou lautohi pea mo faitohi
[Paki ʼo te pasina 8]
Ko te moʼoni ʼo te Tohi-Tapu ʼe ina pulihi te ʼu fakakeheʼi ʼo te hahaʼi ʼuhi ko te lanu, te gāue pea mo te falā