Te Fakapalatahi—Neʼe Loto Koa Kiai Te ʼAtua?

Ko tona tali nounou pe ʼaenī, kailoa. Tou vakaʼi tona tupuʼaga.

NEʼE fakatuʼutuʼu e te ʼAtua ke maʼu tatau e te hahaʼi fuli te fealagia ʼaē ke nātou maʼuʼuli pea mo fiafia. ʼE tou lau fēnei ʼo ʼuhiga mo te fakatupu ʼo te tagata: “Pea neʼe folafola maʼa te ʼAtua: ‘Tā fai te tagata ki totā paki, ke hage ko tāua, pea ke nātou pule ki te ʼu ika ʼo te tai pea mo te ʼu manulele ʼo te lagi pea mo te ʼu manu lalata, pea mo te kele katoa, pea mo te ʼu manu fuli pe ʼaē ʼe taka ʼi te kele.’ ” ʼI tana ʼosi fakatupu te ʼu meʼa fakakelekele, “Neʼe sio ai te ʼAtua kia meʼa fuli neʼe ina fai pea koʼeni ko te meʼa ʼaia neʼe lelei ʼaupito.”​—Senesi 1:​26, 31.

ʼE feala koa ke ʼui e te ʼAtua, ko te fakapalatahi ʼi te temi ʼaenī ʼe ko he meʼa ʼe “lelei ʼaupito”? Kailoa, “koteuhi ko te Atua e ko Ofa.” (1 Soane 4:8) ʼE ʼui e te Tohi-Tapu ʼo ʼuhiga mo ia, “ ʼe mole fakapulepule,” pea “ ʼe haohaoa tana gāue, heʼe ko tona ʼu ala fuli ʼe faitotonu. Ko te ʼAtua agatonu, ʼaē ʼe mole ia te ia te heʼe faitotonu; ʼe faitotonu pea mo totonu.” (Teutalonome 10:17; 32:4; vakaʼi ia Sopo 34:19.) Neʼe mahino ki te ʼapositolo ko Petelo te faʼahi ʼaenī: “I te mooni, kua mahino mai kia te au, e mole fakakehekehei e te Atua he tahi. Kae i te puleaga fuape, ko he tahipe e teki kia te ia mo gaue i te susitisia, e ina tali leleiʼi iaʼia.”​—Gaue 10:​34, 35.

Kapau ko te ʼAtua ʼe ko he tahi ʼe ʼofa, pea ʼe mole fakapulepule, pea ʼe faitotonu mo totonu, neʼe feala koa ke ina fakatupu he ʼu hahaʼi ʼe mole nātou maʼu tatau anai te fealagia ʼaē ke nātou maʼuʼuli fiafia? Kapau neʼe fakapalatahi ki te hahaʼi ʼo ina tuku nātou ʼi he mālama ʼe mole fai fakatatau kia nātou fuli, pea ko te faʼahi ʼaia ʼe fakafeagai ʼaupito anai ki tona ʼulugaaga. Neʼe ina fakatuʼutuʼu ke nātou “tutupu ʼāteaina, pea ke tatau tonatou fakaʼapaʼapaʼi pea mo te ʼu fealagia ʼaē ʼe foaki kia nātou.” Kae ʼe mahino papau ia, ʼe mole feiā ia ʼaho nei. Koteā tona tupuʼaga?

Te Tupuʼaga ʼo Te Fakapalatahi

Neʼe fakatupu e te ʼAtua te hahaʼi ke tatau fuli tonatou ʼu fealagia, kae neʼe mole faka ʼuhiga leva ʼe nātou tatau anai ʼi te ʼu ʼaluʼaga fuli ʼo tonatou maʼuli. ʼE feala ke kehekehe te ʼu gāue ʼaē ʼe nātou faiva ai, pea mo te ʼu meʼa ʼaē ʼe nātou holi kiai, pea mo tonatou ʼulugaaga. ʼE feala ke toe kehekehe mo tanatou tuʼulaga pea mo te pule ʼaē ʼe foaki kia nātou. Ohage la, ʼe mole tatau te ʼu gāue ʼa te tagata pea mo te fafine, he neʼe fakatupu e te ʼAtua te fafine moʼo “fakakatoa” te tagata. (Senesi 2:​18) ʼE mahino papau ia, ʼe kehe te pule ʼa te ʼu mātuʼa pea mo te pule ʼa te fānau. Kae logola te ʼu kehekehe ʼaia, ko nātou fuli​—te hahaʼi tagata, mo te hahaʼi fafine pea mo te fānau​—neʼe foaki tatau age e te ʼAtua te fealagia ʼaē ke nātou maʼuʼuli fiafia. Neʼe feala kia nātou fuli ke nātou maʼu he matagafua lelei ia muʼa ʼo te ʼAtua.

ʼO toe feiā pe mo te ʼu foha fakalaumālie ʼa te ʼAtua, ʼaē neʼe fakatupu ʼi muʼa ʼo te malamanei, neʼe foaki kia nātou te ʼu fekau pea mo te ʼu maʼua kehekehe. (Senesi 3:​24; 16:​7-​11; Isaia 6:​6; Suta 9) Kae logola te faka tuʼakoi ʼo te ʼu meʼa ʼaē neʼe foaki kia nātou, neʼe feala ke nātou maʼu fakatatau te ʼu fakatuʼutuʼu fakaʼatua ʼo ʼuhiga mo te maʼuli pea ke nātou fiafia. ʼAki te faʼahi ʼaia, neʼe hā ai te mole fakapalatahi ʼa te ʼAtua.

Meʼa fakaʼofaʼofa foki, he neʼe mole fiafia te tahi ʼaselo ʼi te fakatuʼutuʼu faitotonu ʼaia ʼa te ʼAtua. Neʼe holi ia ki he ʼu meʼa neʼe lahi age ʼi te ʼu meʼa ʼaē neʼe foaki kiai e te ʼAtua, pea neʼe holi ki he tuʼulaga ʼe māʼoluga age. ʼI tana taupau te holi kovi ʼaia, neʼe fakafeagai ai kia Sehova, ʼaē ʼe tau mo feʼauga ke pule kia meʼa fuli ʼuhi ko ia te Tupuʼaga ʼo meʼa fuli. Ki muli age, ko te foha fakalaumālie agatuʼu ʼaia ʼa te ʼAtua, neʼe ina uga te hahaʼi ke nātou kole ki te ʼAtua he ʼu meʼa ʼe lahi age ʼi te meʼa ʼaē neʼe Ina foaki age kia nātou. (Senesi 3:​1-6; vakaʼi ia Isaia 14:​12-​14.) Koia, neʼe fulihi katoa ai te fakatuʼutuʼu ʼa Sehova ʼo ʼuhiga mo te maʼuli pea mo te fiafia ʼa te hahaʼi. Ko te laumālie agatuʼu ʼaia, ʼaē ʼe fakahigoaʼi ia Apokalipesi 20:2 ko “te tiapolo ko Satana,” neʼe liliu ko te tupuʼaga ʼo te fakapalatahi ʼi te malamanei.

ʼE Fetogi Anai Koa Te ʼAluʼaga ʼAia?

Ko tona tali nounou pe ʼaenī, ei!

Kae ko ai ʼaē ʼe feala ke ina fakahoko te ʼu fetogi ʼaia? Kua fualoa ʼaupito te faiga ʼa te kau takitaki ʼo te malamanei ke nātou fai ia te faʼahi ʼaia, pea ko ʼihi ia nātou neʼe nātou fai fakamalotoloto. Neʼe mole nātou faʼa lavaʼi te faʼahi ʼaia, ʼo tupu ai te manatu ʼa te tokolahi, ʼe mole feala ke fakatokatoka te fihifihia ʼo ʼuhiga mo te fakapalatahi. Kae koʼeni te manatu ʼa te ʼAtua ʼaē ʼe fakahā ia Isaia 55:​10, 11: “Ohage pe ko te tō ifo ʼo te toe ʼua lalahi mai te lagi, ʼo feiā aipe mo te nive, pea ʼe mole toe liliu ki ai ka mole heʼeki ina faka huhuʼa te kele pea mo ina fakatupu pea mo fakahomo, pea mo kapau neʼe heʼeki foaki te pulapula ki te tagata tūtū pulapula pea mo te pane kia ia ʼaē ʼe kai, ʼe feiā anai taku folafola ʼaē ʼe mavae atu ʼi toku gutu. ʼE mole toe liliu mai anai kia te ʼau ka mole hona ʼu fua, kae ʼe mahino papau ia ʼe ina fai anai te meʼa ʼaē kua ʼau leleiʼia, pea ʼe lava lelei moʼoni anai te meʼa ʼaē neʼe ʼau fekauʼi ki ai.”

ʼE tou fīmālie ʼi te fakahā mai e Sehova ʼAtua, ʼe ina fakahoko anai tana fakatuʼutuʼu ʼuluaki ʼaē ke ina foaki fakatatau ki te hahaʼi fuli te maʼuli pea mo te fiafia! ʼI tona ʼuhiga ʼAtua ʼo te moʼoni, ʼe fakamaʼua kia te ia ke ina fakahoko te ʼu meʼa ʼaē ʼe ina fakapapau. Meʼa fakafiafia foki, heʼe loto e Sehova ke ina fai te faʼahi ʼaia pea ʼe ina maʼu te mālohi moʼona fakahoko. ʼE ina fakahoko feafeaʼi anai tana fakapapau ʼaia?

ʼE hoko anai ʼaki te Puleʼaga ʼaē neʼe talanoa kiai ia Sesu Kilisito ʼi te faikole ʼaē neʼe ina akoʼi mai: “Ko tamatou Tamai e i Selo, . . . Ke aumai tau pule, ke fai tou finegalo i te kelekele o hage ko Selo.” (Mateo 6:​9, 10) Ei, ko te Puleʼaga ʼa te ʼAtua ʼe ko te puleʼaki ʼaē ka fakaʼaogaʼi e Sehova moʼo ‘laliki pea mo fakagata te ʼu puleʼaga fuli ʼaia [ʼaē ʼe kei tuʼu ʼi te temi ʼaenī], pea ʼe tuʼu anai ia ʼo aʼu ki he ʼu temi heʼegata.’​—Taniela 2:​44.

ʼI te takitaki ʼo te Puleʼaga ʼo selo, ʼe tuputupu anai he sosiete fakatagata foʼou. ʼO ʼuhiga mo te faʼahi ʼaia, neʼe tohi fēnei e te ʼapositolo ko Soane ʼi te tohi fakamuli ʼa te Tohi-Tapu, ia te Apokalipesi: “Pea nee au mamata ki he lagi foou mo he kelekele foou. Koteuhi nee mole te uluaki lagi mo te uluaki kelekele, pea nee puli mo te tai.” (Apokalipesi 21:1) ʼE puli anai mo te ʼu fua kovi ʼo te fakapalatahi​—te masiva, te mahaki, te mole akoʼi ʼo te hahaʼi, te fakapulepule, pea mo te tahi ʼu mamahi ʼaē ʼe tau mo te hahaʼi.a

Kua taʼu teau tupu te faka mafola ʼa te kau Fakamoʼoni ʼa Sehova te Puleʼaga ʼaia ki te hahaʼi. (Mateo 24:14) ʼAki tanatou ʼu tohi pea mo te ʼu ako Tohi-Tapu, neʼe nātou faiga ke nātou tokoni ki te hahaʼi ke nātou maʼu te ʼatamai mālama ʼo ʼuhiga mo te fakatuʼutuʼu ʼa te ʼAtua ʼaē ʼe fakahā ʼi te Tohi-Tapu. Kae ko tanatou gāue faiako ʼaē ʼe fai ʼi te malamanei katoa, neʼe mole gata ʼaki pe tana foaki ki te hahaʼi he ʼamanaki ki he maʼuli fiafia ʼe mole toe fakakeheʼi ai anai te hahaʼi, kae kua toe fua lelei kia nātou ʼi te temi ʼaenī ke nātou tauʼi te fakapalatahi. Tou vakaʼi peʼe feafeaʼi.

[Nota ʼi te lalo pasina]

[Talanoa ʼo te pasina 5]

Neʼe loto e te ʼAtua ke maʼu tatau e te hahaʼi te fealagia ʼaē ke nātou maʼuʼuli pea mo fiafia